அம்பாறை முஸ்லிம்களின் பெருநாள் ஏற்பாடுகளும், கவலைதரும் சம்பவங்களும்..!

(ஏ.பி.எம்.அஸ்ஹர்)

புனித ரமழான் மாதத்தின் கடைசிப்பத்தில் நுழைந்துள்ள இவ்வேளையில் நம்மில் பலர் மீதமாக உள்ள நாட்களை இறைவனின் திருப்தியையும் புனித லைலதுல் கத்ருடைய நன்மைகளையும் அடைந்து கொள்வதற்கான முயற்சிகளை மேற்கொள்ளாது பெருநாள் தினத்திற்காக ஆடைகளையும் இதர பொருட்களையும் கொள்வனவு செய்வதில் மிக மும்முரமாக ஈடுபட்டு வருவதை காணக்கூடியதாக உள்ளது.

இக்காட்சிகளை பொதுவாக அனைத்து முஸ்லிம் பிரதேசங்களிலும் காணக்கூடியதாக உள்ளது பெருநாள்  தினத்திற்காக ஆடைகளைக் கொள்வனவு செய்யத்தான் வேண்டும் ஆனால் அவை நமது இபாதத்களுக்குத்தடையாக இருந்து விடக்கூடாது. ஆனால் பார்ப்பதற்கு நிலைமை அவ்வாறு தென்படவில்லை.

குடும்பத்தலைவர்கள் வேண்டுமானால் இபாதத்களில் ஈடுபடலாம் ஆனால் பெரும்பாலான குடும்பத் தலைவிகளும் பெண் பிள்ளைகளும் இரவு பகல் பாராது கடைத்தெருக்களில் நேரகாலத்தை வீணாக்கி அலைந்து திரிவது மிகவும் வேதனைக்குரிய விடயமாகும். அதிலும் பெரும்பாலானோர் நோன்புக்கு வழங்க வேண்டிய கண்ணியத்தையும் கௌரவத்தையும் வழங்காது ஆள்பாதி ஆடைபாதி கோலங்களில் ஏனைய நோன்பாளியின் நோன்புகளையும் பாழாக்கும் வகையில் காட்சியளிப்பது மிகவும் கவலைக்குரிய விடயமாகும்.

கடைசிப்பத்தின் ஒற்றைப்பட்ட நாட்களில் புனித லைலதுல்கத்ருடைய நாளை அடைந்து கொள்ளுங்கள் என நபி (ஸல்) அவர்கள் கூறியதற்கிணங்க எதிர்வரும் நாட்களில் புனித லைலதுல்கத்ரை அடைந்துகொள்ள நாம் அனைவரும் முயற்சிக்க வேண்டும். இதில் குடும்பத்தலைவர்களின் பொறுப்பு மிகப்பிரதானமானதாகும். ஆயிரம் மாதங்களைவிடச்சிறந்த இந்நாளை அடைந்துகொள்ள சகலரும் முயற்சிக்கவேண்டும். 

பெருநாள் நெருங்கிவரும் இவ்வேளையில் நமது கவனங்களை முழுக்க முழுக்க அதற்காக வழங்கி ஷைத்தானின் வலையில் விழுந்து எல்லாம் வல்ல அல்லாஹ்வின் கோபத்திற்கு ஆளாகாமல் மீதமாக உள்ள நாட்களில் தொடர்ச்சியாக இரவு பகல் பாராது நல்அமல்கள் செய்து புனித லைலதுல் கத்ருடைய இரவை அடைந்து கொள்ள நாம் அனைவரும் முயற்சிக்கவேண்டும்.