September 25, 2018

இலவச நன்கொடை இனி தரமாட்டோம், எந்த நாட்டு பாதுகாப்பையும் பொறுப்பெடுக்கவும் மாட்டோம் - ஐ.நா வில் ட்ரம்ப்

தனது நாட்டுடன் நட்பு பாராட்டும் மற்றும் மதிப்பளிக்கும் நாடுகளுக்கு மட்டுமே அமெரிக்கா  நிதியுதவி வழங்குமென அந்நாட்டு ஜனாதிபதி டொனால்ட் ட்ரம்ப் தெரிவித்துள்ளார்.

ஐக்கிய நாடுகள் அமைப்பின் 73 ஆவது பொதுச்சபை கூட்டத் தொடரின் பிரதான அமர்வு இலங்கை நேரப்படி இன்று  பிற்பகல் நியூயோர்க் நகரிலுள்ள ஐ நா தலைமையகத்தில் ஆரம்பமானது.

முழு உலகும் எதிர்பார்த்துள்ள ஐக்கிய நாடுகள் சபையின் இவ்வருட பொதுச்சபை கூட்டத்தொடர் “ஐக்கிய நாடுகள் சபையை சகல மக்களுக்கும் அணுகச் செய்தல், நீதியும் அமைதியும் பேண்தகு தன்மையும் கொண்ட சமூகத்திற்கான உலகளாவிய தலைமைத்துவத்தின் ஒன்றிணைந்த பொறுப்பு” எனும் தொனிப்பொருளில் இடம்பெறுகின்றது.

இந்நிலையில் குறித்த நிகழ்வில் பங்கேற்ற ஐக்கிய அமெரிக்க ஜனாதிபதி டொனால்ட் ட்ரம்ப் உரையாற்றுகையிலேயே மேற்கண்டவாறு தெரிவித்துள்ளார்.

"சோஷலிஸம், உலகமயமாதல் என்பன தோற்றுவிட்டன. இனி உலக நாடுகளுக்கு இலவச நன்கொடை தரமாட்டோம். எந்த நாட்டு பாதுகாப்பையும் பொறுப்பெடுக்கவும்  மாட்டோம். அனைத்தையும், அமெரிக்க நலனை முன்நிறுத்தியே தீர்மானிப்போம்".

ஐக்கிய அமெரிக்காவோடு எந்தெந்த நாடுகள் மதிப்பளித்து நடக்குமோ எந்த நாடுகள் தமது நாட்டுடன் நட்பு பாராட்டி செயற்படுமோ அந்த நாடுகளுக்கு மாத்திரமே ஐக்கிய அமெரிக்கா நிதியுதவிகளை வழங்கும் எனத் தெரிவித்தார்.

தற்போது அனைத்து நாடுகளிடத்திளும் பொருளாதார மற்றும் நிதிநெருக்கடிகளை ஏற்படுத்தி வருவதில் ஐக்கிய அமெரிக்கா தீவிரம் காட்டி வருகிறது.

இந்நிலையில் அதன் அடுத்தக் கட்டமாக குறித்த நடவடிக்கையை அமெரிக்கா மேற்கொண்டுள்ளது. இதன் காரணமாக பல உலக நாடுகள் பாதிப்புக்குள்ளாக உள்ளமை குறிப்பிடத்தக்க விடயமாகும்.

ஜனாதிபதியை கொலை செய்தால், நேரடித் தாக்கம் பிரதமருக்கே இருக்கிறது

நாலக டி சில்வா மற்றும் பொலிஸ் மா அதிபர் இடையிலான உறவை உறுதிப்படுத்துவதற்காக பிரதான சாட்சிகள் 05 இருப்பதாக பாராளுமன்ற உறுப்பினர் உதய கம்மன்பில கூறியுள்ளார். 

பக்கச்சார்பு, ஊழல், அதிகார துஷ்பிரயோகம், முறையற்ற நடத்தை உள்ளிட்டவை அந்த சாட்சிகள் என்று அவர் கூறியுள்ளார். 

இன்று காலை கொழும்பில் இடம்பெற்ற ஊடகவியலாளர் சந்திப்பிலேயே அவர் இதனைக் கூறியுள்ளார். 

பொலிஸ் மா அதிபர் பதவி விலகாவிட்டால் அவரை பாராளுமன்ற தீர்மானத்தின் மூலமாக மாத்திரமே பதவி நீக்க முடியும் என்றும் அவர் கூறியுள்ளார். 

இதன்காரணமாக அதற்கு பாராளுமன்றத்தில் ஐக்கிய தேசிய கட்சி ஆதரவு வழங்காவிட்டால் ஜனாதிபதியை கொலை செய்யும் திட்டத்தில் அந்தக் கட்சிக்கு தொடர்பிருப்பதாக சந்தேகம் ஏற்படும் என்றும் அவர் மேலும் கூறினார். 

அதேநேரம் ஜனாதிபதி உயிரிழந்தால் அதன் நேரடி தாக்கம் பிரதமருக்கே இருப்பதாக பாராளுமன்ற உறுப்பினர் உதய கம்மன்பில கூறியுள்ளார்.

ரூபாவின் தொடர் வீழ்ச்சி குறித்து, மஹிந்த இன்று வெளியிட்ட விஷேட ஊடக அறிக்கை

இந்தியாவின் பொருளாதாரத்தினை இலங்கையின் பொருளாதாரத்துடன் ஒப்பிடமுடியாது என தெரிவித்துள்ள முன்னாள் ஜனாதிபதி மஹிந்த ராஜபக்ஷ , தேசிய உற்பத்திகளுக்கு எதிரான இறக்குமதிகள் அதிகரிப்பே ரூபாவின் பெறுமதி தொடர்ச்சியாக வீழ்ச்சியடைவதற்கு காரணம் எனவும் குறிப்பிட்டார். 

ரூபாவின் தொடர் வீழ்ச்சி குறித்து முன்னாள் ஜனாதிபதி மஹிந்த ராஜபக்ஷ இன்று செவ்வாய்க்கிழமை வெளியிட்டுள்ள விஷேட ஊடக அறிக்கையிலேயே அவர் மேற்கண்டவாறு தெரிவித்துள்ளார். 

அந்த அறிக்கையில் மேலும் குறிப்பிடப்பட்டுள்ளதாவது, 

நல்லாட்சி அரசாங்கம் ஆட்சிக்கு வந்ததிலிருந்து அமெரிக்க டொலரின் பெறுமதி வீழ்ச்சியடைந்து வருகின்றது. தற்போது இந்நிலைமை உக்கிரமடைந்துள்ளது. 2014 ஆம் ஆண்டு இறுதியில் 131 ரூபாவாகக் காணப்பட்ட டொலரின் பெருமானம் இன்று 170 ரூபாவாக வீழ்ச்சியடைந்துள்ளது. 

ரூபாவின் பெருமதி வீழ்ச்சியடைவதனால் பொருளாதாரத்திற்கு பாதிப்பு ஏற்படுகின்றது என அரசாங்க தரப்பு குறிப்பிடுவதை ஏற்றுக்கொள்ள முடியாது. 

எனது ஆட்சி காலத்தில் அதாவது 2007 - 2008 வரையான காலப்பகுதியில் உலக பொருளாதார நெருக்கடியின் காரணமாக தென் கொரியா, இந்தோனேஷியா, தாய்லாந்து, மலேசியா , பிலிப்பைன்ஸ் உட்பட ஆசிய நாடுகளில் பணப்பெறுமதி அமெரிக்க டொலருடன் ஒப்பிடப்பட்டு பாரிய வீழ்ச்சி அடைந்தது. அன்று காணப்பட்ட உலக பொருளாதார நெருக்கடி இலங்கையிலும் எவ்விதமான பாதிப்பும் ஏற்படாத வகையில் பொருளாதாரக் கொள்கைகள் நடைமுறைப்படுத்தப்பட்டது. 

இந்தியாவின் பொருளாதாரத்தினை இலங்கையின் பொருளாதாரத்துடன் ஒப்பிடமுடியாது. இந்தியாவின் பொருளாதாரத்தின் ஒரு பகுதியே இலங்கை. எனது  ஆட்சி காலத்தில்  காணப்பட்ட பொருளாதாரக் கொள்கைகள் இன்று ஒரு தனிக்கட்சியின் பொருளாதாரக்கொள்கையாக பின்பற்றப்பட்டு வருகின்றது. 

இன்று 4 வீதத்துக்கும் குறைவான பொருளாதார வளர்ச்சியே காணப்படுகின்றது. அத்தியாவசிய பொருட்களின் விலை ஏற்றம், சர்வதேசத்தில் முன்னிலைப்பட வேண்டும் என்ற நோக்கில் தேசிய உற்பத்திகளுக்கு எதிரான இறக்குமதிகள் இடம்பெறுகின்றமையின் காரணமாகவே ரூபாவின் பெறுமதி தொடர்ச்சியாக வீழ்ச்சியடைகின்றது என தெரிவித்துள்ளார். 

அரசாங்கத்திற்கு எதிராக இராணுவத்தினர் கிளர்ந்தெழுவர் என எச்சரிக்கிறேன் - மேஜர் அஜித்

வெளிவிவகார அமைச்சர் திலக் மாறப்பனவை பதவியிலிருந்து விலக்கிவிட்டு அப்பதவியை பிரித்தானிய பிரபுக்கள் சபை உறுப்பினருக்கு வழங்கினால் அவர் இலங்கை இராணுவத்தினர் குற்றமற்றவர்கள் என்பதை நிரூபிப்பார். 

மேலும் அரசாங்கம் இராணுவத்தினர் மீது கெடுபிடிகளை மேற்கொண்டு வருகிறது.  நாட்டில் இருபது இலட்சம் பேர் வரையிலான இராணுவத்தினர் உள்ளனர். எனவே அவர்கள் அனைவரும் எப்போதாவது அரசாங்கத்திற்கு எதிராக கிளர்ந்தெழுவார்கள் என்று எச்சரிக்கை விடுக்கிறேன். அந்த எழுச்சி எவ்வாறு அமையும் என்பதைத் சொல்ல முடியாதென சட்டத்தரணி  மேஜர் அஜித் பிரசன்ன தெரிவித்தார்.  

“தாய் நாட்டுக்காக இராணுவத்தினர்” அமைப்பு ஏற்பாடுசெய்த ஊடகவியலாளர் சந்திப்பு இன்று -25- கொழும்பு ஸ்ரீவஜிராஷர்ம பௌத்த நிலையத்தில் நடைபெற்றது. அதில் கலந்துகொண்டு கருத்து தெரிவிக்கையிலேயே அவர் இதனைத் தெரிவித்தார். 

(எம்.சி.நஜிமுதீன்)

ஞானசாரரின் ஹிதாயத்திற்காக பிரார்த்திப்போம்...!


-Muhammed Niyas-

சும்மா சொல்லப்படாது. முகத்தில தாடியோட பார்க்கும்போது ஏதோவொரு இனம்புரியாத வித்தியாசம் தெரியிது. அப்படியே வெளியே வரக்குள்ள, முகத்தில அழகான தாடியோடயும், உள்ளத்தில ஈமானோடயும் வந்தா சந்தோஷம்.

எத்தனையோ உள்ளங்களை புரட்டிப்போட்ட அழ்ழாஹ்வுக்கு, இந்த உள்ளத்தை புரட்டுவது மட்டும் முடியாத காரியமா என்ன?

#Pray_For_Hithayath

ஸ்னைபர் துப்பாக்கி, விசாரணை ஆரம்பம்


பயங்கரவாத புலனாய்வுப் பிரிவில் இருந்த, ஸ்னைபர் ரக துப்பாக்கியொன்று,  காணாமல்போனதாக கூறப்படும்  சம்பவம் தொடர்பில், குற்றப்புலனாய்வுத் திணைக்களம் விசாரணைகளை ஆரம்பித்துள்ளது.

குற்றப்புலனாய்வுத் திணைக்கள பணிப்பாளரின் உத்தரவின்பேரில்,  விசேட பொலிஸ் குழுவினரால் இந்த விசாரணைகள் முன்னெடுக்கப்பட்டு வருகின்றன.

சில மாதங்களுக்கு முன்னர், ஒட்டுச்சுட்டான் பகுதியில் வைத்து ​கிளைமோர் குண்டுகளுடன்  கைது செய்யப்பட்ட, விடுதலைப் புலிகள் அமைப்பைச் சேர்ந்த நபரிடம், விசாரணைகளின் மூலம்  பெறப்பட்ட  தகவலுக்கமைய, பயங்கரவாத புலனாய்வுப் பிரிவினர், குறித்த  ஸ்னைபர் ரக துப்பாக்கியை கைப்பற்றியிருந்தனர்.

குறித்த துப்பாக்கி, பயங்கரவாத புலனாய்வுப்பிரிவில் இருந்த நிலையில், காணாமல்  போயுள்ளதாக தெரிவிக்கப்படுகிறது.                                        

தாடி வளர்க்கப்போவதாக, ஞானசாரர் சபதம் - புதிய புகைப்படமும் வெளியாகியது



தனக்கு எதிராக விதிக்கப்பட்டுள்ள சிறைத் தண்டனை நிறைவடையும் வரை தாடி வளர்க்க ஞானசாரர் சபதமெடுத்துள்ளார்.

சிறுநீரகத்தில் ஏற்பட்ட பிரச்சினைக் காரணமாக பல தடவைகள் ஸ்ரீ ஜயவர்த்தனபுர வைத்தியசாலைக்கு சிகிச்சைகளுக்காக செல்லும் கலகொட அத்தே ஞானசார தேரர் இன்றும் சிகிச்சைகளுக்காக, சிறைச்சாலை வைத்தியசாலையிலிருந்து  ஸ்ரீ ஜயவர்த்தனபுர வைத்தியசாலைக்கு சென்றிருந்தார்.

இதன்போது, அவர் தாடியுடன் காணப்பட்ட நிலையில், இது குறித்து சிலர் அவரிடம் வினவியப் போதே, தனது தண்டனை காலம் நிறைவடையும் வரை தான் தாடி வளர்க்க முடிவெடுத்துள்ளதாக ஞானசாரர் குறிப்பிட்டுள்ளார்.


கோடிகளுக்காக கட்சி மாறமாட்டோம் - உதுமாலெப்பை

(ஏ.எல்.ஜனுவர்)

கோடிகளுக்காகவும், பதவி அந்தஸ்துகளையும் உயர்த்திக் கொள்வதற்காக கட்சி மாறமாட்டோம், கொள்கைகளுக்கானதாகவே எமது பயணம் என்றும் தொடரும் என முன்னாள் கிழக்கு மாகாண அமைச்சர் எம்.எஸ்.உதுமாலெப்பை தெரிவித்தார்.

அண்மையில் தேசிய காங்கிரஸின் பிரதித்தலைவர் உள்ளிட்ட அனைத்து  பதவிகளிலிருந்தும் இராஜினமா செய்தமை தொடர்பில் விளக்கமளிக்கும் கூட்டம் றகுமானியபாத் மக்கள் பணிமனையில் இடம்பெற்ற போது இவ்வாறு அவர் தெரிவித்தார். அவர் தொடர்ந்தும் உரையாற்றுகையில்,

ஒரு அரசியல் கட்சியில் பதவி வகிக்கும் ஒருவர் ஜனநாயக ரீதியில் பதவி விலகுவதற்கு உரிமை இருக்கின்றது. இந்த அடிப்படையில்தான் நான் கட்சியில் வகித்த இரண்டு பதவிகளையும் இராஜினமாச் செய்தேன். எனது இராஜினமா தொடர்பாக கட்சி முக்கியஸ்தர்கள் சிலரிடம் ஆலோசனை பெறவில்லையென குறைபாடு நிலவுகின்றது.

