இலங்கை குரங்குகளை சீனாவுக்கு அனுப்புவது என்னாச்சு..?

இலங்கையில் இருந்து 100,000 குரங்குகளை பெற்றுக்கொள்ள சீன நிறுவனமொன்று விடுத்த கோரிக்கை இன்னும் நிலுவையில் உள்ளதாக விவசாய அமைச்சர் மஹிந்த அமரவீர இன்று பாராளுமன்றத்தில் தெரிவித்தார்.

கண்காட்சி நோக்கங்களுக்காக சீனாவில் உள்ள மிருகக்காட்சிசாலைகளுக்கு 100,000 குரங்குகளை ஏற்றுமதி செய்யுமாறு சீன நிறுவனம் ஒன்று விவசாய அமைச்சிடம் கோரிக்கை விடுத்துள்ளதாக அமைச்சர் அமரவீர தெரிவித்தார்.

வனஜீவராசிகள் பாதுகாப்பு திணைக்களம் இது தொடர்பில் தேவையான நடவடிக்கைகளை மேற்கொள்ள வேண்டும் எனவும், அதேவேளை,இது தொடர்பில் குழுவொன்று நியமிக்கப்பட்டு கலந்துரையாடல்களை மேற்கொண்டு வருவதாக அமைச்சர் தெரிவித்துள்ளார் .

“இருப்பினும், பல சுற்றுச்சூழல் அமைப்புகள் குரங்குகள் சீனாவிற்கு உணவாக ஏற்றுமதி செய்யப்படுவதாகக் கூறி இந்த விடயத்தில் கவலைகளை எழுப்பியுள்ளன.. இந்த விவகாரத்தில் இலங்கையில் உள்ள சீன தூதரகமும் கடும் பின்னடைவை எதிர்கொண்டது,” என்றார்.

இலங்கையில் இருந்து குரங்குகளை பெற்றுக்கொள்வதில் சீன நிறுவனம் தொடர்ந்தும் ஆர்வமாக உள்ளதால், வனவிலங்கு பாதுகாப்பு திணைக்களத்துடன் கலந்துரையாடி இறுதி முடிவு எடுக்கப்படும் என அதிகாரிகள் தெரிவித்துள்ளதாக அமைச்சர் மேலும் தெரிவித்தார்.

எவ்வாறாயினும், உத்தேச திட்டத்திற்கு எதிராக சுற்றாடல் ஆர்வலர்கள் தற்போது உச்ச நீதிமன்றத்தில் வழக்குத் தாக்கல் செய்துள்ளதாக அமைச்சர் தெரிவித்தார்.

“நாட்டில் எதிர்கொள்ளும் பாரிய அளவிலான பயிர் அழிவுக்கு குரங்குகளை ஏற்றுமதி செய்வதே சாத்தியமான தீர்வாக அதிகாரிகள் கருதுகின்றனர். இது ஒரு முழுமையான தீர்வு அல்ல, ஆனால் ஒரு விருப்பம், ”என அமைச்சர் மேலும் குறிப்பிட்டுள்ளார்.