சிகிச்சை சரியில்லாததால், டாக்டரை குத்தி கொன்ற நோயாளி

சரியாக சிகிச்சை அளிக்கவில்லை என கூறி டாக்டரை கத்தியால் குத்தி கொலை செய்தார் நோயாளி. மேலும் 2 டாக்டர்கள் படுகாயம் அடைந்தனர்.சீனாவில் மக்களின் நலனுக்காக சுகாதார துறை சார்பில், ஆண்டுதோறும் அரசு பல ஆயிரம் கோடி ரூபாய் நிதி ஒதுக்கி வருகிறது. இத்திட்டத்தின் கீழ் அரசு மருத்துவமனைகளில் ஏராளமான டாக்டர்கள் நியமிக்கப்படுகின்றனர். எனினும், சிகிச்சை குறைபாடு உள்ளதாக கூறி டாக்டர்கள் மீது அடிக்கடி தாக்குதல் நடந்து வருகிறது. ஜீஜியாங் மாகாணத்தில் உள்ள வெங்லிங் நகரத்தில் அரசு மருத்துவமனைக்கு நேற்று 33 வயதுள்ள நோயாளி ஒருவர் வந்தார். அவர் ஏற்கனவே தனது மூக்கில் ஏற்பட்ட கோளாறு காரணமாக காது மூக்கு தொண்டை நிபுணரிடம் சிகிச்சை பெற்றிருந்தார். 

அவர் சரியாக சிகிச்சை அளிக்கவில்லை என கூறி சண்டையிட்டார். அங்கு பணியில் இருந்த மற்ற டாக்டர்கள் சம்பந்தபட்ட டாக்டர் தற்சமயம் இல்லை என்று கூறியுள்ளனர். இதனால் ஆத்திரம் அடைந்த நோயாளி, அங்கிருந்த டாக்டரை சரமாரியாக கத்தியால் குத்தினார். ரத்த வெள்ளத்தில் சம்பவ இடத்திலேயே டாக்டர் பலியானார். அதை பார்த்து நர்ஸ்கள் அலறி அடித்து ஓட்டம் பிடித்தனர். நோயாளியை தடுக்க முயன்ற 2 டாக்டர்களுக்கும் கத்தி குத்து விழுந்தது.  அதன்பின் காவலாளிகள் அந்த ஆசாமியை பிடித்து போலீசில் ஒப்படைத்தனர். இந்த சம்பவம் சீனாவில் பரபரப்பை ஏற்படுத்தியுள்ளது.