முஸ்லிம் அரசியல்வாதிகள், சஹ்ரானின் எதிர்பார்ப்பை நிறைவேற்றி வருகின்றனரா..?

முஸ்லிம் அமைச்சர்கள் தமது பதவிகளில் இருந்து விலகியதன் மூலம் முன்னாள் அமைச்சர் றிசார்ட் பதியூதீனுக்கு எதிராக சுமத்தப்பட்டுள்ள குற்றச்சாட்டுக்களில் இருந்து அவர் தப்பிக்க சந்தர்ப்பத்தை ஏற்படுத்தி கொடுத்துள்ளதாக தேசிய சுதந்திர முன்னணியின் ஊடகப் பேச்சாளர் மொஹமட் முஸ்ஸமில் தெரிவித்துள்ளார்.

தேசிய சுதந்திர முன்னணியின் தலைமையகத்தில் நேற்று நடைபெற்ற செய்தியாளர் சந்திப்பில் வைத்து அவர் இதனை கூறியுள்ளார். மேலும் கூறுகையில்,

றிசார்ட் பதியூதீனுக்கு எதிரான குற்றச்சாட்டுக்கள் தொடர்பான சாட்சியங்களை எதிர்வரும் 11ஆம் திகதி நாங்கள் குற்றப் புலனாய்வு திணைக்களத்தில் கையளிப்போம்.

இலங்கை வரலாற்றில் முதல் முறையாக முஸ்லிம் அமைச்சர்கள் அனைவரும் தமது பதவிகளில் இருந்து விலகியுள்ளனர்.

கடந்த பல ஆண்டுகளாக அனைத்து அரசாங்கங்களிலும் அங்கம் வகித்த இந்த அரசியல்வாதிகள் முஸ்லிம் மக்களுக்காக குறைந்தளவான நியாயத்தையும் நிறைவேற்றவில்லை.

இதற்கு பதிலாக முஸ்லிம் மக்களின் வாக்குகளை கொள்ளையடித்து மாறி, மாறி அனைத்து அரசாங்கங்களிலும் பதவிகள் மற்றும் சிறப்புரிமைகளை மட்டுமே பெற்று கொண்டனர்.

முஸ்லிம் அரசியல்வாதிகள் தற்போதைய சந்தர்ப்பத்தில் சஹ்ரானின் எதிர்பார்ப்பை நிறைவேற்றி வருகின்றனரா என்ற கேள்வி தனக்கு எழுவதாகவும் மொஹமட் முஸ்ஸமில் குறிப்பிட்டுள்ளார்.