December 02, 2021

சஹ்ரானின் மனைவிக்கு எதிராக, கல்முனை நீதிமன்றத்தில் வழக்கு


உயிர்த்த ஞாயிறுத் தாக்குதலின் பிரதான சூத்திரதாரியும், தௌஹீத் ஜமாஅத் இயக்கத்தின் தலைவரென அறியப்பட்டவரும் தற்கொலைத்தாரியுமான சஹ்ரான் ஹாசிமின் மனைவிக்கு எதிராக வழக்குத் தாக்கல் செய்யப்பட்டுள்ளது.

அவருக்கு எதிரான குற்றப்பத்திரிகையை சட்டமா அதிபர் திணைக்களம்,  கல்முனை மேல் நீதிமன்றத்தில் தாக்கல் செய்துள்ளது.

ஹெல்மட் அணிந்து சமைக்கும் பெண்


நாட்டில் தற்போது தொடர்ச்சியாக இடம்பெற்று வரும் எரிவாயு அடுப்புகள் திடீர் திடீரென வெடிப்பதால் மக்கள் பெரும் அச்சத்துக்குள்ளாகியுள்ளனர்.

குறிப்பாக இந்த திடீர் வெடிப்பால் இல்லத்தரசிகளே அதிகம் பாதிக்கப்படுகின்றனர்.

இந்த நிலையில் சில இல்லத்தரசிகள் எரிவாயு அடுப்பில் சமையல் செய்யும் போது பாதுகாப்பு ஹெல்மெட் அணிவதை வழக்கமாகக் கொண்டுள்ளனர்.

பலபிட்டிய வட்டுகெதர பிரதேசத்தில் உள்ள இல்லத்தரசி ஒருவர் பாதுகாப்பு கவசம் அணிந்து எரிவாயு அடுப்பில் சமைப்பதை புகைப்படம் காட்டுகிறது. 

அசாத் சாலி விடுதலையானார் - வழக்கிலிருந்து முழுமையாக விடுதலை


மேல் மாகாணத்தின் முன்னாள் ஆளுனர் அசாத் சாலி (Azath Salley) விடுதலை செய்யப்பட்டுள்ளார்.

அசாத் சாலிக்கு எதிராக சுமத்தப்பட்டிருந்த குற்றச்சாட்டுக்களிலிருந்து அவர் விடுதலை செய்பய்பட்டுள்ளார்.

அசாத் சாலிக்கு எதிராக பயங்கரவாத தடைச் சட்டத்தின் கீழ் இரண்டு குற்றச்சாட்டுக்கள் சுமத்த வழக்குத் தொடரப்பட்டிருந்தமை குறிப்பிடத்தக்கது.

கொழும்பு மேல் நீதிமன்றம் இது தொடர்பான உத்தரவை பிறப்பித்துள்ளமை குறிப்பிடத்தக்கது. 

உளவியல் கருத்தரங்கு நடத்தியவரும், அவரது மெய்ப்பாதுகாவலர்களும் துப்பாக்கி, தோட்டாக்களுடன் கைது


பதுளை - ஹாலிஎல பிரதேசத்தில் உள்ள பாடசாலையொன்றில் மாணவர்களுக்கான உளவியல் கருத்தரங்கை நடத்துவதற்காக சென்றிருந்த ஆலோசகர் மற்றும் அவரது மெய்ப்பாதுகாவலர்கள் மூவர், துப்பாக்கி மற்றும் 129 தோட்டாக்கள் உள்ளிட்ட பொருட்களுடன் கைது செய்யப்பட்டுள்ளனர். 

கறுப்பு நிற ஆடை அணிந்திருந்த இவர்கள் துப்பாக்கி ஒன்றை வைத்திருந்ததாக ஹாலிஎல காவல்துறையினருக்கு நேற்று(01) தகவல் கிடைத்துள்ளதாக காவல்துறை ஊடகப் பேச்சாளர் அலுவலகம் தெரிவித்துள்ளது. 

பின்னர் காவல்துறை உத்தியோகத்தர்கள் குழுவொன்று அப்பாடசாலைக்கு விஜயம் செய்து விசாரணைகளை மேற்கொண்டதில், குறித்த வேலைத்திட்டத்திற்கு, மாகாணக் கல்விப் பணிப்பாளர் அல்லது வலயக் கல்விப் பணிப்பாளரின் அனுமதி பெறப்படவில்லையெனத் தெரியவந்துள்ளது. 

பாடசாலைக்கு ஆலோசகராக வந்திருந்த நபர், எந்தவொரு நிறுவனத்தின் கீழும், இது போன்ற நிகழ்ச்சிகளை நடத்த பதிவுகளை மேற்கொண்டிராத, துறைசார் தகைமைகள் அற்றவர் என்பதும் விசாரணைகளில் தெரியவந்துள்ளது. (Hiru)


புத்தளம் - தில்லையடியில் திடீரென தீப்பற்றி எரிந்த மோட்டார் சைக்கிள்


புத்தளம் தில்லையடி பகுதியில் உள்ள இரவு நேர ஹோட்டலுக்கு முன்பாக நேற்றிரவு 11 மணியளவில் மோட்டார் சைக்கிள் ஒன்று திடீரென தீப்பற்றி எரிந்துள்ளது. 

இந்தச் சம்பவம் தொடர்பில் மேலும் தெரியவருவதாவது, 

சம்பவம் இடம்பெற்ற போது தில்லையடி பகுதியில் உள்ள ஹோட்டலில் உணவு எடுத்துச் செல்வதற்காக வருகை தந்த நபர் ஒருவருடைய மோட்டார் சைக்கிள் ஒன்றே இவ்வாறு தீப்பிடித்துள்ளது. 

குறித்த நபர் ஹோட்டலுக்கு முன்பாக மோட்டார் சைக்கிளை நிறுத்திவிட்டு உணவுத் தேவைகளை முடித்துக் கொண்டு பயணிப்பதற்காக மீண்டும் மோட்டார் சைக்கிளை இயக்க ஆரம்பித்துள்ளார். 

இதன்போதே, குறித்த மோட்டார் சைக்கிள் திடீரென தீப்பற்றி எரிய ஆரம்பித்துள்ளதாக தெரிவிக்கப்படுகிறது. 

இதனையடுத்து , குறித்த ஹோட்டல் உரிமையாளர் உட்பட பணியாளர்களும், ஹோட்டலுக்கு வருகை தந்தவர்களும் கூட்டாக இணைந்து சில நிமிடங்களில் தீயினை கட்டுப்பாட்டுக்குள் கொண்டு வந்துள்ளனர். 

இதனால், குறித்த மோட்டார் சைக்கிள் முழுமையாக எரிந்துள்ளது. எனினும், உயிர்ச் சேதங்கள் எதுவுமில்லை என தெரிவிக்கப்படுகிறது. 

நாட்டில் தற்போது சமையல் எரிவாயு சிலிண்டர்கள் திடீரென வெடித்துச் சிதறும் சம்பவங்கள் ஊடகங்களில் வெளியாகி வரும் நிலையில், இவ்வாறு ஹோட்டலுக்கு முன்பாக மோட்டார் சைக்கிள் தீப்பிடித்து எரிந்தமை தில்லையடி பகுதியில் நேற்றிரவு பெரும் பரபரப்பை ஏற்படுத்தியிருந்தது. 

-ரஸ்மின்-

மதமாற்றத்தை ஞானசாராரிடம் முறையிட்டவரின் வீட்டுக்குச்சென்று ஒரு குழுவினர் அச்சுறுத்தல்


 டி.ஷங்கீதன்

வவுனியா கிழவன் குழம் பகுதியில் மதமாற்றக்காரர்களால் அச்சுறுத்தலுக்கு உட்படுத்தப்பட்ட மார்கண்டு ஜெகதீஸ்வரனின் துணிச்சலையும் செயற்பாட்டையும் அதற்கு எதிராக செயற்பட்டதையும் பாராட்டுவதுடன் அவருக்கு துணையாக என்றும் இருப்போமென வெள்ளவத்தை கங்காதீஸ்வர யாக பீடத்தின் தலைவர் சாமி கங்காதரன் தெரிவித்துள்ளார்.

கடந்த சில வருடங்களாகவே இலங்கையின் பல்வேறு பகுதிகளிலும் மதமாற்றம் மிகவும் வேகமாக இடம்பெற்று வருகின்றது.குறிப்பாக வடக்கு, கிழக்கு மலையக பகுதிகளில் இந்த செயற்பாடானது மிகவும் வேகமாக நடைபெறுகின்றது.

மக்களின் வறுமை நிலையை பயன்படுத்தி இந்த செயற்பாட்டை ஒரு குழுவினர் திட்டமிட்ட அடிப்படையில் செயற்பட்டு வருகின்றார்கள். இதற்காக அவர்கள் பாரிய அளவில் நிதியையும் தங்களுடைய ஆட்பலத்தை பயன்படுத்தி வருகின்றார்கள் என்றும் அவர் தெரிவித்தார்.

’ஒரே நாடு, ஒரே சட்டம்’ எனும் ஜனாதிபதியின் செயலணி, வவுனியாவில் மக்களின் கருத்தரியும் நிகழ்வை நடத்தியது. அதில், கலந்து கொண்ட வுவனியா கிழவன் குழத்தை சேர்ந்த மார்கண்டு ஜெகதீஸ்வரன் தங்களுடைய பகுதிகளில் இடம்பெறுகின்ற மதமாற்ற

செயற்பாடு தொடர்பாக மிகவும் விரிவாக ஆதாரங்களுடன் குழுவினருக்கு

தெளிவுபடுத்தி இருந்தார்.

இதனை பொறுத்துக் கொள்ள முடியாத ஒரு குழுவினர், மதுபோதையில், அவருடைய வீட்டுக்குச் சென்று அவரை அச்சுறுத்தியது மட்டுமன்றி, கட்டாய மதமாற்றம் செய்யவும் முயற்சி செய்துள்ளனர்.

இதன்போது மிகவும் துணிச்சலாக செயற்பட்ட ஜெகதீஸ்வரன் இது தொடர்பாக அருகில் உள்ள பொலிஸ் நிலையத்திற்கு அறிவித்ததுடன் அவர்களை தற்பொழுது பொலிசார் கைது செய்துள்ளனர். இந்த துணிச்சலே எங்களுடைய இளைஞர்களுக்கு வர வேண்டும்.இந்த

விடயத்தில் நாம் அனைவரும் ஜெகதீஸ்வரனுக்கு ஆதரவாக நின்று செயற்பட வேண்டும்.அது மட்டுமல்லாமல் எங்களுடைய ஆலயங்களின் அறங்காவலர் சபை ஆலய நிர்வாகம் என்பன இந்த விடயத்தில் கவனம் செலுத்த வேண்டும் என்றும் குறிப்பிட்டுள்ளார்.

