முஸலிம்களுக்கு எதிரான செயற்பாடுகளை நிறுத்த நடவடிக்கை - ஜனாதிபதி மஹிந்த

இலங்கை முஸ்லிம்களுக்கு எதிராக மேற்கொள்ளப்படும் இனவாத செயற்பாடுகளை நிறுத்த தமது அரசாங்கம் உடனடி நடவடிக்கை மேற்கொள்ளுமென ஜனாதிபத  மஹிந்த ராஜபக்ஸ தெரிவித்துள்ளார்.

அலரி மாளிகையில் இன்று வியாழக்கிழமை முஸ்லிம் பாராளுமன்ற பிரதிநிதிகளுக்கும், ஜனாதிபதி மஹிந்த ராஜபக்ஸவுக்குமிடையே நடைபெற்ற சந்திப்பின்போதே இவ்விடயம் தெரிவிகப்பட்டுள்ளது.

சிரேஷ்ட அமைச்சர்களான ரத்னசிறி விக்ரமநாயக்க, டியூ குணசேகர,ஏ.எச்.எம்பௌசி, அமைச்சர்களான நிமால் சிறிபால டி. சில்வா, பசில் ராஜபக்ஷ, ரவூப் ஹக்கீம், அதாவுல்லா, றிசாட் பதியுதீன், பிரதி அமைச்சர்களான ஹிஸ்புல்லா, அப்துல் காதர், நாடாளுமன்ற உறுப்பினர்களான பைசல் காசீம் ஆகியோர் இச்சந்திப்பில் கலந்து கொண்டுள்ளனர்.

இங்கு ஜனாதிபதி மேலும் தெரிவித்துள்ளதாவது,

முஸ்லிம்களுக்கு எதிராக முன்னெடுக்கப்படும் இனவாத செயற்பாடுகள் தொடர்பில் ஆராய்வதற்காக நாடாளுமன்ற தெரிவுக்குழுவொன்றை நியமிக்கவுள்ளேன். இந்த தெரிவுக்குழுவின் முன்னிலையில் முஸ்லிம்களுக்கு எதிராக இனவாத செயற்பாடுகளை பரப்புவோர் சாட்சியமளிக்க முடியும். முஸ்லிம்களுக்கு எதிராக முன்னெடுக்கப்படும் இனவாத செயற்பாடுகளை தொடர்ந்து முன்னெடுக்க இடமளிக்க முடியாது. இனவாத கருத்துக்களை பரப்பும் பௌத்த பிக்குகளை அழைத்து நான் பேசுவேன் எனவும் ஜனாதிபதி மஹிந்த இதன்போது உறுதியளித்துள்ளார்.

அத்துடன் முஸ்லிம் எம்.பி.க்கள் சில இனவாத செயற்பாடுகளை ஜனாதிபதியின் கவனத்திற்கு கொண்டுசென்றபோது, உடனடியாகவே அதனுடன் சம்பந்தப்பட்ட செயலாளர்க்கு தொலைபேசி அழைப்பெடுத்துள்ள மஹிந்த, குறித்த ஊடக நிறுவனங்கள் குறித்து நடடிவக்கை மேற்கொள்ளுமாறு பணித்ததாகவும் எமது இணையத்தறிகு  அறியவருகிறது.