பொலிஸார் எங்களை மிகமோசமாக தாக்கினார்கள் - சிங்கள ராவய

மாடுகள் இறைச்சிக்காக அறுக்கப்படுவதை எதிர்த்து கொழும்பு கோட்டை ரெயில் நிலையத்திற்கு எதிரில் ஆர்ப்பாட்டத்தில் ஈடுபட்ட பிக்குமார் மீது சாதாரண உடையில் வந்திருந்தவர்களுடன் பொலிஸார் இணைந்து தாக்குதல் நடத்தியதாக சிங்கள ராவய அமைப்பு தெரிவித்துள்ளது.

தாக்குதலுக்கு உள்ளான பிக்கு ஒருவர் கைது செய்யப்பட்டுள்ளதாக மாடுகள் அறுக்கப்படுவதை நிறுத்துவதாக ஜனாதிபதியிடம் உறுதிமொழியை கோரி ஆர்ப்பாட்டத்தில் ஈடுபட்ட சிங்கள ராவய அமைப்பின் உறுப்பினரான வேவல சீலரத்தன தேரர் தெரிவித்தார். அவர் மேலும் தெரிவிக்கையில்,

பொலிஸார் மிக மோசமாக பிக்குமாரை தாக்கினர். கண்டியில் இருந்து நாங்கள் பாத யாத்திரையாக கொழும்புக்கு வந்தோம். எந்த இடத்திலும் பிரச்சினைகளை ஏற்படுத்தவில்லை.

தேவையற்ற வகையில் பொலிஸாரும், சாதாரண உடையில் இருந்தவர்களும் தலையிட்டு பிரச்சினைகளை ஏற்படுத்தினர். எமது பிக்குமார் தாக்குதலுக்கு உள்ளாகினர் என்றார்.

மாடுகள் இறைச்சிக்காக அறுக்கப்படுவதை நிறுத்துவது தொடர்பில் திருப்தியான பதிலை ஜனாதிபதி வழங்கவில்லை என்பதால், தமது எதிர்ப்பு நடவடிக்கையை உண்ணாவிரதப் போராட்டமாக மாற்றியுள்ளதாக சிங்கள ராவய அமைப்பு குறிப்பிட்டுள்ளது.