“முஸ்லிம் அகதிகள் பிரச்சினையில், மர்ஹும் பேராசிரியர் ஹஸ்புல்லாஹ்”

இலங்கையின் கடந்த நான்கு சகாப்த இனப்பிரச்சினை வரலாற்றில் வடமாகாண முஸ்லிம்களின் பலவந்தமான வெளியேற்றமும், அதைத் தொடர்ந்து ஏற்பட்ட நீண்டகால அகதி வாழ்வும் மிக முக்கியமான ஒரு விடயமாகும். வடமாகாணத்திலிருந்து வெளியேற்றப்பட்ட அகதிகள் குடும்பம் ஒன்றை சேர்ந்த ஒருவராவும், அகதிகளின் மறு மலர்ச்சிக்காக தனது. கல்விப் புலமையூடாக பாரிய பங்காற்றிவர்களில் ஒருவராகவும் பேராசிரியர், மர்ஹும் எஸ். எச். ஹஸ்புல்லாஹ் அவர்கள் கருதப்படுகின்றார்கள்.

பேராசிரியர் ஹஸ்புல்லாஹ் அவர்கள் எம்மை விட்டும் பிரிந்து (25 ஆகஸ்ட் 2018) ஐந்து ஆண்டுகள் கடந்தோடிவிட்டன. (இன்னாலில்லாஹி வ இன்னாஇலைஹி ராஜிஊன்.-)

இந்நூற்றாண்டில் இலங்கை முஸ்லிம்களின் அரசியல், பொருளாதார மீள் கட்டமைப்புக்கான மூலோபாயங்களை வகுப்பதிலும், குறிப்பாக முப்பது வருட உள்நாட்டு போரினால் மிகவும் பாதிக்கப்பட்டு இலங்கையின் நாலா புறங்களிலும் இடம் பெயர்ந்து சிதறியிருந்த வடமாகாண முஸ்லிம்களின் மீள் எழுச்சிக்கும் அவர்களின் மீள் வாழ்வியல் கட்டமைப்புக்கும் தனது துறையுடனான அறிவியல், ஆத்மார்த்த பங்களிப்புகளை வழங்கியவர்களில் பேராசிரியர் ஹஸ்புல்லாஹ்வுக்கு இலங்கை முஸ்லிம்களின் வரலாற்றில் தனியிடமுண்டு. பேராசிரியர் ஹஸ்புல்லாஹ்வை பொறுத்தவரை வடக்கு கிழக்கு மாகாண தமிழ் பேசும் மக்களின் இன ஒற்றுமைக்கு முன்னுரிமையளித்தே தனது செயற்பாடுகளை முன்னெடுத்துள்ளமை அவர் பற்றிய ஆய்வில் நிரூபிக்கப்பட்டுள்ளது.

இலங்கை அரசியலில் இனத்துவ பிணக்கு மற்றும் அதற்கான தீர்வு முயற்சிகள் போன்றவற்றில் தான் சார்ந்திருந்த முஸ்லிம் சமூகம் குறித்தும் பொதுவாக இலங்கையின் அனைத்து சமூகம் சார்பாகவும் தனது புலமைசார் பங்களிப்புகளை நீண்ட காலமாக கொண்டிருந்தார்.

20.02-.2006 காலப் பகுதிகளில் இலங்கை அரசுக்கும் தமிழீழ விடுதலைப் புலிகளுக்கும் இடையில் இடம்பெற்ற பல சுற்று சமாதானப் பேச்சு வார்த்தைகளில் புலமைசார் அவதானிப்பாளராக பங்கு பற்றினார்.

பேராசிரியர் அவர்கள் இலங்கை முஸ்லிம்களின் பல்வேறு பிரச்சினைகள் குறித்து பல்வேறு அறிக்கைகளை உள்நாட்டு அரசாங்கம் மற்றும் வெளியுலக சர்வதேச நிறுவனங்களிலும் அவ்வப்போது சமர்ப்பித்தது மட்டுமன்றி, இலங்கையின் முஸ்லிம் அரசியல் வாதிகளுக்கும் பல்வேறு தரவுகளையும், தீர்வு திட்டங்களையும் வழங்ககூடிய ஆழுமையையும் ஆற்றல்களையும் கொண்டிருந்தார். பொதுவாக, எமது கால வரலாற்றில் எமக்குத் கிடைத்த ஒரு அறிவு, ஆற்றல் கொண்ட யுக புருஷராக பேராசிரியர் ஹஸ்புல்லாஹ் திகழ்ந்தார் என்பதில் இருவேறு கருத்து கிடையாது.

பேராசிரியரின் பல்வேறு பங்களிப்புகளையும், சமூகத்துக்கு செய்த வரலாற்று பதிவுகளையும் ஆய்வு ரீதியாக விளக்கி எழுதப்பட்ட பேராசிரியர்கள், துறைசார் நிபுணர்கள், பேராசிரியரோடு இணைந்து செயல்பட்ட செயல்பாட்டாளர்கள் என பதினான்கு பேரின் ஆங்கில, தமிழ் மொழி கட்டுரைகளை தாங்கி எழுதப்பட்ட “பேராசிரியர் எஸ். எச். ஹஸ்புல்லாஹ் – வாழ்வும் பணியும்” (Prof. S. H. Hasbullah – Life and Works”) என்னும் நூல் “கிழக்கு முஸ்லிம் கல்விப்பேரவை” யின் முயற்சியினால் தொகுக்கப்பட்டு, எதிர்வரும் 31ந்தேதி திங்கள்

கிழமை பி.ப. 3.30 க்கு தென்கிழக்கு பல்கலைக்கழக தொழில் நுட்பவியல் பீட கேட்போர் கூடத்தில் நடைபெற உள்ளது.

பிரதம அதிதியாக யாழ் பல்கலைக்கழக முன்னாள் துணைவேந்தரும், வாழ்நாள் பேராசிரியருமான பொ. பாலசுந்தரம்பிள்ளை அவர்களும், சிறப்பு அதிதியாக தென்கிழக்கு பல்கலைக்கழக துணைவேந்தர் பேராசிரியர் றமீஸ் அபூபக்கர் அவர்களும் கலந்து சிறப்பிக்கவுள்ளனர்.- Vidivelli

பேராசிரியர் எம்.எஸ்.எம்.ஜலால்தீன்,

தலைவர், கிழக்கு முஸ்லிம் கல்விப் பேரவை.