3 ஆம் உலகப் போரில், இஸ்ரேல் காணாமல் போய்விடும், ஆயுதங்களும் தயார் - ஈரான்

மூன்றாம் உலகப் போரின் போது இஸ்ரேல் காணாமல் போய்விடும் என்றும் அதற்கான ஏவுகணைகளும் துப்பாக்கிகளும் தயார் நிலையில் உள்ளது என்றும் ஈரானின் இஸ்லாமிய புரட்சிக் காவலர் கார்ப்ஸ் (IRGC) துணைத் தளபதி பிரிகேடியர் ஜெனரல் ஹோசியன் சலாமி எச்சரித்துள்ளார்.

ஈரான் மற்றும் இஸ்ரேல் ஆகிய நாடுகளுக்கு இடையில் எப்போதும் பதட்டம் நீடிக்கின்ற நிலையில் இஸ்ரேல் அதிபரை " அரக்கன் " என வர்ணிக்கும் அவர் வரப் போகும் மூன்றாம் உலகப் போரில் இஸ்ரேலை அழித்து விடப் போவதாக மிரட்டி உள்ளார் . அதற்கான உபகரணங்கள் தயாரான நிலையில் இருப்பதாக அவர் கூறியுள்ளார்.

தெஹ்ரானின் எச்சரிக்கையில், போர் நடந்தால் எங்களுக்கு வெகு அருகில் இருக்கும் உங்கள் விமான தளங்களை நாங்கள் எப்போது வேண்டுமானாலும் தாக்க தயாராக இருக்கிறோம் என எச்சரிக்கை விடுத்துள்ளார்.

சிரியாவில் அமெரிக்க கூட்டுப்படைகள் தாக்குதல் நடத்தியுள்ள நிலையில் இவரின் இந்த பேச்சு எரியும் தீயில் எண்ணெய்யை ஊற்றுவது போல் உள்ளதாக கூறப்படுகிறது.

எதிரி தீங்கு விளைவிக்கும் எந்த நேரத்திலும் அவர்கள் ஆக்கிரமிப்பு நிலத்தில் எங்கிருந்தாலும் அவர்களைத் தாக்க ஈரானின் ஆயுதங்கள் மற்றும் ஏவுகணைகள் தயாராக உள்ளதாக ஸலாமி எச்சரித்துள்ளார்.

கடந்த செவ்வாயன்று சிரியாவில் ஐந்து தெஹ்ரான் கட்டுப்பாட்டு வரைபடங்களை இஸ்ரேல் வெளியிட்டுள்ளது. அதன் எதிர்வினையாகத்தான் ஸலாமி இவ்வாறு கூறியுள்ளார் என உள்ளூர் ஊடகங்கள் தெரிவிக்கின்றன.

இதைத் தொடர்ந்து அமெரிக்காவிற்கும் எச்சரிக்கை விடுக்கும் வகையில் 2015 ல் ஒப்புக் கொள்ளப்பட்ட பன்முக அணுசக்தி ஒப்பந்தத்தில் இருந்து டொனால்ட் டிரம்ப் வெளியேறினால் , "விரும்பத்தகாத" விளைவுகளை ஏற்படுத்தும் என்றும் ஈரான் கூறியுள்ளது.

அணு ஆயுத ஒப்பந்தத்திலிருந்து அமெரிக்கா வெளியேறினால் இரானிற்கு வேறு பல வழிகள் உள்ளன என்று கூறும் ஈரானின் வெளியுறவுத் துறை மந்திரி மேலும் அமெரிக்க நடவடிக்கைகளை ஈரான் பிரதிபலிக்க ஆரம்பித்தால் அது அமெரிக்காவிற்கும் அமெரிக்கர்களுக்கு விரும்பத் தகாத விஷயமாக இருக்கும் என்றும் கூறினார்.

பாரக் ஒபாமாவால் 2015ல் கையெழுத்திடப்பட்ட அணுசக்தி ஒப்பந்தம் மோசமான ஒப்பந்தம் என தொடர்ந்து டிரம்ப் கூறி வந்துள்ளார். மேலும் இரானின் பாலிஸ்டிக் ஏவுகணை திட்டங்கள் குறித்து அதிருப்தியில் இருக்கும் டிரம்ப் இந்த அணுசக்தி ஒப்பந்தத்தை எப்போது வேண்டுமானாலும் முறித்துக் கொள்ளத் தயாராக இருப்பதாக செனட் வெளியுறவுக் குழுவின் தலைவரான அமெரிக்க செனட்டர் பாப் கார்க்கர் கூறியுள்ளது குறிப்பிடத்தக்கது.