முஸ்லிம் சிறுமியை வெட்டிக்கொன்றவனை தூக்கில்போட கோரிக்கை (படங்கள் இணைப்பு)

6 வயது சிறுமி பாத்திமா அப்ரா

எம். எஸ். பாஹிம்

வெலிகம பிரதேசத்தில் வைத்து ஆறு வயதுடைய சிறுமியை குரூரமான முறையில் வெட்டிக் கொலை செய்த சம்பவம் தொடர்பாக கைதான சந்தேகநபர் சார்பாக சட்டத்தரணிகள் எவரும் ஆஜராகக் கூடாது என கொல்லப்பட்ட சிறுமியின் குடும்பத்தவர்கள் கோரிக்கை விடுத்துள்ளனர். இத்தகைய கொடூர மனம் படைத்தவர்களுக்கு தூக்குத் தண்டனை வழங்க வேண்டும் எனவும் அவர்கள் தெரிவித்தனர்.

முதலாம் தரத்தில் கல்வி பயிலும் வெலிகம கோட்ட கொடையைச் சேர்ந்த பாத்திமா அப்ரா கடந்த செவ்வாய்க்கிழமை கோடரியால் வெட்டிக் கொலை செய்யப்பட்டிருந்தார். இவரின் முகத்திலும் காயங்கள் காணப்பட்டன. கொலை செய்யப்பட்டு வாழைப்பற்றை ஒன்றுக்குள் வீசப்பட்டிருந்த நிலையில் சிறுமியின் சடலம் மீட்கப்பட்டது. இந்த இளம் பிஞ்சை கசக்கி வீசிய பாதகன்  ஊர்மக்களினால் அடித்து பொலிஸில் ஒப்படைக்கப்பட்டிருந்தார். சந்தேகநபர் நீதிமன்றத்தில் ஆஜர் செய்யப்பட்ட பின்னர் எதிர்வரும் 24 ஆம் திகதி வரை விளக்கமறியலில் வைக்கப்பட்டுள்ளார்.

இந்த நிலையிலே குறித்த பாதகனுக்காக சட்டத்தரணிகள் யாரும் ஆஜராக வேண்டாம் என சிறுமியின் பெற்றோர் மற்றும் உறவினர்கள் கோரியுள்ளனர். இத்தகையவர்களுக்கு அதி உச்ச தண்டனை வழங்குவதன் மூலமே இத்தகைய குரூரமான சம்பவங்களை தடுக்க முடியும் எனவும் குறிப்பிட்டனர்.

இதேவேளை நீதவானின் உத்தரவுக்கமைய மேற்படி சம்பவத்தை நேரில் கண்ட சிறுமியுடன், கொல்லப்பட்ட சிறுமியின் பெற்றோர் நேற்று வெலிகம பொலிஸ் நிலையத்திற்கு வாக்குமூலம் அளிக்கச் சென்றிருந்தனர்.

ஆனால் ஓரிரு மணி நேரங்கள் காத்திருந்தும் பொலிஸார் உதாசீனமாக நடந்து கொண்டதோடு, சிறுமியிடம் வாக்குமூலம் பெற நடவடிக்கை எடுக்கவில்லை என அறிய வருகிறது. இது தொடர்பில் தமது விசனத்தை தெரிவித்த அவர்கள், அங்கிருந்து வெளியேறியதாகவும் அறிவிக்கப்படுகிறது.

‘இது தொடர்பில் தலையிட்ட பிரதேச சிரேஷ்ட பொலிஸ் அத்தியட்சகர் சிறுமியின் வாக்குமூலத்தை பதிய நடவடிக்கை எடுப்பதாகவும், சம்பவம் தொடர்பில் பக்கசார்பற்ற விசாரணை நடத்துவதாகவும் கொல்லப்பட்ட சிறுமியின் பெற்றோரிடம் உறுதியளித்ததாக இறந்த சிறுமியின் பெரியப்பாவான சாபி தெரிவித்தார்.

இதேவேளை சந்தேக நபரிடம் பெற்ற தகவலின்படி கொலைக்குப் பயன் படுத்தப்பட்ட கோடரி சந்தேகநபரின் வீட்டில் இருந்து மீட்கப்பட்டதோடு அங்கிருந்து ஆபாசப்பட சீடிகளும் கண்டுபிடிக்கப்பட்டதாக பொலிஸார் கூறினர்.

பூச்செண்டு தருவதாக கூறி ஏமாற்றியே சந்தேக நபர் இந்த சிறுமியை தனது வீட்டிற்கு அழைத்துச் சென்றுள்ளதோடு, அதன் பின்னரே சிறுமி கொல்லப்பட் டுள்ளார்.

குறித்த சந்தேகநபர் சில வருடங்களுக்கு முன்னர் மனநல பாதிப்பிற்காக சகிச்சை பெற்றவர் எனவும், தற்பொழுது சிறந்த மனநிலையுடன் உள்ளதாகவும் பிரதேச மக்கள் தெரிவித்துள்ளனர். இவர் மோசமான நடத்தைகளுடையவர் எனவும் பெண்கள் குளிப்பதை மறைந்திருந்து பார்த்தது தொடர்பில் முறைப்பாடுகள் உள்ளதாகவும் அறியவருகிறது.

இந்த பாதகனுக்கு கடும் தண்டனை வழங்க வேண்டும் என சிறுமியின் இறுதிக்கிரியையில் பங்கேற்ற ஆயிரக்கணக்கான மக்கள் கோரிக்கை விடுத்திருந்தனர். சந்தேக நபருக்கு ஏற்படும் நோயைக் குணப்படுத்த சிறுவர் ஒருவரை பலியிட வேண்டும் என்ற நம்பிக்கை இவர்களின் குடும்பத்தில் காணப்பட்ட தாகவும் அதனால் சிறுமி கொலை செய்யப்பட்டி ருக்கலாம் எனவும் ஊர் மக்கள் சிலர் சந்தேகம் தெரிவித்தனர்.  tn



கோடரியால்  வெட்டிப படுகொலை செய்யப்பட்ட 6 வயது சிறுமி பாத்திமா அப்ராவின் ஜனாஸா..!