தாம் நினைத்ததை சாதித்த பௌத்த பேரினவாதிகள்

(Umar Ali)

ஊடகங்களின் வாயிலாக கிடைத்த தகவல்களின்படி இக்கட்டுரையை வரைகின்றேன்.கிராண்ட்பாஸ் மஸ்ஜித் விவகாரத்தில் பௌத்த பேரினவாதிகள் தாம் நினைத்ததை சாதித்துள்ளனர். புதிய பள்ளிவாசலில் தொழக்கூடாது என்று அறிக்கை விடுத்தனர்.பலமுறை நேரில் வந்து அச்சுறுத்தினர்,சட்டப்பிரச்சினையை முன்வைத்தனர்.அரசாங்கத்திற்கு போட்டுக்கொடுத்தனர் எதுவுமே எடுபடாத போது வன்முறையில் இறங்கி பள்ளிவாசலையும் தொழுதவர்களையும் தாக்கியிருக்கின்றனர்.

அதாவது தெளிவாக இருந்த ஒரு நீரோடையில் இரங்கி அதை குழப்பி விட்டு அதில் மதவாதத்தின் நச்சு விதைகளை விதைத்து, இப்பொழுது குழம்பிய குட்டையில் கலவரப்பட்டிருக்கின்ற  முஸ்லீம்களை சமாதானப்படுத்துவது என்ற போர்வையில் பேச்சுவார்த்தைக்கு வரச்செய்து அங்கே  தமது விருப்பங்களை அதிகாரபூர்வமாக அரங்கேற்றி பங்கு பற்றியவர்களின் கருத்தை மிதித்துவிட்டு  அவர்களது விருப்பத்தை மேலோங்கச்செய்திருக்கின்றார்கள்.இதன்போது என் முஸ்லீம்கள் உடன்பட்டார்கள் என்று புரியவில்லை..? 

இப்பொழுது நடைபெற்ற தாக்குதலுக்கு சட்டரீதியான நடவடிக்கை என்ன ? ஈடுபட்டவர்கள் நாளை சுதந்திரமாக உலாவத்தான் போகின்றார்களா?

பேச்சுவார்த்தை மேடையில்  நமது காரணங்கள் ஏன் ஏன் வலிமை சேர்த்துப் பேசப்பட்டு அதிலே நிலையாமல் நிற்க முடியாமல் நிலை தடுமாறி பௌத்தர்களது கோரிக்கையின் பால் இறுதி முடிவு எடுக்க என்ன காரணம். இவ்வாறான கேள்விகள் மனதிலே எழுகின்றன.

உண்மையிலே பதில் என்ன என்று சிலருக்கு மட்டும் தெரியும். ஆனால் அவர்கள் பதிலளிக்க மாட்டார்கள். ஏனெனில் சில சொகுசுகளை இழக்க நேரிடலாம் உண்மையைப்பேசி பிடிவாதமாக நின்றால்.தேவையான இடத்தின் அரவணைப்பு கிட்டாது கோபப் பார்வையே படும். 

இதற்கு முன்னர் நடைபெற சம்பவங்கள் எல்லாவற்றிலும் இது போன்ற முடிவுகள் எடுக்கப்பட்டிருப்பது இங்கு குறிப்பிடத்தக்கது.தாக்குதல்கள் நடாத்துவது,இடிப்பது எரிப்பது இறுதியில் ஏனென்று கேட்கும்போது சமாதானம் பேச்சுவார்த்தை என்று நமக்கு எதுவித பலனும் இல்லாத கூட்டமொன்றை அரங்கேற்றி சருவதேச நாடுகளுக்கு அரசு தலையிட்டு பிரச்சினைக்கு சுமுகமான தீர்வு  என்று கொட்டை எழுத்தில் செய்திவரும். தலைப்புகளைப்படித்துவிட்டு  பலர் அமைதியடைந்து விடுவார்கள்.

பந்திகளைப் படிக்கும்போதுதான் அதன் சாணக்கியமும் பாதிக்கப்பட்டவர்கள் இன்னும் கோசம் போடாமல் குரல்வளை நசுக்கப்பட்டிருப்பதும் புரியும்.

முடிவாக முஸ்லீம்களது தோல்வியும் முஸ்லீம்களுக்கான அநியாயமும் நமது அமைச்சர்கள், பிரதிநிதிகளின் மறைமுகமான, நிர்பந்த ஒப்புதல்களின் மூலம் எட்டப்பட்டிருக்கின்றது.தலைவர்கள் பிரச்சினைக்கு முடிவு எட்டப்படும் என்ற விடயத்தில் காட்டிய கரிசனை பாராட்டத்தக்கது. ஆனால் அந்த வேகத்தில் ஒரு விவேகமும்,நிலை தவறாதும்  ஒரே நிலையாய் இருந்திருக்க வேண்டும் ஏனையோரும் ஒற்றுமையாய் ஒரே நிலைப்பாட்டில் இருந்திருக்க வேண்டும்.