இலங்கையில் இஸ்ரேலிய தூதரகம் ஆரம்பிக்கப்பட அரபு நாடுகள் தூங்கிக் கொண்டிருப்பதே காரணம்

அரபு நாடுகளிடம் அரசியல் சாணாக்கியம் இல்லை. அரபு நாட்டு தூதரகங்கள் தூங்கிக் கொண்டிருக்கின்றன. இலங்கையில் இஸ்ரேலிய தூதரகம் ஆரம்பிப்பதற்கான முன்னெடுப்புக்கள் மேற்கொள்ளப்படும் நிலையிலவ் அவர்கள் மௌனமாக இருக்கின்றனர் என மேல் மாகாண ஆளுநர் அலவி மௌலானா குறிப்பிட்டுள்ளார்.

இதுதொடர்பில் அவர் தெரிவித்துள்ளதாவது,

அமெரிக்காவின் அழுத்தங்கள் காரணமாகதான் இஸ்ரேல் இலங்கையில் கால் பதிக்க முற்படுகிறது. ஆசிய நாடுகளில் துவேச மனப்பான்மை அதிகமாக நிலவி வருகிறது. இலங்கையையும் அது விட்டுவைக்கவில்லை. இதனால் இலங்கையின் முன்னேற்றம் தடைப்படுகிறது.

இந்நிலையில் இலங்கையில் இஸ்ரேலிய ஊடுருவல் நாட்டின் ஐக்கியத்திற்கு பெரும் பாதிப்பை ஏற்படுத்தும். ஏனைய மதங்களுடன் பிளவை ஏற்படுத்துவதோடு முஸ்லிம்களுக்குள்ளேயும் பிளவுகளை ஏற்படுத்துவார்கள். சமாதானத்தை விரும்பும் சகலரும் இலங்கையில் இஸ்ரேல் தூதரகம் அமைப்பதை எதிர்க்கவேண்டும்.

நாட்டின்  பொருளாதாரம் எப்படிப்போனாலும் இன ஐக்கியத்தை இல்லாதொழிக்கும் சர்வதேச பலம் வாய்ந்த சக்கியே இஸ்ரேல். எனவே இஸ்ரேல் தூதரகத்தை இலங்கையில் ஆரம்பிப்பது தொடர்பில் ஜனாதிபதி சிந்திக்கவேண்டும். இலங்கை தூதரகம் இலங்கையில் ஆரம்பிக்கப்படுமாயின் அதனை முஸ்லிம்கள் எதிர்ப்பார்கள் என்றார்.