தாயிடம் 25 இலட்சம் ரூபா நஷ்டஈடு கோரும் மகன் (குருநாகலையில் நடந்த சோகம்)

வைஸ்

உதவி - நவமணி

கடந்தவாரம் குருநாகலை மாவட்டத்திற்கு உட்பட்ட நீதிமன்றத்தில் ஒரு விஷேடமான வழக்கு நடைபெற்றது. விஷேடத்துவம் என்னவென்றால் ஒரு மகன் தனது தாய்க்கு எதிராக தாக்கல் செய்த வழக்காகும்.

தனது தாயும் தனது உடன் பிறந்த சகோதரியும் தன்னை அவமதித்ததாகக் கூறி அதற்காக நஷ்டஈடு கோரியே அந்த வழக்கை மகன் தாக்கல் செய்திருந்தார். அதாவது தாய் தன்னை அவமானப்படுத்தியாகக் கூறி தாயிடம் இருந்து 25 லட்சம் ரூபா நஷ்டஈடு பெற்று தரும்படி அந்த மகன் தாய்க்கு எதிராக வழக்குத் தாக்கல் செய்திருந்தார்.

இந்த வழக்கு ஏன் எங்களுக்கு முக்கியமானது அந்த மகனும் தாயும் முஸ்லிம்கள் என்பதனாலாகும். தாயின் பெற்றோரின் முக்கியத்துவத்தையும் அவர்கள் மீதுள்ள பிள்ளைகளின் கடமை பற்றியும் இஸ்லாம் தெளிவாகக் கூறும்போது அதை பின்பற்றுவதாகக் கூறிக் கொள்ளும் அர்த்தம் பார்த்து உலமாக்களிடம் கேட்டு இஸ்லாமிய பெயர்களை வைத்துக் கொள்ளும் முஸ்லிம் மகன் தன்னை பெற்றெடுத்த, பாலூட்டி வளர்த்த தாய்க்கு எதிராக வழக்கு அதுவும் தாய் தனக்கு மானபங்கம் ஏற்படுத்தியதாகக் கூறி நட்டஈடு கோரி வழக்குத் தாக்கல் செய்துள்ளார்.

வழமையாக நீதிபதிகள் அதிகம் பேசுவதில்லை. ஆனால் இந்த வழக்கிலே நீதிபதி அந்த மகனுக்கு நீண்ட நேரம் தெளிவுபடுத்தினார்.

இது உம்மைப் பெற்றெடுத்த தாய். உம்மை பாலூட்டி சீராட்டி வளர்த்த தாய். அவள் உனக்குத் தந்த பாலின் சக்தியால்தான் இந்தளவு பேசும் வல்லமையை பெற்றாய் என்பதை நீர் உணரவில்லையா. உன்னை வளர்க்க எவ்வளவு இந்தத் தாய் கஷ்டப்பட்டிருப்பாள். இரத்தத்தை பாலாக்கித் தந்த தாயல்லவா அவரிடமா நீர் நஷ்டஈடு கேட்கிறீர் ஆனால் முறைப்படி நீரே தாய்க்கு நஷ்டஈடு கொடுக்க வேண்டும். உன்னைக் கஷ்டப்பட்டு வளர்த்ததற்கு நீரே கொடுக்க வேண்டும் என சிந்தித்துப் பாரும். இந்த வழக்கை வாபஸ் பெற்றுக் கொள்வது பற்றி அல்லது சமாதானம் செய்து கொள்வது பற்றி சிந்தியும் எனக் கூறிபல வசனங்கள் அவர் வாயிலிருந்து வெளிவந்தன.

இவை அனைத்தும் நீதிபதியின் உள்மனதின் வேதனை வெளிப்பாடு என்பது அவரது முகப் பாவனையில் நன்கு தெரிந்தது.

ஆனால் மகனோ, விட்டபாடில்லை 25 லட்சம் நஷ்டஈடு வேண்டும் என்று கண்டிப்பாக நின்று விட்டார்.

இந்த மகன் தான் ஒரு அகில இலங்கை சமாதான நீதவான் என்பதை பலமுறை திருப்பித் திருப்பி நீதிமன்றத்தில் கூறியதை கேட்கக் கூடியதாக இருந்தது. அது மட்டுமல்ல ஒரு பிரபல அரச நிறுவனத்தின் தொழிலாளி. தாய் இவருக்கு எதிராக அதாவது இந்த மகன் தன்னை தாக்க வந்ததாக தாய் செய்த முறைப்பாடு மூலமே சமாதான நீதவானான தன்னை தாய் அவமதித்து விட்டார் என்பதே வழக்கின் மூலமாகும். இவ்வாறு தாயின் முறைப்பாடு மூலம் ஊரில் ஏற்பட்ட அவமானத்திற்கே 25 லட்சம் ரூபா நஷ்டஈடு கோரப்பட்டுள்ளது.

தாயோ கிராமத்து சராசரிப் பெண். அவரது உடை மூலம் வசதி படைத்தவர்கள் அல்ல என்பது விளங்கியது. சமாதானப்படுத்தி வழக்கை முடிக்க எவ்வளவோ நீதிபதி முயன்றும் சரிவரவில்லை. வழக்கு விசாரணைக்காக பின்போடப்பட்டுள்ளது.

எமது சமூகம் எங்கே போகிறது. குடும்பத் தொடர்புகள் குடும்பக் கடமைகள் கட்டுப்பாடுகள் என்பன எங்கே? சமூகத்தின் கௌரவ பதவி வகிப்பவர்கள் சமாதானத்திற்கே நியமிக்கப்பட்டவர்கள் இவ்வாறு நடந்தால் என்னாவது? இவர்கள் போன்றவர்களுக்கு சமாதான நீதவான் பதவியை வழங்கியவர்களை என்னவென்பது? அவர்களும் இதற்கு பதில் சொல்ல வேண்டும். ஏனெனில் சமாதான நீதவானாகிய தன்னை தனது தாய் அவமதித்ததற்காக வழக்குத் தாக்கல் செய்பவர்கள் சமாதான நீதவானின் கடமையை சரியாகச் செய்வாரா?

இது தொடர்பான வாசகர் கருத்துக்கள் வரவேற்கப்படுகின்றன. மிக இரத்தினச் சுருக்கமாக எழுதியனுப்பப்படும் பொறுத்தமெனக் கருதப்படும் கருத்துக்கள் பிரசுரிக்கப்படும்.

156, Hospital Road, Kalubowila, Dehiwala

E-mail: editornavamani@gmail.com
                                                                                         
 freelankamedia@gmail.com