வரலாற்றில் முதன்முறையாக, யாழ்ப்பாணத்தில் தேசிய மீலாத் விழா

(ஏ.ஏ.மொஹமட் அன்ஸிர்)

இவ்வருடத்திற்கான (2017) தேசிய மீலாத் விழா யாழ்ப்பாணத்திலும், மன்னாரிலும் நடைபெறவுள்ளதாக முஸ்லிம் சமய விவகார அமைச்சர் ஹலீம், ஜப்னா முஸ்லிம் இணையத்திடம் தெரிவித்தார்.

அமைச்சர்கள் ஹலீம் மற்றும் றிசாத் பதியுதீன் ஆகியோர் இணைந்து இத் தீர்மானத்தை மேற்கொண்டுள்ளனர்.

முன்னர் மன்னாரில் மாத்திரம் தேசிய மீலாத் விழாவை நடாத்த திட்டமிடப்பட்டிருந்தது. அத்துடன் அமைச்சர் கபீர் ஹாசிம் தமது பகுதியில் நடாத்தவும் வேண்டுகோள் விடுத்திருந்தார்.

இவ்வாறான நிலையிலேயே தற்போது முஸ்லிம் சமய விவகார அமைச்சானது யாழப்பாணத்திலும், மன்னாரிலும் இவ்வருடத்திற்கான தேசிய மீலாத் விழாவை நடாத்த உத்தியோகபூர்வமாக தீர்மானித்ததாக அமைச்சர் ஹலீம் கூறினார்.

இதற்கான நடவடிக்கைகள் எதிர்வரும் வாரங்களில் ஆரம்பிக்கப்படுமென ஜப்னா முஸ்லிம் இணையத்திடம் சுட்டிக்காட்டிய அமைச்சரின் பிரத்தியேகச் செயலாளர்  பாஹிம், வன்னி மாவட்ட பாராளுமன்ற உறுப்பினர் மஸ்தானும் இதுதொடர்பிலான கோரிக்கையை முன்வைத்திருந்ததாக கூறினார். 

அதேவேளை இதுதொடர்பில்  ஜப்னா முஸ்லிம் இணையத்திடம் கருத்துக்கூறிய அமைச்சர் றிசாத் பதியுதீன்,

யாழ்ப்பாண முஸ்லிம் பிரதேசங்களையும், பள்ளிவாசல்களையும், மதரஸாக்களையும் உயிர்பெறச் செய்யும் நோக்குடன் இம்முறை தேசிய மீலாத் விழாவை யாழ்ப்பாணத்திலும் நடாத்த  தான் விட்டுக்கொடுப்புடன் செயற்பட்டதாகவும், இதனால் மன்னாருடன் இணைந்ததான அபிவிருத்தியை யாழ்ப்பாணமும் பெற்றுக்கொள்ளும் எனவும் தெரிவித்தார்.

டாக்டர் ரம்ஸி தலைமையிலான யாழ்ப்பாண முஸ்லிம் பிரதிநிதிகள் அடங்கிய குழு, அண்மையில் அமைச்சர் ஹலீமை சந்தித்து, யாழ்ப்பாணத்தில் இவ்வருடத்திற்கான தேசிய மீலத் விழாவை நடத்துமாறு கோரிக்கை விடுத்திருந்தமையும் இங்கு குறிப்பிடத்தக்கது.