முபாறக் மௌலவியின் வேதனை...!

சமூகத்தின் உயர் மட்டம் தவறு செய்யும் போது அவற்றை கண்டுகொள்ளாமலும் சாமாண்ய மக்கள் தவறு செய்யும் போது அதனை கண்டிப்பவர்களாக யூத நசாராக்கள் இருந்ததாக அல்குர்ஆன் குறிப்பிடுவது போன்றே முஸ்லிம் காங்கிரஸ் தலைவரின் மகளது திருமணம் கோடிக்;கனக்கான ரூபாய் செலவில் நடந்ததை கண்டிக்காத இஸ்லாமிய அமைப்புக்களின் மௌனம்; உள்ளது என முஸ்லிம் மக்கள் கட்சி குறிப்பிட்டுள்ளது.

இது பற்றி அக்கட்சித் தலைவர் மௌலவி முபாறக் அப்துல் மஜீத் தெரிவித்திருப்பதாவது, 

அண்மையில் பெய்த அடைமழையினால் உணவு கூட இல்லாமல் கிழக்கு மாகாண விவசாயிகள் கடனாளிகளாக தத்தளிக்கும் போது ஸ்ரீலங்கா முஸ்லிம் காங்கிரஸ் தலைவரின் புத்திரியின் திருமணம் கொழும்பு ஆடம்பர ஹோட்டலில் நடைபெற்றுள்ளது. இந்த ஹோட்டலில் ஒருவரின் உணவுக்கு ரூபா ஐயாயிரத்துக்கு மேல் அறவிடப்படுகிறது. சுமார் இரண்டாயிரம் பேர் இந்த  ஆடம்பர திருமணத்தில் கலந்து கொண்டதாக கூறப்படுகிறது. 

   சமூகத்துக்கு எடுத்துக்காட்டாக இருக்க வேண்டிய, மக்கள் வாக்கு பெற்ற ஒரு தலைவரின் இந்நடவடிக்கையை இந்த நாட்டின் தப்லீக், தவ்ஹீத் சுன்னத் போன்ற எந்த ஜமாஅத்தும் கண்டிக்காததன் மூலம் இத்தகைய ஆடம்பர திருமணத்தை இவர்கள் ஆதரிப்பதாகவே கருத முடிகிறது. குறிப்பாக திருமணங்கள் எளிய முறையில் இருப்பதே நபிவழி என  என கடுமையாக வலியுறுத்தி வரும் தவ்ஹீத் சகோதரர்கள் கூட மௌனமாக இருப்பது அல்லாஹ்வை விட அரசியல் தலைவர்களே அச்சப்பட தகுதியுள்ளவர்கள் என்ற இணைவைப்பிலா என்று புரியவில்லை.

   இதே திருமணத்தை ஒரு சாதாரண பணக்கார முஸ்லிம் செய்திருந்தால் இந்நேரம் இந்த ஜமாஅத்துக்களின் பள்ளிவாயல் மிம்பர்களில் குய்யோ முறையோ என புலம்பித்தள்ளியிருப்பார்கள். ஆனால் தாங்கள் பலர் ஆதரவளிக்கும் கட்சித்தலைமை இவ்வாறு நடந்து கொண்ட போது அமைதி காப்பது என்பது தமது தலைவர்களுக்கு வேறு சட்டமும் சாமாண்யர்களுக்கு வேறு சட்டமும் கடைப்பிடித்ததாலேயே யூத நசாராக்கள் இறைவனால் சபிக்கப்பட்டார்கள் என்ற குர்ஆன் வார்த்தையை நமக்கு நினைவு படுத்துகிறது. 

   அதே போல் ஒரு தடவைக்கு மேல் உம்றா செய்வதை விடுத்து அவற்றை ஏழைகளுக்கு வழங்கினால் றிசானா போன்ற பெண்கள் வெளிநாடு போவதை தடுக்கலாமே என பெரிதாக எழுதும் எமது எழுத்தாளர்களும்; கவிஞர்களும், ஊடகவியலாளர்களும், புத்திஜீவிகளும் கூட கோடி ரூபா செலவழித்து நடத்தப்பட்ட இந்தத் திருமணத்தை பகிரங்கமாக கண்டிக்க முன்வரவில்லை. ஒருவர் ஒரு உம்ரா செய்வதாயின் சுமார் ஒரு லட்சம் ரூபாவே செலவாகும். ஐந்து உம்ரா செய்தால் ஐந்து லட்சமே செலவாகும். இது இஸ்லாத்தில் தடுக்கப்பட்டதல்ல. ஆனாலும் அதை விட ஓர் ஏழையை வாழ வைத்தால் அதைவிட நன்மை கிடைக்கும் என்பது உண்மை. அதே போல் மேற்படி ஆடம்பர திருமணத்தை எளிய முறையில் நடத்தியிருந்தால் நூறு றிசானாக்களைவ வாழ வைத்திருக்க முடியும். 

   ஆகவே தலைவர்கள் தவறு செய்யும் போது மௌனம் காப்பதும் சாமாணியர்கள் தவறு செய்யும் போது வெளுத்து வாங்குவதுமான இஸ்லாமிய ஜமாஅத்துக்களின் செயல் நிச்சயம் இறை தண்டனைக்குரியதாகும் என்பதை  மிகத்தெளிவாக சொல்கின்றோம்.