1995ம் ஆண்டு புத்தளத்தில் இடம்பெற்ற முஸ்லிம் காங்கிரஸ் பேராளர் மாநாட்டின் போது மறைந்த தலைவரிடம் பொத்துவில் தொகுதிக்கான பாராளுமன்ற பிரதிநிதித்துவத்தை கட்சி உறுதிப்படுத்த வேண்டுமென கோரிக்கையை முன் வைத்தேன். இதற்கு சரியான பதில் கிடைக்காமையால் அட்டாளைச்சேனை முஸ்லீம் காங்கிரஸ் அமைப்பாளர் பதவியிலிருந்து யாரிடமும் ஆலோசணை கேட்காது இராஜினமாச் செய்தேன். 

எனது இராஜினமாவின் தாக்கத்தால் பொத்துவில் தொகுதிக்கான பாரளுமன்ற உறுப்புரிமை கிடைத்தது. அதே போன்று தேசிய காங்கிரஸின் பிரதித் தலைவர் பதவியிலிருந்து இராஜினமாச் செய்ததனால் எதிர்காலத்தில் கட்சி வளர வாய்ப்பு கிடைப்பதையிட்டு மகிழ்ச்சி அடைகின்றேன். தேசிய காங்கிஸிற்குள்ளே இருந்து கொண்டு கட்சியை பிளவுபடுத்தும் சதி தொடர்பானவர்களை பல தடவைகள் கட்சி தலமைத்துவத்திடம் எடுத்துக் கூறியும் அது தொடர்பாக எவ்வித நடவடிக்கையும் எடுக்காமல் விட்டதுடன், அவர்களின் செயற்பாடுகளுக்கு அங்கீகாரம் வழங்கும் நிகழ்வுகள் தொடர்ந்த வண்ணம் இருந்தனால் மனவேதனையடையும் நிலையிலிருந்தேன்.

ஊடகங்கள் சமூகத்தின் விதியை மாற்றக்கூடிய சக்திவாய்ந்தவை. ஆனால் சில சமூக வலைத்தள, இணையத்தள ஊடகங்கள் ஊடக தர்மத்தை மீறி செயற்படுகின்றன. தேசிய காங்கிரஸின் இணையத்தளத்தில் அட்டாளைச்சேனை பிரதான வீதியில் தெருவிளக்கு பொருத்துவது தொடர்பான விடயத்தில் என்னை மலினப்படுத்தும் வகையில் வெளியிடப்பட்ட செய்தி மனவேதனை அடையச் செய்கின்றது. ஊடகங்கள் எப்போதும் உண்மைகளை வெளியிட வேண்டும். ஊகங்களையும் உண்மைக்குப் புறம்பான செய்திகளை வெளியிடக கூடாது.

தேசிய காங்கிரஸின் மேற்சொன்ற பதவிகளை நான் இராஜினமாச் செய்த பின்னர் எந்தவொரு அரசியல்வாதியிடமோ கட்சியிடமோ இதுவரைக்கும் எதுவித தொடர்பையும் நான் மேற்கொண்டிருக்கவில்லை. மேலும், சில ஊடகங்கள் எனது இராஜினமா அரசியல் தற்கொலை என்றும் எனது நோக்கங்களை சரியாகப் புரிந்து கொள்ளாது வெளியிட்ட செய்திகள் தொடர்பில் எனது கண்டனத்தை தெரிவிப்பதோடு, அரசியல் தற்கொலை என்ற விடயத்தின் உண்மையையும்  விளங்காமலிருப்பதும் வேடிக்கையான விடயமாகும்.

இறைவன் நாடினால் ஒருவருக்கு பதவி கிடைக்கும் என்ற நம்பிக்கை மாறி இணையத்தளங்கள் ஊடாகத்தான் பதவிகள் கிடைக்கும் என்ற மனநிலைக்கு நமது அரசியல்வாதிகள் இன்று 
வந்துள்ளனர்.

தேசிய காங்கிரஸின் ஊடகப் பிரிவோடு தொடர்பான அக்கறைப்பற்று மாநகர சபை பிரதி மேயர் அஸ்மி தலமையிலான குழுவினர் முகநூல் போலி பக்கங்களினூடாக தேசிய காங்கிரஸின் சிரேஷ்ட உறுப்பினர்களை ஓரம் கட்டும் முயற்சிகள் தொடர்ச்சியாக செய்து கொண்டிருக்கின்றனர். 

மாற்றுக்கட்சிக்காரர்களின் தொடர்புடனும் கட்சியை அழிக்கும் முயற்சியில் இயங்கும் இந்த சதிகாரக் குழுவிடமிருந்து தேசிய காங்கிரஸையும், கட்சித் தலைவரையும் மீட்டெடுக்க வேண்டிய பாரிய பொறுப்பு தேசிய காங்கிரஸின் சிரேஷ்ட உறுப்பினர்களுக்கும், போராளிகளுக்கும் உள்ளன எனவும் தெரிவித்தார்

ஞானசாரர் மீண்டும், வைத்தியசாலையில் அனுமதி

பொதுபல சேனா அமைப்பின் செயலாளர்  ஞானசார தேரர் வைத்திய பரிசோதனை ஒன்றிற்காக சிறைச்சாலை வைத்தியசாலையிலிருந்து ஜயவர்தனபுர வைத்தியசாலைக்கு மாற்றப்பட்டுள்ளார்.

கடந்த ஆகஸ்ட் மாதம் 30ம் திகதி ஜயவர்தனபுர வைத்தியசாலையில் மேற்கொள்ளப்பட்ட சத்திர சிகிச்சையினை தொடர்ந்து சிறைச்சாலை வைத்தியசாலைக்கு மாற்றப்பட்ட ஞானசார தேரர் மீண்டும் ஒவ்வாமை காரணமாக செப்டம்பர் 6ம் திகதி ஜயவர்தனபுர வைத்தியசாலைக்கு மாற்றப்பட்டிருந்தார்.


இலங்கையில் உள்ளங்களை நெகிழவைத்த திருமணம்


இலங்கையில் பலரின் மனங்களை நெகிழ வைத்த திருமண வைபவம் ஒன்று இடம்பெற்றுள்ளது.

ஆடம்பரம் இல்லாமல் பிள்ளைகளால் கைவிடப்பட்ட முதியோர்கள் மற்றும் பெற்றோரினால் கைவிடப்பட்ட பிள்ளைகளின் முன்னிலையில் திருமணம் நடத்தப்பட்டுள்ளது.

மாத்தளை பிரதேசத்தை சேர்ந்த இளைஞர் ஒருவரே இவ்வாறு திருமணம் நடத்த திட்டமிட்டு, வெற்றிகரமாக முடித்துள்ளார்.

புகைப்பட கலைஞரான அருணசிறி என்ற இளைஞர் பயாஷானி என்ற பெண்ணுடன் திருமண பந்தத்தில் இணைந்துள்ளார்.

இந்த திருமணம், இம்புலன்தன்ட முதியோர் இல்லத்தில் நடத்தப்பட்டுள்ளது.

இந்த திருமணத்திற்கு மேலும் பல பகுதிகளை சேர்ந்த முதியோர்களும், சிறுவர் இல்லங்களில் உள்ள சிறுவர்களும் அழைக்கப்பட்டுள்ளனர்.

பெற்றோரின் அன்பை இழந்த பிள்ளைகளுக்கும், பிள்ளைகளின் அன்பை இழந்த பெற்றோருக்காகவும், இந்த திருமணம் நடத்தப்பட்டுள்ளது.

இலங்கையில் மிகவும் ஆடம்பரமாகவும், களியாட்ட நிகழ்வுகளுடன் நடத்தப்படும் திருமணங்களுக்கு மத்தியில், இந்தத் திருமணம் பலரையும் நெகிழ்சி அடைய செய்துள்ளது.

சிலோன் தவ்ஹீத் ஜமாத், நிறைவேற்றியுள்ள தீர்மானங்கள்

23.09.2018 அன்று மடவளை சன்சைன் மண்டபத்தில் நடைபெற்ற சிலோன் தவ்ஹீத் ஜமாத்தின் பொதுக்குழுவில் நிறைவேற்றப்பட்ட தீர்மானங்கள்.

TNTJவை விட்டு SLTJ நிரந்தரமாக நீங்கும் வரை தனித்து செயல்படுதல்.

ஶ்ரீ லங்கா தவ்ஹீத் ஜமாத் அமைப்பு தமிழ்நாடு தவ்ஹீத் ஜமாத்தின் நிர்வாக கட்டுப்பாட்டில் இருந்து உடனடியாக விலக வேண்டும் என்பதுடன் அமைப்பிலிருந்து நீக்கப்பட்ட அனைவரும் மீண்டும் அமைப்பில் இணைக்கப்படுவதுடன் அமைப்பின் மார்க்க மற்றும் நிர்வாக செயல்பாடுகள் தொடர்பில் தற்போதைய நிர்வாகம் மீது முன்வைக்கப்பட்ட குற்றச்சாட்டுக்களை பொதுக்குழு உறுப்பினர்கள் முன்னிலையில் இரு தரப்பினரும் ஆதரங்களை சமர்பித்து தம் பக்க நியாயத்தை நிரூபிக்கும் விதமாக பொதுக்குழுவை கூட்ட வேண்டும் என்றும்  அதுவரை (23.09.2018) விசேட பொதுக்குழுவில் கலந்துகொண்ட கிளைகள் புதிய பெயரில் தனித்து வீரியமாக கொள்கை பிரச்சாரத்தை முழு மூச்சுடன் முன்னெடுப்பது என தீர்மானிக்கப்பட்டது.

CTJ எனும் புதிய பெயரில் செயல்படுதல்.

இதுவரை காலமும் ஶ்ரீ லங்கா தவ்ஹீத் ஜமாத் என்ற பெயரில் செயல்பட்டு வந்த கொள்கை சகோதரர்கள் இனிவரும் காலங்களில் சிலோன் தவ்ஹீத் ஜமாத் (CTJ) எந்த பெயரில் ஏகத்துவ பிரச்சாரத்தையும், சமுதாயப் பணிகளையும் இன்னும் வீரியமாக முன்னெடுப்பது என தீர்மானிக்கப்பட்டது.

எந்த வெளிநாட்டு இயக்கத்தின் கீழும் செயல்படுவதில்லை.

இயக்க ரீதியில் அமைப்பின் செயல்பாடுகளை  தலைமை நிர்வாகம், ஆலோசனை சபை, மற்றும் தணிக்கை குழு ஆகிய மூன்று மட்ட நிர்வாகம் மூலம் முன்னெடுக்கப்படும் என்பதுடன் எந்தவொரு வெளிநாட்டு அமைப்புகளின் கீழும் நிர்வாக ரீதியில் கட்டுப்பட்டு செயல்படும் அமைப்பாக இவ்வமைப்பு இருக்காது என்று தீர்மானம் நிறைவேற்றப்படுகிறது.

ஜமாத்தின் செயல்பாடுகளை வெளிநாடுகளில்  முன்னெடுக்கும் விதமாக தேவைக்கேற்ப அமைப்பின் கிளைகள் வெளிநாடுகளில் உருவாக்கம் செய்யப்படும்.

பைலா மாற்றம் கொண்டுவருதல்.

ஶ்ரீ லங்கா தவ்ஹீத் ஜமாத் என்ற பெயரில் செயல்பட்ட நேரத்தில் பயன்பாட்டில் இருந்த அமைப்பு விதி (By Law) யில் பல்வேறுபட்ட சிக்கள்களும், குழப்பங்களும் கிளை, மற்றும் மாவட்ட நிர்வாகங்கள், பிரச்சாரகர்கள் உள்ளிட்டவர்களினால் சுட்டிக்காட்டப்பட்டுள்ள காரனத்தினால், புதிய அமைப்பு விதியை கிளை, மாவட்ட நிர்வாகங்கள் மற்றும் பிரச்சாரகர்களின் ஆலோசனைகளை எழுத்து மூலம் பெற்று மீண்டும் உருவாக்குவது என்றும், புதிய அமைப்பு விதி உருவாக்கப்பட்ட பின் மீண்டும் பொதுக்குழு கூட்டப்பட்டு பொதுக்குழு உறுப்பினர்களின் ஒப்புதலுடன் அது அமைப்பின் சட்டமாக்கப்படும் என்றும் தீர்மானிக்கப்படுகிறது.

தனியார் சட்டம் முறைப்படி இறுதி செய்யப்பட வேண்டும்.

இலங்கை முஸ்லிம் தனியார் சட்டத்தில் மார்க்க ரீதியிலான முறையான திருத்தங்கள் கொண்டுவரப்பட வேண்டும் என்று கோரிக்கை பல வருடங்களாக இருந்து வரும் நிலையில், ஆளும் அரசு GSP+ வரிச் சலுகையை காரணம் காட்டி தேவையற்ற திருத்தங்களுக்கு முனைப்புக்காட்டியது. 

வெளிநாடுகளின் தேவைகளுக்காக முஸ்லிம் தனியார் சட்டத்தில் திருத்தங்கள் மேற்கொள்வதை இலங்கை முஸ்லிம்கள் எதிர்த்த அதே வேலை, மார்க்க ரீதியில் முறையான திருத்தம் வேண்டியும் கோரிக்கை விடப்பட்டது. 

முஸ்லிம் தனியார் சட்டத்தில் மேற்கொள்ளப்பட வேண்டிய மார்க்க அடிப்படையிலான திருத்தங்கள் பற்றிய பரிந்துரைகள் அனைத்து தரப்பினராலும் முன்வைக்கப்பட்ட நிலையிலும் இதுவரை திருத்தம் இறுதி செய்யப்படாமல் இழுபறி நிலையே காணப்படுகிறது.

முஸ்லிம் தனியார் சட்டம் உடனடியாக மார்க்க அடிப்படையில் முறையான திருத்தம் செய்யப்பட்டு இறுதி செய்யப்படுவதுடன் எவ்விதமான மார்க்க முரணான செய்திகளும் அதில் உள்ளடங்கப்படக் கூடாது என்றும் இப்பொதுகுழு தீர்மானிக்கிறது.

முஸ்லிம்கள் மீதான ஆதாரமற்ற குற்றச்சாட்டுக்கு எதிராக உடன் நடவடிக்கை வேண்டும்.

இலங்கை முஸ்லிம்கள் மீது ஆதாரமற்ற குற்றச்சாட்டுக்களை முன்வைத்து தேவையற்ற குழப்பங்களுக்கு சிலர் வித்திட்டு வருகின்றனர். புனர் வாழ்வு அளிக்கப்பட்ட விடுதலைப் புலி இயக்கத்தை சேர்ந்த இன்பராசா என்பவர், முஸ்லிம் அரசியல் வாதிகளிடம் ஆயுதம் இருப்பதாகவும், அதன் மூலம் அச்சுறுத்தல் ஏற்பட்டிருப்பதாகவும் ஆதரமற்ற குற்றச்சாட்டை ஊடகங்களில் முன்வைத்திருந்தார். இன்பராசா என்பவருக்கு எதிராக பல்வேறு தரப்பினராலும் பொலிசில் முறைப்பாடுகள் முன்வைக்கப்பட்ட போதிலும் இதுவரை அவருக்கு எதிரான எந்த விதமான சட்ட நடவடிக்கைகளையும் பாதுகாப்பு துறை மேற்கொள்ளாமலிருப்பதை இப்பொதுக்குழு வன்மையாக கண்டிப்பதுடன், இன்பராசா மீது ICCPR இன் கீழ் நடவடிக்கை எடுக்கப்பட வேண்டுமென இப்பொதுக்குழு வேண்டிக்கொள்கிறது.

