March 18, 2021

கொரோனா காலப்பகுதியில் இலங்கையில், கர்ப்பிணித் தாய்மார் இறப்பு வீதம் உயர்வு - ஐ.நா.


கோவிட் -19 காரணமாக சுகாதார சேவைகளில் ஏற்பட்ட பாதிப்புகளினால் தெற்காசியாவில் 239,000 தாய் மற்றும் குழந்தை இறப்புகளுக்கு வழிவகுத்திருக்கலாம் என்று ஐ.நாவின் புதிய அறிக்கையில் தெரிவிக்கப்பட்டுள்ளது.

இதில் பெண்கள், குழந்தைகள் மற்றும் இளம் பருவத்தினர் அதிகம் பாதிக்கப்பட்டுள்ளனர் என்று அந்த அறிக்கையில் சுட்டிக்காட்டப்பட்டுள்ளது.

இந்த அறிக்கை ஆப்கானிஸ்தான், நேபாளம், பங்களாதேஷ், இந்தியா மற்றும் இலங்கை ஆகிய நாடுகளின் மீது கவனம் செலுத்தியுள்ளது.

தெற்காசியாவில் இதுவரை 13 மில்லியன் கோவிட் வழக்குகள் மற்றும் 186,000 க்கும் மேற்பட்ட இறப்புகள் பதிவாகியுள்ளன. தெற்காசியா உட்பட பல நாடுகளில் தொற்றுநோய்க்கு எதிராக கடுமையான கட்டுப்பாடுகள் விதிக்கப்பட்டன.

வைத்தியசாலைகள், மருந்தகங்கள் மற்றும் அத்தியாவசிய கடைகள் திறந்த நிலையில் இருந்தபோதும், ஏனைய அனைத்து சேவைகளும் முடக்கப்பட்டிருந்தன.

இதன்படி, தெற்காசிய பிராந்தியத்தில் கோவிட்-19 தொற்றுநோய் காலத்தில் இலங்கையில் கர்ப்பிணித் தாய்மார் இறப்பு வீதம் அதிகரித்துள்ளது என ஐ.நா.வின் புதிய அறிக்கையில் தெரிவிக்கப்பட்டுள்ளது.

இலங்கையின் கர்ப்பிணித் தாய்மார் இறப்பு வீதம் 21.5 ஆகவும், பாகிஸ்தானில் 21.3 ஆகவும் பதிவாகியுள்ளது.

2020ஆம் ஆண்டில் சிசு மரண வீதம் இந்தியாவில் அதிகூடுதலாக (15.4வீதம்) இருந்துள்ளதாகவும், பங்களாதேஷில் 13 வீதமாக பதிவாகியுள்ளதாகவும் தெரிவிக்கப்பட்டுள்ளது.

0 கருத்துரைகள்:

Post a comment