வங்கி வைப்புப் பணத்தை மோசடியாகப் பறிக்கும் திட்டம்

இலங்கை மத்திய வங்கி மற்றும் காவல்துறையின் நிதிக் குற்றப் புலனாய்வுப் பிரிவு (FCID) போன்ற நிறுவனங்களின் அதிகாரிகளாகத் தங்களை போலியாகக் காட்டிக் கொண்டு, அந்த நிறுவனங்களின் போலியான கடிதத் தலைப்புகளைப் பயன்படுத்தி மோசடி செய்யும் சம்பவங்கள் தொடர்பாக இலங்கை CERT நிறுவனத்திற்கு முறைப்பாடுகள் கிடைத்து வருகின்றன.

இந்த மோசடியில் ஈடுபடும் நபர்கள் முதலில் கைபேசி மற்றும் சமூக ஊடகங்கள் மூலம் மக்களைத் தொடர்புகொண்டு, அவர்களிடம் உள்ள சேமிப்பு மற்றும் நிலையான வைப்புக் கணக்குகளில் (Fixed Deposits) இருக்கும் பணம் தொடர்பாக விசாரிக்கின்றனர்.

மோசடிக்குள்ளாகும் நபர்களின் வைப்புத் தொகைகள் தொடர்பான தகவல்கள் தங்களிடம் ஏற்கனவே இருப்பதாகக் கூறும் இந்த மோசடிக்காரர்கள், அந்தப் பணம் சட்டவிரோதமாகப் பெறப்பட்டதாக முறைப்பாடுகள் கிடைத்துள்ளதாகவும், எனவே நிதிக் குற்றப் புலனாய்வுப் பிரிவு மூலம் அது தொடர்பாக விசாரணை நடத்தப்பட வேண்டும் என்றும் கூறி அவர்களை அச்சுறுத்துகின்றனர்.

அதன் பின்னர், இலங்கை மத்திய வங்கியின் போலியான கடிதத் தலைப்புகள், அதிகாரிகளின் போலி கையொப்பங்கள் மற்றும் ரப்பர் முத்திரைகள் பயன்படுத்தப்பட்ட கடிதங்களை அனுப்பி, பாதிக்கப்பட்ட நபர்களை மேலும் அச்சுறுத்துகின்றனர்.

இறுதியாக, அந்தப் பணத்தை வேறு ஒரு தனியார் வங்கிக் கணக்கிற்கு மாற்றுமாறு அறிவுறுத்துகின்றனர். அதற்காக ஒரு தனிப்பட்ட வங்கிக் கணக்கின் விபரங்களையும் வழங்குகின்றனர்.

இவ்வாறு, பாதிக்கப்பட்டவர்களை அச்சுறுத்தி அவர்களுடைய வங்கிப் பணத்தை மோசடியாகப் பெற்றுக்கொள்வதே இந்தக் கும்பலின் உண்மையான நோக்கமாகும்.

உங்கள் வங்கி விபரங்களை யாருடனும் பகிர்ந்து கொள்ளாதீர்கள்.