10.000 உல­மாக்கள் குழம்பிப் போய், 200 மத்­ர­ஸாக்கள் நிலை தடு­மா­றி­யுள்­ளன - ரிஸ்வி முப்தி கவலை

சலீம் மர்சூப் தலை­மை­யி­லான பிரி­வினர் முஸ்லிம் தனியார் சட்­டத்தில் ஷாபி மத்­ஹ­புக்கு மாற்­ற­மான திருத்­தங்­களை சிபா­ரிசு செய்­துள்­ள­தனால் இந்­நாட்டில் உள்ள 10 ஆயி­ரத்­துக்கும் மேற்­பட்ட உல­மாக்கள் குழம்பிப் போயி­ருக்­கி­றார்கள். 200 க்கும் மேற்­பட்ட மத்­ர­ஸாக்கள் நிலை தடு­மா­றி­யுள்­ளன என அகில இலங்கை ஜம்­இய்­யத்துல் உலமா சபையின் தலைவர் அஷ்ஷெய்க் எம்.ஐ.எம்.ரிஸ்வி முப்தி தெரி­வித்தார்.

நீதி­ய­மைச்சர் தலதா அத்­துக்­கோ­ர­ள­விடம் முஸ்லிம் தனியார் சட்ட திருத்த சிபா­ரிசு குழு­வி­னரால் சமர்ப்­பிக்­கப்­பட்­டுள்ள அறிக்கை தொடர்பில் வின­வி­ய­போதே அவர் இவ்­வாறு கூறினார்.தொடர்ந்தும் அவர் ‘விடி­வெள்ளி’ க்கு கருத்து தெரி­விக்­கையில்;

“எமது நாட்டில் ஷாபி மத்ஹப் 1000 வரு­ட­கால வர­லாற்­றினைக் கொண்­ட­தாகும். மிகவும் விசா­லத்­தன்­மை­யா­ன­தாகும். ஷாபி மத்­ஹபின் விசா­லத்­தன்மை கார­ண­மாக ஹனபி, ஹம்­பலி, மாலிகி இமாம்­களின் கருத்­து­க­ளையும் தாரா­ள­மாக உள்­வாங்­கிக்­கொள்ள முடியும்.

அகில இலங்கை ஜம்­இய்­யத்துல் உலமா சபை தனது நிலைப்­பாட்டில் உறு­தி­யாக இருக்­கி­றது. எந்தச் சவால்­க­ளையும் எதிர்­கொள்ள தயா­ராக இருக்­கி­றது. 8½ வரு­ட­கால குழுவின் அமர்­வு­களில் எல்லா விட­யங்­க­ளிலும் விட்­டுக்­கொ­டுப்­புடன் செயற்­பட்­டுள்­ளது. உலமா சபை குழு­வுடன் ஏழு கலந்­து­ரை­யா­டல்­களை நடத்­தி­யுள்­ளது. உலமா சபையின் பத்­வாக்­குழு கலந்­து­ரை­யா­டல்­க­ளின்­போது தெளி­வு­களை வழங்­கி­யுள்­ளது.

எமது நாட்டில் 1000 வரு­டங்கள் பழைமை வாய்ந்த ஷாபி மத்­ஹ­புக்கு முர­ணல்­லாத மற்றும் ஷரீ­ஆ­வுக்கு முர­ணல்­லாத திருத்­தங்­க­ளுக்கு உலமா சபை அங்­கீ­காரம் வழங்­கி­யுள்­ளது. மத்தா (நஷ்­ட­ஈடு) விவா­க­ரத்­தின்­போது பெண்­க­ளுக்கு வழங்­கப்­பட வேண்டும். மற்றும் காதி நீதி­மன்­றங்­களில் முஸ்லிம் பெண்கள் ஜுரிக­ளாக நிய­மிக்­கப்­பட வேண்டும். காதி ஆலோ­சனைச் சபையில் பெண்கள் நிய­மனம் பெற வேண்டும் எனும் விட­யங்­களில் உடன்­பட்­டுள்­ளது.

அகில இலங்கை ஜம்­இய்­யத்துல் உலமா சபை தனது நிலைப்­பாட்­டி­னையும் சிபா­ரி­சு­க­ளையும் 2010 ஆம் ஆண்­டி­லேயே குழுத் தலைவர் சலீம் மர்­சூ­பிடம் தெரி­வித்­து­விட்­டது. அன்று கொழும்பு ரன்­முத்து ஹோட்­டலில் நடை­பெற்ற கூட்­டத்தில் பத்­வாக்­குழு தனது நிலைப்­பாட்­டினை தெளி­வாக விளக்­கி­விட்­டது. தனது நிலைப்­பாட்­டினை அன்று உலமா சபை தனது ஏனைய அங்­கத்­தி­ன­ருக்கோ, ஊட­கங்­க­ளுக்கோ கூட தெரி­விக்­க­வில்லை. 2017 இல் உல­மாக்கள் அடங்­கிய தரப்பு சலீம் மர்­சூ­பிடம் 90 பக்­கங்கள் அடங்­கிய அறிக்­கையை கைய­ளித்­தது.

இன்று பல்­வேறு தரப்­புகள் உலமா சபை மீது குற்­றங்­களைச் சுமத்தி வரு­கின்­றன. உலமா சபை திருத்­தங்­களை விரும்­ப­வில்லை. எதிர்க்­கி­றது என்று கூறி வரு­கி­றார்கள். மக்­களைத் திசை திருப்­பு­வ­தற்குப் பள்­ளி­வா­சல்கள் உப­யோ­கப்­ப­டுத்­தப்­ப­டு­வ­தாக குற்றம் சுமத்­து­கி­றார்கள்.

சலீம் மர்சூப் தயா­ரித்­துள்ள அறிக்கை 100 வீதம் ஷரீ­ஆ­வுக்கு உட்­பட்­ட­தெ­னவும் பள்­ளி­வாசல் மிம்­பர்­களில் இது பற்றி தவ­றாகப் பிர­சங்கம் செய்­யப்­ப­டு­வ­தாகத் தெரி­விக்­கி­றார்கள்.

பள்­ளி­வா­சல்­களும் மிம்­பர்­களும் மக்­களை நல்­வ­ழிப்­ப­டுத்­தவே பயன்­ப­டுத்­தப்­ப­டு­கின்­ற­ன­வே­யன்றி மக்­களை வழி­கெ­டுப்­ப­தற்­கல்ல.

ஷாபி மத்­ஹப்தான் எமது நாட்டில் பிரச்­சினை என்­கி­றார்கள். பள்­ளி­வா­சல்கள் மக்­களைக் குழப்­ப­வில்லை. பொது­ப­ல­சேனா அல்­லாஹ்­வையும் நபிகள் நாய­கத்­தையும் அவ­ம­தித்துப் பேசி­விட்டு பின்பு அவ்­வாறு நாங்கள் அல்­லாஹ்­வையும் நபிகள் நாய­கத்­தையும் அவ­ம­திக்­க­வில்லை என்று கூறு­வ­தற்கு அவர்­களின் கூற்று சம­மாகும்.

உல­மாக்கள் ஒன்­றுமே அறி­யா­த­வர்கள் என்று சிலர் நினைக்­கி­றார்கள். இன்று மார்க்­கத்தின் தூண்­க­ளாக நிற்­ப­வர்கள் உல­மாக்­களே. அவர்­களை குறைத்து மதிப்­பிட எவ­ராலும் முடி­யாது.

முஸ்லிம் தனியார் சட்­டத்தில் திருத்­தங்­களைச் சிபா­ரிசு செய்­வ­தற்கு அப்­போ­தைய நீதி­ய­மைச்சர் மிலிந்த மொர­கொ­ட­வி­னாலே குழு நிய­மிக்­கப்­பட்­டது. குழுவில் பெண்கள் நிய­மிக்­கப்­பட்­டது தொடர்பில் நாம் எதிர்ப்பு வெளி­யி­ட­வில்லை என்று தெரி­விப்­பது நகைப்­புக்­கு­ரி­ய­தாகும். அவ்­வாறு கூறு­வ­தற்கு உலமா சபைக்கு எந்த அதி­கா­ர­மு­மில்லை.

இலங்­கையில் மஸ்­ஜி­து­களில் ஆமீன் கூறும்­போது உரத்த குரலில் இமாம் உட்­பட தொழு­கையில் ஈடு­ப­டு­ப­வர்கள் கூறு­வார்கள். இது எமது நாட்டின் ஆயிரம் வருட காலம் பழைமை வாய்ந்த ஷாபி மத்­ஹபின் வழ­மை­யாகும்.

இதேபோல் சூரத்துல் பாத்­தி­ஹாவை இமாம் ஓது­வது போன்று அவரைப் பின்­பற்றி தொழக்­கூ­டிய ஒவ்­வொ­ரு­வரும் ஓது­வார்கள்.

ஆனால் ஹனபி மத்­ஹபில் உரத்­த­கு­ரலில் ஆமீன் கூறு­வ­தில்லை. அத்­தோடு சூரத்துல் பாத்­தி­ஹாவை இமாமை பின்­பற்றி தொழு­ப­வர்கள் ஓதக்­கூ­டாது.  தற்­போது எமது நாட்டில் 1000 வரு­டங்கள் பழைமை வாய்ந்த ஷாபி மத்ஹப் பின்­பற்­றப்­ப­டு­கி­றது. இந்­நி­லையில் இதை நீக்கு என்று சொன்னால் ஆமீன் பல­மாகக் கூறாதே என்றும் சூரத்துல் பாத்­தி­ஹாவை பின்னால் ஓதாதே என்று சொன்னால் நாட்­டி­லுள்ள இமாம்கள், உலமாக்கள் சகிப்பார்களா?

பெண்கள் திருமணம் செய்யும்போது ‘வொலி’ அவசியம் என ஷாபி மத்ஹபில் தெரிவித்திருக்கும்போது அதை நீக்கு என்றால் உலமாக்கள் நாட்டு மக்கள் தாங்கிக்கொள்வார்களா?

 ஷாபி மத்ஹபுக்கு எதிரான கருத்துகள் அடங்கிய சிபாரிசுகளை வெளியிட வேண்டாம். அதனால் பிரச்சினைகளே உருவாகும் என்று நாம் கூறினோம். ஆனால் சம்பந்தப்பட்ட தரப்பு அதனை கருத்தில் கொள்ளவில்லை. இதனாலேயே முஸ்லிம் தனியார் சட்ட திருத்தத்தில் பிரச்சினைகள் உருவாகியுள்ளன” என்றார்.

காத்தான்குடி ஜாமிஅதுல் பலாஹ் அறபுக்கல்லூரியில் 2019 மாணவர் அனுமதிக்கு விண்ணப்பம் கோரல்

இலங்கையின் கிழக்கு மாகாணத்தின் மட்டக்களப்பு மாவட்டத்தில் பிரசித்திபெற்ற அறபுக் கல்லூரியான காத்தான்குடி ஜாமிஅதுல் பலாஹ் அறபுக்கல்லூரியில் இன்ஷா அல்லாஹ் 2019ம் ஆண்டு புதிய கல்வி ஆண்டிற்கு ஷரீஆ (கிதாபு), அல்குர்ஆன் மனனம் (ஹிப்ழு)ப் பிரிவுகளுக்கு புதிய மாணவர்கள் இணைத்துக் கொள்ளப்படவுள்ளதாக கல்லூரியின் இயக்குநர் சபைச் செயலாளர் மௌலவி எம்.எச்.எம்.புஹாரி (பலாஹி) பீ.ஏ. தெரிவித்தார்.

மேற்படி விடயம் தொடர்பில் அவர் கருத்து தெரிவிக்கையில்;.... ஷரீஆ (மௌலவி ஆலிம்) பிரிவுக்கு 13 வயதிற்கு மேற்படாத 2018ம் ஆண்டு பாடசாலையில் தரம் 8இல் கல்வி கற்றுக்கொண்டிருக்கும் அல்குர்ஆனைப் பார்த்து சரளமாக ஓதத் தெரிந்தவர்களும்;, அல்குர்ஆன் மனனம் (ஹாபிழ்) பிரிவுக்கு 11 வயதிற்கு மேற்படாத 2018ம் ஆண்டு பாடசாலையில் தரம் 6இல் கல்வி கற்றுக் கொண்டிருக்கும் அல்குர்ஆனைப் பார்த்து சரளமாக ஓதத் தெரிந்தவர்களும் 20.10.2018ம் திகதிக்கு முன்னர் விண்ணப்பிக்க முடியும்.

விண்ணப்பங்களை நேரில் பெற விரும்புவோர் கல்லூரிக் காரியாலயத்தில் பெற்றுக்கொள்ளலாம். தபால் மூலம் விண்ணப்பிப்போர் அவசியமாக விண்ணப்பதாரியின் முழுப்பெயர்,வயது, கல்வித்தரம், சேர விரும்பும் பிரிவு, வதிவிட விலாசம், தொலைபேசி இலக்கம் போன்ற விபரங்கள் அடங்கிய சுயமாகத் தயாரிக்கப்பட்ட விண்ணப்பங்களை செயலாளர். ஜாமிஅதுல் பலாஹ் அறபுக்கல்லூரி, காத்தான்குடி. என்ற முகவரிக்கு அனுப்பிவைப்பதுடன், மேலதிக விபரங்களுக்கு 0779330778,0773526763 எனும் தொலைபேசி இலக்கங்களுடன் தொடர்பு கொள்ள முடியும். அத்தோடு விண்ணப்பிக்கும் மாணவர்கள் தமிழில் பரிச்சயம் உடையவர்களாக இருத்தல் வேண்டும். இன்ஷா அல்லாஹ் நேர்முகப் பரீட்சை 2018 நவம்பர் 3ம்,4ம் திகதிகளில் நடைபெறும்.

குறிப்பு: இங்கு மாணவர்களுக்கு தகவல் தொழில் நுட்பக் கல்வி வழங்கப்படுவதுடன் மாணவர்கள் க.பொ.த.சாதாரண தரம் மற்றும் உயர் தர (கலைப்பிரிவு) பரீட்சைகளுக்கும்,அரசாங்கத்தால் நடாத்தப்படும் அஹதிய்யா, அல்ஆலிம்,தர்மாச்சார்ய சான்றிதழ் பரீட்சைகளுக்கும் தயார்படுத்தப்படுகின்றமை குறிப்பிடத்தக்கது.

