முஸ்லிம் அரசியல்வாதிகளை சிறிலங்கா சுதந்திர கட்சியில் இணையுமாறு நெருக்கடி

சிறிய முஸ்லிம் கட்சிகள் அக்கட்சிகளை கலைத்துவிட்டு சிறிலங்கா சுதந்திரக் கட்சியில் இணைந்துகொள்ளுமாறு அழுத்தம் கொடுக்கப்பட்டுள்ளதாக நம்பத்தகுந்த அரசியல் வட்டாரங்களிலிருந்து ஜப்னா முஸ்லிம் இணையத்திற்கு அறியவருகிறது. இதனை முஸ்லிம் பாராளுமன்ற உறுப்பினர் ஒருவரும் உறுதிப்படுத்தினார்.

இதுவும் ஒரு பேரினவாத சிந்தனையே என்றும், எதிர்காலத்தில் முஸ்லிம் சமூகத்தின் பேரம் பேசும் ஆற்றலை முடக்குவது அதன் நோக்கமெனவும் அந்த எம்.பி. சுட்டிக்காட்டினார்.

சிறுபான்மை கட்சிகள் தொடர்பில் பாதுகாப்பு அமைச்சின் செயலாளர் கேட்டபய ராஜபக்ஸ, பொதுபல சேனா மற்றும் ஜாதிக்கஹெல உறுமய கட்சிகள் ஏற்கனவே தமது விமர்சனங்களை வெளிப்படுத்தியிருந்தன. 

இந்நிலையில் ஜனாதிபதி மஹிந்த ராஜபக்ஸ அரசாங்கத்தில் அங்கம்வகிக்கும் முஸ்லிம் கட்சிகளுக்கு இந்த அழுத்தம் பிரயோகிக்கப்பட்டுள்ளதாக அறியவருகிறது. இதுதொடர்பில் முஸ்லிம் அமைச்சரொருவர் தமது கவலையை வெளிப்படுத்தியதாகவும் மேலும் அறியமுடிகிறது.

சிறிலங்கா சுதந்திரக கட்சியின் தேசிய அமைப்பாளராக அமைச்சர் பஷில் ராஜபக்ஸ அண்மையில் நியமிக்கப்பட்டுள்ளமை இங்கு குறிப்பிடத்தகக்து.