'வடக்கு முஸ்லிம்களே அச்சப்படாதீர்கள் - நான் உங்களோடு நிற்பேன்' - அமைச்சர் றிசாத்

வடக்கு முஸ்லிம்களை மீண்டும் இக்கட்டான நிலைக்கு தள்ளுவதற்கு சில சக்திகள் முயலுவதாகவும், வடக்கில் மீள்குடியேறியுள்ள முஸ்லிம்கள் இதனால் பெரும் துன்பத்திற்கு முகம் கொடுத்துள்ளதாகவும் அமைச்சர் றிசாத் பதியுதீன் தெரிவித்ததுடன், அவர்களின் நலனுக்காக இந்த புனித ரமளான் மாதத்தில் பிரார்த்திக்குமாறும் வேண்டுகோள் விடுத்தார்.

யாழ் முஸ்லிம் இணையத்திற்கு தொலைபேசி மூலம் கருத்துரைத்த அவர் மேலும் கூறியதாவது,

வடக்கில் மீளக்குடியமர்ந்த முஸ்லிம்களின் நிலை பரிதாபத்திற்குரியது,  அவர்கள் பல்வேறு வகையான, பலரின் நெருக்கடிக்கு முகம்கொடுத்துள்ளனர். நெருக்கடிகளுக்கு அஞ்சி சிலர் மீண்டும் வெளியேறிவிடுவோமா என்று சிந்திக்குமளவு நிலைமை மோசமான கட்டத்தை அடைந்துள்ளது.

வடக்கு முஸ்லிம்கள் தமது தாயகப் பிரதேசத்தில் மீளக்குடியேறுவதற்காக ஜனாதிபதியும், பாதுகாப்பு அமைச்சு செயலாளரும், முப்படையினரும் மேற்கொண்ட தியாகங்கள் மிகப்பெரியது. இந்த தியாகங்கள் காரணமாகவே புலிகள் அழிக்கப்பட்டு, வடக்கு முஸ்லிம்களில் ஒருதொகுதியினர் மீண்டும் தமது தாயகப் பிரதேசத்தில் மீளக்குடியேறியுள்ளனர்.

மீளக்குடியேறியுள்ள முஸ்லிம்கள் தமது தாயகப் பிரதேசத்திலிருந்து மீண்டும் வெளியேறக்கூடாது. அச்சுறுத்தலகளை கண்டு அவர்கள் பின்வாங்கக்கூடாது. இலங்கை முஸ்லிம்களுக்காயினும், வடக்கு முஸ்லிம்களுக்காயினும் அநீதி ஏற்படும் போது அங்கு எனது குரல் நிச்சயம் ஒலிக்கும். இதை எவரும் தடுக்கமுடியாது. பாதிக்கபட்ட வடக்கு முஸ்லிம்களின் நலனுக்காக தொடர்ந்து உழைப்பேன்.

தமிழ் சமூகத்தின் நியாயமான கோரிக்கைகள் மற்றும் அமைச்சர் என்ற வகையிலும் அவர்களின் குறைகளை போக்கவும் அர்ப்பணிப்புடன் செயற்பட்டேன். எதீர்காலங்களிலும் அவர்களுக்கான எனது சேவைகளில் எத்தகைய குறையும் இருக்காது எனவும் அமைச்சர் றிசாத் பதியுதீன் மேலும் தெரிவித்ததுடன், சில்லறை அச்சுறுத்தல்களை கண்டு மீளக்குடியேறிய முஸ்லிம்கள் மீண்டும் வெளியேற முயலக்கூடாது எனவும் அவர்களுக்கு ஆதரவாக எந்தவேளையிலும் தாம் தொடர்ந்து செயற்படுவேன் எனவும் உறுதியாக தெரிவித்தார்.