December 01, 2021

நான் சவால் விடுகின்றேன், எரிவாயு சிலிண்டர் எங்கு வெடித்தது என காட்டுங்கள்? அறிவுபூர்வமாக வேறு விதத்தில் யோசிக்குமாறு கேட்டுக்கொள்கின்றேன்


கடந்த சில நாட்களாக எரிவாயு சிலிண்டர்கள் வெடிப்பதாக தவறான ஒரு செய்தி பரவுவதை நான் அமைதியாக அவதானித்துக்கொண்டிருந்தேன். நான் சவால் விடுகின்றேன். முடிந்தால் எனக்கு காட்டுங்கள் எரிவாயு சிலிண்டர் எங்கு வெடித்தது?எங்குமே எரிவாயு சிலிண்டர் வெடிக்கவில்லை, எரிவாயு அடுப்பு தான் வெடிக்கின்றது என நாடாளுமன்ற உறுப்பினர் திஸ்ஸகுட்டியாராச்சி தெரிவித்துள்ளார்.

கொழும்பில் இன்று இடம்பெற்ற ஊடக சந்திப்பில் கலந்துக்கொண்டு கருத்து தெரிவிக்கும் போதே இவ்வாறு தெரிவித்துள்ளார்.இதன்போது அவர் மேலும் தெரிவிக்கையில்,

இது சரியாக வயிற்று வலியாக இருக்கும் போது கால் வலி பற்றி பேசுவதை போன்ற ஒரு செயல். ஆகவே நான் மிகத்தெளிவாக ஞாபகமூட்ட விரும்புகின்றேன். எரிவாயு கலவையில் பிரச்சினை இல்லையென மீண்டும் மீண்டும் கூறுகின்றார்கள்.எரிவாயு சிலிண்டரில் பிரச்சினை இல்லை என கூறுகின்றார்கள்.

ஊடகங்களில் ,சமூக வலைத்தளங்களில் நன்றாக தெரிகின்றது எரிவாயு சிலிண்டர்கள் வெடிக்கவில்லை. உண்மையாகவே இந்த பிரச்சினை எரிவாயு அடுப்பில் தான் உள்ளது.

நன்றாக ஞாபகம் வைத்துக்கொள்ளுங்கள் நாம் இப்போது பரிசோதனை செய்ய வேண்டியது எரிவாயு தொடர்பாகவோ, எரிவாயு சிலிண்டர் தொடர்பாகவோ அல்ல. எரிவாயு அடுப்புக்கள் தொடர்பாகவே தேடிப்பார்க்க வேண்டும்.

தற்பொழுது சந்தைக்கு வரும் புதிய அடுப்புக்களில் மேலாக ஒரு கண்ணாடி உள்ளது. அப்படியான பாதுகாப்பு கண்ணாடிகள் மிகவும் விலை அதிகமானவை. இப்படியான பாதுகாப்பு கண்ணாடிகள் பொருத்தப்பட்ட அடுப்புக்களே இன்று சந்தையில் குறைந்த விலையில் 2000, 3000 ,6000 ரூபாய்க்குள் கிடைக்கின்றன.

ஆகவே சிலவேளை இவ்வாறான அடுப்புக்கள் மிகவும் குறைந்த தரமுடையதாக இருக்கலாம். நாம் அனைத்து இடங்களிலும் வெடிப்பு சம்பவங்களில் பார்த்தது எரிவாயு அடுப்பு தான். ஆகவே , இந்த பிரச்சினை எரிவாயு சிலிண்டரிலோ , எரிவாயுவிலோ இல்லை.எரிவாயு அடுப்பில் தான் உள்ளதென்று ஏன் எம்மால் சிந்திக்க முடியாது.

ஆகவே இவையனைத்தையும் அரசியல் இலாப நோக்கத்திற்கு எடுத்துக்கொண்டு ஒரே வரிசையில் செல்வதால் தான் பிரச்சினை. எமது நாட்டின் நிலை இன்று அதுதான், யாராவது ஒன்றை கூறினால் அதை பெரிதுப்படுத்துவது. இளைஞர்களும் அப்படித்தான் ஊடகங்களும் அப்படித்தான். ஆகவே அறிவுபூர்வமாக சற்று வேறு விதத்தில் யோசிக்குமாறு கேட்டுக்கொள்கின்றேன் என்றும் தெரிவித்துள்ளார்.

உயிர்வாயுவை பயன்படுத்தி எவ்வாறு சமையல் செய்வது..? இந்தியாவில் பசில் பயிற்சி


இந்தியாவிற்கு இரண்டு நாள் உத்தியோக பூர்வ விஜயம் மேற்கொண்டுள்ள நிதியமைச்சர் பசில் ராஜபக்ச உயிர்வாயுவை பயன்படுத்தி எவ்வாறு சமையல் செய்வது என பயிற்சியெடுத்துள்ளார்.

இந்தியாவின் சுலாப் சர்வதேச சமூக சேவை அமைப்பின் அலுவலகத்திற்கு விஜயம் செய்தபோதே உயிர்வாயு சமையல் குறித்த பயிற்சியில் அவர் ஈடுபட்டார்.

இதனிடையே நாளையதினம் அமைச்சர் பசில் ராஜபக்ச இந்திய பிரதமர் மோடியை சந்தித்து இலங்கை தற்போது எதிர்கொண்டுள்ள பொருளாதார நெருக்கடிக்கு தீர்வினை காணும் வகையிலான பேச்சில் ஈடுபடவுள்ளமை குறிப்பிடத்தக்கது.

உலகில் எரிபொருள் விலையை, அதிகரிக்காத ஒரே நாடு இலங்கை மாத்திரமே - கம்மன்பில


உலகில் எரிபொருள் விலையை அதிகரிக்காத ஒரே நாடு இலங்கை மாத்திரமே என எரிசக்தி அமைச்சரான உதய கம்மன்பில தெரிவித்துள்ளார்.

நாட்டில் எண்ணெய் நெருக்கடி ஏற்படுமாயின் நாட்டு மக்கள் சார்பாக அவர் எடுக்கும் தீர்மானம் தொடர்பில் எரிசக்தி அமைச்சர் உதய கம்மன்பிலவிடம் பாராளுமன்ற உறுப்பினரான ஹேஷா விதானகே இன்று -01- கேள்வி எழுப்பினார்.

எதிர்காலத்தில் இலங்கையர்கள் எண்ணெயை இறக்குமதி செய்ய முடியாத நிலை ஏற்படும் என்றும், அமைச்சர் கம்மன்பிலவால் நிராகரிக்கப்பட்ட எரிபொருள் விலை சூத்திரம் மீண்டும் பயனுள்ளதாய் கருதப்படும் என ஹேஷா விதானகே இதன் போது தெரிவித்தார்.

பெற்றோலியக் கூட்டுத்தாபனம் கடந்த ஆறு மாதங்களில் எவ்வித திருத்தங்களையும் மேற்கொள்ளாததால் கடந்த ஆறு மாதங்களில் 70 பில்லியன் ரூபா வருமான இழப்பு ஏற்பட்டுள்ளதாகவும், வரிகளை ஓரளவு குறைக்குமாறும் அவர் கோரிக்கை விடுத்துள்ளதாகவும் அவர் தெரிவித்தார்.

ஒமிக்ரோன் நமது நாட்டிற்கு வரவில்லை என, யாராலும் கூற முடியாது - Dr ஹேமந்த


ஒமிக்ரோன் பிறழ்வு இந்நாட்டிற்கு வந்துள்ளதாக உறுதியாக கூற முடியாது என சுகாதார பிரிவு தெரிவித்துள்ளது. 

மற்றைய நாடுகளுடன் ஒப்பிடும் போது நமது நாட்டிற்கு குறித்த வைரஸ் தாமதமாக வரக்கூடும் என பிரதி சுகாதார சேவைகள் பணிப்பாளர் நாயகம் வைத்திய நிபுணர் ஹேமந்த ஹேரத் தெரிவித்தார். 

"இது தொடர்பில் உறுதியாக கூற முடியாது. உறுதியான தகவல்கள் எமக்கு இதுவரை கிடைக்கவில்லை. எனினும், உலகின் ஏனைய நாடுகளுக்கு பரவியுள்ள விதத்தை பார்க்கும் போது நமது நாட்டிற்கு குறித்த பிறழ்வு வரவில்லை என எவராளும் கூற முடியாது. எனினும், இலங்கைக்கு தென்னாபிரிக்காவில் இருந்து நேரடியாக அதிகளவான மக்கள் வருவதில்லை. அதன் காரணமாக மற்றைய நாடுகளை விட நமது நாட்டுக்கு வருவது தாமதமாகக்கூடும். நாங்கள் ஒரு மாதிரியை எடுத்து மட்டுமே பகுப்பாய்வு செய்கிறோம். அந்த மாதிரிக்கு அகப்படும் வரையில் குறித்த வைரஸ் பிறழ்வு நாட்டில் பரவுவதற்கு வாய்ப்புள்ளது." 

எரிவாயு வெடிப்புகளால் மக்களின் உயிருக்கு பெரும் ஆபத்து, இப்பிரச்சினையையும் வேறு தளத்திற்கு கொண்டு செல்ல முயற்சிப்பது வருந்தத்தக்கது


ஐக்கிய மக்கள் சக்தியின் பொதுச் செயலாளர் ரஞ்சித் மத்தும பண்டார அவர்கள் வெளியிடப்பட்டுள்ள ஊடக அறிக்கை.

நாடு முழுவதும் எரிவாயு கசிவுடன் தொடர்புடைய வெடிப்புகளின் எண்ணிக்கை நாளுக்கு நாள் அதிகரித்து வருகிறன.  இதுவரை 30க்கும் மேற்பட்ட எரிவாயு சிலின்டர்களின் வெடிப்புகள் பதிவாகியுள்ளன.

இந்த வெடிப்புகளால் நாட்டு மக்களின் உயிருக்கு பெரும் ஆபத்து ஏற்பட்டுள்ளது. எனினும், அரசாங்கம் வழமை போன்று இப்பிரச்சினையையும் வேறு தளத்திற்கு கொண்டு செல்ல முயற்சிப்பது வருந்தத்தக்கது. மேலும் வெடிப்பது எரிவாயு தொட்டிகள் அல்ல என்றும் ரெகுலேட்டர்கள் மற்றும் கேஸ் அடுப்புகளின் மீது குற்றம் சாட்டி, பொறுப்புள்ள அமைச்சர்கள் யாரைப் பாதுகாக்கப் பார்க்கிறார்கள் என்று கேள்வி எழுப்புகிறோம்.

மிகவும் பாதகமான ஒப்பந்தம் கைச்சாத்திடப்பட்டு எரிவாயு கொள்வனவு செய்வதால் பாரிய பிரச்சினை ஏற்பட்டுள்ளதாக அண்மையில் லிட்ரோ நிறுவனத்தின் தலைவர் தெரிவித்திருந்தார். அந்த ஒப்பந்தத்தின் மூலம் மோசடி நடந்துள்ளது என்பது தெளிவாகிறது.லிட்ரோ நிறுவனத்திற்கு குறைந்தது 10 பில்லியன் ரூபா நட்டம் ஏற்பட்டுள்ளதாகவும், அது யாரோ ஒருவரின் சட்டைப்பையில் விழுந்துள்ளதாகவும் லிட்ரோ நிறுவனத்தின் தலைவர் ஊடகவியலாளர் சந்திப்பில் தெரிவித்தார்.