(பழுலுல்லாஹ் பர்ஹான்)


ஒலுவில் கடலரிப்பை தடுப்பதற்கு, உடன் நடவடிக்கை எடுக்கவும் - பைசல் காசீம் ஜனாதிபதியிடம் கோரிக்கை

ஒலுவில் கடலரிப்பை உடனடியாகத் தடுக்கும்வகையில் ஆழ்கடலில் இருந்து மண்ணை அகழ்ந்து கரையோரத்தை மீள்நிரப்பும் செயற்திட்டத்தை உடன் மேற்கொள்ளுமாறு சுகாதார பிரதி அமைச்சர் பைசல் காசீம் ஜனாதிபதி மைத்திரிபால சிறிசேனவிடம் அவசர கோரிக்கை ஒன்றை விடுத்துள்ளார்.

இது தொடர்பில் பிரதி அமைச்சர் ஜனாதிபதிக்கு கடிதம் ஒன்றை அனுப்பி வைத்துள்ளார்.அக்கடிதத்தில் அவர் மேலும் குறிப்பிடப்பட்டுள்ளவை வருமாறு:

ஒலுவில் துறைமுகம் அமைக்கப்பட்டபோது அது அப்பகுதி மக்களுக்கு விடிவைக் கொண்டு வரும் என்று எல்லோரும் மகிழ்ச்சியடைந்ததிருந்தனர். ஆனால்,அது  அழிவையே கொண்டு  வரும் என்று யாரும் நினைத்திருக்கவில்லை. 

இதன் நிர்மாணப் பணிக்காக மக்கள் காணிகளை இழந்தது ஒருபுறமிருக்க அவர்களை மேலும் துன்பத்துக்கு உள்ளாக்கும்வகையில்  இப்போது நாலாயிரம் மீனவர்களின் வாழ்வும் பாதிக்கப்பட்டுள்ளது.கரைவலை மூலம் மீன் பிடித்து வாழ்வை நடத்தி வந்த இம்மக்களின் வாழ்வு இன்று கேள்விக்குறியாகியுள்ளது.

இந்தத் துறைமுக நிர்மாணத்தின்போது கடலினுள் பாரிய கருங்கற்களால் தடை அமைக்கப்பட்டது.இந்தத் தடை ஏற்படுத்தப்பட்ட நாள் முதல் ஒலுவில்,நிந்தவூர்,பாலமுனை,சாய்ந்தமருது,காரைதீவு,மாளிகைக்காடு போன்ற ஊர்களில் கரைவலை மீன்பிடி கிட்டத்தட்ட இல்லாமலேயே போயுள்ளது.

இயற்கையாக இடம்பெற்று வந்த கரை நீரோட்டம் பாதிக்கப்பட்டதனால் கரையோரத்தின் சமநிலை பாதிக்கப்பட்டுள்ளது.வடக்கில் இருந்து தெற்கு நோக்கி ஓடும் கடல்நீர் துறைமுக வாயிலை அடைப்பதுடன் துறைமுக்கத்தின் தென்பக்கம் மணலைக் கொண்டுவந்து சேர்க்கின்றது.துறைமுக வாயில் அடைபடுவதனால் துறைமுகத்தினுள் மீன்பிடி  படகுகள் நுழைய முடியாமல் உள்ளன.

இதனால் துறைமுகத்தின் வடக்கு திசை பாரிய கடலரிப்புக்கு உள்ளாகியுள்ளது.இதனால் வெளிச்ச வீடு மற்றும் துறைமுக அதிகார சபைக்குச் சொந்தமான சுற்றுலா விடுதிகள் போன்றவை பாதிக்கப்பட்டதால் இவற்றைப் பாதுகாப்பதற்காக அதிகாரசபை கடலினுள் வடக்கு தெற்காக அலைத்தடுப்பு வேலி ஒன்றினை அமைத்தது.

இந்த வேலி அமைக்கப்பட்டதன் பின் வடக்கில் இருக்கும் கிராமங்களானஅட்டப்பள்ளம்,நிந்தவூர்,காரைதீவு,மாளிகைக்காடு மற்றும் சாய்ந்தமருது போன்ற ஊர்கள் பாரிய கடலரிப்புப் பிரச்சினைக்கு உள்ளாகிவிட்டன.இதனால் இவ்வூர்கள் பல பிரச்சனைகளை எதிர்கொண்டு வருகின்றன.

15 ஆயிரம் கரைவலை குடும்பங்கள் பாதிப்பு,கடல் தாவரங்கள் அழிவு,கரையோரத்தில் இருந்த வயற்காணிகள் மற்றும் தென்னந்தோப்பு உள்ளிட்ட ஐம்பதுக்கு மேற்பட்ட ஏக்கர் காணி கடலுக்குள் உள்ளீர்ப்பு,கடல் ஆமைகளின் இணைப்பெருக்கம் பாதிப்பு,கடற்பாறைகள் வெளித்தள்ளப்பட்டு மீனவர்களின் வேலைகளுக்கு பாதிப்பு போன்ற பல பாதிப்புக்கள் ஏற்பட்டுள்ளன.

இது தொடர்பில் நான் கடற்றொழில் அமைச்சர் மஹிந்த அமரவீர,துறைமுக அபிவிருத்தி அமைச்சர் மஹிந்த சமரசிங்க மற்றும் கரையோரப் பாதுகாப்புத் திணைக்களத்தின் பணிப்பாளர் நாயகம் ஆகியோரை அழைத்துச் சென்று காண்பித்துள்ளேன்.இருப்பினும்,நிரந்தரத் தீர்வுகள் எவையும் முன்வைப்படவில்லை.இதனால் கடலரிப்பின் வீதம் நாளுக்கு நாள் அதிகரித்துக்கொண்டு செல்கின்றது.

பாறாங்கற்களைப் போட்டு இதைத் தடுக்க முடியாது.அவை கரைவலை மீனவர்களுக்கு பாதிப்பை ஏற்படுத்தும்.ஆகவே,வென்னப்புவ போன்ற இடங்களில் நடைமுறைப்படுத்தப்பட்டு வெற்றிபெற்ற ஆழ்கடலில் இருந்து மண்ணை அகழ்ந்து கரையோரத்தை மீள்நிரப்பும் செயற்பாட்டின் மூலமாகே இந்தப் பிரச்சினைக்கு நிரந்தரத் தீர்வைக் காணமுடியும்.

ஆகவே,இந்தத் திட்டத்தை உடன் நடைமுறைப்படுத்தி பாதிக்கப்பட்டுள்ள மீனவர்களையும் ஊர்களையும் காப்பாற்றுவதற்கு நடவடிக்கை எடுக்குமாறு நான் உங்களிடம் தாழ்மையாக வேண்டிக்கொள்கிறேன்.
-எனத் தெரிவித்துள்ளார்.

[பிரதி அமைச்சரின் ஊடகப் பிரிவு]

6 வயது சிறுமியின் கையைப் பிடித்த 70 வயது முதியவருக்கு விளக்கமறியல்

யாழில் ஆறு வயது சிறுமியின் கையைப் பிடித்தார் எனும் குற்றசாட்டில் கைதுசெய்யப்பட்ட 70 வயது முதியவரை விளக்கமறியலில் வைக்குமாறு நீதிவான் உத்தரவிட்டுள்ளார்.

நாவற்குழி பகுதியில் கடந்த சனிக்கிழமை வீதியால் நடந்து சென்ற சிறுமியை முதியவர் தவறான நோக்கத்துடன் கையைப் பிடித்து இழுத்தார் என சிறுமியின் பெற்றோரால் சாவகச்சேரி பொலிஸ் நிலையத்தில் முறைப்பாடு செய்யப்பட்டது. 

முறைப்பாட்டின் பிரகாரம் விசாரணைகளை முன்னெடுத்த பொலிஸார் குறித்த முதியவரை கைது செய்து சாவகச்சேரி நீதிவான் நீதிமன்ற பதில் நீதிவான் முன்னிலையில் ஆஜர்படுத்தினர்.

குறித்த வழக்கை விசாரித்த பதில் நீதிவான் முதியவரை எதிர்வரும் 14 நாட்களுக்கு விளக்கமறியலில் தடுத்து வைக்க உத்தரவிட்டார்.

பாகிஸ்தான் கெப்டனுக்கு கங்குலியின் ஆதரவும், இலங்கை கற்கவேண்டிய பாடமும்...!


பாகிஸ்தான் கேப்டன் சர்பராஸ் அகமது ஒரு சிறந்த கேப்டன் அவரை ஆதரித்து பாகிஸ்தான் கிரிக்கெட் வாரியம் ஊக்கப்படுத்த வேண்டும் என இந்திய அணியின் முன்னாள் கேப்டன் சவுரவ் கங்குலி தெரிவித்துள்ளார். 

14வது ஆசிய கோப்பை தொடரின் சூப்பர் 4 சுற்று ஆட்டங்கள் நடைபெற்று வருகிறது. இதில் இந்தியா பாகிஸ்தான் அணிகள் மோதிய ஆட்டத்தில் இந்தியா 9 விக்கெட்டுகள் வித்தியாசத்தில் அபார வெற்றி பெற்றது. குரூப் பிரிவு ஆட்டத்திலும் பாகிஸ்தான் இந்தியாவிடம் படுதோல்வியை சந்தித்தது. 


இந்த தொடர் தொடங்குவதற்கு முன்பாக பாகிஸ்தான் வீரர்களில் சிலர் கூறும்போது, நான் ஒருவனே இந்திய வீரர்களின் 10 விக்கெட்டையும் கைப்பற்றுவேன், கோலி இல்லாதது இந்தியாவுக்கு பின்னடைவு என வெற்று வாய் சவடால் விட்டனர். ஆனால் நிஜத்தில் நடந்ததோ வேறு, இந்தியாவுக்கு எதிரான இரண்டு போட்டிகளையும் சேர்த்து அவர்கள் வெறும் 2 விக்கெட்டுகளை மட்டுமே கைப்பற்றியுள்ளனர். 

மேலும், ஆப்கானிஸ்தான் அணிக்கு எதிரான போட்டியிலும் போராடி கடைசி ஓவரில் தான் வெற்றி பெற்றனர். இதன் காரணமாக பாகிஸ்தான் அணி வீரர்கள் மீதும், கேப்டன் சர்பராஸ் அகமது மீதும் கடுமையான விமர்சனங்கள் முன்வைக்கப்பட்டு வருகிறது. 

இந்நிலையில், இந்திய அணியின் முன்னாள் கேப்டன் சவுரவ் கங்குலி சர்பராஸ் அகமது ஒரு சிறந்த கேப்டன் என புகழாரம் சூட்டியுள்ளார். இது தொடர்பாக தொலைக்காட்சி ஒன்றுக்கு பேட்டி அளிக்கும் போது அவர் குறிப்பிட்டுள்ளதாவது:-

சர்பிராஸ் அகமது ஒரு சிறந்த கேப்டன், அவரை போன்ற வீரர்கள் தினம் தினம் பிறந்து வர மாட்டார்கள். கடந்த ஆண்டு சாம்பியன்ஸ் டிராபியை அப்பழுக்கற்ற முறையில் சிறப்பாக வழிநடத்தி கோப்பையை வென்ற அவர் ஒரு தைரியமான வீரர். 

ஆசிய கோப்பை தோல்விகளால் அவர் மீது வைக்கப்படும் விமர்சனங்களை எல்லாம் புறம்தள்ளிவிட்டு பாகிஸ்தான் கிரிக்கெட் வாரியமும், முன்னாள் வீரர்களும் சேர்ந்து அவரை ஆதரித்து ஊக்கப்படுத்த வேண்டும் என கங்குலி கூறினார். 

அதேவேளை இலங்கையின் மிகச்சிறந்த சகலதுறை ஆட்டக்காரரான அஞ்சலோ மத்யூஸ் மிகக்கடுமையான விமர்சனங்களை எதிர்கொள்வதும், அவரிடமிருந்தும் கெப்டன் பதவியை பறித்துக்கொண்டமையும் குறிப்பிடத்தக்கது. அதுபோன்ற விமர்சனங்களையே தற்போது பாகிஸ்தான் கெப்டன் சுமக்கும் நிலையில் அவருக்கு ஆதரவாக  கங்குலி கருத்து வெளியிட்டுள்ளமை இங்கு கவனிக்கத்தக்கது.

2018 ஆம் ஆண்டு சிறந்த வீரராக, லூகா மோட்ரிச் தெரிவு


2018 ஆம் ஆண்டின் சிறந்த வீரருக்கான பிபா விருது அறிவிக்கப்பட்டுள்ளது. இதில், பிபா சிறந்த வீரர் விருதுக்கு, குரோசியா அணியின் கேப்டன் லூகா மோட்ரிச் தேர்வு செய்யப்பட்டுள்ளார்.

சர்வதேச கால்பந்து சம்மேளனம் (FIFA) ஆண்டுதோறும் உலகின் சிறந்த கால்பந்து வீரரை தேர்வு செய்து சிறந்த வீரருக்கான விருதை வழங்கி வருகிறது. 

அதன்படி, 2018-ம் ஆண்டிற்கான விருதை வழங்குவதற்காக 5 முறை பிபாவின் சிறந்த வீரர் விருது பெற்ற கிறிஸ்டியானோ ரொனால்டோ, லிவபர்பூல் அணிக்காக 43 கோல்கள் அடித்துள்ள முகமது சலா மற்றும் லூகா மோட்ரிச் ஆகிய மூவரும் இறுதி பட்டியலில் இடம் பெற்றிருந்தனர். 

இந்நிலையில், ரொனால்டோ மற்றும் முகமது சலா ஆகியோரை பின்னுக்கு தள்ளி 33 வயதான லூகா மோட்ரிச் 2018-ம் ஆண்டிற்கான உலகின் சிறந்த கால்பந்து வீரராக தேர்வு செய்யப்பட்டுள்ளார்.

ரஷியாவில் நடைபெற்ற உலக் கோப்பை கால்பந்து போட்டியில் முதல்முறையாக குரோசியா இறுதிப்போட்டிக்கு முன்னேறியது. இதற்கு கேப்டன் மோட்ரிச்சின் ஆட்டம் முக்கிய காரணமாக அமைந்தது. உலகக்கோப்பையில் சிறப்பான ஆட்டத்தை வெளிப்படுத்தியதால் தங்க கால்பந்து விருதும் அவருக்கு வழங்கப்பட்டது குறிப்பிடத்தக்கது. 

பிரேசிலை சேர்ந்த மார்டா என்பவருக்கு சிறந்த பெண் வீராங்கனைக்கான பிபா விருது அறிவிக்கப்பட்டுள்ளது.

தமிழர்களை அழித்தொழிப்பதில் முஸ்லிம், அரசியல்வாதிகள் குறி - சங்கரட்ண தேரர்

/பாறுக் ஷிஹான்/

ஒற்றுமையின்றி  தமிழர்கள் மட்டும் தனியாக பாடுபட்டால் சாதிக்க முடியாது  என  கல்முனை ஸ்ரீ சுபத்திரராம மஹா விகாரையின் விகாராதிபதியும் கல்முனை சிவில் பாதுகாப்பு ஆலோசனைக் குழுவின் தலைவராகவும், அம்பாறை மாவட்ட சர்வமத அமைப்பின் இணைத் தலைவராகவும் அம்பாறை வித்தியானந்த பிரிவெனாவின் தமிழ்ப்பாட வளவாளராகவும் இருக்கும் ரன்முதுகல சங்கரட்ணதேரர் குறிப்பிட்டுள்ளார்.

