மைத்திரி படுகொலை சதித்திட்ட பிரதான சூத்திரதாரி ரணில், திட்டம்தீட்டியவர் பொன்சேகா

ஜனாதிபதி மைத்திரிபால சிறிசேனவை படுகொலை செய்வதற்கு சூழ்ச்சித் திட்டம் தீட்டிய பிரதான சூத்திரதாரி முன்னாள் பிரதமர் ரணில் விக்ரமசிங்க என குற்றம் சுமத்தப்பட்டுள்ளது.

ஊழல் ஒழிப்பு படையணியின் நிறைவேற்றுப் பணிப்பாளர் நாமல் குமார இந்தக் குற்றச்சாட்டை சுமத்தியுள்ளார்.

அம்பாறையில் இன்று -05- நடைபெற்ற நிகழ்வு ஒன்றில் உரையாற்றிய போது நாமல் குமார இதனைக் குறிப்பிட்டுள்ளார். அவர் தொடர்ந்தும் கூறுகையில்,

ஜனாதிபதி மைத்திரி மற்றும் முன்னாள் பாதுகாப்புச் செயலாளர் கோதபாய ராஜபக்ச ஆகியோரை படுகொலை செய்யும் சூழ்ச்சித் திட்டத்தின் பின்னணியில் அரசியல்வாதிகள் இருக்கின்றார்கள்.

பிரதான சூத்திரதாரி ரணில் விக்ரமசிங்க என்பதனை நான் மிகவும் பொறுப்புடன் கூறுகின்றேன். இந்த சதித் திட்டத்தினை திட்டமிட்டவர் பீல்ட் மார்ஸல் சரத் பொன்சேகாவாகும்.

பொலிஸ் மா அதிபர் பூஜித் ஜயசுந்தர, பயங்கரவாத விசாரணைப் பிரிவின் முன்னாள் பொறுப்பதிகாரி பிரதிப் பொலிஸ் மா அதிபர் நாலக டி சில்வா ஆகியோரும் இந்த சதித் திட்டத்தின் பின்னணியில் செயற்பட்டுள்ளனர்.

ஜனாதிபதி பதவி வெற்றிடமாகினால் நாடாளுமன்றில் பெரும்பான்மை பலமுடையவர் ஜனாதிபதியாக நியமிக்கப்படுவார் என அரசியல் அமைப்பில் ஓர் சட்டம் உண்டு என பிரதிப் பொலிஸ் மா அதிபர் நாலக டி சில்வா என்னிடம் கூறியிருந்தார்.

இந்த கொலைச் சதித் திட்டத்தின் பிரதான சூத்திரதாரி ரணில், திட்டம் தீட்டியவர் சரத் பொன்சேகா, பொலிஸ் மா அதிபர் பூஜித், பிரதிப் பொலிஸ் மா அதிபர் நாலக டி சில்வா ஆகியோரும் இந்த சதித் திட்டத்துடன் தொடர்புபட்டிருக்கின்றார்கள் என நாமல் குமார குற்றம் சுமத்தியுள்ளார்.