அல்லாஹ்வை நம்பிக்கொண்டு உள்ளே சென்றேன் - மனம் திறக்கும் அமைச்சர் றிசாத் பதியுதீன்

ஹிரு தொலைக்காட்சியில் நேற்று வியாழக்கிழமை (21) இரவு வில்பத்து விடயமான விவாத நிகழ்ச்சியில் அமைச்சர் றிசாத் பதியுதீன் பங்கேற்றார்.

இன்று காலை Jaffna Muslim இணையம் றிசாத் பதியுதீனை தொடர்புகொண்டது. இதுதொடர்பில் அவர் தெரிவித்த கருத்துக்கள் கீழ்வருமாறு,

குறித்த விவாத நிகழ்ச்சியில் பங்கேற்க முன்னர் 2 ரக்காஆத் சுன்னத் தொழுகையை நிறைவேற்றினேன். அல்லாஹ்விடம் இருகரமேந்தினேன். அல்லாஹ்வை நம்பிக்கொண்டு (தவக்கல்து அலல்லாஹ்)  ஹிரு தொலைக்காட்சிக்கு சென்றேன்

குறித்த நிகழ்ச்சியில் பங்குகொண்டதன் மூலம் இலட்சக்கணக்கான சிங்கள சகோதரர்களின் மனதில் குடிகொண்டிருந்த தவறான நிலைப்பாட்டை நீக்கமுடிந்துள்ளது என நம்புகிறேன்.

சிங்கள அரசியல்வாதிகளும் றிசாத் காணி பிடித்துள்ளார் என்றும், வில்பத்து காட்டுப் பகுதியில் முஸ்லிம்கள் சட்டவிரோதமாக குடியேற்றப்பட்டுள்ளனர் என்றும் சொல்லிக்கொண்டனர். இவற்றுக்கு மேலதிகமாக ஊடகங்கள் மிக மோசமான பிரச்சாரத்தை எனக்கு எதிராகவும், எனது சமூகத்திற்கு எதிராகவும் முன்னெடுத்தன.

இந்த குற்றச்சாட்டுக்கு எல்லாம் தற்போது பதில் வழங்கப்பட்டுள்ளது. இனியும் இந்த பிரச்சாரங்கள் தொடருமாயின் அது என்மீதும் நான் சார்ந்திருக்கும் சமூகம் மீதும் இவர்கள் கொண்டுள்ள பொறாமையும், தனிப்பட்ட சுயநலன்களும், மற்றும் இனவாதமுமே காரணம் என்பது தெளிவாகிறது.

இந்த விவகாரத்தில் என்னுடன்இரண்டரக் கலந்திருக்கும் இலங்கை வாழ் முஸ்லிம்கள் மற்றும் வெளிநாடுகளில் வாழும் இலங்கை முஸ்லிம்களுக்கும் எனது நன்றிகளை சொல்கிறேன். இந்த விவகாரத்தில் ஆர்வத்துடன் ஒத்துழைத்த சகோதரர்கள், எனக்காக பிரார்த்தித்த சகோதர சகோதரிகளுக்கும் நன்றிகளை உரித்தாக்குகிறேன்.

 அவ்வாறே குறித்த விவாத நிகழ்ச்சி முடிவடைந்த பின்னர் அல்லாஹ்வுக்கு நன்றி சொன்னேன். நாட்டின் பல்வேறு பகுதிகளில் வாழும் சிங்கள, தமிழ், முஸ்லிம் மக்கள் விவாதம் குறித்தும் பொய்யான குற்றச்சாட்டுக்களுக்கு தான் வழங்கிய ஆதாரமான பதில்களை வரவேற்று தன்னை தொடர்புகொண்டதாகவும் றிசாத் பதியுதீன் Jaffna Muslim இணையத்திடம் மேலும் சொன்னார்.