பல்டியடித்த மெத்திகா, எல்லோரும் ஏசினார்கள், இது நான் செய்த வேலையல்ல என்கிறார்
உலக சுகாதார ஸ்தாபனத்தின் (WHO) படி உலகெங்குமுள்ள 190க்கும் மேற்பட்ட நாடுகள் கொவிட் தொற்றினால் மரணித்தவர்களின் சடலங்களை அடக்கம் செய்வதற்கும், தகனம் செய்வதற்கும் அனுமதி வழங்கியிருந்தன. ஆனால் கொவிட் தொற்றாளர்களின் மரணித்த உடல்கள் கட்டாயமாக தகனம் செய்யப்பட வேண்டுமென்று இலங்கை மிகவும் உறுதியான நிலைப்பாட்டினைக் கொண்டிருந்தது.
கொவிட் தொற்றினால் மரணிப்பவர்களின் உடல்கள் அடக்கம் செய்யப்பட்டால் நிலத்தடி நீரில் வைரஸ் கிருமிகள் பரவி நோய் தொற்றுகள் அதிகரிக்கும் என நியமிக்கப்பட்டிருந்த விஷேட நிபுணத்துவ குழுவின் சிபாரிசுக்கமைய அரசாங்கம் தகனம் செய்யப்பட வேண்டுமென்ற உறுதியான கொள்கையை அமுல்படுத்தியது.
கொவிட் தொற்றினால் மரணிப்பவர்களின் இறுதிக்கிரியைகள் தொடர்பாக சிபாரிசுகள் செய்யும் விஷேட நிபுணர்கள் அடங்கிய குழுவின் உறுப்பினராகவிருந்த பேராசிரியை மெத்திகா விதானகே இன்று இவ்விவகாரத்திலிருந்தும் தப்பித்துக்கொள்ள முயற்சிக்கிறார்.
‘‘நிபுணத்துவ குழுவில் வைத்திய சட்ட அதிகாரிகள் பெரும் எண்ணிக்கையில் இருந்தார்கள். கொவிட் சடலங்களை அடக்கம் செய்தால் நிலத்தடி நீர் மூலம் வைரஸ் கிருமிகள் பரவுவதற்கு வாய்ப்புண்டு என்று அவர்கள் தான் கூறினார்கள். அவர்களின் அதிகமானோரின் கருத்துகளுக்கு அமைவாக நாம் கொவிட் சடலங்கள் அடக்கம் செய்யப்படக் கூடாது, எரிக்கப்பட வேண்டுமென தீர்மானம் எடுத்தோம். இது தொடர்பில் ஊடகங்களுக்கு தெரிவிக்க வேண்டிய நிலைமை எனக்கே ஏற்பட்டது. அதனால் என்னை எல்லோரும் ஏசினார்கள். இது எனது தேவைக்காக நான் செய்த வேலை அல்ல’’ என்று பேராசிரியை மெத்திகா விதானகே தெரிவித்துள்ளார்.
இதேவேளை கொவிட் தொற்று நோய் நீரினால் பரவும் நோயல்ல என வைரஸ் தொற்று தொடர்பான விஷேட நிபுணர் பேராசிரியர் மலிக் பீரிஸ் 2020இல் ஊடகங்களுக்கு கருத்து தெரிவித்த போது குறிப்பிட்டிருந்தமை கவனத்திற் கொள்ளத்தக்கதாகும்.
Vidivelli
Post a Comment