உடல்கள் எரிப்பு - முஸ்லிம் வைத்தியர்கள், தமது பங்களிப்பை சரியாக செய்தார்களா...?

- சட்டத்தரணி பஸ்லின் வாஹிட் -

'முள்ளை முள்ளால் தான் எடுக்க வேண்டும்' என்பர். எரிப்பது சம்பந்தமான விடயத்தில் அரசுக்கு விளக்கம் கொடுப்பது வைத்தியர்களின் சங்கமும், வைத்தியத்துறையுடன் சம்பந்தப்பட்ட சுகாதார உயர் அதிகாரிகளுமே. இவர்களின் அபிப்பிராயப்படியே எரிப்பது தான் மிகவும் பொருத்தமானது  பாதுகாப்பானது என்ற முடிவை அரசு எடுத்தது. அரசின் நடவடிக்கைகள் எல்லாவற்றையும் இனவாத நோக்கில் நாம் பார்ப்போம் எனில் எல்லாமே பிழையாகத்தான் தெரியும்.

 வைத்தியத் துறையுடன் சம்பந்தப்பட்டவர்களின் அபிப்பிராயம் இந்த விடயத்தில் மிகவும் முக்கியமானது என்பதில் எந்த சந்தேகமும் இல்லை. ஏனென்றால் கொரோனா அழிப்பில் முன்வரிசை போராளிகளாக இருப்பது அவர்களே. எனது நண்பன் நளீர் அவர்கள்  அடிக்கடி என்னிடம் கூறும் ஒரு விடயம் இந்த விடயத்தில் வைத்திய துறையுடன் சம்பந்தப்பட்ட முஸ்லிம்கள் தமது பங்களிப்பை சரியாக செலுத்த வில்லை என்பதே.

ஏனெனில்  யார் என்ன சொன்னாலும் குறிப்பிட்ட துறையில் சம்பந்தப்பட்டவர்கள் உரிய விளக்கத்தை கொடுத்து இருந்தால் இதில் வேறுவிதமான முடிவு வந்து இருக்கலாம் என்பதே அவரின் அபிப்பிராயம். இது சம்பந்தமாக சமூகத்துக்கு விளக்கம் அளிக்க வேண்டும் என்று அவர் என்னுடன் பலமுறை தர்க்கித்தார்.

இதில் ஓரளவு உண்மையும் இருக்கின்றது சட்டப் பிரச்சினை என்றால் சட்டத்துறையில் சம்பந்தப்பட்டவர்களின் அபிப்பிராயத்திற்கு முன்னுரிமை வழங்கப்படும். எனவே உலமாக்களும் அரசியல்வாதிகளும்,சட்டத்தரணிகளும், வேறு சமூக நலன் விரும்பிகளும் இந்த விடயத்தில் என்ன விளக்கத்தை கொடுத்தாலும் குறிப்பிட்ட துறையுடன் சம்பந்தப்பட்டவர்கள் விளக்கம் அளித்திருந்தால் ஏதேனுமொரு மாற்றம் நிகழ்ந்திருக்கலாம் என்ற விடயத்தில் எனக்கும் மாற்றுக் கருத்து இல்லை. 

இந்த விடயத்தில்  சுகாதாரத்துறையைச் சார்ந்த முஸ்லிம் உயர் அதிகாரிகள்  தமது பங்களிப்பை உரிய நேரத்தில்  செலுத்தவில்லை என்ற இந்த கருத்தில் ஏதேனும் உண்மை இருக்கின்றதா? அல்லது அவர்களுக்கு ஒரு சந்தர்ப்பம் கிடைக்கவில்லையா? அப்படி என்றால் காலம் தாழ்த்தியாவது அவ்வாறான ஒரு முயற்சி நடை பெறுகின்றது என்றால் வரவேற்கத்தக்க விடயமே.