 கனேடிய அரசின் நிதியுதவியுடன் கல்முனை மாநகரில் 3400 கோடி ரூபா நிதியில் மலசலகூடக் கழிவகற்றல் வேலைத்திட்டம் முன்னெடுக்கப்பட உள்ள நிலையில் அப்பகுதி வாழ்  தமிழர்கள் மத்தியில் கல்முனை -1 பல்தேவை கட்டடத்தில் இடம்பெற்ற சந்திப்பொன்றில் மேற்கண்டவாறு தெரிவித்தார்.

இங்கு உரையாற்றிய அவர்,

அம்பாறை மாவட்டத்தில்  கல்முனையில் வாழும் தமிழர்களை திட்டமிட்டமுறையில் அழித்தொழிக்க வேண்டும் என்பதில் முஸ்லிம் அரசியல்வாதிகள் குறியாக இருந்து வருகின்றார்கள் என்பதை இங்குள்ள மக்களே எனக்கு தெரிவிக்கின்றனர்.இதற்காகவே தான்  கல்முனை மாநகர சபைக்குட்ட 75 கிராம சேவகர் பிரிவுகளில் வாழும் மக்களின் சுகாதாரத்தைப் பேணும் வகையில் மலசலகூடக் கழிவுகளை அகற்றி சுத்திகரிக்கும் வேலைத்திட்டத்தை மக்கள் செறிந்து வாழும் பகுதியில்  முன்னெடுக்கப்படவுள்ளதாக அறிகின்றேன்.இத்திட்டம் நல்ல ஒரு திட்டம் தான்.காலத்தின் தேவையும் கூட.ஆனால் இவ்வாறான பாரிய திட்டங்கள் அமைக்கப்படும் போது மக்களிற்கான விழிப்பூட்டல்கள் அவசியமாகும்.ஆனால் அவை ஒன்றும் இதுவரை எவரும் முன்னெடுக்கவில்லை என்பதே எமது கவலையாகும்.

இப் பிரதேசத்தில் அதிகாரத் துஸ்பிரயோகத்தில்   அரசியல்  பொருளாதார ரீதியில் பலம் பெருந்தியவர்கள் ஈடுபட முயன்றால் நான் பார்த்துக்கொண்டு சும்மா இருக்க போவதில்லை. இன்னுமொரு இனத்தின் உரிமைகளைப் பறித்தெடுக்கின்ற நிலை இத்திட்டத்தில் காணப்பட்டால் இதற்கு நாம் அனைவரும் கட்சிபேதங்களை மறந்து செயற்பட வேண்டும்  ஒரு இனம் பாதிக்கப்படாமல் அரச அதிகாரிகள் இன மத குல பேதங்கள் பார்க்காமல் பரந்த மனப்பாங்குடன் மக்களுக்குச் சேவையாற்ற வேண்டும். அதிகாரங்களை துஸ்பிரயோகம் பண்ணக்கூடாது. மக்கள் செறிவாக வாழுகின்ற பிரதேசங்களுக்கும் அதிகமாக மக்கள் கூடிக்கலைகின்ற இடங்களுக்கும் இந்த கழிவு நீர் முகாமைத்துவ திட்டத்தை அமுல்படுத்த  இந்த விடயம் தொடர்பில் மக்கள் பூரண விளக்கத்தினை அளிக்க வேண்டும்.அந்த விளக்கத்தினை ஊடகங்கள் ஊடாக  மக்களுக்கு வழங்க முன்வர வேண்டும்.

இந்த திட்டத்திலுள்ள படித்த சிலருக்கே  நன்மைகள் தீமைகள்  தொடர்பில் விளக்கமில்லாமல் இருக்கிறது.  அவர்களுக்கு இது தொடர்பில் போதிய அளவில் அறிவு இருக்கவில்லை. மலசலத்தை அகற்றி அதனை மீள் சுழற்சிக்குற்படுத்துகின்ற போது அதனால் சூழலில் துர்நாற்றம் எழும் என மக்கள்  கருதுகிறார்கள்அவ்வாறே வீடுகளில் இருந்து குழாய்வழியாக பிரதான கழிவு நீர் முகாமைத்துவ சட்டகத்திக்கு அவற்றை நிலக்கீழ்வழியாக கொண்டுவரும் போது குழாய்களில் வெடிப்பு ஏற்பட்டு சூழல் மாசடையும் அந்த பிரதேசமே துர்நாற்றம் வீசும் என அவர்கள்  கருதுகிறார்கள். இதனால் தான் இந்த திட்டத்தை ஆரம்பிக்கின்ற போது மக்கள் அத்திட்டத்தை  நிறுத்தும் முயற்சியில் இறங்குகிறார்கள்.இதுவே உண்மை.

ஆனால் இந்த கருத்தை தற்போது மக்கள் கருத்தாக தான் முன்வைக்கும் போது   போது   பிரதி அமைச்சர் எச்.எம்.எம்.ஹரீஸை வசைபாடுவதாகவும் இனவாதம் கதைப்பதாகவும் சிலர்  குறிப்பிடுகின்றனர்.ஆனால் எனது நோக்கம் மக்களுக்கு நன்மையான விடயங்களை பெற்றுக்கொடுப்பதாகும்.இந்த தேசிய அரசாங்கத்தில் நாட்டில் நல்லிணக்க சக வாழ்வு ஏற்படுத்த முயற்சிகள் இடம்பெறுகிறது.எனவே எதிர்கால சந்ததிகளின் நலனை அடிப்படையாக கொண்டு எமது மக்களிற்கான அபிவிருத்தி திட்டங்களை நாம் மேற்கொள்ள வேண்டும்.நான் ஒரு பௌத்த குருவாக மாத்திரமன்றி தேசிய ஒருமைப்பாட்டை ஏற்படுத்தும் வகையில் அயராது உழைத்து வருபவன்.நான் ஒரு இனவாதி அல்ல.பல்லின மக்கள் வாழுகின்ற இப்பிரதேசத்தின் அனைத்து மக்களின் மொழி மத கலாசாரத்திற்கு மதிப்பளிக்க பழகிக்கொள்ள வேண்டும்.இதனை ஏற்படுத்துவதில் நான் உறுதியாக உள்ளேன்.அதற்கு ஏற்ற வகையில் ஒவ்வொருவரது சிற்தனையில் மாற்றங்களை கொண்டு வர வேண்டும்.இங்கு மக்களின் தேவைகளை அறிந்து கல்முனை மாநகர உறுப்பினர் சந்திரசேகரம் ராஜன் எங்களையும் மக்களையும் அரவணைக்கின்றார்.நாமும் அவருக்கு பக்க பலமாக இருக்க வேண்டும்.இவருடைய நல்ல சிந்தனையை பாராட்டுகின்றேன்.கல்முனை மாநகரில் மக்களுக்காக செய்ய வேண்டிய பல அபிவிருத்திகள் எம் கண்முன்னே இருக்கின்றன. அதனை செய்யவேண்டும்.எமது பிரதேச மக்களுக்கு நிறைய பிரச்சினைகள் இருக்கின்றன. அதனையெல்லாம் தீர்த்து வைக்கவேண்டும். அதற்காகவேண்டித்தான் இக்கூட்டத்திற்கு அழைத்தவுடன் வந்தேன்.கல்முனையில் தமிழ் மக்களுக்கு பாதகமான முறையில் நகர அபிவிருத்தி மேற்கொள்ளப்படுமாக இருந்தால் அதனை நான் எதிர்ப்பேன் என்றும் தெரிவித்தார்.

இராவணன் இலங்கையன் அல்ல - அடித்துக்கூறும் சுப்பிரமணியன் சுவாமி

இராவணன், நொய்டாவில் பிறந்தவர் என்றும், தமிழக முன்னாள் முதல்வர் கருணாநிதி கூறி வந்தது போல் அவர் திராவிடன் அல்ல என்றும் சுப்பிரமணியன் சுவாமி கூறியுள்ளார்.

ஆரியர்_ -திராவிடர் எனும் கருத்து இந்தியர்கள் மனதில் ஆங்கிலேயரால் விதைக்கப்பட்டதாகவும் அவர் குற்றம் சாட்டியுள்ளார்.

இராமாயணத்தில் இராமனின் மனைவியான சீதையைக் கடத்தியதால் அவருக்கு எதிரியானவர் இராவணன். அரக்கனான இராவணன் கொல்லப்பட்ட தினத்தை வட இந்தியாவில் தீபாவளியாகக் கொண்டாடுகிறார்கள். அந்த வகையில், தசரா பண்டிகையின் இறுதியிலும் இராவணனின் கொடும்பாவியை எரித்து வட இந்தியர்கள் மகிழ்கின்றனர்.

இந்த நிலையில், பா.ஜ.கவின் மூத்த தலைவர் சுப்பிரமணியன் சுவாமி நேற்றுமுன்தினம் கோவாவில் ஒரு நிகழ்ச்சியில் கலந்து கொண்டார். அங்கே 'இந்திய பாரம்பரியக் கலாசாரம் மற்றும் அதன் முக்கியத்துவம்' எனும் தலைப்பில் அவர் உரையாற்றினார்.

அதில் அவர், "இராவணன் உத்தரப் பிரதேச மாநிலம், நொய்டாவில் உள்ள பிஷ்ரக் கிராமத்தில் பிறந்தவர்" எனக் கூறினார். இராமாயணத்தில் வில்லனாகச் சித்தரிக்கப்படும் இராவணன், இலங்கையில் பிறந்தவர் என்ற பிரதான கருத்தை சுவாமி மறுத்தார்.

"கருணாநிதி கூறிவந்தது போல் இராவணன் ஒரு திராவிடன் அல்ல, ஆரியன்" என்றும் சுப்பிரமணியன் சுவாமி தெரிவித்தார்.

இதுகுறித்து அவர் மேலும் கூறும்போது "வட இந்தியாவில் பிறந்ததாலும், இராவணனைக் கொன்றதாலும் தென் இந்தியர்களுக்கு இராமன் வெறுக்கத்தக்கவர் ஆகி விட்டார். இராவணன் இலங்கையில் இருந்ததால் அவர் திராவிடன் எனக் கருதப்படுவது உண்மை அல்ல"எனத் தெரிவித்தார்.

மேலும், "இராவணன் சாம வேதம் அறிந்த அறிஞர். ஆனால் இராவணனைத் தன்னைப் போல் எனத் தவறாகக் கருணாநிதி கருதி விட்டார்"என்று சுப்பிரமணியன் சுவாமி தெரிவித்தார்.

இது குறித்து தனது உரையில் சுப்பிரமணியன் சுவாமி கூறு ம்போது, "வட இந்தியா ஆரியர்களுக்கானது எனவும், தென் இந்தியர்கள் திராவிடர் என்றும் ஆங்கிலேயர் நம் மனதில் புகுத்தியது தவறான கருத்து. எனவே, நாம் அனைவரும் ஒருவரே என்பது ஏற்கப்பட வேண்டும். ஆங்கிலேயர் தம் வரலாற்று நூல்களில் எழுதியது போல் நாம் ஒன்றும் தொலைதூரத்தில் இருந்து வந்தவர்கள் அல்ல"எனத் தெரிவித்தார்.

இந்திய உத்தரப் பிரதேசத்தின் கவுதம்புத் நகர் மாவட்டத்தில் உள்ள கிரேட்டர் நொய்டாவில் பிஷ்ரக் என்னும் கிராமம் உள்ளது. இக்கிராமவாசிகள் இராவணன் அங்கு பிறந்ததாக நம்புகின்றனர். இதை நிரூபிக்கும் வகையில் அக்கிராமத்தில் உள்ள ராதா கிருஷ்ணா கோயில் வளாகத்தில் இராவணனுக்கு கடந்த வருடம் சிலை வைக்க முயற்சி செய்தனர். இதை எதிர்த்த சிலர் அந்த இராவணன் சிலையை இரவில் உடைத்து அங்கிருந்து அகற்றி விட்டனர்.

இதுகுறித்து கிரேட்டர் நொய்டா பொலிஸாரிடம் புகார் செய்யப்பட்டு வழக்குப் பதிவு செய்யப்பட்டுள்ளது. இந்தச் சிலையை உடைத்ததாக அருகிலுள்ள காஜியாபாத்தின் தூதேஷ்வர்நாத் கோயிலின் தலைமைப் பூசாரியான நாராயண் கிரி, பூசாரி கிருஷ்ணா கிரி, சதீஷ் நாகர், ஹரீஷ் சந்திரா நாகர் மற்றும் பசுப் பாதுகாப்பு தள தலைவரான சுரேந்திரா நாத் உட்பட 30 பேர் குற்றம் சாட்டப்பட்டுள்ளனர்.

ஏற்கெனவே, கான்பூர் மற்றும் ஜோத்பூர் ஆகிய இடங்களில் எதிர்ப்புகளை மீறி இராவணனுக்கு கோயில் அமைக்கப்பட்டு, வழிபாடுகள் மேற்கொள்ளப்படுவது குறிப்பிடத்தக்கது.

கறுத்தக்கொழும்பானுக்கு சவாலாகும் ரிஜேசி


முதலாவது மாம்பழ உற்பத்தி வலயம், யாழ்ப்பாணம் மற்றும் தம்புள்ள ஆகிய இடங்களில் உருவாக்கப்படவுள்ளது. “நாமே வளர்த்து நாமே சாப்பிவோம்” என்ற தொனிப்பொருளின் கீழ், இந்த விவசாய அபிவிருத்தி திட்டம், முன்னெடுக்கப்படவுள்ளது என்று சிறிலங்காவின் விவசாய அமைச்சர் மகிந்த அமரவீர தெரிவித்துள்ளார்.

“இந்த திட்டத்தின் கீழ் முதலாவது விவசாய அறுவடை வலயம், தம்புள்ள மற்றும் யாழ்ப்பாணத்தில் நிறுவப்படும்.

உலக வங்கியின் உதவியுடன் நடைமுறைப்படுத்தப்படும் இந்த விவசாய நவீனமயப்படுத்தல் திட்டத்தின் கீழ், ரிஜேசி (Tom & JC mango) வகையைச் சேர்ந்த ஒரு இலட்சம் மாங்கன்றுகள் நடுகை செய்யப்படும்.

முதற்கட்டமாக, 12500 மாங்கன்றுகள், தம்புள்ளவில் நாட்டப்படவுள்ளன.

ரிஜேசி மாம்பழம், இலகுவாக பயிரிடக் கூடியது. உலர் மற்றும் ஈரவலயங்களில்  நன்றாக வளரக் கூடியது. ஆண்டு முழுவதும் காய்க்கக் கூடியது. இதற்கு உள்ளூரிலும், வெளிநாடுகளிலும் நல்ல கேள்வி உள்ளது.

ஏற்றுமதிச் சந்தையை இலக்கு வைத்து இந்த மாம்பழங்களை உற்பத்தி செய்யும் போது, விவசாயிகளால் அதிக வருவாயை பெற முடியும்.

எதிர்வரும் 28ஆம் நாள், யாழ்ப்பாணம், தம்புள்ளவில் முதலாவது மாம்பழ உற்பத்தி வலயத்தை உருவாக்கும், ஆரம்ப நிகழ்வு இடம்பெறவுள்ளது என்றும் அவர் தெரிவித்துள்ளார்.

பிரதமர் ரணில் வெறுமனே, கனவு கண்டுகொண்டிருக்கிறார் - மஹிந்த

நாட்டில் காணப்படும் பிரச்சினைகள் தொடர்பில், பிரதமர் ரணில் விக்கிரமசிங்கவிடம், தெளிவான திட்டமேதும் இல்லை எனத் தெரிவித்துள்ள முன்னாள் ஜனாதிபதி மஹிந்த ராஜபக்‌ஷ, அவர் வெறுமனே கனவு கண்டுகொண்டிருக்கிறார் எனவும் விமர்சித்தார். 

