முஸ்லிம்களுக்கு எதிரான வன்முறைகளை, சர்வதேசத்திற்கு கொண்டுசெல்பவர்கள் குறித்து விசாரணை

இலங்கையில் இடம்பெற்றுவரும் முஸ்லிம் மக்களுக்கெதிரான வன்முறைகள் குறித்தான உண்மை நிலைமைகளை சர்வதேச சமூகத்திற்கு எடுத்துச் சொல்லும் முக்கியமான முஸ்லிம் அரசியல் தலைவர்களை அரச புலனாய்வுத்துறை கண்காணிக்க ஆரம்பித்துள்ளதாக மிக நம்பகரமாக அறியமுடிகின்றது என கொழும்பு ஊடகம் ஒன்று செய்தி வெளியிட்டுள்ளது.

அந்தச் செய்தியில்,

கண்டியில் அண்மையில் இடம்பெற்ற வன்முறைச் சம்பவங்கள் மற்றும் கடந்த காலங்களில் தொடர்ந்து முஸ்லிம்களுக்கெதிராக இடம்பெற்றுவரும் அசம்பாவிதங்கள் குறித்து ஐக்கிய நாடுகள் சபை உட்பட்ட சர்வதேச மனித உரிமைகளை காக்கும் அமைப்புக்கள் முழுமையான விபரங்களை அறிந்து வைத்திருப்பதால் அது விடையத்தில் அரசு கடும் அதிர்ச்சியடைந்துள்ளதாக நம்பப்படுகின்றது.

இப்படியான தகவல்கள் அரசில் அங்கம் வகிக்கும் முஸ்லிம் அரசியல்வாதிகள் ஊடாகவே வெளியில் செல்வதாகக் கருதும் அரசு அதனைக் கண்காணிக்கும் வகையில் செயற்படுமாறு தேசிய புலனாய்வுத்துறையை பணித்திருப்பதாக மூத்த பாதுகாப்பு அதிகாரி ஒருவர் தெரிவித்தார்.

அரசால் சந்தேகிக்கப்படும் முஸ்லிம் அரசியல்வாதிகள் சந்திக்கும் முக்கியஸ்தர்கள், அவர்களுடன் நெருங்கி செயற்படும் நாடுகள், அவர்களுக்கு நிதியுதவிகள் கிடைக்கும் மூலங்கள் என்பன இதன்படி கண்காணிக்கப்படுவதாக அறியமுடிந்தது என்றுள்ளது.