மஹியங்கனை பள்ளிவாசலும், ஜனாதிபதியும்..!

கடந்த கிழக்கு மாகாண சபைத் தேர்தல் பொதுக் கூட்டத்தில் பங்கேற்ற ஜனாதிபதி மஹிந்த ராஜபக்ஸ தம்புள்ள பள்ளிவாசல் தாக்கப்பட்ட சம்பவம் குறித்து எந்தவொரு முஸ்லிம் அரசியல்வாதியும் தன்னிடம் முறைப்பாடு செய்யவில்லை என கவலை வெளியிட்டிருந்தார். இதனை முழு முஸ்லிம் சமூகமும் மறந்திருக்காது.

இந்நிலையில் மிக அண்மையில் மஹியங்கனை பள்ளிவாசல் மீது மேற்கொள்ளப்பட்ட தாக்குதல் குறித்து மற்றும் பள்ளிவாசலில் பன்றியின் இரத்தம் ஓட்டப்பட்டிருந்தமை குறித்து நீர்கொழும்பில் நடைபெற்ற புதிய நீதிமன்ற கட்டட திறப்பு நிகழ்வின் போது முஸ்லிம் காங்கிரஸ் தலைவர் ரவூப் ஹக்கீம் ஜனாதிபதியின் மஹிந்த ராஜபக்ஸவின் நேரடி கவனத்திற்கு கொண்டு வந்திருந்தார்.

இதனை ரவூப் ஹக்கீமின் சகோதரர் டாக்டர் ஹபீஸ் ஜப்னா முஸ்லிம் இணையத்திடம் உறுதிப்படுத்தியிருந்தார்.

பின்னர் கண்டியில் ஜனாதிபதி மாளிகையில் நடைபெற்ற இப்தார் நிகழ்வொன்றில் பங்கேற்ற அமைச்சர் ரவூப் ஹக்கீம், றிசாத் பதியுத்தீன் மற்றும் அதாவுல்லா ஆகியோர் மஹியங்கனை பள்ளிவாசல் விவகாரம் குறித்து ஜனாதிபதியுடன் பேசினர். இதனை குறித்த நிகழ்வில் பங்கேற்ற முஸ்லிம் அமைச்சர் ஒருவர் ஜப்னா முஸ்லிம் இணையத்திடம் உறுதிப்படுத்தினார்.

இதையடுத்து கடந்த வெள்ளிக்கிழமை மஹியங்கனை பள்ளிவாசல் அச்சுறுத்தல் காரணமாக மூடப்பட்டது. பள்ளிவாசல் இதுவரை திறக்கப்படவேயில்லை.

இதனையடுத்து மூடப்பட்டுள்ள பள்ளிவாசல் விவகாரம் குறித்து மூத்த அமைச்சர் பௌஸி, அமைச்சர் நிமால் சிறிபால டீ.சில்வா மற்றும் மேல்மாகாண ஆளுநர் அலவி மௌலானா ஆகியோர் பகிரங்கமாகவும், தனிப்பட்டவகையிலும் ஜனாதிபதியின் கவனத்திற்கு கொண்டு சென்றுள்ளனர். இதனை மூத்த முஸ்லிம் ஊடகவியலாளர் ஒருவர் ஜப்னா முஸ்லிம் இணையத்திடம் உறுதிப்படுத்தியிருந்தார்.

அந்தவகையில் இங்கு மிகத்தெளிவாக விளங்குவது யாதெனில் மஹியங்கனை பள்ளிவாசல் விவகாரம் குறித்து ஜனாதிபதியின் கவனத்திற்கு கொண்டுவரப்பட்டுள்ளது என்பதேயாகும்.

தம்புள்ள பள்ளிவாசல் தாக்குதல் போன்று எனக்கு எந்த முஸ்லிம் அரசியல்வாதியும் அதுபற்றி கூறவில்லையென குறிப்பிட்டதை போன்று இம்முறையும் ஜனாதிபதி தனது பொறுப்பிலிருந்து தப்பிவிட முடியாது.

மூடப்பட்டுள்ள மஹியங்கனை பள்ளிவாசல் குறித்து முஸ்லிம் சமூகம் நிறைவேற்று அதிகாரம் பொருந்திய ஜனாதிபதியிடமிருந்து மிகவும் பொறுப்பான பதிலை எதிர்பார்க்கிறது...!!