சஜித் பிரேமதாசவுக்கு வழங்கும் வாக்கு, றிசாட் பதியுதீனுக்கு வழங்கும் வாக்கு என நினைத்து கொள்ளுங்கள்

தமிழ் தேசியக் கூட்டமைப்பினர் கடைசி நேரத்தில் சஜித் பிரேமதாசவுக்கு வாக்களிக்கச் சொல்லிக் கொண்டு வருவார்கள். கடந்த 5 வருடமாக நல்லாட்சி ஊடாக எதனைப் பெற்றுத் தந்தீர்கள் என்ற கேள்வியைக் கேட்டு விரட்டியடியுங்கள் என முன்னாள் பிரதி அமைச்சரும் ஜனநாயக மக்கள் காங்கிரஸ் தலைவருமான பிரபா கணேசன் தெரிவித்துள்ளார்.

வவுனியா, ஈரப்பெரியகுளத்தில் கோத்தபாய ராஜபக்சவுக்கு ஆதரவு தெரிவித்து இன்று -18- இடம்பெற்ற கூட்டத்தில் கலந்து கொண்டு உரையாற்றும் போதே இவ்வாறு தெரிவித்தார். அவர் மேலும் தெரிவிக்கையில்,

மஹிந்த ராஜபக்சவின் காலத்தில் எமது மக்களுக்கு கிடைத்த அபிவிருத்திகள் கடந்த 4 வருட காலமாக இல்லாமல் போயிருக்கிறது. தமிழ் மக்களுக்கு தேவையான அரசியலமைப்பை பெற்றுக் கொடுக்கின்றோம். சமஸ்டியை பெற்றுக் கொடுக்கின்றோம். அரசியல் கைதிகளை விடுதலை செய்து கொடுக்கின்றோம் என்று தமிழ் தேசியக் கூட்டமைப்பினர் பல வாக்குறுதிகளை வழங்கினார்கள். நல்லாட்சியை ஏற்படுத்துகின்றோம் என்று ரணில் விக்ரமசிங்கவின் ஆட்சியை ஏற்படுத்தினார்கள்.

ஆனால் அந்த ஆட்சியில் எமது மக்களுக்கான உரிமைகளும் கிடைக்கவில்லை. அபிவிருத்தியும் கிடைக்கவில்லை. வன்னி மாவட்டத்தில் இருக்கும் தமிழ் மக்கள் பாரிய அளவில் மிகவும் கஸ்ரத்துடன் வாழ்ந்து வருகின்றார்கள். இந்த மக்களுக்கு உரிமைகள் எவ்வளவு அவசியமோ அதைவிட வேகமாக அபிவிருத்திகள் தேவைப்படுகிறது. அந்த அபிவிருத்திகளை வேட்பாளர் கோத்தபாய ராஜபக்ஸ அவர்களை வெற்றி பெறச் செய்வதன் மூலம் தான் பெறக் கூடியதாக இருக்கும். இல்லையென்றால் கடந்த நான்கு வருடங்களைப் போல் மீண்டும் 5 வருடங்களை கடக்க வேண்டி வரும். இந்த அடிப்படையை தமிழ் மக்கள் சரியாக புரிந்து கொண்டு செயற்பட வேண்டும்.

வன்னி மாவட்டத்தில் 84 வீதமான தமிழர்கள் வாழ்ந்து கொண்டிருக்கிறார்கள். 10 வீதமான முஸ்லீம்களும், 6 வீதமான சிங்களவர்களும் வாழ்ந்து கொண்டிருக்கிறார்கள். சிங்கள மக்களைப் பொறுத்தவரை வவுனியாவில் நூற்றுக்கு நூறு வீதம் கோத்தபாய ராஜபக்ஸ அவர்களை ஆதரிக்க தயாராக இருக்கிறார்கள். தமிழ் மக்களும் அப்படியானதொரு நிலைப்பாட்டை எடுத்தால் தான் எங்களுக்கு தேவையான பாரிய அபிவிருத்திகளைப் பெற்றுக் கொள்ள முடியும்.

கடந்தவாரம் தென்னிலங்கையின் எட்டியாந்தோட்ட, தெரனியகல, கம்பகா போன்ற பல பிரதேசங்களில் கோத்தபாய ராஜபக்சவுடன் இணைந்து கூட்டங்களில் கலந்து கொண்டிருந்த போது அங்கு இருக்கும் 75 வீதமான சிங்கள மக்கள் கோத்தபாயவுக்கு வாக்களிக்க தயாராக இருக்கிறார்கள். அந்த வெற்றியில் தமிழ் மக்களின் வாக்குகளும் இருந்தால் தான் எதிர்காலத்தில் தமிழ் மக்களுக்கு தேவையானவற்றை பெற்றுக் கொள்ள முடியும்.

தமிழ் தேசியக் கூட்டமைப்பினர் கடைசி நேரத்தில் சஜித் பிரேமதாசவுக்கு வாக்களிக்கச் சொல்லிக் கொண்டு வருவார்கள். அவர்கள் வரும் பொழுது அவர்களை விரட்டியடியுங்கள். கடந்த 5 வருடமாக நல்லாட்சி ஊடாக எதனைப் பெற்றுத் தந்தீர்கள் என்ற கேள்வியைக் கேட்டு விரட்டியடியுங்கள்.

மேலும், சஜித் பிரேமதாசவுக்கு வழங்கும் ஒவ்வொரு வாக்கும் றிசாட் பதியுதீனுக்கு வழங்கும் வாக்கு என நினைத்து கொள்ளுங்கள். மீண்டும் பங்கரவாதம் ஏற்படும் என்பதை தெரிந்து கொள்ள வேண்டும். நான் 20 அம்சக் கோரிக்கைளை முன்னாள் ஜனாதிபதி மஹிந்த ராஜபக்ஸ அவர்களிடமும், வேட்பாளர் கோத்தபாய ராஜபக்ஸவிடம் முன்வைத்து ஏற்றுக் கொண்ட பின் தான் நான் அவர்களுக்காக வேலை செய்கின்றேன்.

எனவே அந்த கோரிக்கைகளை நிறைவேற்ற தமிழ் மக்களும் கோத்தபாயவுக்கு வாக்களிக்க வேண்டும். அதன் மூலமே எமக்குதேவையானவற்றைப் பெற முடியும் எனத் தெரிவித்தார்.