மு.கா. தீர்மானம் - முஸ்லிம்கள் மீதான அரசின் நல்லெண்ணத்தை பாழ்படுத்தியுள்ளது

மாகாண சபைத் தேர்தல்களில் ஸ்ரீலங்கா முஸ்லிம் காங்கிரஸ் தனித்துப் போட்டியிடுவதானது அரசாங்கத்துக்கும் முஸ்லிம் சமூகத்துக்கும் செய்யும் துரோகமாகும். முஸ்லிம் காங்கிரஸின் இத்தகைய நடவடிக்கையை நான் வன்மையாக கண்டிக்கிறேன் என பிரதியமைச்சர் அப்துல் காதர் தெரிவித்துள்ளார்.

எதிர்வரும் மாகாண சபைத் தேர்தல்களில் ஸ்ரீலங்கா முஸ்லிம் காங்கிரஸ் தனித்துப் போட்டியிடுவதற்கு எதிர்ப்புத் தெரிவித்து பிரதியமைச்சர் விடுத்துள்ள அறிக்கையொன்றிலேயே மேற்கண்டவாறு கூறியுள்ளார். அவ்வறிக்கையில் மேலும் கூறப்பட்டுள்ளதாவது,

எதிர்க்கட்சியில் இருந்த ஸ்ரீலங்கா முஸ்லிம் காங்கிரஸ் கட்சிக்குள் பிளவு ஏற்படப் போகிறது என்ற பயத்தினாலும் பதவி மோகங்களுக்காகவும் அரசுடன் ஒன்றிணைந்து அமைச்சுப் பதவிகளை அலங்கரித்துக் கொண்டு வந்த நிலையில் மாகாண சபைத் தேர்தலில் தனித்துப் போட்டியிடுவது என்று எடுத்த முடிவு எவராலும் ஏற்றுக் கொள்ள முடியாது.

இவ்வளவு காலமும் சுய நலத்துக்காக அரசுடன் ஒட்டிக் கொண்டிருந்த முஸ்லிம் காங்கிரஸ் திடீரென எடுத்த முடிவு அரசாங்கம் முஸ்லிம் மக்கள் மீது கொண்டிருந்த நல்லெண்ணத்தை பாழ்படுத்தியுள்ளது ஆகவே முஸ்லிம் காங்கிரஸ் தன்னிச்சையாக தீர்மானங்களை எடுத்து முஸ்லிம் சமுகத்தை காட்டிக் கொடுக்கும் செயற்பாடுகளில் ஈடுபட வேண்டாம் எனவும் குறிப்பிட்டுள்ளார்.