பொதுபல சேனாவுடன், முஸ்லிம் தரப்பு என்ன பேசியது..?

(AAM. Anzir)

இலங்கையில் முஸ்லிம்களுக்கு எதிராக உருவாகிவரும் நெருக்கடி நிலையை எதிர்கொள்ளவும், சிறியசிறிய இனவாத அமைப்புக்களை கட்டுப்படுத்தும் நோக்குடனே முஸ்லிம் தரப்பு பொதுபச சேனாவுடன் பேச்சில் ஈடுபட்டுள்ளது.

அந்தவகையில் இப்பேச்சில் பங்கேற்றுள்ள முஸ்லிம் கவுன்சில் தலைவர் என்.எம். அமீன் ஜப்னா முஸ்லிம் இணையத்துடன் பகிர்ந்துகொண்ட முக்கிய விடயங்களை இங்கு தருகிறோம்.

முஸ்லிம் கவுன்சிலானது ஆரம்பத்திலிருந்தே தமது உயிர்களையும் பொருட்படுத்தாது எதிர்க்க வேண்டிய விடயங்களை எதிர்த்து வருகிறது. அசின்விராதுவின் இலங்கை வருகையை நாம் பகிரங்கமாக எதிர்த்தோம். அந்த மேடையில் ஞானசாரர் எம்மை பார்த்துக் கொள்வோம் என்றுகூட எச்சரிக்கை விடுத்தார்.

இன்று அதே ஞானசாரருடன் முஸ்லிம்களாகிய நாம், வேறு பல முஸ்லிம் தரப்புகளுடனும் இணைந்து பேச்சில் ஈடுபடுகிறோம். 

இதுவரை ஞானசாரருக்கும், பொதுபல சேனாக்கும் இஸ்லாம் தொடர்பிலும், முஸ்லிம்கள் பற்றியும் இருந்த சந்தேகங்களுக்கு எம்மால் முடிந்த தெளிவை வழங்கிவருகிறோம்.

ஞானசாரருக்கு நேர்வழி கிடைக்க வேண்டுமென்று அல்லாஹ் நாடியிருந்தால், அந்த நேர்வழி அவருக்கு கிடைத்தே தீரும். அதை யாராலும் தடுக்க முடியாது.

மேலும் நாட்டின் தற்போதைய சூழ்நிலையை நாம் சரிவர புரியவேண்டும். டென்சனை குறைக்க வேண்டிய தேவையுள்ளது. அதன்பொருட்டு பொதுபல சேனாவுடன் பேசினோம். ஞானசாரருடன் ஒரு மேசையில் அமர்ந்து கலந்துரையாடினோம்.

இப்பேச்சுவார்த்தைகளில் ஞானசாரருக்கு எதிரான வழக்குகளை வாபஸ் பெறுவது பற்றி அவரோ அல்லது நாங்களோ பேசவில்லை. முஸ்லிம் சமூகத்தை காட்டிக்கொடுக்கவோ அல்லது ஞானசாராரை தப்பிக்கவைக்கும் நோக்கமோ எம்மிடமில்லை. இதில் தெளிவாக உள்ளோம். சந்திப்பில் பங்கேற்கும் முஸ்லிம் சகோதரர்கள் எவருக்கும், அந்த நோக்கம் கொஞ்சமேனும் இல்லை.

நாட்டு முஸ்லிம்களுக்கு சட்டப் பாதுகாப்புக்கூட உத்தரவாதமற்ற நிலையில், மிகப்பெரும் இனவாத அமைப்புடன் பேசுவது முஸ்லிம்களுடைய எதிர்காலத்திற்கு சாதகமானது. தூரநோக்குடன் சிந்திப்பவர்கள் இதை புரிந்துகொள்வர்.

நாளுக்கு நாள் முஸ்லிம்களுக்கு எதிரான வெறுப்பு பல வடிவங்களில் அதிகரித்து வருகிறது. இதனை தடுக்கவும், குறைக்கவும் பொதுபல சேனாவுடனான முஸ்லிம் தரப்பின் பேச்சுவார்த்தை வெற்றியளிக்கும். ஞானசாரரிடம் இந்தப் பேச்சின் பின்னர் சிறுமாற்றத்தை அவதானிக்க முடிகிறது. பேச்சின் பங்கேற்றவன் என்றவகையிலும், அவரது செயற்பாடுகளை கூர்ந்து கவனிப்பவன் என்ற வகையிலும் கடந்த 3 வாரங்களாக இதனை அவதானிக்க முடிகிறது.

இந்தநிலையில் சமூக ஊடகங்களை பயன்படுத்தும் நமது சகோதரர்கள், மிகுந்த பொறுப்புடன் செயற்படும்படி நாம் அவர்களிடம் உருக்கமாக வேண்டுகிறேன். எமது விமர்சனங்கள் இப்பேச்சுக்கு பங்கம் ஏற்படுத்திவடக்கூடாது.

ஞானசாரருடனான இப்பேச்சுவார்த்தையில் உலமா சபை, முஸ்லிம் கவுன்சில் மற்றும் முஸ்லிம் சட்டத்துறை சார்ந்தவர்கள் என பலர் பங்கேற்கின்றனர்.

பொதுபல சேனாவுடன் முஸ்லிம் தரப்பு ஒரு புரிந்தணர்வு உடன்படிக்கையில் கைச்சாத்திடுமா என்று கூறமுடியாவிட்டாலும்கூட இப்பேச்சுவார்த்தை நெருக்கடியை குறைப்பதற்கான ஒரு தந்திரோபாய நடவடிக்கை என்று நாங்கள் நம்புகிறோம். இதற்கு முஸ்லிம் சமூகத்திலுள்ள சகல தரப்புகளினதும் ஒத்துழைப:பு அவசியம் எனவும் அமீன் ஜப்னா முஸ்லிம் இணையத்திடம் மேலும் குறிப்பிட்டார்.