இந்த மோசடியில் ஏற்பட்ட நஷ்டத்தை ஈடுகட்ட, மக்களை ஆபத்தில் ஆழ்த்திய வன்னம் கேஸ் சிலிண்டரின் கொள்ளளவை மாற்றினார்களா என்ற நியாயமான சந்தேகம் தற்போது எழுந்துள்ளது.இதே போல் கேஸ் சிலிண்டரின் கொள்ளளவை மாற்றி சிலிண்டரை இதற்கு முன்னதாகவே சந்தைக்கு விடுத்து வாயுவின் கலவை மாற்றப்பட்டது என்பது இரகசியமல்ல.

மொரட்டுவ பல்கலைக்கழகத்தின் பேராசிரியர் சாந்த வல்பொல அவர்கள்,எரிவாயு தொடர்பான வெடிப்புகள் தொடர்பில் நுகர்வோர் அதிகார சபைக்கு அவதானிப்பு அறிக்கையை சமர்ப்பித்துள்ளதாக ஊடகங்கள் செய்தி வெளியிட்டுள்ளன. அதை பொதுமக்கள் அறியும் வகையில் கூட வெளியிடப்படவில்லை.

இலங்கை தர நிர்ணய சபையிடம் ஐக்கிய மக்கள் சக்தியின் நாடாளுமன்ற உறுப்பினர்கள் முன்வைத்த கேள்விகளுக்குக் கூட இதுவரை எந்த பதிலும் கிடைக்கவில்லை. எரிவாயு தொடர்பில் பாராளுமன்றத்தில் கேள்விகள் எழுப்பப்பட்ட போது அமைச்சர்கள் சபையில் இல்லாதது குறித்து கௌரவ சபாநாயகர் அவர்களே கவலை வெளியிட்டார்.

ஜனாதிபதியால், முன்பு போலவே, இது குறித்து விசாரிக்கவென பெரிய குழு ஒன்று நியமிக்கப்பட்டுள்ளது.இந்த நடவடிக்கைகள் சார்ந்த உண்மையான சிக்கலை மூடி மறைப்பதற்கான ஒரு முயற்சியே அன்றி இது வேறு ஒன்றும் இல்லை.இதற்குள் கலவையை மாற்றிய எரிவாயு தொட்டிகள் வெடிக்கும் அல்லது தீர்ந்துவிடும்.இப்பிரச்னையை இப்படியே முடிவுக்கு கொண்டு வர அரசாங்கம் முயற்சிப்பதாக தெரிகிறது.

இந்த தீவிர மோசடியை இனிமேலும் மேற்கொள்ளாது, எரிவாயு மீதான மோசடி நடவடிக்கைகள் மற்றும் வாயு கலவையை மாற்றுவதன் மூலம் மக்களின் உயிருக்கு ஆபத்து ஏற்படுத்திய அனைவரும் சட்டத்தின் முன் நிறுத்தப்பட வேண்டும் என்றும் வெடிப்புகளால் பாதிக்கப்பட்ட அனைவருக்கும் இழப்பீடு வழங்க அரசாங்கம் உடனடியாக நடவடிக்கை எடுக்க வேண்டும் என்றும் ஐக்கிய மக்கள் சக்தி வலியுறுத்துகிறது.


ரஞ்சித் மத்தும பண்டார,

பொதுச் செயலாளர்,

ஐக்கிய மக்கள் சக்தி

லிற்றோ சமையல் எரிவாயு நிறுவனத்தை விற்பதற்காகவே, நாட்டில் தற்போது சமையல் எரிவாயுக்கள் வெடிக்க வைக்கப்படுகின்றன


லிற்றோ சமையல் எரிவாயு நிறுவனத்தை விற்பனை செய்வதற்காகவே, நாட்டில் தற்போது சமையல் எரிவாயுக்கள் வெடிக்க வைக்கப்படுவதாக ஐக்கிய மக்கள் சக்தியின் பாராளுமன்ற உறுப்பினர் சமிந்த விஜேசிறி தெரிவித்தார். 

பாராளுமன்றத்தின் இன்றை அமர்வில் கலந்துகொண்டு தொடர்ந்து உரையாற்றிய அவர், சமையல் எரிவாயு தொடர்பில் பல்வேறு குற்றச்சாட்டுக்களை முன்வைத்து அந்த நிறுவனத்தை வேறு எவருக்காவது வழங்குவதற்கே தற்போது சமையல் எரிவாயு தொடர்பான பிரச்சினைகள் நாட்டில் உருவாக்கப்பட்டுள்ளன. எதிர்காலத்தில் இதனை அறிந்துகொள்ள முடியும் எனவும் தெரிவித்தார்.

15 இஸ்லாமிய நாடுகளின் தூதுவர்கள் பிரதமருடன் சந்திப்பு - இரவு விருந்துபசாரமும் வழங்கப்பட்டது


இஸ்லாமிய நாடுகளின் தூதுவர்கள் மற்றும் உயர் ஸ்தானிகர்களுக்கு இடையிலான சந்திப்பொன்று பிரதமர் மஹிந்த ராஜபக்ஷ தலைமையில் நேற்று (30) இரவு கொழும்பு ஷங்கிரில்லா ஹோட்டலில் நடைபெற்றது.

கௌரவ வெளிவிவகார அமைச்சர் பேராசிரியர் ஜீ.எல்.பீரிஸ் அவர்களின் அழைப்பின் பேரில் இவ்விசேட சந்திப்பும் இரவு விருந்துபசாரமும் இடம்பெற்றது.

இதன்போது வருகைத் தந்திருந்த தூதுவர்கள் மற்றும் உயர் ஸ்தானிகர்களுடன் கௌரவ பிரதமர் நட்பு ரீதியாக கலந்துரையாடினார்.

கொவிட்-19 தொற்று நிலைமையை கட்டுப்படுத்துவதற்கு இலங்கை அரசாங்கம் மேற்கொண்ட துரித செயற்பாட்டிற்கு வருகைத்தந்திருந்த தூதுவர்கள் மற்றும் உயர் ஸ்தானிகர்கள் பாராட்டு தெரிவித்தனர்.

இஸ்லாமிய நாடுகளுடனான இருதரப்பு உறவை தொடர்ந்து பேணுவதல் மற்றும் பரஸ்பர செயற்பாடுகள் மற்றும் திட்டங்கள் ஊடாக இலங்கையின் பொருளாதார மேம்பாட்டிற்கு பங்களிப்பு செய்வது தொடர்பில் இதன்போது தூதுவர்கள் கருத்து தெரிவித்தனர்.

தொற்று நிலைமைக்கு சவால்களை வெற்றி கொண்டு இலங்கையின் பொருளாதாரத்தை கட்டியெழுப்புவதற்கு தற்போதைய அரசாங்கம் மேற்கொண்டுவரும் முயற்சிகள் தொடர்பில் வெளிவிவகார அமைச்சர் பேராசிரியர் ஜீ.எல்.பீரிஸ் அவர்கள் இதன்போது தெளிவுபடுத்தினார்.

இலங்கையின் பொருளாதாரத்தை கட்டியெழுப்புவதற்கு இஸ்லாமிய நாடுகளின் ஒத்துழைப்பினை தொடர்ச்சியாக எதிர்பார்ப்பதாக இதன்போது கௌரவ பிரதமர் மஹிந்த ராஜபக்ஷ அவர்கள்  தூதுவர்கள் மற்றும் உயர் ஸ்தானிகர்கள் மத்தியில் குறிப்பிட்டார்.

இஸ்லாமிய நாடுகளை பிரதிநிதித்துவப்படுத்தும் இலங்கையின் 15 தூதுவர்கள் மற்றும் உயர் ஸ்தானிகர்கள் இச்சந்திப்பில் கலந்து கொண்டனர்.

ஓமான், பலஸ்தீன், குவைத், சவுதி அரேபியா, மலேசியா, கடார், துருக்கி, ஈரான், லிபியா, ஐக்கிய அரபு இராச்சியம், இந்தோனேசியா மற்றும் எகிப்து ஆகிய நாடுகளுக்கான இலங்கை தூதுவர்கள் மற்றும் மாலைதீவு, பங்களாதேஷ், பாகிஸ்தான் ஆகிய நாடுகளை பிரதிநிதித்துவப்படுத்தி அந்நாடுகளின் இலங்கை உயர் ஸ்தானிகர்கள் ஆகியோர் இச்சந்திப்பில் கலந்து கொண்டிருந்தனர்.

மிக இளம் வயதில் பேராசிரியராகப் பதவியுயர்வைப் பெற்றுள்ள எம்.ஏ.எம். பௌசர்


தென்கிழக்குப்  பல்கலைக்கழக கலை, கலாசார பீடத்தின் அரசியல் விஞ்ஞானத் துறைத் தலைவர் எம்.ஏ.எம். பௌசர் பேராசிரியராக பதவியுயர்வு பெற்றுள்ளார்.

இவர் மிக இளம் வயதில் பேராசிரியராகப் பதவியுயர்வைப் பெற்றுள்ளமை பல்ககைலக்கழக வரலாற்றில் முன்மாதிரியாக அமைகின்றது.

இப்பதவியுயர்வின் மூலம்  கலை கலாசாரப் பீடத்தின் இரண்டு பேராசிரியர்களைக் கொண்ட ஒரேயொரு துறையாக அரசியல் விஞ்ஞானத்துறை திகழ்கின்றது.

தென்கிழக்குப் பல்கலைக்கழகத்தின் அரசியல் விஞ்ஞானத் துறையில் விசேட கற்கையினைப் பூர்த்தி செய்த பேராசிரியர் எம்.ஏ.எம். பௌசர், அத்துறையில் முதல் வகுப்புப் பட்டத்தைப் பெற்ற முதலாவது மாணவர் என்ற பெருமையைப் பெற்றுக்கொண்டிருக்கிறார்.

20.11.2020 முதல் அமுலுக்கு வரும் வகையில் இப்பதவியுயர்வு வழங்கப்பட்டுள்ளமை குறிப்பிடத்தக்கது.


இலங்கைக்கு உரித்தான 'மெனிகே' 19,360 கிலோமீற்றர் பறந்து சென்று, மீண்டும் நாடு திரும்பியது


புலம்பெயரும் பறவைகள் தொடர்பான ஆய்வொன்றில், இலங்கைக்கு உரித்தான பறவையொன்று 19,360 கிலோமீற்றர் தூரம்  பறந்து சென்று மீண்டும் நாட்டை வந்தடைந்துள்ளதாக கண்டறியப்பட்டுள்ளது.

இலங்கையிலிருந்து ஐரோப்பா, ஆர்க்டிக் வரையில் வடக்கு நோக்கி புலம்பெயர்ந்த குறித்த பறவை சுமார் 20,000 கிலோமீற்றர் தூரம் பயணத்தை நிறைவுசெய்து மீண்டும் இலங்கைக்கு திரும்பியுள்ளது. 

