ஜனாஸா எரிப்பும், முஸ்லிம் தலைமைகளும் - அலி சப்ரி மீது, விரல் நீட்டுவது நியாயமா...?

- சட்டத்தரணி பஸ்லின் வாஹிட் -

 ஜனாஸா எரிப்பு என்ற விடயத்தில் எல்லா முஸ்லீம்களும் ஒரே நிலைப்பாட்டையே கொண்டுள்ளனர். இதிலே கட்சி வேறுபாடு இருக்க முடியாது. முஸ்லிம்கள் எல்லா  விடயங்களிலும் மார்க்கத்தின் கட்டளைகளை அப்படியே நடைமுறைப்படுத்துவதில் பின் நிற்பதில்லை. எமக்கு நினைத்தவாறு மார்க்கக் கட்டளைகளை மாற்றம் செய்வதில் எந்தவிதமான உரிமையும் இல்லை என்பதில் கருத்து வேறுபாடும் இல்லை. ஆனால் சிறுபான்மையாக உள்ள இந்த நாட்டில் சில நேரங்களில் எமது மார்க்க உரிமைகளும் மறுக்கப்படுகின்றன. அவ்வாறான சந்தர்ப்பங்களில் உரிமைகளை வென்றெடுக்க போராட்டம் நடத்த வேண்டியுள்ளது .சில நேரங்களில் போராட்டங்களில் தோல்வியை தழுவ நேரிடலாம்.

ஜனாசா எரிப்பு விடயத்தில் இற்றைவரை நாம் தோல்வியே கண்டிருக்கின்றோம் இறுதியாக நீதிமன்றத்தின் உதவியை நாட வேண்டிய நிலைக்கு சமூகம் தள்ளப்பட்டுள்ளது. இந்த விடயத்தில் சில முஸ்லிம் தலைமைகளும் அமைப்புக்களும் முயற்சிகளை மேற்கொண்டாலும் இறுதியில் எல்லோரும் ஆளும் தரப்பின் பக்கம் பொறுப்பைச் சாட்டி விட்டு ஏனையோர் தப்பிக்கும் வழி வகைகளைத் தேடுகின்றனர்.ஆனால் சுமந்திரன் அவர்கள் நீதிமன்றம் செல்ல உதவத் தயாரானபோது தூங்கிக் கிடந்த தலைமைகள் எல்லாம் துள்ளிக்குதித்து முதலாவது இடத்தைப் பிடிக்கத் துடித்தன. அதுவரை மௌனமாக இருந்த மர்மம் எரிப்பு விடயத்தை வைத்தே தேர்தல் மேடைகளில் வாக்குக் கொள்ளையில் ஈடுபடுவதற்கா எனவும் எண்ணத் தோன்றுகின்றது.

மோதர பெண் ஜனாசா covid 19 காரணமாக நிகழ்ந்தது என்று பிழையான தீர்ப்பு வழங்கப்பட்டது என்ற விடயத்தில் நான் எனது கருத்தை முகப்புத்தகத்தில் பதிந்த போது சிலர் ஏளனமாக எனது கருத்தை சித்தரிக்க முயன்றனர்.காரணம் நான் ஆளும் கட்சியின் ஆதரவாளன் ஒருவனாக இருப்பது ஆகும். எனது கருத்தை அரசுக்கு எதிரான ஒருவர் பதிந்திருந்தால் பாராட்டுக்கள் குவிந்து இருக்கும்.நல்ல உதாரணம் தனித்துவத் தலைவரின் அமைச்சின் ஊடக செயலாளராக இருந்த சகோதரர் முதலைக் கண்ணீர் என்று அதனைக் கூறியிருந்தார். ஆளும் கட்சியில் உள்ளவர்கள் இரக்ககுணமற்ற அரக்கர்கள் என  சமூகத்துக்கு காட்டி தமது வாக்கு வங்கிகளை க் காப்பாற்றுவது தான் குறுகிய நோக்கம்.

