பெளத்தர்கள் இஸ்லாத்தை நோக்கி, மதம் மாற்றப்படுவதால் முரண்பாடு முற்றுகிறது - மனோ

(Mano Ganesan  னுடைய பேஸ்புக்கிலிருந்து)

(06/04/16) <மதமாற்றங்கள் சகவாழ்வை குழப்புகின்றன> இந்த நொடியில் என் மனதில்……

மட்டக்களப்பு மாமாங்கம் கோவில் வீதியை சேர்ந்த உதயகுமார் இந்துமதி என்ற ஒரு பெண் நபர், புனித இஸ்லாம் மதத்தை தழுவிகொண்டு தன் பெயரை உதயகுமார் மபாசா என்று மாற்றிக்கொண்டுள்ளார் என்ற அறிவிப்பு இன்று 06/04/16/புதன்கிழமை வீரகேசரி விளம்பர அனுபந்த பக்கம் 02ல், குறிப்பிட்ட நபரால் வெளியிடப்பட்டுள்ளதை, சுட்டிக்காட்டி ஒரு நண்பர் காலையில் ரொம்பவும் வருத்தப்பட்டார்.

அத்தனைக்கும் வருத்தப்பட்ட நண்பர் ஒன்றும் கோவில், குளம் என்று பயணிக்கும் பெரும் ஹிந்து பக்தரும் அல்ல. வாரத்துக்கு ஒரு முறை ஆலயத்துக்கு போகும் ஒரு படித்த சராசரி சைவ இந்து இலங்கையர். இந்த நாட்டில் மத, இன நல்லுறவுகள் கட்டிக்காக்கப்பட வேண்டுமென அவர் விரும்புகிறார்.

இத்தகைய மதமாற்றங்கள் நாட்டின் இன சகவாழ்வுக்கு உகந்தது அல்ல என நான் நினைக்கின்றேன். விரும்பிய மதங்களை கடைப்பிடிக்கும் தனி மனித சுதந்திரம் என்ற அடிப்படையில் இத்தகைய நடவடிக்கைகளை ஏற்றுக்கொள்ளமுடியாது. நாட்டின் இன்றைய சூழலில் நாம் இன, மத, மொழி நல்லுறவுகளை, ஒற்றுமையை, சகவாழ்வை, வளர்க்க வேண்டிய கட்டத்தில் இருக்கும்போது, அதற்கு முரணான செயற்பாடுகளை அனுமதிக்க முடியாது.

ஒரு மதத்தவர், இனத்தவர் மீது இன்னொரு மதத்தவர், இனத்தவர் எதிர்ப்பு உணர்வை முன்னெடுக்க இவை காரணங்களாக அமைந்து விடுகின்றன. சந்தேகக்கண் கொண்டு பார்க்க இவை காரணிகளாக அமைந்து விடுகின்றன.

இதேபோல் பெளத்தர்களும் ஆங்காங்கே இஸ்லாத்தை நோக்கி மதம் மாற்றப்படுவதால் அங்கேயும் முரண்பாடு முற்றுகிறது. பெளத்த, இந்து மதத்தவர் மத்தியில் கிறிஸ்தவ மதத்தை நோக்கிய மாற்றங்களும் நடைபெறுகின்றன. கிறிஸ்தவ மதம் என்னும்போது அது மதத்துடன் மாத்திரம் நின்று விடுகிறது. இஸ்லாம் என்று சொல்லும்போது அது ஒரு இனமாக மாறி விடுகிறது.

எனவே மத, இன முரண்பாடுகளால், ஏற்கனவே குழம்பி போயிருக்கும் இந்நாட்டில், இவை தொடர்பில் விழிப்புணர்வு தேவை. முற்போக்கு சிந்தனை கொண்ட இஸ்லாமிய, கிறிஸ்தவ நண்பர்கள் மத்தியில் கலந்துரையாடல் தேவை. மதமாற்ற தடை சட்டங்களும் தேவை.

மத, இன முரண்பாட்டு சந்தேக உணர்வுகள், சகவாழ்வுக்கு குந்தகம் விளைவிப்பதால், இவை சகவாழ்வு அமைச்சரான எனது அமைச்சு சார்ந்த பிரச்சினை என எண்ணுகிறேன். எனவே இது தொடர்பில் ஒரு அமைச்சரவை பத்திரத்தை தயாரிக்கும்படி, இன, மத சகவாழ்வுக்கு பொறுப்புள்ள அமைச்சர் என்ற முறையில் எனது செயலாளருக்கு இன்று நான் கூறியுள்ளேன்.

எல்லோரும் வெட்கப்பட்டு தவிர்க்கும், இந்த சர்ச்சைக்குரிய விடயத்தைப்பற்றி எவராவது முன்வந்து பேச வேண்டும். நான் இப்போ பேசிவிட்டேன். இனி என்னை கண்டமேனிக்கு திட்டி தீர்க்கலாம். (ஸ்டார்ட் மியூசிக்!)