'மெனிகே' என்று பெயரிடப்பட்டுள்ள Heuglin's gull என்ற இந்த பறவை, கடந்த ஏப்ரல் மாதம் தலைமன்னாரிலிருந்து தனது பயணத்தை ஆரம்பித்திருந்தது.

தலைமன்னாரிலிருந்து ஜீ.பி.எஸ் பொருத்தப்பட்ட 'மேக' மற்றும் 'மெனிக்கே' என்று பெயரிடப்பட்டுள்ள இரண்டு Heuglin's gull இன பறவைகள் விடுவிக்கப்பட்டன.

அவற்றின் மேக உடனேயே வடக்கு நோக்கி இடம்பெயர்வைத் தொடங்கியது, மெனிகே 20 நாட்களுக்கு மன்னாரில் தங்கியிருந்து ஏப்ரல் பிற்பகுதியில் மன்னாரை விட்டு வெளியேறியது.

இலங்கையை விட்டு வெளியேறி ஆறு மாதங்கள், ஒன்பது நாட்களுக்குப் பிறகு கடந்த நவம்பர் 4 ஆம் திகதி மெனிகே மன்னாருக்குத் திரும்பியது. 

மெனிக்கே மன்னாரிலிருந்து ஆர்க்டிக் வரை சென்று மீண்டும் மன்னார் வரையான தனது முழுப் பயணத்தின் போது 19,360 கிலோமீற்றர் தூரத்தை வியக்கத் தக்க வகையில் கடந்துள்ளது.

தெற்கு திசை நோக்கி இடம்பெயரும் 'மேக' இறுதி கட்டத்தில் இருக்கிறது, அது விரைவில் நாடு திரும்பும் என எதிர்பார்க்கப்படுகிறது.

Heuglin's gull என்பது இலங்கையின் வடமேற்கு மற்றும் வடக்கு கரையோரப் பகுதிகளில் மட்டுமே காணப்படும் ஒரு அழகான,  புலம்பெயர் பறவையாகும். 

இந்த ஆய்வை மேற்கொள்ளும் கொழும்பு பல்கலைக்கழகத்தின் களப் பறவையியல் ஆய்வு வட்டத்தின் ஆய்வுக் குழுவில் பேராசிரியர் சம்பத் செனவிரத்ன (முதன்மை ஆய்வாளர்), பேராசிரியர் சரத் கொடகம மற்றும் கலாநிதி கயோமினி பனாகொட ஆகியோர் அடங்குகின்றனர். 

வனவிலங்கு பாதுகாப்பு திணைக்களம் மற்றும் இலங்கை கடற்படை ஆகியவை இந்த ஆராய்ச்சியில் ஒத்துழைப்பு வழங்கியுள்ளன.

உறங்கிக் கொண்டிருந்த சிறுமி தீ விபத்தில் பலி


வெலிகம, வெவெகெதரவத்த பிரதேசத்தில் வீடொன்று தீப்பிடித்து எரிந்ததில் சிறுமி ஒருவர் உயிரிழந்துள்ளதாக தெரிவிக்கப்படுகின்றது. 

நேற்று (30) இரவு இடம்பெற்ற இந்த தீ விபத்தில் 8 வயது சிறுமி ஒருவர் உயிரிழந்துள்ளதாக பொலிஸார் தெரிவித்துள்ளனர். 

வீட்டில் உள்ள ஒரு அறையில் தீ விபத்து ஏற்பட்டு வீட்டின் மேற்கூரை எரிந்து நாசமானது. 

வீட்டின் அறையில் உறங்கிக் கொண்டிருந்த சிறுமி தீ விபத்தில் சிக்கி உயிரிழந்துள்ளதாக பொலிஸார் தெரிவிக்கின்றனர். 

அவரது பாட்டியும், 13 வயது சகோதரியும் அருகில் உள்ள அறையில் தூங்கிக் கொண்டிருந்த போது, ​​வீட்டை விட்டு வெளியே ஓடி வந்து உயிர் தப்பியதாக பொலிஸார் தெரிவித்தனர். 

சம்பவம் தொடர்பில் அறிவிக்கப்பட்டவுடன் வெலிகம பொலிஸார் தீயை அணைக்க மாத்தறை தீயணைப்பு வாகனங்களை வரவழைத்துள்ளதாகவும் தீ விபத்துக்கான காரணம் இதுவரையில் தெரியவரவில்லை எனவும் தெரிவிக்கப்படுகிறது. 

வீட்டில் இருந்த எரிவாயு சிலிண்டர், எரிவாயு அடுப்பு அல்லது மற்ற உபகரணங்களுக்கு எந்த சேதமும் ஏற்படவில்லை என பொலிஸார் தெரிவித்தனர். 

வெலிகம பொலிஸார் மேலதிக விசாரணைகளை மேற்கொண்டு வருகின்றனர்.

தேசிய பாதுகாப்பை வழங்குவதாக பெருமைகூறி பதவிக்கு வந்த அரசாங்கத்தின் கீழ் சமையலறைக்கு செல்ல மக்கள் அச்சப்படுகின்றனர்


எரிவாயு சிலிண்டர்கள் வெடித்தமை மற்றும் அவற்றின் கலவை தொடர்பான பிரச்சினைகள் தொடர்பில் ஐக்கிய மக்கள் சக்தியின் பாராளுமன்ற உறுப்பினர்கள் குழு, நுகர்வோர் விவகார அதிகாரசபையிடம், நேற்று (30) முறைப்பாடு செய்தது.

கட்சியின் எம்.பிக்களான ஜே. சி. அலவத்துவல, முஜிபூர் ரகுமான், ஹெக்டர்

அப்புஹாமி, திலிப் வெதராச்சி, சுஜித் சஞ்சய பெரேரா மற்றும் பலர் முறைப்பாடு வழங்குவதற்குச் சென்றிருந்தனர்.

தேசிய பாதுகாப்பை வழங்குவதாக பெருமை கூறிக் கொண்டு பதவிக்கு வந்த

அரசாங்கத்தின் கீழ், இன்று சமையலறை வேலைகளை மேற்கொள்ள மக்கள் அச்சப்படுகின்றனர். இது தொடர்பாக உரிய விசாரணை நடத்தி உரிய நடவடிக்கை எடுக்க வலியுறுத்துகிறோம் என்று ஐக்கிய மக்கள் சக்தியின் பாராளுமன்ற உறுப்பினர் ஜே.சி.அலவத்துவல தெரிவித்தார்.முறைப்பாடு செய்யப்பட்டதன் பின்னர் ஊடகங்களுக்கு கருத்து தெரிவித்த போதே மேற்கண்டவாறு தெரிவித்த அவர், மேலும் தெரிவித்ததாவது, எரிவாயு பற்றாக்குறையை நிவர்த்தி செய்து மக்களுக்கு நிவாரணம் வழங்குவதற்குப் பதிலாக இன்று எரிவாயு தாங்கிகளின் கலவை தொடர்பில் பிரச்சினைகள் எழுந்துள்ளன.

விரைவில் எரிவாயு சிலிண்டர்கள் தீருகின்றன என்று மக்கள் குற்றம்

சாட்டுகின்றனர். மறுபுறம், நாடு முழுவதும் எரிவாயு சிலிண்டர்கள் வெடிக்கின்றன என்று

குறிப்பிட்டார்.நாட்டில் 40 சதவீத மக்கள் எரிவாயுவை பயன்படுத்துகின்றனர் என்றும் இதனால் அந்த மக்கள் அனைவரும் இன்று பாதுகாப்பற்ற நிலைக்கு தள்ளப்பட்டுள்ளனர் என்றும் சுட்டிக்காட்டினார்.எரிவாயு சிலிண்டர்கள் வெடித்தமை மற்றும் அவற்றின் கலவை தொடர்பான நிலைமைகள் தொடர்பில் நுகர்வோர் விவகார அதிகார சபையிடம், எமது கட்சியின் எம்.பிக்கள் கேட்டறிந்தனர்.

கலவை மற்றும் தரம் குறித்து விசாரணை நடத்துமாறு அங்கு கோரிக்கை

விடுத்தோம். தரமற்ற எரிவாயு சிலிண்டர்களை சந்தையில் இருந்து அகற்ற வேண்டும் என்றும் கோரிக்கை விடுத்தோம் என்றார்.இது தொடர்பில் இன்று (01) நடைபெறவுள்ள விசேட பாராளுமன்ற தெரிவுக்குழு கூட்டத்தில், அறிவிக்கவுள்ளதாகவும் அலவத்துவல எம்.பி

குறிப்பிட்டுள்ளார்.

November 30, 2021

அவுஸ்திரேலியாவில் அதிக சம்பளம் பெறும், பெண்களின் பட்டியலில் இலங்கையர் முதலிடம்


பிரித்தானியாவில் பிறந்த, இலங்கையை சேர்ந்த அவுஸ்திரேலியாவைச் சேர்ந்த ஷெமாரா விக்ரமநாயக்க, அவுஸ்திரேலியாவின் அதிக வேதனம் பெறும் மேலாளர்( CEO)பட்டியலில் முதலிடம் பிடித்துள்ளார்.

தி ஒஸ்ரேலியன் ஃபைனான்சியல் ரிவியூவின்( Australian Financial Review) வருடாந்த பட்டியலின்படி, மேக்வேர் குழுமத்தின் தலைமைச் செயல் அதிகாரியான (CEO) ஷெமாரா விக்ரமநாயக்க, கடந்த ஜூன் வரையிலான 12 மாதங்களில் $ 15.97 மில்லியன் வேதனத்தைப் பெற்றுள்ளார்.

இந்தநிலையில் அவுஸ்திரேலியாவின் அதிக வேதனம் பெறும் 50 மேலாளர்கள் கடந்த நிதியாண்டில் சராசரியாக 6.18 மில்லியன் டொலர்களை சம்பாதித்துள்ளனர் என்பது தெரியவந்துள்ளது. 

உகாண்டாவின் நிலை இலங்கைக்கு ஏற்படும் - பொன்சேகா எச்சரிக்கை


உகாண்டாவை போலவே சீனாவின் கடன் இலங்கையை விழுங்கிக்கொண்டிருப்பதாக எதிர்க்கட்சி பாராளுமன்ற உறுப்பினர் ஃபீல்ட் மார்ஷல் சரத் பொன்சேகா குறிப்பிட்டார்.

சீனாவிடமிருந்து பெற்ற கடனை திருப்பி செலுத்த முடியாமையால் உகாண்டாவிலுள்ள ஒரேயொரு சர்வதேச விமான நிலையத்தையும் சீனா கையகப்படுத்தியதாக ஃபீல்ட் மார்ஷல் சரத் பொன்சேகா சமூக ஊடகங்களில் பதிவிட்டுள்ளார்.

தேசிய திட்டமிடலொன்று இல்லாமல் சீனாவிடமிருந்து பாரியளவில் கடன் வாங்கும் ஊழலுடன் தொடர்புடைய அரசியல்வாதிகளின் முறையற்ற முடிவு இதுவென்பதே சரத் பொன்சேகாவின் நிலைப்பாடாகும்.