 இன்று எதிர்க்கட்சியில் உள்ளவர்கள் அன்று திகன கலவரத்தின் போது  உயிருடன் இளைஞன் ஒருவன் எரியூட்டப்பட்ட போது, மினுவாங்கொடையில் இனவாதிகளால் அடித்து ஒரு குடும்பஸ்தர்  கொலை செய்யப்பட்டபோது, அதேபோல் நிக்கவரட்டியவில்   ஒருவர் இனவாதிகளால் கொலை செய்யப்பட்டபோது மற்றும் கண்டியிலே பிரபலமான மௌலவி அவர்கள் இனவாதிகளின் தாக்குதலால் படுகாயம் அடைந்து பின்னர் வபாத்தான போது அவர்களும்  முதலைக் கண்ணீர்தான் வடித்திருப்பார்கள் என்று. அன்று அவர்கள் ஆளும் கட்சியின் பிரபல ஆதரவாளர்கள்.ஆகவே அந்த எல்லா சந்தர்ப்பங்களிலும் வெறுமனே கவலையை தெரிவித்தது மட்டுமல்லாமல் காத்திரமான எந்த ஒரு நடவடிக்கையையும் அவர்களாலும் எடுக்க முடியவில்லை.

எரிப்பு விடயத்தில் எல்லோரும் விரல் நீட்டுவது பொதுவாக  அலிசப்ரி அவர்களுக்கு எதிராக ஆகும். இந்த விடயத்தில் தன்னாலான எல்லா முயற்சிகளையும் எடுத்ததாகவும், ஜனாதிபதி அவர்கள் துறைசார் வல்லுனர்களின் கருத்துக்களின் அடிப்படையில் ஒவ்வொரு விடயத்தையும் கையாளுகின்றமையினால்  இந்த விடயத்தில் சுகாதாரத்துறையினர்  எரியூட்டல் மட்டுமே இலங்கைக்கு பொருத்தமானது என்று விடாப்பிடியாக இருந்ததனால் ஜனாதிபதி அவர்களும் அதே நிலைப்பாட்டில் உள்ளார் என்பதை அலிசப்ரி அவர்கள் அண்மையில் UTV பேட்டியின்போது தெளிவுபடுத்தினார். பல துறைசார் வல்லுனர்களைக் கொண்டு சுகாதாரப் பணிப்பாளர் அவர்களுக்கு விளக்கத்தைக் கொடுத்து இவ்விடயத்தில் முஸ்லிம்களுக்கு அடக்கம் செய்வதற்கு அனுமதியை பெற முயற்சித்தாலும் அவரின் நிலைப்பாட்டில் மாற்றம் எதுவும் நடக்காது விட்டு தனது கவலையையும் தெரிவித்தார்.

கடந்த அரசின் காலத்தில் 21 முஸ்லிம் உறுப்பினர்கள் ஆளும் கட்சியில் இருந்தும் வரலாற்றில் என்றும் இல்லாத அநியாயங்கள் முஸ்லிம் மக்களுக்கு எதிராக கட்டவிழ்த்து விடப்பட்டன. இலங்கையின் அரசியல் வரலாற்றில் அதிகளவான பாதிப்பு முஸ்லிம் சமூகத்திற்கு ஏற்பட்டது கடந்த அரசில் ஆகும்.அத்தனை அநியாயங்களையும் அங்கீகரிப்பது போல் அந்தத் தலைமைகள் மௌனம் காத்ததன் மர்மம் பட்டங்களும் பதவிகளும் ஆகும்.

