மஹியங்களை பள்ளிவாசல் தாக்குதல் - அல்லாஹ்வின் தண்டனை நிச்சயம் கிடைக்கும்

(மௌலவி எம். எச். ஷைஹுத்தீன் மதனி)

11.07.2013 இரவு 11.20 அளவில் மஹியங்கனை அரபா ஜும்ஆப் பள்ளிவாசல் இனந்தெரியாத காடையர்களால் அடித்து நாசமாக்கப்பட்டது மட்டுமல்லாமல் முஸ்லிம்களது மார்க்கத்தில் முற்று முழுதாக தடை செய்யப்பட்ட பன்றியை அறுத்து அதன் பாகங்களையும் இரத்தத்தையும் புனித பள்ளி வாசலினுள் வீசி அசிங்கப்படுத்திய சம்பவத்தை வன்மையாகக் கண்டிக்கின்றோம். இச்சம்பவம் இலங்கை முஸ்லிம்களை மாத்திரம் அல்ல உலக முஸ்லிம்கள் அனைவரையும் புண்படுத்தியுள்ளது. புனித ரமழான் மாதம் என்று கூட பார்க்காமல் இந்த அராஜக செயலைச் செய்தவர்களை கண்டு பிடித்து சட்டத்தின் முன் நிறுத்தி ஆகக் கூடிய தண்டனை பெற்றுக் கொடுக்க அரசாங்கம் முன் வர வேண்டும். சட்டத்தின் முன் நிறுத்தப்பட்டு அவர்களுக்கு தண்டனை வழங்கப்படுகிறதோ இல்லையோ புனித ரமழானை மதிக்காத அப்படுபாவிகளுக்கு அல்லாஹ்வினால் கடும் தண்டனை விரைவில் கிடைக்கும் என்பதில் எவ்வித சந்தேகமும் இல்லை. 

எல் ரீ ரீ ஈ பயங்கரவாதம் ஒழிக்கப்பட்டு நாடு சுதந்திரக் காற்றை சுவாசித்துக் கொண்டிருக்கும் இச்சந்தர்ப்பத்தில் ஒரு சில சிங்கள பயங்கரவாதம் தலை தூக்கி இந்நாட்டின் சிறுபான்மை மக்களின் இருப்பை கேள்விக் குறியாக்கி மீண்டும் ஒரு பயங்கரவாதத்தை இந்நாட்டில் விதைக்க எத்தனிக்கின்றது. எனவே இச்சதிகாரர்களின் சதியில் சிக்கி விடாமல் முஸ்லிம்கள் ஒற்றுமையுடனும் புத்திசாதுரியத்துடனும் நடந்து கொள்வதோடு தினமும் இப்பயங்கரவாதிகளினது சதியிலிருந்து முஸ்லிம்களைப் பாதுகாக்குமாறு அல்லாஹ்விடம் பிரார்த்திக்குமாறும் கேட்டுக் கொள்கின்றோம். 

இச்சம்பவம் தொடர்பாக உரிய நடவடிக்கைகளை உரிய நேரத்தில் எடுத்து இன்றைய ஜும்ஆத் தொழுகையை நடாத்த உதவிய ஸ்ரீ லங்கா முஸ்லிம் காங்கிரஸ் தலைவரும் நீதி அமைச்சருமான அல் ஹாஜ் ரவுப் ஹக்கீம், மற்றும் முஸ்லிம் மீடியா போரத்தின் தலைவர் அல் ஹாஜ் என்.எம் அமீன் அவர்கள், மற்றும் ஊவா மாகாண காணி அமைச்சர் அனுர விதானகமகே அவர்கள், மற்றும் இப்பள்ளி வாசலுக்காக அயாராது தினமும் உழைக்கின்ற தொழிலதிபர்களும் சமூக சேவையாளர்களுமான அல் ஹாஜ் சுலைமான் அல் ஹாஜ் சீனி முஹம்மத் மற்றும் மஹியங்கனை முஸ்லிம் கடை உரிமையாளர்களுக்கும் எமது நன்றிகளைத் தெரிவித்துக் கொள்கின்றோம்.