கஞ்சாவை ஏற்றுமதி செய்ய திட்டம் - பாராளுமன்றத்திலும் அங்கீகாரம் பெறவுள்ளதாக இராஜாங்க அமைச்சர் தெரிவிப்பு


கஞ்சா ஏற்றுமதிக்குத் தேவையான சட்டத்தைப் பாராளுமன்றத்தில் முன்வைத்து அங்கீகாரம் பெற உள்ளதாகச் சுதேச மருத்துவ ஊக்குவிப்பு, கிராமிய மற்றும் ஆயுர்வேத வைத்தியசாலைகள் அபிவிருத்தி மற்றும் சமூக சுகாதார இராஜாங்க அமைச்சர் சிசிர ஜெயக்கொடி இன்று (30) பாராளுமன்றத்தில் தெரிவித்தார்.

ஏற்றுமதிக்கு மட்டுமே அனுமதி பெறப்படும் என்றும் அவர் தெரி வித்துள்ளார்.

இன்று நள்ளிரவு முதல் அமுலாகும் புதிய நடைமுறை


குடும்ப உறுப்பினர்கள் மற்றும் சக பணியாளர்களுக்கு நோய் பரவும் அபாயத்தைக் குறைக்கும் வகையில், தேவையில்லாமல் வீடுகளை விட்டு வெளியேறுவதைத் தவிர்த்துக் கொள்ளுமாறு சுகாதார சேவைகள் பதில் பணிப்பாளர் நாயகம் எஸ்.ஸ்ரீதரன் அறிவித்துள்ளார்.

இன்று நள்ளிரவு 12 மணிமுதல் எதிர்வரும் 15ஆம் திகதிவரையான காலப்பகுதியில் அமுலாகும் புதிய சுகாதார வழிகாட்டுதல்களிலேயே மேற்குறிப்பிட்ட விடயத்தை அவர் அறிவித்துள்ளார்.

திருமண மண்டபங்களில் அவற்றின் திறனில் மூன்றில் ஒரு பங்குக்கு மிகாமல் அதிகபட்சம் 200 பேருக்கு மிகாமல் திருமண வைபவங்களை நடத்த முடியும் என்றும் திறந்த வெளி எனின், 250 பேர் அனுமதிக்கப்படுவர் என்றும் குறிப்பிடப்பட்டுள்ளது.

உணவகங்களில்  அவற்றின் திறனில் மூன்றில் ஒரு பங்குக்கு மிகாமல் அதிகபட்சம் 100 பேர் உள்ளிருந்து உணவருந்த அனுமதிக்கப்படுவர். திறந்த வெளியாயின் 150 பேர் அனுமதிக்கப்படுவர்.

பாடசாலைகளைத் திறப்பது கல்வி அமைச்சினாலும் பல்கலைக்கழகங்களைத் திறப்பது பல்கலைக்கழக மானியங்கள் ஆணைக்குழுவினாலும் தீர்மானிக்கப்படும் என்றும் சுட்டிக்காட்டப்பட்டுள்ளது.

க.பொ.த சாதாரண தர மற்றும் உயர்தர வகுப்பு மாணவர்களுக்கு மட்டும், சாதாரண கொள்ளளவில் 50 சதவீதினரைக் கொண்டு பிரத்தியேக வகுப்புகளை நடத்த அனுமதிக்கப்பட்டுள்ளது. 

பின்வரிசை நாடாளுமன்ற உறுப்பினராக வெறுப்பிலும், துக்கத்திலும் காலத்தை கடத்தி வருகிறேன் - எஸ்.பி.


பராக்கிரமபாகு மன்னனுக்கு பின்னர் கமத்தொழில் அமைச்சராக தானே நாட்டை மீண்டும் அரிசியில் தன்னிறைவடைய செய்ததாக ஸ்ரீலங்கா பொதுஜன பெரமுனவின் நாடாளுமன்ற உறுப்பினர் எஸ்.பி. திஸாநாயக்க  (S.B.Dissanayake) தெரிவித்துள்ளார்.

நாடாளுமன்றத்தில் மகிந்த ராஜபக்சவுக்கு அடுத்த நிலையில் இருக்கும் சிரேஷ்ட உறுப்பினரான தான் தற்போது, பின்வரிசை நாடாளுமன்ற உறுப்பினராக வெறுப்பிலும் துக்கத்திலும் காலத்தை கடத்தி வருவதாகவும் அவர் கூறியுள்ளார்.

சிங்கள வலையொளித்தளம் ஒன்றுக்கு வழங்கிய நேர்காணலில் முன்னாள் அமைச்சருமான எஸ்.பி.திஸாநாயக்க இதனை கூறியுள்ளார். தற்போதைய அரசாங்கத்தின் கீழ் நாட்டின் பொருளாதாரம் முன்நோக்கி செல்லாது ஒரே இடத்தில் ஸ்தம்பித்துள்ளது.

நாட்டு மக்கள் தற்போதைய அரசாங்கத்தின் மீது அதிருப்தியில் உள்ளனர். ஈஸ்டர் ஞாயிறு தாக்குதலுடன் றிசார்ட் பதியுதீன் மற்றும் ஹிஸ்புல்லா ஆகியோருக்கு தெளிவான தொடர்பு இருக்கின்றது என்பதை நான் சாட்சியங்ளுடன் தொடர்ந்தும் தகவல்களை வெளியிட்டு வந்தேன்.

அவர்களுடன் இருக்கும் அரசியல் உடன்பாடுகள் காரணமாக சட்டம் நடைமுறைப்படுத்தப்படுவதில்லை.

நாடொன்றை அபிவிருத்தி செய்ய வேண்டுமாயின் நாட்டின் காணிகளை வெளிநாட்டு முதலீட்டாளர்களுக்கு பணத்திற்கு விற்பனை செய்ய வேண்டும்.

சிங்கப்பூர், மலேசியா போன்ற நாடுகள் தமது நாட்டின் காணிகளை வெளிநாட்டு முதலீட்டாளர்களுக்கு விற்பனை செய்ததன் மூலம் அவர்கள் முதலீடு செய்ய சந்தர்ப்பம் வழங்ியதால், முன்னேறியுள்ளன எனவும் எஸ்.பி.திஸாநாயக்க மேலும் தெரிவித்துள்ளார்.  TW

கடன் பொறியிலிருந்து, இலங்கையை காப்பாற்றியிருக்கிறோம் - பீற்றுகிறாது சீனா


மேற்குலக கடன் பொறியில் இருந்து இலங்கையை சீனா காப்பாற்றியதாக கொழும்பில் உள்ள சீனத் தூதரகம் தனது டுவிட்டர் பக்கத்தில் குறிப்பிட்டுள்ளது.

2017ஆம் ஆண்டு இலங்கை அரசாங்கம், ஹம்பாந்தோட்டை துறைமுகத்தை குத்தகைக்கு விட தயாராகிய நேரத்தில் சீனா உதவுவதற்காக முன்வந்து, இலங்கையை கடன் பொறியில் இருந்து காப்பாற்றியது எனவும் சீனத் தூதரகம் சுட்டிக்காட்டியுள்ளது.

சர்வதேச பிணை முறிப் பத்திரங்களுக்கு செலுத்த டொலர் இல்லாத காரணத்தினாலேயே இலங்கை கடந்த 2017 ஆம் ஆண்டு ஹம்பாந்தோட்டை துறைமுகத்தை குத்தகைக்கு வழங்கியது.

இதனை விடுத்து, சீனாவின் எக்சிம் வங்கிக்கு செலுத்த வேண்டிய கடனுக்காக இலங்கை அரசாங்கம் ஹம்பாந்தோட்டை துறைமுகத்தை சீனாவுக்கு வழங்கவில்லை எனவும் சீனத் தூதரகம் குறிப்பிட்டுள்ளது.

இதனடிப்படையில் நோக்கினால், இலங்கை சிக்கவிருந்த சர்வதேச கடன் பொறியில் இருந்து சீன அரசாங்கம் உதவியுள்ளது. அத்துடன் இலங்கை இதுவரை பெற்றுக்கொண்டுள்ள சர்வதேச கடன்களில் சீனாவிடம் 10 வீதமான கடனையே பெற்றுள்ளது.

அது 3 ஆயிரத்து 388.2 மில்லியன் டொலர்கள் என இலங்கை மத்திய வங்கியை மேற்கோள்காட்டி சீனத் தூதரகம் தனது டுவிட்டரில் குறிப்பிட்டுள்ளது. 

எரிவாயுடன் வெடிப்புச் சம்பவங்கள் குறித்து ஆராய 8 பேரடங்கிய குழு ஜனாதிபதியினால் நியமனம்


வீட்டு சமையல் எரிவாயு கொள்கலன்களுடன் தொடர்புடைய சம்பவங்கள் தொடர்பில் விசாரணைகளை மேற்கொண்டு, தீர்வுகளை முன்வைக்க ஜனாதிபதியினால் விசேட குழுவொன்று நியமிக்கப்பட்டுள்ளது. ஜனாதிபதி ஊடகப் பிரிவு இதனைத் தெரிவித்துள்ளது.

மொரட்டுவ பல்கலைக்கழகத்தின் பேராசிரியர் ஷாந்த வல்பலகேவின் தலைமையில் 8 பேரடங்கிய இந்தக் குழு நியமிக்கப்பட்டுள்ளதாக மேலும் தெரிவிக்கப்பட்டுள்ளது.

குழுவின் ஏனைய உறுப்பினர்களாக சிரேஷ்ட பிரதி காவல்துறைமா அதிபர் தேசபந்து தென்னகோன், மொரட்டுவ பல்கலைக்கழகத்தின் பேராசிரியர் அஜித் டி சில்வா, ஜயவர்தனபுர பல்கலைக்கழகத்தின் பேராசிரியர் டபிள்யூ.டி.டபிள்யூ. ஜயதிலக்க, பேராசிரியர் பிரதீப் ஜயவீர, இலங்கை புத்தாக்குனர் ஆணைக்குழுவின் ஆணையாளர் பேராசிரியர் நாராயண் சிறிமுத்து, கைத்தொழில் தொழில்நுட்ப நிறுவகத்தின் மேலதிக பணிப்பாளர் நாயகம் கலாநிதி சுதர்ஷன சோமசிறி மற்றும் இலங்கை தரநிர்ணய கட்டளைகள் நிறுவகத்தின் சிரேஷ்ட பிரதிப் பணிப்பாளர் சுஜீவ மஹகம ஆகியோர் நியமிக்கப்பட்டுள்ளனர்.

சம்பந்தப்பட்ட சகல தரப்பினரிடம் விசாரணை மேற்கொள்வதுடன், தற்போதுள்ள ஆய்வுகள், பல்வேறு கருத்துக்களை ஆராய்ந்தும் இரண்டு வாரங்களுக்குள் அறிக்கையை சமர்ப்பிக்குமாறு மேற்படி குழுவிற்கு ஜனாதிபதி பணிப்புரை விடுத்துள்ளதாக ஜனாதிபதி ஊடகப்பிரிவு மேலும் தெரிவித்துள்ளது.

