"இந்தியாவை பற்றி குறைத்து பேசுபவர்கள், கொலை செய்யப்படுபவார்கள்''

மதசகிப்பின்மை விவகாரத்தில் நாட்டில் என்ன நடக்குதுனே தெரியவில்லை. அமீர்கான் கருத்து தெரிவித்தாலும்  தெரிவித்தார்... ஆளாளுக்கு வரிஞ்சு கட்டிட்டு களம் இறங்கிட்டாங்க.  மும்பையில் அமீர்கானுக்கு எதிராக சிவசேனா தொடர்ந்து போராட்டத்தில் ஈடுபட்டு வருகிறது. அமீரின் வீட்டு  முன்பு முற்றுகையிலும் ஈடுபட்டது.

தொடர் போராட்டங்களின் விளைவாக மும்பையில் உள்ள அமீர்கான் வீட்டுக்கு பலத்த பாதுகாப்பு போடப்பட்டுள்ளது. அமீர்கானின் மனைவி கிரண், குழந்தைகள் பாதுகாப்பு கருதி மும்பையில் இருந்து வெளியேறி விட்டதாக கூறப்படுகிறது. ஆனால் தனது கருத்தில் உறுதியாகவுள்ள அமீர்கான், மகத்தான இந்தியனான எனக்கு, ''எனது தாய் நாட்டை விட்டு வெளியேறும் எண்ணமில்லை '' என்று திட்டவட்டமாக அறிவித்து விட்டார். 

எனினும் நாடு முழுவதும் அமீர்கானின் கருத்துக்கு எதிர்ப்பு தெரிவித்து போராட்டம் நடைபெற்று வருகிறது.  எந்த விஷயத்திலும் அதிரடியை காட்டும் சிவசேனா, இந்த விஷயத்திலும் சும்மா இருக்குமா? லூதியானாவில் அமீர்கானுக்கு எதிராக நடைபெற்ற போராட்டத்தில் பேசிய, பஞ்சாப் மாநில சிவசேனாத் தலைவர்  ராஜிவ் தாண்டன், அமீர்கானை கன்னத்தில் அறைந்தால், அவர்களுக்கு 1 லட்சம் ரூபாய் பரிசளிக்கப்படும் என்று கொளுத்தி போட்டார். அதிரடிக்கு பஞ்சமில்லாத சிவசேனாவினர், அமீர்கானின் விஷயத்தில் இப்படிதான் நடப்பார்கள் என்பது  எதிர்பார்க்கப்பட்ட ஒன்றுதான்.

சிவசேனா இப்படியென்றால் அதனுடன் ரத்ததொடர்புள்ள மகாராஷ்ட்ர நவநிர்மான் சேனாத் தலைவர் ராஜ் தாக்கரேவோ, ஒரு படி மேலே போய், '' இந்த தேசம் பாதுகாப்பற்றது, சகிப்பின்மை இல்லாதது என்று யாராவது கூறினால் அவர்களை கொலை செய்வேன். அது ஷாருக்கான், அமீர்கான், சல்மான்கான் அல்லது செங்கிஸ்கானாக இருந்தாலும் சரி... அதை பற்றி நான் கவலைப்படப் போவதில்லை. இந்தியாவை பற்றி குறைத்து பேசுபவர்கள் கொலை செய்யப்படுபவார்கள்'' என்று பகிரங்க மிரட்டல் விடுத்துள்ளார். 

ராஜ்தாக்கரேவின் இந்த பேச்சுக்கு பதிலடியாக தமிழ்நாடு தவ்ஹீத் ஜமாஅத், சிவசேனாத் தலைவர் உத்தவ் தாக்கரேவை கன்னத்தில் அறைந்தால் 2 லட்ச ரூபாய் பரிசளிக்கவுள்ளதாக அறிவித்து பரபரப்பை ஏற்படுத்தியுள்ளது.

அந்த அமைப்பின்  தலைவர் அல்தாப்போ, ''வன்முறையான பேச்சுக்கு அவர்கள் வழியில் சென்றுதான் பதிலளிக்க வேண்டும். வன்முறையான வார்த்தைகளை மக்கள் சகித்துக் கொள்ள மாட்டார்கள். ஒருவரை அடிக்க ஒரு லட்சம் என்றால், உன்னை அடிக்க 2 லட்சம் என்று அறிவித்தால்தான் அதன் வலி தெரியும்'' என்கிறார். 

மொத்தத்துல.. கன்னத்துல அறையுற போட்டி நடத்துறாங்களோனுதான் தோணுது!