முஸ்லிம்களுக்கே தற்போது அதிகளவு பிரச்சினை - முன்னாள் ஜனாதிபதி சந்திரிக்கா

முஸ்லிம் மக்கள் அச்சுறுத்தல்களை எதிர் கொண்டிருப்பதாகவும் இந்த விவகாரத்திற்கு அரசாங்கம் இதுவரை தீர்வு காணவில்லையெனவும் முன்னாள் ஜனாதிபதி சந்திரிகா பண்டாரநாயக்க குமாரதுங்க தெரிவித்துள்ளார். 

தமிழ் மக்கள் முன்னர் பிரச்சினைகளை எதிர்கொண்டிருந்ததாகவும் இப்போது முஸ்லிம்கள் அதிகளவான பிரச்சினைகளை  எதிர்கொண்டிருப்பதாகவும் அவர் தெரிவித்தார். மதங்களிடையே  சௌஜன்யமற்ற நிலைமை அதிகரித்து வருவதாகவும்  சில இடங்களை  சில குழுக்கள் தாக்கி வருவதாகவும் அவர் விசனம் தெரிவித்துள்ளார்.  

தான் ஜனாதிபதியாக இருந்த காலத்திலும் இத்தகைய விடயங்கள் இடம்பெற்றன. ஆயினும்  அவற்றை உடனடியாக  தடுத்து நிறுத்தியிருந்ததாகவும்  ஆட்களைக் கைது செய்ததாகவும் அவர் கூறியதுடன்,  மதஸ்தலங்களைத் தாக்குவதற்கு முயற்சித்ததற்காக பிக்குகளைக் கூட தாங்கள் கைது செய்ய வேண்டிய நிலைமையிருந்ததெனக் கூறுவதையிட்டு கவலையடைவதாக அவர் தெரிவித்துள்ளார். 

இத்தகைய சம்பவங்கள் ஊடகங்களில் வெளிவந்த போது அதனை  அரசாங்கம் உடனடியாக தலையிட்டு கையாண்டது. ஆனால், இப்போது அவ்வாறு இடம்பெறுவதாக  தென்படவில்லை.  மதங்கள் மற்றும் சமூகங்கள் மத்தியில் நல்லிணக்கம் அற்ற நிலைமை காணப்படுகிறது என்று தெரிவித்துள்ள முன்னாள் ஜனாதிபதி இந்த விடயங்கள் தொடர்பாக அரசியல் தலைவர்களை சார்ந்திருப்பதற்குப் பதிலாக சிவில் சமூகம் மதத்தலைவர்கள் மற்றும் ஏனையவர்கள் இந்த விவகாரத்தில் தலையிட வேண்டுமென அவர் வலியுறுத்தியுள்ளார். 

அதேவேளை தனது பிள்ளைகள் ஒருபோதும் அரசியலுக்குள் பிரவேசிக்க மாட்டார்களெனத் தெரிவித்த அவர். அரசியல் பிரவேசித்திற்கு எதிராகவே தான் அவர்களுக்கு ஆலோசனை வழங்கியதாகக் கூறியுள்ளார்.  

எனது பிள்ளைகள்  இந்த நாட்டை நேசிக்கின்றனர். ஆனால்,  அரசியலில் பிரவேசிக்க வேண்டிய தேவை இல்லையென  அவர்களுக்கு தொடர்ந்து நான் கூறிவந்துள்ளேன். நாட்டிற்கு சேவையாற்ற அவர்கள் விரும்பினால் அதற்கு பல வழிகள் உண்டு என்று நான் கூறியுள்ளேன் என அவர் தெரிவித்திருக்கிறார்.  

இரு தடவைகள் ஜனாதிபதியாக பதவி வகித்த பின்னர் தான் தொடர்ந்தும் வேறு பல வழிகளில் நாட்டிற்கு சேவையாற்றி வருவதாக   சந்திரிகா குறிப்பிட்டுள்ளார்.   சில சமயங்களில் இடையூறுகளைத் தவிர அரசாங்கத்திடமிருந்து நான் எந்தவொரு உதவியையும் பெற்றுக்கொள்வதில்லை. 

ஆனால்,   நான் தொடர்ந்து சமூகத்திற்காக எதைச் செய்ய விரும்புகிறேனோ அதனை செய்து வருகிறேன். தனிப்பட்டவர்கள் மற்றும் ஏனையோர்  ஊடாக அவர்களின் உதவியைப் பெற்று  சேவையாற்றி வருகிறேன் என்று திருமதி குமாரதுங்க கூறியுள்ளார்.