றிசானாவின் குடும்பத்தை விற்றுவிடாதீர்கள்...!

சகோதரி றிசானாக்கு மரண தண்டனை நிறைவேற்றப்பட்டு சில நாட்கள் கடந்துவிட்டன. அதுகுறித்த வாதப்பிரதி வாதங்கள் இன்னும் ஓய்வடையவில்லை. றிசானாவின் தாயார் தனது மகளின் மரணத்திற்கு பின்னர் எமக்கு கூறிய சில விடயங்களை முழு முஸ்லிம் சமூகத்துடனும் பகிர்ந்துகொள்ள விரும்புகிறோம்.

* சவூதிஅரேபியா சிறைச்சாலையில் றிசானா மரண தண்டனையை எதிர்நோக்கியிருந்தபோது லலித் கொத்தலாவல (செலிங்கோ) கொழும்பில் சகல வசதிகளுடன்கூடிய  வீடொன்றை றிசானா குடும்பத்தினருக்கு வழங்க முன்வந்தார். அதனை றிசானா குடும்பத்தினர் முற்றாக நிராகரித்தனர். எங்களுக்கு எதுவும் வேண்டாம். எங்கள் மகளை எங்களிடம் கொண்டுவந்து தாருங்கள். அது போதும் என்பதுதான் கொத்தலாவளைக்கு றிசானா குடும்பத்தினர் கூறிய பதில்.

* மற்றுமொரு தடவை ஒரு பணக்காரர் 45 இலட்சம் ரூபாய்களை றிசானா குடும்பத்திற்கு வழங்க முன்வந்தர்ர். அதனையும் றிசானா குடும்பம் நிராகரித்தது.

* ஒருமுறை றிசானாவை பார்ப்பதற்காக அவரது குடும்பத்தினர் சவூதி அரேபியா சென்றுள்ளனர். சில கைவேலை செய்து சிறைச்சாலையில் கூலியாக பெற்றுக்கொண்ட 50 றியால் பணம் றிசானாவின் கையில் இருந்துள்ளது. அந்தப்பணத்தையும் றிசானா தனது தாயாரிடமே ஒப்படைத்துள்ளார். அவர்கள் இலங்கை வந்தடைந்தவுடன் அந்த 50 றியால் பணத்தையும் தங்களைவிட வறுமைக்குட்பட்டவர்களுக்கு பங்கிட்டு கொடுத்துள்ளனர்.

* றிசானாவின் குடும்பம் மிகவும் ஏழ்மையானது. றிசானாவின் தாயார் காட்டுக்குசென்று விறகு சேகரித்து, பின்னர் அதனை விற்று, அதன்மூலம் கிடைக்கும் பணத்தை கொண்டுதான் கறி சமைத்து சாப்பிடுவார்கள். பலநேரங்களில் சோறு மாத்திரம்தான் அவர்களின் வயிற்றை நிறைத்துள்ளது.

வறுமையின் அகோரம் என்னவென்று றிசானாவின் குடும்பத்தினருக்கு நன்கு தெரியும்.மேற்குறிப்பிட்ட துயர் மிகு சம்பவங்களை நாம் பகிர்ந்துகொள்ள ஒரு முக்கிய காரணம் உள்ளது.

ஜனாதிபதி மஹிந்த ராஜபக்ஸ றிசானா குடும்பத்திற்கு வீடு ஒன்றை கட்டிக்கொடுக்குமாறு அமைச்சர் விமல் வீரவன்சவுக்கு உத்தரவிட்டுள்ளார்.  முஸ்லிம் அரசியல் வாதிகளும் உதவி வாக்குறுதிகளுடனும், புகைப்பட பிடிப்பாளர்களுடனும் றிசானாவின் வீட்டுக்கு படையெடுக்கவுள்ளனர்.

பாதிக்கப்பட்ட றிசானாவின் குடும்பத்தினருக்கு உதவுவது நமது கடமை. அந்தவகையில் நமது முஸ்லிம் உறவுகள் குறிப்பிடத்தக்க உதவிகளை நிச்சயம் றிசானா குடும்பத்திற்கு செய்வார்கள். இதில் எந்த சந்தேகமும் இல்லை.

இருந்தபோதும் நாம் இங்கு கூறவருவது என்னவென்றால் றிசானா குடும்பத்தினரின் தற்போதைய துயர்மிகு நிலவரத்தை நமது அரசியல்வாதிகள் தமது சுயஇலாபங்களுக்காக பயன்படுத்த கூடாது என்பதுதான் எமது விருப்பம். முடிந்தால் அவர்களுக்கு உதவுங்கள். இல்லாவிட்டால் ஒதுங்கியிருங்கள். அதைவிடுத்து றிசானா குடும்பத்தை தொடர்புபடுத்தி ஊடகங்களில் விளம்பரம் தேடாதீர்கள். அந்த குடும்பத்திற்கு உதவி செய்வதற்கு முன்னதாகவே உதவி செய்தவர்கள் போன்று அறிக்கையிடுவதை தவிருங்கள்.

றிசானாவின் குடும்பத்தின் வறுமையை பயன்படுத்தி அல்லது அவர்களின் துயரத்தை பயன்படுத்தி அவர்களோடு இணைந்து போட்டோ எடுப்பதையோ அதை ஊடகங்களுக்கு அனுப்புவதையோ நிறுத்துங்கள். றிசானாவின் குடும்பத்தாருடன் இணைந்து போட்டோ எடுப்பதால் மாத்திரம் அவர்களின் வலி குறைத்து  விட்டதாக நினைத்துவிடாதீர்கள்.

சகோதரி றிசானா குடும்பத்திற்கு உதவப்போகும் முஸ்லில் அரசியல் வாதிகளே..!

உங்களின் உதவியின்றியும் றிசானா குடும்பம் உயிர் வாழ்ந்தது என்பதை ஞாபகம் வைத்திருங்கள். காட்டில் விறகு சேகரித்து, அதனை விற்று, அந்த பணத்தில் உயிர்வாழ்ந்த றிசானா குடும்பம் உங்களின் உதவியின்றியும் உயிர்வாழமுடியும் என்பதை ஒருபோதும் மறந்துவிடாதீர்கள்.

இந்நிலையில் றிசானாவின் பரிதாப மௌத்தையும், அதனைக்கொண்டு அரசியல் இலாபமீட்டவும் அரசியல்வாதிகள் முயன்றால் அது வெட்கக்கேடானது.

எமது யாழ் முஸ்லிம் இணையமானது 'றிசானா குறித்த அரசியல்வாதிகளின் அனுதாப செய்தியை பிரசுரிக்க மாட்டாது'' என பகிரங்கமாக அறிவித்தது முஸ்லிம் அரசியல்வாதிகளிடையே சிறு கொந்தளிப்பையும் மறுபக்கம் முஸ்லிம் சமூகத்திடம் வரவேற்பையும் பெற்றிருந்தது.

றிசானா குடும்பத்தை பயன்படுத்தி இலாபமடைய முயலும் எந்தவொரு தனிநபருக்கும், அரசியல்வாதிகளுக்கும் முஸ்லிம் சார்பு ஊடகங்கள் எந்தவித முக்கியத்துவத்தை வழங்ககூடாது என நாம் சக ஊடகங்களிடம் வேண்டுகோள் விடுக்க விரும்புகிறோம்..!!