முஸ்லிம் ஆலோசனை சபை உருவாகியது...!

முஸ்லிம் இயக்க பிரதிநிதிகளையும் சமூக ஆர்வலர்களையும் கொண்ட அரசியல் கலப்பற்ற முஸ்லிம் ஆலோசனை சபை ஒன்று உருவாக்கப்பட்டுள்ளது.

சமூகத்தில் ஓர் இணக்கப்பாட்டை ஏற்படுத்துமுகமாக முஸ்லிம் கவுன்சில் ஒப் ஸ்ரீ லங்கா ஏற்பாடு செய்த கூட்டமொன்றில் உலமாக்கள், முஸ்லிம் இயக்கப்பிரதிநிதிகள், வர்த்தகர்கள், கல்விமான்கள் மற்றும் துறைசார் நிபுணர்கள் ஆகியோரைக்கொண்ட ஆலோசனை சபை ஒன்று உருவாக்கப்பட்டது.

எழுபத்தைந்துக்கும் அதிகமான முக்கியஸ்தர்களைக்கொண்ட இச்சபை, முஸ்லிம்கள் எதிர்நோக்கியுள்ள பிரச்சினைகளை அடையாளம் கண்டு அவற்றைத் தீர்ப்பதற்கான குறுகிய கால, இடைக்கால, நீண்டகால திட்டங்களை வகுத்து செயல்படவுள்ளதோடு நாட்டில் சமாதான சக வாழ்வுக்காகவும் பாடுபடும்.

முஸ்லிம் கவுன்சிலின் தலைவர் என்.எம்.அமீன் இக்கூட்டத்தில் உரையாற்றும்போது, தற்போது முஸ்லிம்கள் எதிர்நோக்கியுள்ள சவால்களுக்கு முகம் கொடுக்கும் அதே வேலை, எமது தனித்துவத்தை காத்துக்கொண்டு, ஏனைய சமூகங்களுடன் இணைந்து நாமும் இலங்கையர் என்ற அடையாளத்தை பதிக்க வேண்டிய முக்கியத்துவத்தை வலியுறுத்தினார்.

முஸ்லிம் கவுன்சில் ஒப் ஸ்ரீலங்கா என்பது ஐம்பதுக்கு மேற்பட்ட முஸ்லிம் இயக்கங்களை உள்ளடக்கிய ஒரு சங்கமாகும். கடந்தகாலங்களில் முஸ்லிம்கள் எதிர்நோக்கிய பல சவால்களுக்கு முகம் கொடுத்து, நிரந்தர தீர்வினை பெறுவதற்காக அரசியல் உயர் மட்டங்களிலும், மத குருக்களுடனும் மற்றும் முக்கிய பிரமுகர்களுடனும் பேச்சு வார்த்தை நடாத்தி இனங்கள் மத்தியில் சுமுக உறவினை ஏற்படுத்துவதற்கு பாடுபட்டு வருவது அறிந்ததே.