சவூதிக்கு சென்று ஒரு வாரமே ஆனநிலையில் உயிரிழப்பு

- Vijith Kumar -

 

விசிட்டிங் விசாவில் வந்து ஒரு வாரமே ஆன நிலையில்; சவுதியில் ஊதுபத்தியில் இருந்து பரவிய தீயில் தாய், மகள் உயிரிழப்பு

வெளிநாட்டில் வசிக்கும் கணவருடன் சில நாட்கள் செலவிடுவதற்காக வந்த குடும்பத்திற்கு, சோகமான முறையில் இந்தப் பயணம் முடிந்தது.

சவுதி அரேபியாவின் புரைதா பகுதியில் அவர்கள் தங்கியிருந்த இடத்தில் ஏற்பட்ட தீ விபத்தில், புகையைச் சுவாசித்ததால் சென்னையை சேர்ந்த ஜெயபாரதி (37) மற்றும் அவரது இரண்டு வயது மகள் கார்த்திகா ஸ்ரீ ஆகியோர் பரிதாபமாக உயிரிழந்தனர்.

கணவர் கோகுல் ராஜை சந்திப்பதற்காக வருகையாளர் விசாவில் சவுதி வந்திருந்த ஜெயபாரதிக்கு, அங்கு வந்து ஏழாவது நாளான 21ஆம் தேதி இந்தச் சோக சம்பவம் நடந்தது.

இரவு தூங்கிக் கொண்டிருந்தபோது, அறையில் ஏற்றி வைக்கப்பட்டிருந்த ஊதுபத்தியில் இருந்து கார்பெட்டுக்கு தீ பரவியதாக கூறப்படுகிறது. அறை முழுவதும் அடர்த்தியான புகை சூழ்ந்ததால், மூச்சுத்திணறி தாயும் மகளும் உயிரிழந்தனர்.

அருகிலுள்ள மற்றொரு அறையில் தூங்கிக் கொண்டிருந்த கோகுல் ராஜ், புகையின் வாசனையை உணர்ந்து எழுந்தபோது நிலைமை கைமீறியிருந்தது.

இந்திய தூதரகம் மற்றும் புரைதா ‘கனிவ்’ அமைப்பினரின் முயற்சியால் தேவையான சட்ட நடவடிக்கைகள் முடிக்கப்பட்டு, இருவரின் உடல்களும் ஏர் இந்தியா விமானம் மூலம் சென்னைக்கு கொண்டு வரப்பட்டு, உறவினர்களிடம் ஒப்படைக்கப்பட்டன.

இதுபோன்ற சிறிய கவனக்குறைவுகள் பெரும் சோகங்களுக்கும் உயிரிழப்புகளுக்கும் காரணமாகலாம் என்றும், அனைவரும் கூடுதல் எச்சரிக்கையுடன் இருக்க வேண்டும் என்றும் சமூக ஆர்வலர்கள் அறிவுறுத்தியுள்ளனர்.