அரசியல் ஞானம் பெற்ற எந்த ஒரு தலைவருக்கும் கடந்த ஜனாதிபதித் தேர்தலில் வெல்லப்போவது கோட்டாபய ராஜபக்ஷ அவர்களே என்பதை தெரியாமல்  இருக்க முடியாது. ஏனெனில் அதற்கு முன்னைய வருடம் நடைபெற்று உள்ளூராட்சி தேர்தல் பெறுபேறுகள் அதற்கு சான்று பகிர்ந்தன. ஆனால் எதுவுமே புரியாதது போல் முஸ்லிம் மக்களின் 95% வாக்குகளையும் தோல்வியுற்ற சஜித் அவர்களுக்கு வாரி வழங்கும்படியாக பிரச்சாரம் செய்து விட்டு 5% முஸ்லிம் வாக்குகளை பெற்ற கட்சியின் முஸ்லிம் தலைமைகளுக்கு எதிராக குரல் எழுப்புவதன் நியாயம்தான் என்ன? ஆளும் கட்சியில் அன்று அவர்களால் அரசுக்கு எதிராக போர்க்கொடி தூக்க முடியவில்லை.இன்று அரசின் ஆதரவாளர்கள் மட்டும் சமூக பிரச்சினை களுக்கு பொறுப்பாளிகளாக இருக்க வேண்டும் என எதிர்பார்ப்பது சிறுபிள்ளைத் தனமானது.

2015 தேர்தலில் மகிந்த ராஜபக்ச அவர்களுக்கு எதிராக முஸ்லிம் மக்கள் ஒன்று திரண்டது அவரின் ஆட்சியில் நடைபெற்ற அநியாயங்கள் தான் காரணம் என அலிசப்ரி அவர்களின் பேட்டியை   வீடியோப் பித்தன் ஒருவர் விமர்சித்து இருந்தார்.ஆனால்  2020 இல் நல்லாட்சியின் வரலாறு படைத்த கொடுமைகளுக்கு எதிராக முஸ்லிம் மக்கள் ஒன்று திரளாத காரணத்தை சொல்லாமல்  மறைத்து விட்டார்.

UTV பேட்டியில் அலிசப்ரி அவர்கள் மிகவும் தெளிவாகவும், நிதானமாகவும் தமது கருத்துக்களை வழங்கினார்.தான் குறுகிய நோக்குடன் அரசியல் பயணத்தை தொடரவில்லை என்பதையும் சமூக நலன் ஒன்று மட்டுமே தனது இலக்கு என்பதை ஆணித்தரமாக கூறினார்.அரசின் தலைமைகள் மீது தமக்கு இருக்கும் நம்பிக்கையை உறுதிபட எடுத்துரைத்தார்.

இன்ஷா அல்லாஹ் எதிர்வரும் 4 1/2 வருடங்கள் இந்நாட்டை ஆளப் போவது கோட்டாபய ராஜபக்ஷ அவர்களின் கீழான அரசே.முஸ்லிம் சமூகத்தின் குரலாக , பிரதிநிதியாக குரல் கொடுக்க அதில் எமது பிரதிநிதிகள் அவசியம்.அதில் எம் சமூகத்துக்கு ஏதேனும் நன்மைகள் கிடைக்கும் என்பதில் நம்பிக்கை வைக்க வேண்டும்.எந்த ஒரு முஸ்லிம் பிரதிநிதியும் இல்லாத ஒரு அரசை உருவாக்கி வரலாற்றுத் தவறை இழைத்தவர்களாக நாம் ஆளாகக் கூடாது. அண்மையில் அலி சப்ரி அவர்களுடன் உரையாடிக் கொண்டிருந்த போது அவர் கூறிய விடயம் இந்திய முஸ்லிம் மக்கள் எல்லோரும் ஒன்றாக தோல்வியுற்ற  காங்கிரஸ் கட்சியின் பின்னால் அணிதிரண்டு இன்று அனாதரவான ஒரு சமூகமாக பல்வேறு இன்னல்களை எதிர் நோக்கிக் கொண்டு உள்ளனர்.அரசு அவர்களைக் கண்டதும் காணாதது போல் உள்ளது.எனவே எல்லா முட்டைகளையும் ஒரே கூடையில் போடாமல் பிரித்துப் போடும் வழிவகைகளைப் பற்றி மீண்டும் சிந்திக்கும் காலம் வந்துவிட்டது..