புனித அல்குர்ஆனை சோசலீசத்திற்கு ஏற்றவாறு மாற்றியெழுத சீனா திட்டம்

Aashiq Ahamed

குர்ஆனையும், பைபிளையும் சோசியலிச தத்துவங்களுக்கு ஏற்றவாறு மாற்றி எழுத சீனா முடிவெடுத்திருப்பதாக பிரிட்டனின் டெய்லிமெயில் செய்தி வெளியிட்டிருக்கிறது.

இது உண்மையென்றால், அறிவுக்கு பொருந்தாத இம்மாதிரியான காரியத்தில் ஈடுபடுவதற்கு முன்பாக சோவியத் ரஷ்யாவை நினைவுக்கு கொண்டு வருவது சீனாவிற்கு நல்லது.

சோவியத் உடைந்த போது, அதிலிருந்து பிரிந்த பல நாடுகள் இஸ்லாமின் பக்கம் திரும்ப வந்தன. இன்றைய ரஷ்யாவும் கூட இஸ்லாமிற்கு எதிரான அடக்குமுறைகளை கைவிட்டு அரவணைத்து செல்வதில் கவனம் செலுத்துகிறது. சோவியத் காலக்கட்டத்தில் இடிக்கப்பட்ட ஆயிரகணக்கான மசூதிகளை இன்றைய ரஷ்யா புணரமைத்து கொடுத்திருக்கிறது. 8,000-த்திற்கும் அதிகமான மசூதிகள் இன்று ரஷ்யாவில் இருப்பதாக சமீபத்திய செய்திகள் தெரிவிக்கின்றன. 76% ரஷ்யர்கள் இஸ்லாம் குறித்து நன்மதிப்பை கொண்டிருக்கின்றனர். முஸ்லிம்களை தவிர்த்து மாஸ்கோவின் பொருளாதாரத்தை கணக்கிட முடியாது என மாஸ்கோ மேயர் குறிப்பிட்டது இங்கே கவனிக்கத்தக்கது.

இஸ்லாமிற்கு எதிரான அடக்குமுறைகள் சிறிதளவு கூட ஆதாயத்தை கொடுத்ததில்லை என்பது வரலாறு உணர்த்தும் செய்தி. குர்ஆன் என்பது காகிதங்களில் இல்லை, அது மக்களின் மனங்களில் இருக்கிறது. என்ன முயற்சி செய்தாலும் அது திரும்ப வந்துவிடும். ஆகையால் இம்மாதிரியான முட்டாள்தனமான நடவடிக்கைகளில் ஈடுபடுவது தவிர்த்துவிட்டு அரவணைத்து செல்வதில் சீனா கவனத்தை செலுத்தினால் நன்மை இருக்கும்.