24 மணி​நேரத்தில் நாடளாவிய ரீதியில், 16 காஸ் சிலிண்டர்கள் வெடித்துள்ளன


கடந்த 24 மணி​நேரத்தில் நாடளாவிய ரீதியில், 16 காஸ் சிலிண்டர்கள் வெடித்துள்ளன என பொலிஸார் தெரிவித்தனர்.

லிற்கோ காஸ் சிலிண்டர்களே இவ்வாறு வெடித்துள்ளன என்றும் பொலிஸார் தெரிவித்தனர்.

அமைச்சர்கள் மீது சபாநாயகர் விமர்சனம் - நாள் தோறும் ஜனாதிபதி நாடாளுமன்றத்துக்கு வரவேண்டியிருக்கும் எனவும் தெரிவிப்பு


ஜனாதிபதி நாடாளுமன்றத்துக்கு வரும்போது மாத்திரமே முன்னிலை அமைச்சர்கள் அனைவரும் நாடாளுமன்றத்துக்கு வருவதாக சபாநாயகர் மஹிந்த யாப்பா அபேவர்த்தன குற்றம் சுமத்தியுள்ளார்

அப்படியெனில் நாள் தோறும் ஜனாதிபதி நாடாளுமன்றத்துக்கு வரவேண்டியிருக்கும் என்று அவர் குறிப்பிட்டுள்ளார்.

எரிவாயு கொள்கலன் வெடிப்புக்கள் தொடர்பாக இன்று நாடாளுமன்றத்தில் எதிர்கட்சி தலைவர் சஜித் பிரேமதாச எழுப்பிய கேள்விக்கு பதிலளிப்பதற்கு முன்னிலை அமைச்சர்கள் எவரும் பிரசன்னமாகியிருக்கவில்லை.

இதனையடுத்தே சபாநாயகர் இந்த கருத்தை வெளியிட்டார்.

நாட்டின் முக்கிய பிரச்சினைகளுக்கு பதில் கூறவேண்டிய பொறுப்பு முன்னிலை அமைச்சர்களுக்கு உள்ளது.

இதில் இருந்து விலகியிருக்கமுடியாது.  இது கவலைக்குாிய விடயமாகும்.

எனவே முன்னிலை அமைச்சர்கள் நாடாளுமன்றத்துக்கு சமுகமளித்து பொறுப்புக்கூறலை நிறைவேற்றவேண்டும் என்று சபாநாயகர், அரசாங்க கட்சி பிரதம அமைப்பாளர் ஜோன்ஸ்டன் பெர்ணான்டோவிடம் தெரிவித்தார். Twin

நேற்றைய அமைச்சரவைக் கூட்டத்தில், முக்கியமாக பேசப்பட்டது என்ன..?


சந்தையில் பொருட்களின் விலை அதிகரிப்பு தொடர்பிலேயே நேற்றைய (29) அமைச்சரவைக் கூட்டத்தில் கருத்து பரிமாறல்கள் இடம்பெற்றுள்ளன.

பொருட்களின் விலை அதிகரிப்பை தடுக்க முடியாது எனவும் பண்டங்களுக்கான தட்டுப்பாடு மற்றும் அவற்றை பெற்றுக் கொள்வதற்காக பொதுமக்கள் வரிசையில் காத்திருத்தல் போன்ற சந்தர்ப்பங்கள் ஏற்படாத வகையில் செயற்பட வேண்டும் என நிதியமைச்சர் பசில் ராஜபக்ஷ நேற்றைய அமைச்சரவை கூட்டத்தின் போது தெரிவித்துள்ளார்.

அத்துடன், நாட்டின் பல பகுதிகளில் இருந்து பதிவாகும் சமையல் எரிவாயு கொள்கலன்களுடன் தொடர்புடைய வெடிப்புச் சம்பவங்கள் தொடர்பில் இதன்போது அவதானம் செலுத்தப்பட்டுள்ளது.

நாட்டில் பயன்படுத்தப்படும் சமையல் எரிவாயுக்களின் செறிமானத்திற்கு இணையாகவே உலகின் பல நாடுகளில் சமையல் எரிவாயு கொள்கலன்கள் பயன்படுத்தப்படுவதாகவும் அந்த நாடுகளில் இது போன்ற சம்பவங்கள் பதிவாவதில்லை எனவும் அமைச்சர் ஒருவர் அமைச்சரவை கூட்டத்தின் போது தெரிவித்துள்ளார்.

இதன்மூலம் செறிமானத்தில் சிக்கல்கள் இல்லை என்பது நன்கு புலப்படுவதாகவும் அவர் சுட்டிக்காட்டியுள்ளார்.

இதேவேளை, எரிவாயு பாவனை அதிகரிப்புடன் எரிவாயு தொடர்பான விபத்துக்கள் அதிகரித்து வருவதாக கொழும்பில் நேற்று இடம்பெற்ற ஊடகவியலாளர் சந்திப்பில் அமைச்சர் வாசுதேவ நாணயக்கார தெரிவித்தார்.

புத்தளத்தில் ஒருவர் படுகொலை


புத்தளத்தில் குடும்பத் தகராறு காரணமாக கூரிய ஆயுதம் ஒன்றினால் தாக்கப்பட்டு இளம் குடும்பஸ்தர் ஒருவர் உயிரிழந்துள்ளார். 

புத்தளம் நூர் நகர் பகுதியைச் சேர்ந்த 26 வயதுடைய இளம் குடும்பஸ்தரே இவ்வாறு உயிரிழந்துள்ளதாக பொலிஸார் தெரிவித்தனர். 

புத்தளம் 2ஆம் வட்டாரத்தில் உள்ள வீடொன்றில் இந்தச் சம்பவம் நேற்றிரவு (29) இடம்பெற்றுள்ளது. 

குடும்ப உறவினர்களுக்கிடையில் தனிப்பட்ட விவகாரங்கள் தொடர்பில் சில நாட்களாக ஏற்பட்ட வாக்குவாதம் முற்றிவிட அது இறுதியில் கைகலப்பாக மாறியுள்ளது. 

இதன்போது, அங்கிருந்த நபர் ஒருவர், மற்றையவரை கூரிய ஆயுதம் ஒன்றினால் கடுமையாக தாக்கி காயப்படுத்தியுள்ளார். 

இதனையடுத்து, அங்கிருந்தவர்கள் காயமடைந்த நபரை உடனடியாக புத்தளம் தள வைத்தியசாலையில் அனுமதித்த போதிலும் அவர் அங்கு சிகிச்சை பலனின்றி உயிரிழந்துள்ளார் எனத் தெரிவிக்கப்படுகிறது. 

சம்பவம் தொடர்பில் கிடைக்கப்பெற்ற முறைப்பாட்டு அமைய, புத்தளம் பொலிஸாருடன் இணைந்து பொலிஸ் தடயவியல் பிரிவினரும் சம்பவ இடத்திற்கு வருகை தந்து கள விசாரணைகளை முன்னெடுத்தனர். 

அத்துடன், இந்த தாக்குதல் சம்பவத்துடன் தொடர்புடையவர் என சந்தேகிக்கப்படும் 34 வயதுடைய குடும்பஸ்தர் ஒருவர் பொலிஸாரினால் கைது செய்யப்பட்டு விசாரணைக்கு உட்படுத்தப்பட்டுள்ளார். 

உயிரிழந்த நபரின் சடலம் புத்தளம் தள வைத்தியசாலையின் பிரேத அறையில் வைக்கப்பட்டு, பீ.சி.ஆர். பரிசோதனைக்கு உட்படுத்தப்பட்டுள்ளதாக வைத்தியசாலைத் தகவல்கள் தெரிவிக்கின்றன. 

பீ.சி.ஆர். பரிசோதனைகள் கிடைக்கப்பெற்றதும், பிரேத பரிசோதனைகள் மேற்கொள்ளப்படும் எனவும் தெரிவிக்கப்படுகிறது. 

இந்த சம்பவம் தொடர்பில் புத்தளம் தலைமையக பொலிஸார் மேலதிக விசாரணைகளை முன்னெடுத்து வருகின்றனர். 

-ரஸ்மின்-

அரசாங்கத்தை விமர்சிப்பது வெட்கக்கேடானது -சுதந்திரக் கட்சியை வெளியேறுமாறு மொட்டுக் கட்சி அறிவிப்பு


அரசாங்கத்தின் கொள்கைகளை நடைமுறைப்படுத்து வதில் அரசாங்கம் சிரமங்களை எதிர்கொள்ளும் போது ஸ்ரீலங்கா சுதந்திரக் கட்சி அரசாங்கத்திற்குள்ளிருந்து கொண்டு அரசாங்கத்தை அப்பட்டமாக விமர்சித்து வருவது வெட்கக்கேடான விடயம் என மொட்டுக் கட்சி பொதுச் செயலாளர் சாகர காரியவசம் தெரிவித்துள்ளார். 

தேர்தல் விஞ்ஞாபனத்தின் சுபீட்சத்தின் நோக்குடன் உடன்படவில்லை என்றால், ஸ்ரீலங்கா பொதுஜன பெரமுன அரசாங்கத்தில் இருந்து ஶ்ரீலங்கா சுதந்திர கட்சி விலக வேண்டும் என அவர் கூறியுள்ளார்.  

“அரசாங்கமாக நாம் செய்வதில் சில பிரச்சினைகள் இருக்கலாம், உதாரணமாக உர விவகாரம். ஸ்ரீலங்கா சுதந்திரக் கட்சி தற்போது சேற்றில் மீன் பிடிப்பது போன்ற ஒன்றைச் செய்கிறது. இது வெற்றியடைந்தால், ஜனாதிபதி சிறீசேன முதலில் வெளியில் வந்து, 'நான்தான் முதலில் ஆரம்பித்தேன்.' , இதுதான் நான் வர விரும்பும் முழு மரியாதை 'ஆனால் இது தவறாகப் போகும் போது அவர்கள் கூறுகிறார்கள்' இல்லை, இது முற்றிலும் தவறு, இது எங்களுக்கு இல்லை, இது ஏதோ தவறு ' என்று ஆனால் கூட்டணி அரசியலில் இது நடக்கக்கூடாது. 

ஒரு கட்சி தங்களுக்கு செழுமையான கொள்கைகள் இருப்பதாக நினைத்தால் அவர்கள் செய்ய வேண்டியது அறிக்கை விடாமல் வெளியேறுவதுதான்.

 இரு தரப்பிலும் இதை வெட்கமற்ற செயலாகவே பார்க்கிறோம். இங்கிருந்து, கிடைக்கும் சலுகைகளை எல்லாம் அனுபவித்து, எல்லாப் பொருட்களையும் பெற்று, இந்தக் கொள்கையை விமர்சித்தால், இந்த நாட்டில் உள்ள அறிவாளிகள் யோசிக்க வேண்டும். ஸ்ரீலங்கா சுதந்திரக் கட்சியின் கொள்கைகளை காட்டிக்கொடுத்து பிணைமுறி ஒப்பந்தத்தில் ஈடுபட்ட அனைவரும் இன்றும் ஸ்ரீலங்கா சுதந்திரக் கட்சியை வழிநடத்திச் செல்கின்றனர். - என சாகர காரியவசம் தெரிவித்தார். 

