வெளிநாட்டு முஸ்லிம் விரோத சக்திகள் பேரினவாதக் குழுக்களுக்கு பணஉதவி

நாட்டில் 1300 ஆண்டுகளாக சிங்கள மக்களுக்கும் முஸ்லிம் மக்களுக்கும் இடையே நீடித்து வரும் நல்லுறவை சீர்குலைப்பதற்கு பெரும்பான்மை இனத்தின் மிகச்சிறிய எண்ணிக்கையிலான பேரினவாத குழுக்கள் திட்டமிட்டு செயலாற்றி வருகின்றன என்று கிழக்கு மாகாண முதலமைச்சர் நஜீப் அப்துல் மஜீத் தெரிவித்தார்.

நாட்டில் தற்போது இடம்பெற்று வரும் முஸ்லிம் விரோத நடவடிக்கைகள் சம்பந்தமாக ஆராயும் விசேட கூட்டம் ஒன்று கிழக்கு மாகாண முதலமைச்சர் செயலகத்தில் நேற்று ஞாயிற்றுக்கிழமை நடைபெற்றது.

இக்கூட்டத்திற்கு தலைமை வகித்து பேசும் போதே முதலமைச்சர் நஜீப் இவ்வாறு குறிப்பிட்டார். இக்கலந்துரையாடலில் கிண்ணியா ஜம்மியதுல் உலமா சபையின் தலைவர் ஷேக் ஹிதாயதுல்லாஹ் மற்றும் சபையின் நிர்வாக உறுப்பினர்களும் கலந்து கொண்டனர்.இங்கு தொடர்ந்து உரையாற்றும் போது முதலமைச்சர் நஜிப் அப்துல் மஜீத் கூறியதாவது.

சில வெளிநாட்டு முஸ்லிம் விரோத சக்திகள் இப்பேரினவாதக் குழுக்களுக்கு பணத்தை வழங்கி மீண்டும் இலங்கையில் பயங்கரவாதச் சூழ்நிலையை ஏற்படுத்த முயற்சிக்கின்றன. இதில் முஸ்லிம்கள் மிகவும் கவனமாகவும் நிதானமாகவும் நடந்து கொள்ள வேண்டும். இதற்காக ஐந்து வேளைத் தொழுகையில் பாதுகாப்பு வேண்டி அல்லாஹ்விடம் பிரார்த்திப்போம். உலமா சபையினரும் எம்மக்களை அமைதி காக்க பல முயற்சிகளை முன்னெடுக்க வேண்டும்.

சுதந்திரதின விழாவிற்கு திருமலை வந்திருந்த ஜனாதிபதியோடு நாட்டில் முஸ்லிம்களுக்கு எதிராக மேற்கொள்ளப்படும் செயல்கள் பற்றி நீண்ட நேரம் உரையாடினேன்.

அப்போது ஜனாதிபதி எல்லோருக்கும் நாடு சொந்தமானது. எவரும் அச்சப்படவேண்டியதில்லை என்று கூறினார். முஸ்லிம் மக்களையும் அவர்களது பள்ளிவாசல்களையும் பாதுகாப்பது தமது கடமையாகும் என்றும் ஜனாதிபதி கூறினார். மூன்று இன மக்களும் சமமாக வாழும் மாவட்டமாக திருகோணமலை விளங்குகின்றது. இதனை உதாரணமாக எடுத்துக் கொள்ளலாம்  என்றும் ஜனாதிபதி தெரிவித்தார் என முதலமைச்சர் தெரிவித்தார்.