பயங்கரவாத முத்திரை குத்தப்பட்ட 2 முஸ்லிம், இளைஞர்களை மீட்பதில் பங்காற்றிய 4 பேர்

காலம்: 2019 ஆம் வருடம் ஜனவரி மாதம் எட்டாம் திகதி .  இடம்: புத்தளத்தில் இருக்கும் வனாத்த விழுவ பகுதி.

சம்பவம்: முஹம்மத் நபீஸ் முஹம்மத் நாப்ரித் (வயது 21), முஹம்மத் நபீஸ் முஹம்மத் நவீத் (வயது 19)ஆகிய இரண்டு மாணவர்கள் இலங்கை குற்றப்புலனாய்வுப் பிரிவினரால் கைது செய்யப்படுகிறார்கள். இவர்களுக்கும் மாவனல்லை புத்தர் சிலையுடைப்பு விவகாரத்தில் கைதாகியிருக்கும் வேறு சில இளைஞர்களுக்கும் இடையில் நெருக்கமான உறவிருக்கிறது என்ற  சந்தேகத்தின் பெயரில் இவர்கள் கைதாகிறார்கள்.

தீவிரவாத செயல்களுக்கு உடந்தையாக இருந்தார்கள் என்ற குற்றச்சாட்டில்  பயங்கரவாத தடுப்பு சட்டத்தின் கீழ் நீதிமன்றில் ஆஜார்படுத்தப்படுகிறார்கள். நீதிமன்றம் மேலதிக விசாரணைக்காக சந்தேக நபர்களை மூன்று மாதங்களுக்கு சிறையில் தடுத்து வைத்து விசாரிக்க பாதுகாப்புப் பிரிவினருக்கு அனுமதி அளிக்கிறது.

இன்று மாவனல்லை மாஜிஸ்ட்ரேட்  நீதிமன்றம் இந்த இருவருக்கும் பிரதி ஞாயிறு தோறும் குற்றப்புலனாய்வுப் பிரிவுக்கு சமூகம் தரவேண்டும் என்றும், இவர்களின் முகவரியில் மாற்றங்கள் நிகழுமானால் அதனையும் உடனடியாக குற்றப் புலனாய்வுப் பிரிவினருக்கு அறிவிக்க வேண்டும் என்ற நிபந்தனையிலும்  விடுதலை செய்தது.

பயங்கரமான வெடி பொருட்களுடன் இவர்கள் கைது செய்யப்பட்டார்கள் என்று சமூக வலைத்தளங்களிலும், ஊடகங்களிலும்  இவர்களின் கைது பற்றிய செய்திகள் வெளியாகியிருந்தன என்பதை இவ்விடத்தில் ஞாபகப்படுத்த விரும்புகிறேன். இன்று மாவனல்லை நீதவான் நீதிமன்றம் இவர்களை நிரபராதிகள் என்று விடுதலை செய்திருப்பதையும் உங்களது கவனத்துக்குக் கொண்டுவர விரும்புகிறேன்.

பயங்கரவாத தடை சட்டம் என்ற பிரிவில் கைது செய்யப்பட்டு சிறையில் அடைக்கப்படும் நபர்களுக்கு பிணை மறுக்கப்படும்.  இந்த நபர்களுடன் தொடர்பு கொள்கின்ற அனைவரும் இலங்கை அரசின் பாதுகாப்புப் பிரிவினரின் கடுமையான கண்காணிப்புக்கு ஆளாவார்கள். அவர்களின் அனைத்து நடவடிக்கைகளும் விஷேட உளவுப்பிரிவினால் வேவு பார்க்கப்படும். இத்தகைய சங்கடங்களுக்கு முகம் கொடுக்க யாருமே முன்வருவதில்லை. அதனால், பயங்கரவாத தடுப்பு சட்டத்தின் கீழ் கைதாகும் நபர்களும்,ு அவர்களது குடும்பத்தினரும் நிர்க்கதியான நிலைக்கு ஆளாவார்கள். சமூகத்தை விட்டும் தனிமையாக்கப்படுவார்கள்.

இந்த இளைஞர்களின் நிலையும், குடும்பத்தாரின் நிலமையும்  இப்படியே ஆகிப்போனது. என்றாலும், சமூக நலனில் அக்கறை கொண்ட சிலரின் தன்னலமில்லா சேவையின் காரணமாகவே அப்பாவிகளான இந்த இளைஞர்களின் விடுதலை சாத்தியமானது. இலங்கை முஸ்லீம் சமூகத்தில் இருக்கின்ற துணிச்சல்மிக்க தனித்துவம் வாய்ந்த அந்த செயல்வீரர்கள்  யாராக இருக்கும் என்று அறிய உங்களுக்கும் ஆர்வமிருக்கும்.

இந்த இளைஞர்களின் விடுதலைக்கு களத்திலிறங்கி ஒருங்கிணைப்பாளராக வேலை செய்தவர்  சமூக சேவையாளர் சங்கைக்குரிய மிப்லால் மௌலவி.  மாணவர்களின் கைது சம்பந்தமான செய்தி கிடைத்தவுடன் இவர் உடனடியாக அந்தக் குடும்பத்தினரை சென்று சந்தித்து ஆறுதலாக இருந்திருக்கிறார். இவருக்குத் தேவையான உதவிகளை பாராளுமன்ற உறுப்பினர் கௌரவ முஜிபுர் ரஹ்மான் செய்து கொடுக்கிறார். அரச உயர்மட்டத்தில் செய்ய வேண்டிய வேலைகளை மேல் மாகாண ஆளுநர் கௌரவ அஸாத்ஸாலி செய்து கொடுத்திருக்கிறார்.

வழமைபோலவே முஸ்லிம்கள் எதிர்நோக்கும் சட்ட ரீதியான பிரச்சினைகளுக்கு சுயமாக முன்வந்து உதவுகின்ற சிரேஷ்ட சட்டத்தரணி ஷிராஸ் நூர்தீன் இந்த இளைஞர்களின் விடுதலைக்கு முக்கியமான காரணகர்த்தாவாக இருந்திருக்கிறார். இம்முறை அவருடன் நீதிமன்றில் அவருக்கு துணையாக சட்டத்தரணி சாஜித் முஹம்மத் இருந்திருக்கிறார்.

நண்பர்களே......நன்றியுடன் இவர்களை நினைத்துப் பார்ப்போம். எங்களது பிரார்த்தனைகளில் இவர்களையும் மறவாதிருப்போம்! இன்ஷா அல்லாஹ்.

Ahlulbaith