ஸ்ரீலங்கா பொதுஜன பெரமுனவின் தலைமையகத்தில் நேற்று (29) நடைபெற்ற ஊடகவியலாளர் சந்திப்பில் கலந்துகொண்டு கருத்து தெரிவிக்கும் போதே கட்சியின் பொதுச் செயலாளர், நாடாளுமன்ற உறுப்பினர் சாகர காரியவசம் மேற்கண்டவாறு தெரிவித்தார். tl

டுபாய் செல்கிறார் ஜனாதிபதி - அந்நாட்டு அரச தலைவர்களையும் சந்திப்பார்


ஐக்கிய அரபு அமீரகத்தின் தலைநகர் அபுதாபியில் அடுத்த மாதம் 4ஆம் திகதி நடைபெறவுள்ள இந்து சமுத்திர மாநாட்டில் தலைமை உரையாற்றுவதற்காக, ஜனாதிபதி கோட்டாபய ராஜபக்‌ஷவுக்கு அழைப்பு விடுக்கப்பட்டுள்ளதாக வெளிவிவகார அமைச்சர் ஜீ.எல்.பீரிஸ் தெரிவித்ததுடன், டிசெம்பர் மாதம் 5ஆம் திகதி, ஐக்கிய அரபு அமீரகத்தின் அரச தலைவரைச் சந்தித்து கலந்துரையாடவுள்ளார் என்றார்.

ஸ்ரீ லங்கா பொதுஜன பெரமுன கட்சியின் தலைமையகத்தில் நேற்று (29) இடம்பெற்ற ஊடகவியலாளர் சந்திப்பிலேயே அவர் மேற்கண்டவாறு தெரிவித்தார்.தொடர்ந்து தெரிவித்த அவர், இந்த சம்மேளனத்தின் தலைவராக ஜனாதிபதி கோட்டாபய ராஜபக்ஷ செயற்படுவதுடன், உப தலைவர்களாக இந்தியா, சிங்கப்பூர், ஓமான், ஐக்கிய அரபு அமீரகம் ஆகிய நாடுகளின் வெளிவிவகார அமைச்சர்கள் செயற்படுவதாகவும் தெரிவித்தார்.

குறித்த மாநாட்டின் இந்த வருடத்துக்கான தொனிப்பொருள்“ சுற்றாடல், பொருளாதாரம் மற்றும் தொற்று” என தெரிவித்த அவர், இந்த மாநாடானது இலங்கைக்கு மிகவும் முக்கியமானதாக அமையவுள்ளது என்றார்.இதேவேளை, கடந்த வாரம் ஐக்கிய நாடுகளின் அரசியல் விவகாரங்களுக்கான உதவிப் பொது செயலாளர் மற்றும் ஐ.நாவின் விசேட தூதுவரும் இலங்கைக்க வருகைத் தந்து, தமது அமைச்சுடன் கலந்துரையாடல்களை முன்னெடுத்ததாக தெரிவித்தார்.

கொரோனா தொற்று மற்றும் உலகளாவிய பொருளாதார வீழ்ச்சி என்பவற்றின் பின்னணியில் இலங்கை முன்னெடுத்து வரும் வேலைத்திட்டங்கள் மற்றும் நாம் அடைந்துள்ள முன்னேற்றம் தொடர்பில், குறித்த இரண்டு அதிகாரிகளிடமும் விரிவான காரணங்களை முன்வைக்க இது ஒரு பயனுள்ள சந்தர்ப்பமாக அமைந்தது என்றார்.

November 29, 2021

வடக்கு கிழக்கு இணைந்த மாகாணசபையில், முதல்வராகும் ஆசை எனக்கு உள்ளது - சாணக்கியன் Mp


வடக்கு கிழக்கு இணைந்த மாகாணசபையில் முதல்வராகும் ஆசை தனக்கு இருப்பதாக மட்டக்களப்பு மாவட்ட நாடாளுமன்ற உறுப்பினர் சாணக்கியன் தெரிவித்துள்ளார்.

'கிழக்கை மீட்போம்' என்ற பெயரில் பிள்ளையான் கருணா முன்வைத்துவரும் பிரதேசவாதம் தொடர்பாக எழுப்பப்ட்ட கேள்விக்குப் பதிலளிக்கும் போதே சாணக்கியன் இவ்வாறு தெரிவித்தார்.

'வடக்கு கிழக்கு இணைந்த மாகாணத்தில் நான் முதலமைச்சராவது இது போன்ற கருத்துக்களுக்கு முற்றுப்புள்ளி வைப்பதாக அமையும்' என்றும் அவர் தெரிவித்தார்.

கிழக்கு மாகாண தொல்பொருள் மரபுரிமைகளை முகாமை செய்வதற்கான ஜனாதிபதி செயலணிக்கு முபிசால் அபூபக்கரும் நியமனம்


கிழக்கு மாகாண தொல்பொருள் மரபுரிமைகளை முகாமை செய்வதற்கான ஜனாதிபதி செயலணிக்கு புதிய உறுப்பினர்கள் மூவர் நியமிக்கப்பட்டுள்ளனர். இது குறித்த விசேட வர்த்தமானி அறிவிப்பு வெளியாகியுள்ளது.

குறித்த மூன்று உறுப்பினர்களும் மூவினத்தை பிரதிநிதித்துவம் படுத்தும் வகையில் நியமிக்கப்பட்டுள்ளதாக தெரிவிக்கப்பட்டுள்ளது.

நில அளவையாளர் ஆரியரத்ன திசாநாயக்க, ஓய்வுபெற்ற மாகாண பிரதம செயலாளர் ஏ.பத்திநாதன், விரிவுரையாளா் முபிசால் அபூபக்கா் ஆகியோர் இந்த ஜனாதிபதி செயலணியின் புதிய உறுப்பினர்களாக நியமிக்கப்பட்டுள்ளனர்.

இந்த ஜனாதிபதி செயலணி கடந்த வருடம் ஜூன் மாதம் முதலாம் திகதி நியமிக்கப்பட்டிருந்தமை குறிப்பிடத்தக்கது. செயலணியின் உறுப்பினர் கட்டமைப்பை விரிவாக்கும் நடவடிக்கைகளுக்கமைய இவர்கள் நியமிக்கப்பட்டுள்ளனர்.

இதேவேளை, செயலணியின் உறுப்பினராக கடமையாற்றி வரும் நில அளவையாளா் நாயகம் எம்.எஸ்.பீ. தென்னக்கோன் அரச சேவையிலிருந்து ஓய்வு பெறவுள்ளதாகவும் அறிவிக்கப்பட்டுள்ளது.    

"ஒமிக்ரான்" உலகளவில் தீவிர பாதிப்பு ஏற்படலாம் - WHO எச்சரிக்கை


கொரோனா வைரசின் ஒமிக்ரான் திரிபினால் உலக அளவில் ஏற்பட சாத்தியமுள்ள இடர்ப்பாடு 'மிக அதிகம்' என்றும், இதனால், சில பகுதிகளில் தீவிர விளைவுகள் ஏற்படலாம் என்றும் உலக சுகாதார நிறுவனம் திங்கள்கிழமை தெரிவித்துள்ளது.

ராய்டர்ஸ், அசோசியேட்டட் ஃபாரின் பிரஸ் ஆகிய செய்தி முகமைகள் உலக சுகாதார நிறுவனம் வெளியிட்ட அறிவிப்பை செய்தியாக்கியுள்ளன.

உயர் இடர்பாடு மிகுந்த மக்கள் பிரிவினருக்கு தடுப்பூசி செலுத்துவதை தீவிரப்படுத்தவேண்டும்; அதிக எண்ணிக்கையில் தொற்று ஏற்படும் என்பதை எதிர்பார்த்து, அத்தியாவசிய சுகாதார சேவைகளை பேணுவதற்கான, இடர் நீக்கும் திட்டங்களை தயார் செய்யவேண்டும் என்று தங்கள் 194 உறுப்பு நாடுகளையும் உலக சுகாதார நிறுவனம் வலியுறுத்தியுள்ளது.

"முன்னர் வேறு திரிபுகள் எதிலும் இல்லாத அளவில் ஒமிக்ரான் திரிபில் முள்முடி பிறழ்வுகள் அதிகம் உள்ளன. இவற்றில் சில பிறழ்வுகள் பெருந்தொற்று உலக அளவில் எப்படிச் செல்லும் என்ற பாதையை பாதிக்கும் வகையில் உள்ளன. இந்த திரிபின் ஒட்டுமொத்த உலக அளவிலான இடர்ப்பாடு அதிகமாக உள்ளது," என்று உலக சுகாதார நிறுவனம் மேலும் தெரிவித்துள்ளது.

இதுவரை ஒமிக்ரான் தொற்று காரணமாக மரணம் ஏற்பட்டதாக செய்தி ஏதுமில்லை. முன்னர் ஏற்பட்ட தொற்றினாலும், தடுப்பூசியினாலும் உடலில் ஏற்பட்ட நோய்த் தடுப்பு ஆற்றலை ஏமாற்றிவிட்டு உடலில் தொற்றினை ஏற்படுத்தும் ஆற்றல் ஒமிக்ரான் திரிபுக்கு எந்த அளவு உள்ளது என்பது குறித்து மேற்கொண்டு ஆராய்ச்சிகள் தேவைப்படுகின்றன என்கிறது ராய்டர்ஸ் செய்தி முகமை.

"நோயின் தீவிரத் தன்மை எப்படி இருந்தாலும், தொற்றுகளின் எண்ணிக்கை அதிகரிப்பது சுகாதார அமைப்புகளுக்கான தேவையை அதிகரிக்கும். இதனால், மரணங்களும் அதிகரிக்கலாம். பாதிக்கப்படக்கூடிய மக்கள் மீதான இதன் தாக்கம் அபரிமிதமாக இருக்கும். குறிப்பாக, தடுப்பூசி குறைவாகப் போட்டுள்ள நாடுகளில் இதன் பாதிப்பு அதிகமாக இருக்கும்" என்று உலக சுகாதார நிறுவனம் தெரிவித்துள்ளது.

இந்த திரிபு குறித்து முதல் முதலாக தென்னாப்பிரிக்காவில் இருந்து உலக சுகாதார நிறுவனத்துக்கு நவம்பர் 24ம் தேதி தகவல் தெரிவிக்கப்பட்டது.

அதன் பிறகு இந்த திரிபு உலகம் முழுவதும் பரவி வருகிறது. நெதர்லாந்து, டென்மார்க், ஆஸ்திரேலியா ஆகிய நாடுகளில் புதிய தொற்றுகள் கண்டறியப்பட்டுள்ளன. மேலும் பல நாடுகள் பயணத் தடைகளை விதித்து தங்களைத் தனிமைப்படுத்திக்கொள்ள முயல்கின்றன. தங்கள் எல்லைகளை வெளிநாட்டினர் நுழைய முடியாதபடி மூடுவதாக ஜப்பான் திங்கள் கிழமை அறிவித்துள்ளது. முன்னதாக இஸ்ரேல் இது போன்ற கடும் நடவடிக்கையை எடுத்துள்ளது.

