தம்புள்ளயில் அல்லாஹ்வின் இல்லம் இடிக்கப்படுவது உறுதி...?

தம்புள்ளயில் அமைந்துள்ள அல்லாஹ்வின் இல்லம் சட்டவிரோதமான கட்டிடம் என சிங்கள கடும்போக்காளர்கள் கூறிவரும் நிலையில் அப்பகுதியை பாதுகாப்பு அமைச்சின் கீழ் கொண்டுவருவதற்கு உத்தேசிக்கப்பட்டுள்ளது.

இதுகுறித்து நேற்று செவ்வாய்கிழமை தம்புள்ள ரங்கிரி ரஜமஹா விகாரையில் முக்கிய கூட்டமொன்று நடைபெற்றுள்ளது. இதனை யாழ் முஸ்லிம் இணையம் புகைப்படங்கள் ஆதாரத்துடன் பகிரங்கப்படுத்தியிருந்தது.   இங்கே பார்க்க.. http://www.jaffnamuslim.com/2012/05/blog-post_5153.html

புத்த சாசன அமைச்சின் செயலாளரின் வழிகாட்டலில் இடம்பெற்ற விசேட கலந்துரையாடலின்போது தம்புள்ள புனித பூமி பிரதேச அபிவிருத்தி பணிகளை நகர அபிவிருத்திநகர அபிவிருத்தி அதிகார சபையிடம் கையளிக்க தீர்மானிக்கப்பட்டுள்ளது. இதற்கு அமைவாக சர்ச்சைக்குரிய புனித பூமி பிரதேச எல்லைக்குள் அமைத்திருக்கும் அனைத்து சட்டவிரோத கட்டடங்களும் அகற்றப்பட்டு  அபிவிருத்தி நடவடிக்கைகளை துரிதப்படுத்துவது என்று தீர்மானிக்கபடுள்ளது.

இந்தக்கூட்டத்தில் கண்டியிலிருந்து வருகை தந்துள்ள உயர் பௌத்த பீடாதிபதிகளும் கலந்து கொண்டுள்ளனர். அவர்களின் இணக்கத்துடனேயே இத்தீர்மானமும் நிறைவேற்றப்பட்டுள்ளது. இதில் தம்புள்ள பிரதேச செயலாளரும் இதில் கலந்துகொண்டுள்ளார்.

தம்புள்ள பள்ளிவாசலை அகற்ற சிங்கள கடும்போக்காளர்கள் ஏற்கனவே 6 மாதம் கால அவகாசம் விதித்திருந்தார்கள். இந்நிலையிலேயே நகர அபிவிருத்தி சபை தம்புள்ள புனிதப் பிரதேசத்தை பொறுப்பேற்கவுள்ளது. இதன் பணிப்பாளராக பாதுகாப்பு அமைச்சர் கோத்தாபய ராஜபக்ஸ உள்ளார்.

கோத்தாபய ராஜபக்ஸ பணிப்பாளராக உள்ள நகர அபிவிருத்தி அதிகார சபைதான் கொழும்பில் உள்ள நூற்றுக்கணக்கான முஸ்லிம் குடியிருப்புகள் சட்டவிரோதமானவை எனக்கூறி அவற்றை அகற்றியிருந்தது.

இவ்வாறானதொரு நிலையில் தம்புள்ள நகர அபிவிருத்தியை, நகர அபிவிருத்திச் சபை பொறுப்பேற்கும் பட்சத்தில் அங்கு அமைந்துள்ள அல்லாஹ்வின் இல்லத்திற்கு எத்தகைய பாதிப்பு ஏற்படும் என்பதை நாம் அறிந்துகொள்ளமுடியும்.

தம்புள்ள அல்லாவின் இல்லம் மீது சிங்கள கடும்போக்காளர் தாக்குதல் மேற்கொண்டு எதிர்வரும் 20 ஆம் திகதி, ஞாயிற்றுக்கிழமை ஒரு மாதம் நிறைவடைகிறது. இந்த ஒரு மாத காலப்பகுதியில் ஜனாதிபதி மஹிந்த ராஜபக்ஸவோ அல்லது அவரது அரசாங்கமோ குறித்த பள்ளிவாசல் அங்கிருந்து அகற்றப்படாது என்று ஒருபோதுமே பகிரங்கமாக எந்தவொரு வாக்குறுதியையும் வழங்கவில்லை என்பதும் இங்கு கவனிக்கத்தக்கது.

மேலும் பௌத்த சாசன அமைச்சு கட்டுப்பாட்டில் இருந்த தம்புள்ள புனித பூமி பிரதேசத்தை, பௌத்த குருமார் நகர அபிவிருத்தி அதிகார சபையிடம் எதற்காக ஒப்படைக்க வேண்டும்..?  என்ற சந்தேகங்கள் ஏற்பட்டுள்ளமையும் இங்கு சுட்டிக்காட்டத்தக்கது.