பொதுபலசேனாவும் ஐ.எஸ்.அமைப்பும் ஒரே மாதிரியானது - அமில தேரர்

பொதுபலசேனாவும் ஐ.எஸ்.ஐ.எஸ் அமைப்பும் ஒரே மாதிரியானது என சிவில் சமூகத்தினர் அமைப்பின் உறுப்பினர் அமில தேரர் தெரிவித்தார்.

கொழும்பில் இடம் பெற்ற ஊடக சந்திப்பில் கருத்து தெரிவித்த போதே அவர் இதனைக் கூறினார். மேலும் தொடர்ந்த அவர்,

ஞானசார தேரர் குரங்கைப் போல ஆடும் ஒருவராக இருந்தாலும், ஆட்டுவிப்புகளுக்கு ஆட வேண்டுமா என்பதனை அவரே தீர்மானிக்க வேண்டும்.

காவியுடை தரித்த ஒருவராக அவர் நடந்து கொள்ள வேண்டும். தகாத வார்த்தைகளாலும், அடிதடிகள் மூலமாகவும் பௌத்தத்தை காக்க முடியாது. அவர் பௌத்தத்திற்கு சேறு பூசும் நடவடிக்கைகளிலேயே ஈடுபட்டுக்கொண்டு வருகின்றார்.

பொதுபலசேனாவினதும், ஞானசாரவினதும் நடவடிக்கைகளை தடுத்து நிறுத்த முடியாமல் அரசு மேற் கொள்ளும் செயற்பாடுகள் காரணமாக, ஞானசாரரின் செயல்களுக்கு பின்னால் அரசும் இருக்கின்றதா என்ற சந்தேகம் ஏற்படுகின்றது.

எவ்வாறாயினும் பொதுபலசேனாவும் ஐ.எஸ்.ஐ.எஸ் அமைப்பும் ஒரே மாதிரியானவை. இரண்டுமே அவ்வப்போது வெளிவருகின்றன. இரு அமைப்புகளும் ஒரே மாதிரியான நடவடிக்கைகளிலேயே ஈடுபட்டு வருகின்றன.

அதனால் இவ்வாறான செயற்பாடுகளை உடனடியாக தடுத்து நிறுத்த வேண்டும் எனவும் தபர அமில தேரர் தெரிவித்தார்.