நாட்டின் பல பகுதிகளில் மின்சாரத் தடை


நாட்டின் பல பகுதிகளுக்கு மின்சாரத் தடை ஏற்பட்டுள்ளதாக தெரிவிக்கப்படுகின்றது. 

கொத்மலை மின் உற்பத்தி நிலையம் முதல் பியகம வரையான மின் விநியோக கட்டமைப்பில் ஏற்பட்ட கோளாறு இதற்கு காரணம் எனவும் மின்சக்தி அமைச்சு தெரிவித்துள்ளது. 

மாத்தறை, காலி, இரத்மலானை, குருநாகல், அதுருகிரிய, பியகம, ஹபரணை, பன்னிப்பிட்டிய உள்ளிட்ட பல பிரதேசங்களில் மின்சாரத் தடை இவ்வாறு ஏற்பட்டுள்ளதாக தெரிவிக்கப்படுகின்றது. 

இதனால் மக்கள் பெரும் அசௌகரியத்துக்கு முகம் கொடுத்துள்ளதாகவும் தெரிவிக்கப்பட்டுகின்றது. 

இந்நிலையில் மின்சார விநியோகத்தை வழமைக்கு கொண்டு வருவதற்கான நடவடிக்கைகள் மேற்கொள்ளப்பட்டு வருவதாக மின்சார சபை தெரிவித்துள்ளது.

அர்ஜுன ரணதுங்க விலகுகிறார்


ஐக்கிய தேசியக் கட்சியில் இருந்து இன்று (29) முதல் விலகுவதாக முன்னாள் அமைச்சரும் கட்சியின் பாராளுமன்ற உறுப்பினருமான, அர்ஜுன ரணதுங்க அறிவித்துள்ளார்.

இதுதொடர்பில், ஐக்கிய தேசியக் கட்சியின் தலைவர், செயலாளர், பிரதித் தலைவர், உப தலைவர் ஆகியோருக்கு அறிவித்துள்ளார்.

அடுத்த ஜனாதிபதித் தேர்தலில் போட்டியிடவுள்ளேன் - மைத்திரியின் மகன் அறிவிப்பு


அடுத்த ஜனாதிபதித் தேர்தலில் வேட்பாளராக தான் போட்டியிட போவதாக ஸ்ரீலங்கா சுதந்திரக் கட்சியின் தலைவரும் முன்னாள் ஜனாதிபதியுமான மைத்திரிபால சிறிசேனவின் புதல்வர் தஹாம் சிறிசேன (Daham Srisena)தெரிவித்துள்ளார்.

சிங்கள தொலைக்காட்சி ஒன்றில் ஒளிப்பரப்பான நிகழ்ச்சி ஒன்றில் கலந்துக்கொண்ட போதே அவர் இதனை கூறியுள்ளார்.

தஹாம் சிறிசேன, ஸ்ரீலங்கா சுதந்திரக் கட்சியின் பொலன்நறுவை மாவட்ட இளைஞர் அதிகார சபையின் தலைவராக தற்போது பதவி வகித்து வருகிறார்.

தஹாம் சிறிசேனவை தேசிய அரசியல் நீரோட்டத்திற்குள் கொண்டு வரும் நோக்கில், முன்னாள் ஜனாதிபதி மைத்திரிபால சிறிசேன அரசியல் ரீதியான முயற்சிகளை முன்னெடுத்து வருவதாக கூறப்படுகிறது.

முன்னாள் ஜனாதிபதியின் புதல்வி சத்துரிகா சிறிசேனவும் கடந்த காலங்களில் அரசியல் நடவடிக்கைகளில் ஈடுபட்டு வந்துள்ளமை குறிப்பிடத்தக்கது. Tw

Talk With Chathura நிகழ்ச்சி சிறந்த கலந்துரையாடல் நிகழ்ச்சிக்கான விருதை தனதாக்கியது


தொலைக்காட்சி கலை அரச விருது வழங்கும் விழா கொழும்பு பண்டாரநாயக்க சர்வதேச மாநாட்டு மண்டபத்தில் இடம்பெற்றது. 

இதில் தெரண தொலைக்காட்சியில் ஔிப்பரப்பப்படும் ´Talk With Chathura´ நிகழ்ச்சி, 2020 ஆம் ஆண்டின் சிறந்த கலந்துரையாடல் நிகழ்ச்சிக்கான விருதை தனதாக்கி கொண்டுள்ளது. 

மேலும் 2019 ஆம் ஆண்டில் ஜனாதிபதி தேர்தல் ஔிபரப்புக்காக தயாரிக்கப்பட்ட முன்னோட்டம் (Trailer), சிறந்த தொலைக்காட்சி முன்னோட்டத்திற்கான விருதை பெற்றுக் கொண்டுள்ளது. 

அத்துடன் சிறந்த விளையாட்டு நிகழ்ச்சிக்கான விருதை ´Story Of Champions´ நிகழ்ச்சி பெற்றுக் கொண்டுள்ளது.

மதம் மாறாவிட்டால் ஆண்டவரின் சாபம் கிடைக்கும் என மிரட்டி, மதம் மாற்ற முயன்ற கிறிஸ்தவ சபையைச் சேர்ந்த 3 பேர் கைது


- சண்முகம் தவசீலன் -

மதம் மாறாவிட்டால் ஆண்டவரின் சாபம் கிடைக்கும் என மிரட்டி மதம் மாற்ற முயன்ற குற்றச்சாட்டில் 3 பேர் கைதுசெய்யப்பட்ட சம்பவம் ஒன்று, முல்லைத்தீவு - ஒட்டுசுட்டான் பிரதேச செயலக பிரிவுக்குட்பட்ட பனிக்கன்குளம்,  கிழவன்குளம் கிராமத்தில், நேற்று (28) இடம்பெற்றுள்ளது.

மதம் மாற்றச் சென்ற கிறிஸ்தவ சபையைச் சேர்ந்த ஒரு குழுவினர், தன்னை பேசி, அச்சுறுத்தல் விடுத்ததாக மாங்குளம் பொலிஸ் நிலையத்தில்  செய்த முறைப்பாட்டையடுத்து, மாங்குளம் பொலிஸாரால் வாகனத்துடன் குறித்த மூவரும் கைது செய்யப்பட்டுள்ளனர்.

இது தொடர்பில் மேலும் தெரியவருவதாவது,

கிழவன்குளம் பகுதிக்கு, ஹயஸ் ரக வான் மற்றும் மோட்டர் சைக்கிள் என்பவற்றில் சனிக்கிழமை (27)  சென்ற ஒரு குழுவினர், அங்குள்ள வீடு ஒன்றின் முன்னால் நின்று, அந்த வீட்டு குடும்பஸ்தரை அழைத்து, தமது மதத்துக்கு மாறுமாறு கலந்துரையாடியுள்ளனர்.

இதன்போது, அவர் அதற்கு மறுப்பு தெரிவித்த நிலையில்,  குறித்த குடும்பஸ்தரை அங்கு சென்றவர்கள் தரக்குறைவாக பேசியதுடன், கடவுளின் பெயரால் சாபமிட்டு அச்சுறுத்தல் விடுத்துச் சென்றுள்ளனர்.

இதனையடுத்து, பாதிக்கப்பட்ட நபர் கிராம அலுவலருக்கு தகவல் வழங்கி, மாங்குளம் பொலிஸாருக்கு செய்த முறைப்பாட்டையடுத்து, விசாரணைகளை முன்னெடுத்த பொலிஸார், நேற்று (28) குறித்த மூவரையும் கைது செய்துள்ளனர்.

அவர்களிடம் மேலதிக விசாரணைகளை முன்னெடுத்துள்ள மாங்குளம் பொலிஸார், அவர்களை நீதிமன்றில் ஆஜர்படுத்த நடவடிக்கை எடுத்துள்ளனர்.

இதேவேளை, கிழவன்குளம் பகுதியில், சட்டவிரோதமாக  சபைக்கூடம்  ஒன்று அமைக்கப்பட்டு, மதமாற்ற செயற்பாடுகள் தீவிரமாக இடம்பெற்று வருகின்ற நிலையில், குறித்த சம்பவம் இடம்பெற்றுள்ளமை குறிப்பிடத்தக்கது.

சிலிண்டர்களில் இருந்து வெளியேறும் பல குமிழ்கள் - காரணம் கேட்டால் கையை விரிக்கும் கடைக்காரர்கள்


சிலிண்டர்கள் தீப்பற்றல், காஸ் அடுப்புகள் வெடித்துச் சிதறுதல் மற்றும் காஸ் அடுப்பையும், சிலிண்டர்களையும் இணைக்கும் குழாய்கள் வெடித்துச் சிதறுதல் என பல அனர்த்தங்கள் ஏற்பட்டுக்கொண்டிருக்கின்றன.

இந்நிலையில், புதிதாகக் கொள்வனவு செய்யும் சிலிண்டர்களை திறந்தவுடன் பல குமிழ்கள் ஒரே நேரத்தில் வெளியே வருகின்றன.

புதிதாக கொள்வனவு செய்யும் காஸ் சிலிண்டர்களை வீடுகளுக்கு கொண்டுச் செல்லும் நுகர்வோர்,  சீலை கழற்றி மூடியை திறந்தவுடன் இவ்வாறு குமிழ்கள் நிரம்பிக்கொள்கின்றன.

இதுதொடர்பில், காஸ் சிலிண்டர்களைக் கொள்வனவு செய்த கடை உரிமையாளர்களிடம் தெரிவிக்கும் போது, தங்களால் ஒன்றும் செய்யமுடியாது. இவ்வாறான சிலிண்டர்களை மீளவும் பெற்றுக்கொள்ளுமாறு நிறுவனங்கள் தங்களுக்கு அறிவுறுத்தவில்லை என கையை விரித்துவிடுகின்றனர் என நுகர்வோர் தெரிவிக்கின்றனர்.

ஒமிக்ரோன் வைரஸ் நாட்டுக்குள் நுழைவதைத் தடுப்பதற்கு அனைத்து நடவடிக்கைகளையும் அரசாங்கம் முன்னெடுத்துள்ளது


கொரோனா வைரஸின் புதிய திரிபான ஒமிக்ரோன் வைரஸ் நாட்டுக்குள் நுழைவதைத் தடுப்பதற்கு தேவையான அனைத்து நடவடிக்கைகளையும் அரசாங்கம் முன்னெடுத்துள்ளதாக அமைச்சர் நாமல் ராஜபக்ஷ தெரிவித்துள்ளார். 

இது தொடர்பில் மேலும் தெரிவித்த அவர், “ஓமிக்ரான்” வைரஸ் நாட்டுக்குள் நுழைவதைத் தடுக்கும் வகையில் 6 நாடுகளின் பயணிகளுக்கு தடை விதிக்கப்பட்டுள்ளது என்றார். 

வெளிநாடுகளில் இருந்து வருபவர்கள் தொடர்பில் கண்காணிக்கப்படுவதாகவும் தெரிவித்தார்.

Older Posts