போயா தின நிகழ்வுகள், தங்காலையிலுள்ள முன்னாள் ஜனாதிபதியின் இல்லத்தில் நேற்று (24) நடைபெற்ற பின்னர், ஊடகங்களுக்குகருத்துத் தெரிவிக்கும் போதே, அவர் இவ்வாறு தெரிவித்தார். 

பாதாள உலகக் குழுக்கள், தெற்கில் மாத்திரமன்றி, நாடு முழுவதிலும் காணப்படுகின்றன எனக் குறிப்பிட்ட அவர், வடக்கில் காணப்படும் ஆவா குழுவை, உதாரணமாகக் குறிப்பிட்டார். இவ்வாறான குழுக்கள், பொலிஸாரால் கட்டுப்படுத்தப்பட வேண்டுமென அவர் தெரிவித்தார். 

தற்போதைய காலத்தில், தினந்தோறும் கொலைகள் இடம்பெறுகின்றன எனவும், தங்கள் காலத்தில், இவை கட்டுப்பாட்டுக்குள் காணப்பட்டன எனவும் அவர் தெரிவித்தார். நாட்டில் தற்போது காணப்படும் இந்நிலையைக் கட்டுப்படுத்த, இயலாத நிலையில் அரசாங்கம் காணப்படுகிறது என அவர் தெரிவித்தார். 

பொருளாதார நிலைமை தொடர்பில் கருத்துத் தெரிவித்த அவர், ஐக்கிய அமெரிக்க டொலரின் பெறுமதி அதிகரித்துச் செல்லுதல், பொருளாதாரத்தைப் பாதிக்கிறது எனக் குறிப்பிட்டதோடு, கார்களின் விலை அதிகரிப்பதோடு, பருப்பு, சீனி போன்ற உணவுப் பொருட்களை இறக்குமதி செய்யவும், அதிக செலவாகிறது எனக் குறிப்பிட்டார். அதேபோல், சீனி, இரண்டு களஞ்சியசாலைகளில் சேகரித்து வைக்கப்பட்டிருக்கின்ற போதிலும், அவற்றை விடுவிப்பதற்கான நடவடிக்கைகளை எடுக்கப்படவில்லை எனவும் அவர் குற்றஞ்சாட்டினார். 

அதேபோன்று, பொலிஸ் திணைக்களத்துக்குச் சொந்தமான ஸ்னைப்பர்கள் காணாமற்போயுள்ளன என்றால், அது பாரதூரமான விடயமெனத் தெரிவித்த அவர், அவ்வாறு காணாமற்போன ஸ்னைப்பர்கள், எங்கு பயன்படுத்தப்படுகின்றன என்ற கேள்வி எழுகிறது எனத் தெரிவித்தார். 

ஜனாதிபதியும் பாதுகாப்பு அமைச்சின் முன்னாள் செயலாளரும் கொல்லப்பட வேண்டுமென்ற முயற்சிகள் மேற்கொள்ளப்பட்டன என்பது தொடர்பாகச் செய்தி வெளியாகியிருந்த நிலையில், அதைச் சுட்டிக்காட்டிய அவர், அது தொடர்பான சந்தேகநபர்களுக்கெதிராக, எந்த நடவடிக்கையும் எடுக்கப்படவில்லை என்றும் விமர்சித்தார்.   

சவூதியின் திட்டத்தை வரவேற்கும் ரணில், இலங்கையின் இறக்குமதிகளை குறைப்பதாக அறிவிப்பு

தற்போதைய பொருளாதார நிலைமைகளின் கீழ், 500 மில்லியன் ஐக்கிய அமெரிக்க டொலர்கள் அல்லது 1 பில்லியன் ஐ.அமெரிக்க டொலர்கள் பெறுமதியிலான இறக்குமதிகளை, அரசாங்கம் குறைக்க வேண்டியிருக்குமென, பிரதமர் ரணில் விக்கிரமசிங்க, நேற்று (24) தெரிவித்தார்.

கடனை முகாமை செய்வது தொடர்பாக, நிதியமைச்சுடன் பேச்சுவார்த்தைகள் மேற்கொள்ளப்பட்டு வருகின்றன எனவும், அவர் மேலும் குறிப்பிட்டார். 

ஹம்பாந்தோட்டையில், டி.எஸ். சேனாநாயக்க கமவைத் திறந்துவைக்கும் நிகழ்வில், பிரதமர் கலந்துகொண்டு உரையாற்றுகையிலேயே, இவ்வாறு தெரிவித்தார். 

தொடர்ந்து கருத்துத் தெரிவித்த அவர், “நிதியமைச்சருடன் கலந்துரையாடல்களை மேற்கொண்டு வருகிறோம். கடந்த வாரமும் கலந்துரையாடலொன்று மேற்கொள்ளப்பட்டது. தீர்வைகளை அதிகரிப்பதன் மூலமாக, இறக்குமதிகளை 500 மில்லியன் ஐ.அமெரிக்க டொலர்கள் அல்லது 1 பில்லியன் ஐ.அமெரிக்க டொலர்களால் குறைக்கவே, அரசாங்கம் எதிர்பார்க்கிறது” எனத் தெரிவித்தார். 

ஐ.அமெரிக்காவில் கைத்தொழில் உற்பத்தி அதிகரித்திருக்கிறது எனத் தெரிவித்த அவர், அந்நாட்டு ஜனாதிபதி டொனால்ட் ட்ரம்ப்பால் வழங்கப்பட்ட வரிச் சலுகைகள் காரணமாக, அந்நாட்டு மக்கள், அதிகமாகச் செலவிடுகின்றனர் எனவும் தெரிவித்தார். அத்தோடு, ஐ.அமெரிக்காவின் வட்டி வீதங்களும் அண்மையில் அதிகரிக்கப்பட்டுள்ளன எனத் தெரிவித்த பிரதமர், அதனால் முதலீட்டாளர்கள், தமது பணங்களை, ஐ.அமெரிக்காவில் முதலிடுகின்றனர் எனக் குறிப்பிட்டார். இலங்கையின் பங்குப் பரிவர்த்தனையில் முதலிட்டிருந்தோரில், 400 மில்லியன் ஐ.அமெரிக்க டொலர்கள் அளவுக்கு, பணம் வெளியே எடுக்கப்பட்டுள்ளது எனத் தெரிவித்த பிரதமர், எங்கே அதிக இலாபம் கிடைக்கிறதோ, அங்கேயே முதலிடுவதற்கு முதலீட்டாளர்கள் விரும்புவர் என்பது வெளிப்படை எனவும் குறிப்பிட்டார். 

“இது, எங்களால் தொடங்கப்பட்ட பிரச்சினை இல்லை. ட்ரம்ப் நிர்வாகத்தால் வழங்கப்பட்ட சலுகைகளும், வட்டி வீதங்களை அதிகரிப்பதற்காக அவர் எடுத்த முடிவும், இப்பிரச்சினையை ஏற்படுத்தியுள்ளது. இந்நடவடிக்கை, ஏனைய நாடுகளையும் பாதித்துள்ளது” என்று அவர் தெரிவித்தார். 

எண்ணெய் விலை தொடர்பாகக் கருத்துத் தெரிவித்த அவர், ரஷ்யா மீதும் ஈரான் மீதும், ஐ.அமெரிக்காவால் விதிக்கப்பட்ட தடைகளின் காரணமாகவே, விலை அதிகரித்துள்ளது எனத் தெரிவித்ததோடு, ரூபாயின் மதிப்புக் குறைந்தமையும் பங்களித்துள்ளது என்று தெரிவித்தார். எனினும், அடுத்த 6 மாதங்களுக்கு, தினந்தோறும் 1.5 மில்லியன் பரல்களைச் சந்தையில் விடுவதற்கு, சவூதி அரேபியா சம்மதித்துள்ளது எனத் தெரிவித்த அவர், இது, நிவாரணமாக அமைந்துள்ளதெனவும் குறிப்பிட்டார். 

இதேவேளை, இப்பிரச்சினையை அரசாங்கம் எவ்வாறு எதிர்கொள்ளப் போகிறது என, முன்னாள் ஜனாதிபதி மஹிந்த ராஜபக்‌ஷ கேள்வியெழுப்பியிருந்த நிலையில், முன்னைய அரசாங்கம், வர்த்தகக் கடன் வாங்கலில் ஏன் ஈடுபட்டது எனவும், பயன்தராத செயற்றிட்டங்களில் எதற்காக முதலிட்டது எனவும் கேள்வியெழுப்ப விரும்புவதாக, பிரதமர் பதிலளித்தார். 

அத்தோடு, இப்பிரச்சினையிலிருந்து, அரசாங்கம் தப்பியோடி விடாது என, பிரதமர் உறுதியளித்தார். “மறை வளர்ச்சியைப் பதிவுசெய்த பொருளாதாரமொன்று எனக்கு வழங்கப்பட்டது. அதை நான் தீர்த்தேன். ஆகவே, தற்போதைய நெருக்கடியையும் நான் தீர்ப்பேன். ஆகவே, என்னை நம்புமாறு, மக்களிடம் கோருகிறேன்” என, பிரதமர் மேலும் குறிப்பிட்டார். 

-யொஹான் பெரேரா-

September 24, 2018

தமிழர் பிரச்சினை பற்றிப் பேசும்போது, முஸ்லிம்களது பிரச்சினைகளும் இணைக்கப்பட்டாலே அதுமுழு வடிவம் பெறும்

-Hafeez-

இலங்கையில் தமிழர் பிரச்சினை பற்றிப் பேசும் போது முஸ்லிம்களது பிரச்சினைகளும் இணைக்கப்பட்டாலே அதுமுழமையான வடிவம் பெறும் என்று சாகித்திய மண்டல பரிசு பெற்ற எழுத்தாளர் மு.சிவலிங்கம் தெரிவித்தார். (24.9.2108)

கண்டியில் நடந்த வைபவம் ஒன்றிலே அவர் இதனைத் தெரிவித்தார். அவர் அதில் மேலும் தெரிவித்தாவது -

இலங்கையில் தமிழர் பிரச்சினையை வென்றெடுக்க வேண்டுமாயின் வடக்கு, கிழக்கு, மலையகம், மற்றும் முஸ்லிம்கள் என சகல குழுக்களும் இணைத்தே பேசப்படவேண்டும். அப்படியாயின் மட்டுமே அது வெற்றிபெறும். இலங்கையில் தமிழர்கள் பிரச்சினை என்று எதை எடுத்தாலும் அதில் இந்தியாவின் அழுத்தம் பல்வேறு வடிவங்களில் உள்ளதைக்காண முடிகிறது. 

ஊதாரணமாக ஸ்ரீமா- சாஸ்திரி ஒப்பந்தம் காரணமாக ஐந்து இலட்சத்து இருபத்தையாயிரம் வாக்களர்கள் தூக்கி எரியப்பட்டார்கள். அவர்களை அவ்வாறு தூககி எரிய இந்தியாவும் துணை போனது. அவர்கள் இந்தியாவிற்கு அனுப்பட்டார்கள் என்பதை விட விசரப்பட்டார்கள் என்பதே பொருத்தம். ஏனெனில் அவர்கள் அங்கு பல்வேறு திசைகளில் தூக்கி எரியப்பட்டனர் சிதைந்து போயுள்ளனர். சிறுபாக்மையினரின் பிரச்சினைகள் தேசிய பிரச்சினையாக்கப்பட வேண்டுமாயின் முஸ்லிமகள், மலையகம், வடக்கு, கிழக்கு என கூறுபோட்டுப் பார்க்கக் கூடாது. அவை தேசிய மயப்படுத்தப்பட வேண்டும். 

இன்று சிறுபான்மை சமூகங்னிடையே ஒரு பொதுத்தன்மை உண்டு. அது யாழ் மாவட்டததை மட்டும் பிடிக்காதுளளமை அதிஷ்டமே. ஏனைய பிரிவான முஸ்லிம்களும் சரி , மலைகமும் சரி ஒத்த தன்மை காணப்படுகிறது. அதுதான் மக்கள் ஜனநாய ரீதியில் வாக்களித்து தமது பிரதி நிதிகளை பாராளு மன்றம் அனுப்புகின்றனர். அவர்கள் அங்கு சென்று சொற்ப சலுகைகளுக்காக விலை போய் விடுகின்றனர். ஒரு பிரதி அமைச்சர் பதவியை வாங்கிக் கொண்டு வாய்பேசாது ஒதுங்கிக் கொள்கின்றனர். அல்லது பிரதி அமைச்ர் பதவியைக் கொடுத்து அவர்களை தள்ளி வைக்கின்றனர். பின்னர் தமது பிரதி அமைச்சுப் தவியை கைவிடவும் முடியாது. அதனால் சகூகத்திற்கு செய்தது எதுவம் கிடையாது. இந்நிலையில் அற்ப சலுகைக்கு விலை போனவர்கள் பற்றி இன்று முஸ்லிம் இளைஞர்கள் மத்தியில் பலர் சினம் கொண்டுள்ள ஒரு போக்கை அவதானிக்க முடிகிறது. 

எனவே அரசியலில் சோரம் போகாது அதே நேரம் சகல குழுககளது பிரச்சினைகளையும் இணைத்து தேசிய பிரச்சினையாக சித்திரித்து எமது உரிமைகளை வென்றெடுக்க வேண்டும் என்றும் கூறினார்.

கோலியின் கையில் பிரிந்த, அவரது அப்பாவின் உயிர்

நேஷனல் ஜியாக்ரபி தொலைக்காட்சிக்காக எடுக்கப்பட்ட ஆவணப்படத்தில், இந்திய அணியின் கேப்டன் விராட் கோஹ்லி இதுவரை வெளியில் சொல்லாத ஒரு உருக்கமான சம்பவத்தினை பகிர்ந்துள்ளார்.

இந்த சம்பவம் குறித்து விராட் கோஹ்லி கூறியுள்ள அந்த பதிவில், கடந்த 2006-ம் ஆண்டு டெல்லி மற்றும் கர்நாடக அணிகளுக்கு இடையிலான ராஞ்சி போட்டி நடைபெற்றது.

அப்பொழுது பேட்டிங் செய்த நான் 40 ரன்கள் எடுத்த நிலையில் ஆட்டமிழக்காமல் களத்தில் இருந்தேன்.

அன்று இரவு முழுவதும் நண்பர்களுடன் பேசிவிட்டு அதிகாலை 3 மணியளவில் என்னுடைய வீட்டிற்கு திரும்பினேன்.

அப்பொழுது என்னுடைய தந்தைக்கு திடீரென நெஞ்சுவலி ஏற்பட்டது. உடனே நான் அவரை தாங்கிப்பிடித்துக் கொண்டே உதவிக்கு பக்கத்து வீட்டார்களை அழைத்தேன். இரவு நேரம் என்பதால் யாரும் உதவிக்கு வரவில்லை.

பின்னர் சிறிது நேரம் கழித்து ஆம்புலன்ஸ் வந்து சேர்ந்தது. அதற்குள் என் தந்தையின் உயிரும் என்னுடைய கைகளிலே பிரிந்தது. நான் கண்ணீர் விட்டு கதறி அழுதேன். அந்த தருணத்தை என்னுடைய வாழ்நாளில் மறக்கவே முடியாது.

