முஸ்லிம்கள் அச்சமின்றி வாழ வேண்டுமா..? கோத்தாபாயவுக்கு ஓட்டுப்போடுங்கள் - எச்சரிக்கும் வீரவன்சா

அச்சமும், சந்தேகமும் இன்றி தமது வர்த்தக நிலையங்களுக்கு சிங்கள மக்கள் வரும் நாடு முஸ்லிம் சமூகத்திற்கு தேவை எனில், முஸ்லிம் சமூகம் கோத்தபாய ராஜபக்சவுக்கு ஆதரவளிக்க வேண்டும் என நாடாளுமன்ற உறுப்பினர் விமல் வீரவங்ச தெரிவித்துள்ளார்.

முஸ்லிம் கடைகளுக்கு அச்சமின்றி பொருட்களை வாங்க சிங்கள மக்கள் வரும் நாட்டை உருவாக்கும் இயலுமை கோத்தபாய ராஜபக்சவுக்கு மாத்திரமே உள்ளது எனவும் அவர் கூறியுள்ளார்.

மேலும் தெரிவிக்கையில், இலங்கையில் அமெரிக்க இராணுவத்தின் தலையீடுகளை மேற்கொள்வதற்காக இலங்கையில் ஒரு பதற்ற நிலைமையை ஏற்படுத்தும் தேவை அமெரிக்காவுக்கு உள்ளது.

இந்த தேவைக்கு அமையவே சஹ்ரான் ஹசீம்கள் குண்டுகளை வெடிக்க செய்தனர். சிங்கள மக்கள் இதற்கு பதில் தாக்குதலை நடத்தவில்லை என்பதால், அடுத்த தாக்குதலை நடத்த தயாரான பயங்கரவாதிகள் கைது செய்யப்பட்டனர்.

இதனால், அந்த தாக்குதல் தடுக்கப்பட்டது. மீண்டும் நாட்டில் ஒரு பதற்ற நிலைமையை உருவாக்க இருக்கும் தயார் நிலையை எப்படியாவது தோற்கடித்து, இம்முறை ஜனாதிபதித் தேர்தலில் வாக்காளர்கள் பிரிந்து செல்லாது கோத்தபாய ராஜபக்ச வெற்றி பெற செய்வது மக்களின் பொறுப்பு எனவும் விமல் வீரவங்ச குறிப்பிட்டுள்ளார்.