அன்று முதல் தான் என்னுடைய தன்னம்பிக்கை அதிகரித்தது. என்னுடைய கனவுகளையும், தந்தையின் கனவுகளையும் நனவாக்க முயற்சி செய்தேன். அதற்காக கடுமையாக முயற்சித்தேன்.

என்னுடைய தந்தை இறந்ததால் அடுத்தநாள் விளையாட செல்ல மாட்டேன் என அனைவரும் நினைத்திருந்தனர். மற்றவர்களின் நினைப்பை பொய்யாக்கும்படி அடுத்தநாள் நான் விளையாட சென்றேன் என அவர் தெரிவித்துள்ளார்.

49 நாள்கள் திக்குத்தெரியாமல், கடலில் மிதந்த இளைஞன்


இந்தோனீசிய இளைஞர் ஒருவர் நாற்பத்து ஒன்பது நாள்கள் கடலில் திக்கு தெரியாமல் தவித்து மீண்டிருக்கிறார். ஒரு மீன்பிடி குடிசையில் கடல் நீரை குடித்து, தனது குடிசை படகில் இருந்து மரக்கட்டைகளை பயன்படுத்தி கடல் மீன்களை உண்டு இவ்வளவு நாள்கள் தாக்குப்பிடித்திருக்கிறார்.

இந்தோனீசிய கடல் பகுதியில் இருந்து 77 மைல் (125 கிமி) தொலைவில் ஒரு மீன்பிடி குடிசையில் அல்டி நோவல் அடிலங் இருந்துவந்தார். கடந்த ஜூலை மாதம் கடுமையான சூறாவளி காற்று காரணமாக 19 வயது இளைஞர் அடிலங் திக்குதெரியாதநிலையில் குவாம் கடல் பகுதியில் தனித்துவிடப்பட்டார்.

பனாமா கப்பல் ஒன்று மூலமாக அவர் மீட்கப்பட்டார். இந்தோனீசியாவின் சுலாவெசி தீவைச் சேர்ந்த அந்த பத்தொன்பது வயது இளைஞர் 'ராம்பாங்' எனப்படும் துடுப்புகளற்ற, எந்திரம் இல்லாத ஒரு மிதவை மீன்பிடி குடிசையில் வேலை செய்துவந்தார்.

ராம்பாங் விளக்குகளை போடுவதன் மூலம் மீன்களை வலையில் வீழ்த்தும் வேலைதான் அல்டி நோவல் அடிலங்கின் பணி என்கிறது ஜகார்டா போஸ்ட் செய்தித்தாளின் அறிக்கைகள்.

ஒவ்வொருவாரமும் அம்மீன்பிடி குடிசைக்குச் சொந்தக்காரர் தனது நிறுவனத்தின் ஒரு வேலையாள் மூலம் அடிலங்கிற்கு உணவு, தண்ணீர், மற்றும் எரிபொருள் போன்றவற்றை வழங்கிவிட்டு, மிதவை மீன்படி குடிசையில் சிக்கிய மீன்களை பெற்றுக்கொள்வார்.

'அடிக்கடி அழுத அடிலங்'
கடந்த ஜூலை 14-ம் நாள் அடிலங்கின் ’ராம்பாங்’ கடுமையான சூறாவளி காற்றின் தாக்குதலில் சிக்கியது. அப்போது அவரிடம் உணவுப்பொருள்கள் ஓரளவுதான் இருந்தது. ஆகவே அவர் மீன்பிடித்து தனது மீன்பிடி குடிசையின் மர வேலியில் இருந்து மரக்கட்டைகளை எடுத்து மீன்களை சுட்டுச் சாப்பிட்டார்.

தி ஜகார்ட்டா போஸ்ட் நாளிதழலானது திக்கில்லாமல் குடிசை மிதந்ததால் அடிலங் பயந்துவிட்டதாகவும் அடிக்கடி அழுது கொண்டிருந்ததாகவும் ஒசாகாவில் இந்தோனீசிய தூதுவர் ஃபஜர் ஃபர்தாஸ் தெரிவித்ததாக செய்தி வெளியிட்டுள்ளது.

''ஒவ்வொரு முறை அவர் ஓரு பெரிய கப்பலை பார்க்கும்போதும் அவருக்கு தான் காப்பாற்றப்படுவோம் என நம்பிக்கை பிறந்தது. ஆனால் பத்துக்கும் அதிகமான பெருங்கப்பல் அவரை கடந்து சென்றன. ஆனால் எவரும் அவரை பார்க்கவில்லை அல்லது கப்பலை நிறுத்தவில்லை'' என ஃபஜர் ஃபர்தாஸ் கூறியிருக்கிறார்.

கடந்த ஆகஸ்ட் 31-ம் தேதி தனக்கு அருகில் இருந்த எம்வி அர்பெக்கியோ கப்பலை பார்த்ததும் அடிலங் ஒரு அவசரநிலை செய்தியை ரேடியோ சமிக்ஞை மூலமாக அனுப்பினார். குவாம் தீவின் கடல் பகுதியில் இருந்த ஒரு பனாமா கப்பல் அந்த அழைப்பை எடுத்தது.

அக்கப்பலின் கேப்டன் குவாம் கடற்கறை பாதுகாப்பு அதிகாரியை தொடர்புகொண்டார். அவர் ஒரு குழுவை அனுப்பி அவரை மீட்டு ஜப்பானுக்கு கொண்டுவர அறிவுறுத்தினார் என்கிறது ஒசாகாவின் இந்தோனீசிய தூதரக ஜெனெரலின் பேஸ்புக் பக்கம்.

அடிலங் செப்டம்பர் ஆறாம் தேதி ஜப்பானை அடைந்தார். இரண்டு நாட்களுக்கு பின்னர் அவர் இந்தோனீசியாவுக்கு பறந்தார். தற்போது தனது குடும்பத்தினருடன் மீண்டும் இணைந்திருக்கிறார் அந்த 19 வயது இளைஞர்.

எஞ்சலோ மெத்தியுசின் மனவேதனை - அணியிலிருந்து விலகவும் தயார் என்கிறார்


இலங்கை அணியின் தேர்வு குழுவின் தலைவர் மற்றும் தலைமை பயிற்சியாளர் தன்னை ஒருநாள் மற்றும் இருபதுக்கு இருபது அணிகளின் தலைவர் பதவியில் இருந்து விலகுமாறு அறிவித்ததாக எஞ்சலோ மெத்தியுஸ் தெரிவித்துள்ளார். 

இது தொடர்பில் அவர் இலங்கை கிரிக்கட் நிறுவனத்தின் நிறைவேற்று அதிகாரி ஏஸ்லி த சில்வாவிற்கு கடிதமொன்றை அனுப்பியுள்ளார். 

ஆசிய கிண்ணத் தொடரில் இலங்கை அணி படுதோல்வியடைந்த முழுப்பொறுப்பும் தன் மீது சுமத்த நடவடிக்கைகள் மேற்கொள்ளப்பட்டுள்ளதாக அவர் குறிப்பிட்டுள்ளார். 

எவ்வாறாயினும், தோல்வியின் ஒரு பங்காளியாக தான் இருப்பினும், அதன் முழுப்பொறுப்பையும் தன்னால் ஏற்க முடியாது என அவர் குறிப்பிட்டுள்ளார். 

சுமார் 5 வருடங்களாக இலங்கை அணியின் தலைவராக கடமையாற்றிய தான் கடந்த 2017 ஆம் ஆண்டு பதவி விலகியதாகவும், தான் தலைவராக இருந்த காலப்பகுதியில் இலங்கை அணிக்கு பல வெற்றிகளை தேடித்தந்ததாகவும் அவர் சுட்டிக்காட்டியுள்ளார். 

தலைவர் பொறுப்பில் இருந்து விலகியிருந்த காலத்தில் அணியின் பயிற்சியாளர் மற்றும் தேர்வு குழுவின் கோரிக்கைக்கு அமைய ஒருநாள் மற்றும் இருபதுக்கு இருபது அணித்தலைவராக மீண்டும் பொறுப்பேற்றதாக அவர் குறிப்பிட்டுள்ளார். 

எவ்வாறாயினும் அணியின் உறுப்பினர் என்ற அடிப்படையில் அணிக்காக எந்தவொரு சந்தர்ப்பத்திலும் தனது முழு ஒத்துழைப்பையும் வழங்க தயாராக இருப்பதாகவும் அவர் குறிப்பிட்டுள்ளார். 

இலங்கை கிரிக்கெட் அணிக்கு தான் தகுதியற்றவர் என்றால் அணியில் இருந்து விலகவும் தயாராக உள்ளதாக அவர் தெரிவித்துள்ளார். 

தனது மனச்சாட்சியின் அடிப்படையில் தனது ஒத்துழைப்பை வழங்கியதாகவும் அவர் குறித்த கடிதத்தில் குறிப்பிட்டுள்ளார். 

மேலும் கடிதத்தின் இறுதியில் அண்மையில் தென் ஆபிரிக்கா அணியுடன் இடம்பெற்ற போட்டியில் கூடிய ஓட்டங்களை பெற்ற வீரர் தான் என்று குறிப்பிட்டுள்ளார்.

10 ஆம் வகுப்பு மாணவிக்கு செல்போன் வாங்கிக்கொடுத்து, பாலியல் வல்லுறவுசெய்தவன் கைது

தணமல்வில செவனகல பிரதேசத்தில் பாடசாலை மாணவியை வல்லுறவுக்கு உட்படுத்திய ஒருவரை பொலிஸார் கைதுசெய்துள்ளனர்.

செவனகல பிரதேசத்தில் விவசாய வேலைக்கு சென்றிருந்த 22 வயதான இளைஞனே இவ்வாறு கைதுசெய்யப்பட்டுள்ளார். அதே பிரதேசத்தில் பிரபல பாடசாலை ஒன்றில் 10 ஆம் தரத்தில் கல்வி கற்று வரும் மாணவியே சந்தேக நபரால் பாலியல் வல்லுறவுக்கு உட்படுத்தப்பட்டுள்ளார்.

பிரதேசத்தில் நடைபெற்ற வைபவம் ஒன்றில் சந்தேக நபர் முதலில் மாணவியை சந்தித்துள்ளார். இதன் பின்னர் இருவரும் காதலித்து வந்துள்ளனர். சந்தேக நபர், மாணவிக்கு செல்போன் ஒன்றை கொள்வனவு செய்து கொடுத்துள்ளார்.

மாணவியின் பெற்றோர் வீட்டில் இல்லாத நேரத்தில், சந்தேக நபர் மாணவியின் வீட்டுக்கு சென்று வல்லுறவில் ஈடுபட்டுள்ளதாக விசாரணைகளில் தெரியவந்துள்ளது.

சந்தேக நபர் இன்று வெல்லவாய நீதவான் நீதிமன்றத்தில் ஆஜர்ப்படுத்தப்பட்டு விளக்கமறியலில் வைக்கப்பட்டுள்ளார். மாணவி, மருத்துவப் பரிசோதனைக்காக வைத்தியசாலையில் அனுமதிக்கப்பட்டுள்ளார். செவனகல பொலிஸார் மேலதிக விசாரணைகளை மேற்கொண்டு வருகின்றனர்.

மண் கவ்விய முஸ்லிம் கட்சிகள் - முதலிடம் பிடித்த ஜே.வி.பி.

செயற்பாட்டுத்திறன் மிக்க நாடாளுமன்ற உறுப்பினர்களின் பட்டியலில் ஜே.வி.பி. கட்சி முதலிடம் பிடித்துள்ளது.

நாடாளுமன்றத்தின் பதவிக்காலம் மூன்று வருடங்களை பூர்த்தி செய்துள்ள நிலையில் Manthri.lk இணையத்தளம் நாடாளுமன்ற உறுப்பினர்களின் செயற்பாட்டுத்திறன் குறித்த ஆய்வொன்றை மேற்கொண்டுள்ளது.

அதன் பிரகாரம் செயற்பாட்டுத்திறன் கொண்ட முதல் பத்து உறுப்பினர்களில் நான்கு பேர் ஜே.வி.பியின் நாடாளுமன்ற உறுப்பினர்களாக தெரிவாகியுள்ளனர்.

பட்டியலின் முதல் இடத்தில் ஜே.வி.பி தலைவர் அனுரகுமார திசாநாயக்க காணப்படுகின்றார். டொக்டர் நளிந்த ஜயதிஸ்ஸ இரண்டாம் இடத்திலும் , பிமல் ரத்நாயக்க மூன்றாம் இடத்திலும் உள்ளனர்.

நான்காம் இடத்தில் ஐ.தே.க.வின் புத்திக பதிரணவும், ஜே.வி.பி.யின் சுனில் ஹந்துன்னெத்தி ஐந்தாம் இடத்திலும், கூட்டு எதிர்க்கட்சியின் பந்துல குணவர்த்தன ஆறாம் இடத்திலும், ஐ.தே.க.வின் கயந்த கருணாதிலக்க ஏழாம் இடத்திலும், எட்டாம் இடத்தில் ஈ.பி.டீ.பியின் தலைவர் டக்ளஸ் தேவானந்தா, ஒன்பதாம் இடத்தில் கூட்டு எதிர்க்கட்சியின் தினேஷ் குணவர்த்தன, பத்தாம் இடத்தில் தமிழ்த் தேசியக் கூட்டமைப்பின் ஶ்ரீநேசன் ஆகியோர் தெரிவு செய்யப்பட்டுள்ளனர்.

சுதந்திரக்கட்சி, தமிழ் முற்போக்குக் கூட்டணி, முஸ்லிம் காங்கிரஸ் மற்றும் அகில இலங்கை மக்கள் காங்கிரஸ் கட்சிகளின் பிரதிநிதிகள் யாரும் முதல் பத்து இடங்களுக்குள் தெரிவு செய்யப்படவில்லை என்பது குறிப்பிடத்தக்கது.

வெளிநாடுகளிலிருந்து இலங்கை வருகிறீர்களா..? இந்த அறிவிப்பை வாசிக்கத்த தவறாதீர்கள்


வெளிநாட்டில் இருந்து இலங்கை வருபவர்களுக்கு கட்டுநாயக்க விமான நிலையத்தின் சுங்க பிரிவு அதிகாரிகள் இன்று 24.09.2018 முக்கிய அறிவிப்பு ஒன்றை விடுத்துள்ளனர்.

வெளிநாடுகளில் இருந்து கொண்டு வரப்படும் பொருட்கள் தொடர்பில் விசேட கவனம் செலுத்துமாறு பயணிகளை கேட்டுள்ளனர்.

மரக்கறிகள், இறைச்சி, மீன், பழங்கள் போன்றவைகள் கட்டுநாயக்க விமான நிலையம் ஊடாக இலங்கைக்கு கொண்டு வரும் போது, அவற்றினை கொள்வனவு செய்த நாடுகளில் அது தொடர்பான சிறப்பு சான்றிதழை பெற்றிருக்க வேண்டும் என சுங்க பிரிவு தெரிவித்துள்ளது.

சிறப்பு சான்றிதழ் இன்றி கொண்டு வரப்படும் அனைத்து பொருட்களும் பறிமுதல் செய்யப்பட்டு விவசாய திணைக்களத்தின் அதிகாரிகளுக்கு அனுப்பப்படும். பின்னர் அவற்றினை அழிப்பதற்கு நடவடிக்கை மேற்கொள்ளப்படும் என சுங்க பேச்சாளர் சுங்க ஜயரத்ன தெரிவித்துள்ளார்.

இலங்கை மக்களை வெளிநாட்டு கிருமிகள், நோய்களிலிருந்தும் பாதுகாப்பதற்காகவும், இலங்கை பயிர் செய்கைகளை காப்பற்றுவதற்காகவும், பாதுகாப்பு நடவடிக்கையாக இந்த தீர்மானம் மேற்கொள்ளப்பட்டுள்ளதாக அவர் குறிப்பிட்டுள்ளார்.

மேற்கத்திய நாடுகள் போன்று அவுஸ்திரேலியா, நியூசிலாந்து போன்ற நாடுகளிலும் சட்டம் உரிய முறையில் செயற்படுத்தப்படும். தவறுதலாக நாங்கள் கொண்டு செல்லும் பாதணியில் எங்கள் நாட்டு மண் ஒட்டியிருந்தால் அதற்கும் வெளிநாடுகள் சட்டத்தை செயற்படுவதாக சுங்க பேச்சாளர் மேலும் தெரிவித்துள்ளார்.

இதேவேளை நேற்றையதினம் வெளிநாட்டிலிருந்து பெண்ணொருவரினால் கொண்டுவரப்பட்ட பல்வேறு பொருட்கள் சுங்க அதிகாரிகளால் பறிமுதல் செய்யப்பட்டமை குறிப்பிடத்தக்கது.

நாம் உலக கிண்ணத்தை வெல்வது கடினம், ஆதங்கத்தை கொட்டித் தீர்த்தார் அர்ஜுன


2019 ஆம் ஆண்டு உலக கிண்ணத்தை நாம் வெல்வது கடினமே. காரணம் கிரிக்கெட் அந்தளவு தூரம் இன்று கீழ் நிலைக்கு தள்ளப்பட்டுள்ளது. இதற்கு புக்கி கரர்களளே பிரதான காரணம் என அமைச்சர் அர்ஜுன ரணதுங்க தெரிவித்துள்ளார்.

இது தொடர்பில் மேலும் கருத்து தெரிவித்த அவர்,

கடந்த அரசாங்கத்தில் விளையாட்டுத்துறை அமைச்சரிடம் சில குறைபாடுகள் காணப்பட்டாலும் அவர் சட்டத்தை சரியான முறையில் நடைமுறைபடுத்தி புக்கிகரர்களையும் சூதாட்டக்காரர்களையும் கிரிக்கெட் நிர்வாகத்தில் சேர்க்கவில்லை. 

ஆனால் தயாசிறி விளையாட்டுத்துறை அமைச்சரானதும் என்ன நடந்தது? அவர் ஒரு சட்டத்தரணி எனினும் கிரிக்கெட் சட்டத்தை சரியாக தெரியாமல் கிரிக்கெட் நிர்வாகத்தில் புக்கிகாரர்களையும் சூதாட்டக்காரர்களையும் வரவழைத்தார். 

இன்று புக்கிகாரர்களினாலேயே நாட்டின் கிரிக்கெட் விளையாட்டு சிதைந்துபோய் உள்ளது. ஆகவே கிரிக்கெட் கீழ்நிலைக்கு சென்றதற்கு அவர் பொறுப்புக்கூற வேண்டும்.

அத்துடன் தயாசிறி நினைப்பது அவர் ஒரு சிறந்த வீரர் என்று. தனது உடல் கட்டமைப்பை காட்டி ஒருவர் வீரராக முடியாது.  தயாசிறி கிராமத்தில் விளையாட்டு மைதானம் அமைக்க நிதிகொடுத்தார் என சொல்லப்படுகிறதே, எவ்வளவு நிதி போயுள்ளது என்பதை தேடிப்பாருங்கள். 

அந்ந நிதி உண்மையில் விளையாட்டு மைதானம் அமைக்க பயன்படுத்தப்பட்டுள்ளதா? நான் நினைக்கின்றேன் தயாசிறியை பற்றி என்னிடம் கேட்பதை விட ஜீ.எல் பீரிஸ் அல்லது மஹிந்த ராஜபக்ஷவிடம் கேளுங்கள்.  அவர்கள் சொல்வார்கள் தயாசிறி யார் என்று. 

மேலும் நான் ஆறு மாதங்களுக்கு முன்பாகவே எதிர்வு கூறினேன் இலங்கை அணி பங்களாதேஷ் அணியுடனும் ஆப்கானிஸ்தான் அணியுடனும் தோல்வியை தழுவிக் கொள்ளும் என்று அவ்வாற‍ே இன்று நடந்துள்ளது. ஏனெனில் இன்று அந்தளவுக்கு எமது கிரிக்கெட் கீழ்நிலைக்கு சென்றுள்ளது. 

ஆனால் எமது வீரர்களை எம்மால் முன்னேற்ற முடியும். நான் எப்பாதும் சொல்வது யாப்பினை மாற்றுங்கள். அதன் பின் தேர்தலை நடத்துங்கள். அது வரை தற்காலிக குழுவொன்றை நியமியுங்கள். அப்படி அமைக்க முடியவில்லை என்றால் முன்னாள் வீரர்களை பயன்படுத்தி, கிரிக்கெட்டை முன்னேற்றுங்கள். தற்போதைய அமைச்சருக்கும் இது தொடர்பான பொறுப்புள்ளது.

அத்துடன் ஆசியக் கிண்ணத் தொடரில் இலங்கை அணி அடைந்த தோல்விக்கு அணித்தலைவரை குறைசொல்ல முடியாது. தெரிவுக்குழு முழுப்பொறுப்பையும் ஏற்க வேண்டும் என்றும் அவர் சுட்டிக்காட்டினார்.

சிங்கள பௌத்த வாக்குகளை பெற்றுக்கொள்ள நடவடிக்கை எடுக்கப்படும் - நவின்

சிங்கள பௌத்த வாக்குகளை பெற்றுக் கொள்ள நடவடிக்கை எடுக்கப்படும் என ஐக்கிய தேசியக் கட்சியின் தேசிய அமைப்பாளர் நவின் திஸாநாயக்க தெரிவித்துள்ளார்.

கொழும்பில் நேற்று நடைபெற்ற செய்தியாளர் சந்திப்பில் பங்கேற்று உரையாற்றிய போது அவர் இதனை குறிப்பிட்டுள்ளார். அவர் மேலும் கூறுகையில்,

ஐக்கிய தேசியக் கட்சியின் தேசிய அமைப்பாளர் என்ற வகையில் எனக்கு சுதந்திரமாக செயற்பட அனுமதிக்கப்பட வேண்டும்.

அவ்வாறு சுயாதீனமாக இயங்குவதற்கு சந்தர்ப்பம் வழங்கப்பட்டால் கட்சியின் வலுவான விடயங்களை வெளிக்கொணர்ந்து கட்சியை வலுப்படுத்துவேன்.

கட்சியின் இளைஞர் அணி மற்றும் இரண்டாம் நிலை தலைவர்கள் கட்சியை அடுத்த கட்டத்திற்கு நகர்த்த வேண்டுமென்றே விரும்புகின்றார்கள்.

இவர்கள் மத்தியில் எவ்வித முரண்பாடுகளும் போட்டிகளும் கிடையாது. நீண்ட காலமாக அரசியலில் ஈடுபட்டு வருவதனால் தேசிய அமைப்பாளர் பதவியை வகிப்பதில் சிரமங்கள் கிடையாது.

கடந்த தேர்தலில் நுவரெலியா மாவட்டத்தில் பெரும்பான்மை பலம் நிரூபிக்கப்பட்டது. இதேபோன்று தேசிய ரீதியில் சில திட்டங்களை வகுத்து கட்சியை முன்னோக்கி நகர்த்த முடியும்.

கட்சியின் சில தொகுதி அமைப்பாளர்களை நீக்குவதற்கு நடவடிக்கை எடுக்கப்பட உள்ளது. கட்சியிடமிருந்து கைவிட்டுப் போன சிங்கள பௌத்த வாக்குகளை பெற்றுக் கொள்ள நடவடிக்கை எடுக்கப்படும் என கூறியுள்ளார்.

நான் எப்போதும், எங்கு சென்றாலும் வீட்டில் சமைத்த உணவினையே உட்கொள்ளுவேன் - ஜனாதிபதி


ஜனாதிபதி மைத்திரிபால சிறிசேனவின் காலை உணவை பார்த்து தென் மாகாண முதலமைச்சர் ஆச்சரியமடைந்த சம்பவம் ஒன்று இடம்பெற்றுள்ளது.

கடந்த வாரம் கடல் பாதுகாப்பு வாரத்தை முன்னிட்டு, ஜனாதிபதி காலி மாவட்டத்திற்கு விஜயம் மேற்கொண்டிருந்தார்.

ஜனாதிபதியை அழைத்து வந்த ஹெலிகொப்டர் தடல்ல மைதானத்திற்கு சென்ற போது தென் மாகாண முதலமைச்சர் ஷான் விஜயலால் டி சில்வாவும் அங்கு சென்றிருந்தார்.

இதன்போது, தான் இன்னமும் காலை உணவு பெற்றுக் கொள்ளவில்லை. தேரர் ஒருவரை பார்ப்பதற்கு சென்றமையினால் உணவு பெற்றுக் கொள்ள முடியவில்லை. எனவே சாப்பிட்ட பின்னர் செல்வோம் என ஜனாதிபதி கூறியவாறு வாகனத்தில் ஏறியுள்ளார்.

இதன்போது பாதுகாப்பு அதிகாரி ஜனாதிபதியிடம் உணவு பார்சல் ஒன்றை வழங்கியுள்ளார்.

சார் என்ன இதுவென அதிர்ச்சியுடன் ஷான் விஜயலால் கேட்டுள்ளார்.

ஏன் ஷான் அதிர்ச்சியடைகின்றீர்கள். நான் எப்போதும் இப்படி தான். எங்கு சென்றாலும் வீட்டில் சமைத்த உணவினையே உட்கொள்ளுவேன் என ஜனாதிபதி குறிப்பிட்டுள்ளார்.

நான் முன்னர் இந்த கதையை கேள்விப்பட்டேன். அலுவலகத்திற்கு மாத்திரம் என நினைத்தேன். எனினும் வெளியில் செல்லும் இடங்களுக்கும் கொண்டு செல்வதனை பார்த்தால் ஆச்சரியமாக உள்ளதென ஷான் குறிப்பிட்டுள்ளார்.

மகிந்த ஜனாதிபதி வேட்புமனுவை தாக்கல்செய்தால், தேர்தல் ஆணையாளர் அதனை நிராகரிக்க முடியாது

அமெரிக்க பிரஜை ஒருவருக்கு இலங்கையின் ஜனாதிபதி தேர்தலில் போட்டியிட முடியாது என்பதால், அது பற்றி தொடர்ந்தும் பேசுவதில் பயனில்லை என கூட்டு எதிர்க்கட்சியின் நாடாளுமன்ற உறுப்பினர் குமார வெல்கம தெரிவித்துள்ளார்.

கோத்தபாய ராஜபக்சவை ஜனாதிபதி வேட்பாளராக நிறுத்தவுள்ளதாக கூறப்படுவது தொடர்பில் களுத்துறையில் நேற்று ஊடகவியலாளர்கள் எழுப்பிய கேள்விக்கு பதிலளிக்கும் போதே அவர் இதனை கூறியுள்ளார். அவர் மேலும் கூறுகையில்,

நான் குடும்ப அரசியலை விரும்பவில்லை. எதிர்வரும் 2020ஆம் ஆண்டு ஜனாதிபதி தேர்தலில் முன்னாள் ஜனாதிபதி மகிந்த ராஜபக்சவுக்கு போட்டியிட முடியும்.

முன்னாள் ஜனாதிபதி வேட்புமனுவை தாக்கல் செய்தால், தேர்தல் ஆணையாளர் அதனை நிராகரிக்க முடியாது.

தேர்தலுக்கு பின்னர் வழக்குகள் தொடரப்படலாம். அந்த வழக்குகள் விசாரித்து முடிக்கப்படும் போது, மகிந்த ராஜபக்ச ஜனாதிபதி பதவியில் இருப்பார் எனவும் குமார வெல்கம குறிப்பிட்டுள்ளார்.

அதேவேளை கோத்தபாய ராஜபக்சவை கொலை செய்ய சதித்திட்டம் தீட்டப்பட்டமை தொடர்பான குற்றச்சாட்டை அரசாங்கம், கூட்டு எதிர்க்கட்சி மீது சுமத்தியுள்ளது சம்பந்தமாக எழுப்பிய கேள்விக்கு பதிலளித்துள்ள குமார வெல்கம,

கூட்டு எதிர்க்கட்சியில் அப்படியானவர்கள் இல்லை. அப்படி இருந்தால் எனக்கு தெரியும். கொலை செய்யக்கூடிய எவரும் இல்லை என தெரிவித்துள்ளார்.

தட்டுத்தடுமாறி மழுப்பிய மஹிந்தவை, விவாதத்திற்கு அழைக்கும் சஜித்

அம்பாந்தோட்டை, முன்னாள் ஜனாதிபதி மஹிந்த ராஜபக்ஷவை தன்னுடன் பகிரங்க விவாதத்துக்கு வருமாறு ஐக்கிய தேசியக் கட்சியின் பிரதித் தலைவரான அமைச்சர் சஜித் பிரேமதாச சவால் விடுத்துள்ளார்.

அம்பாந்தோட்டை - வீரகெட்டியப் பகுதியில், நேற்று நடைபெற்ற நிகழ்வில் அமைச்சர் சஜித் கலந்து கொண்டு கருத்து வெளியிட்ட போதே அவர் இவ்வாறு தெரிவித்துள்ளார்.

ரூபாவின் பெறுமதி வீழ்ச்சி உட்பட நாட்டின் சமகால பொருளாதார நிலவரங்கள் தொடர்பில் விவாதிப்பதற்காகவே சஜித்தால் மஹிந்தவுக்கு இவ்வாறு சவால் விடுக்கப்பட்டுள்ளது.

மேலும் சஜித் கருத்து தெரிவிக்கையில்,

"முன்னாள் ஜனாதிபதி மஹிந்த ராஜபக்ஷவால் பொருளாதாரத்தை வழி நடத்த முடியாது, தெரியாது. கொழும்பில் நடைபெற்ற ஊடகவியலாளர் மாநாட்டின் போது, ரூபாவின் பெறுமதி வீழ்ச்சி தொடர்பில் அவரிடம் எழுப்பப்பட்ட கேள்விக்கு தட்டுத்தடுமாறி மழுப்பல் போக்கில் பதில் வழங்கினார்.

அவரது ஆட்சிக்காலத்தில் நாட்டின் பொருளாதாரம் எப்படி இருந்தது என்பது அனைவருக்கும் தெரியும். எனவே, ரூபாவின் பெறுமதி உட்பட பொருளாதாரம் தொடர்பில் என்னுடன் தேசிய மட்டத்திலான பகிரங்க விவாதத்துக்கு மஹிந்த தயாரா? ஆங்கிலம், சிங்களம் எந்தமொழியாக இருந்தாலும் நான் தயாராகவே இருக்கின்றேன்" என தெரிவித்துள்ளார்.

Older Posts