பாண்டிருப்பு திரௌபதி அம்மன் ஆலயம், பாதுகாத்த பட்டாணி முஸ்லிம்களுக்கு தடை விதித்தது ஏன்..?

கல்முனை பாண்டிருப்பு திரௌபதி அம்மன் ஆலய உற்சவத்தில் வருடாவருடம் இப்பிரதேச முஸ்லிம்கள் கலந்து கொள்வதுடன், அங்கு வியாபாரத்திலும் ஈடுபட அனுமதிக்கப்படுவர் ஆனால் இம்முறை அது மறுக்கப்பட்டதாக கூறப்படுகின்றது,.. ஆனால் வரலாற்றில் அக் கோயிலுக்கும்  முஸ்லிம் முன்னோர்களுக்கும் நெருங்கிய தொடர்பு உண்டு  என்பது பலருக்கும் தெரியாது,, அது பற்றிய பதிவே இதுவாகும்..

#அறிமுகம் 

பாண்டிருப்பில் அமைந்துள்ள திரௌபதி அம்மன் ஆலயம் மிக நீண்ட பாரம்பரியத்தைக் கொண்டது, இங்கு பாரதப் போரை நினைவு கூருமுகமாக வருடாந்தம் 18 தினங்கள் உற்சவம் இடம்பெறுவதுடன், தீ மிதிப்பும் இடம்பெறும்.இதில் பல்லின மக்கள் கலந்து கொள்வர், இம்மெறை செப்டம்பர் 24- ஒக்டோபர் 12 வரை இடம்பெறும்..

#இன_உறவுக்கான_இடம் 

கல்முனையில் தமிழ்,முஸ்லிம் இன உறவின் அடையாள நிகழ்வுகளாக விளங்குபவை, திரௌபதி அம்மன் தீப்பள்ளயமும், கடற்கரைப்பள்ளி #நாகூர்_ஆண்டகை கொடியேற்றமுமாகும், இது இப்பிரதேச உறவின் நீண்டகால இனவுறவுப் பாரம்பரியத்தின் இரு கண்களாக விளங்குகின்றன,.ஆனால் இன்று திரௌபதி அம்மன் ஆலய நிர்வாகம் இதனைக் கேள்விக்குள்ளாக்கி உள்ளமை கவலையான விடயம் 

#வரலாற்று_சம்பவம்,

ஆரம்ப காலத்தில் கிழக்கிலங்கையில் முக்குவ இனத் தமிழ் பரம்பரையினர் வாழ்ந்து வந்தனர்,  அவர்களின் வாழ்வியல் பரம்பரைக்கு எதிரான தன்மை கொண்ட #திமிலர்கள் அவர்களுக்கு அடிக்கடி தொல்லை  கொடுத்ததுடன், அவர்களது கோயில்களையும், உயிர்களையும், சொத்துக்களையும் அழித்தனர், 

இதனால் பாதிக்கப்பட்டிருந்த முக்குவ தமிழ் மக்கள் தம்மைப் பாதுகாக்க உதவி கோரியபோது அவர்ரகளுக்கு உதவிபுரிந்து பாதுகாத்து அம்மக்களின் வாழ்வியலை நிலை நாட்ட உதவியதுடன் அவர்களது குடிகளிலேயே திருமண உறவையும் பேணியவர்கள் #பட்டாணிகள் "என்ற முஸ்லிம்களாகும். 

இங்கு இடம் பெற்ற போரில்  பட்டாணிய தளபதிகளில் சிலர் உயிரிழந்ததாகவும் நம்ப்ப்படுகின்றது,

#யார்_இந்த_பட்டாணிகள்??

கிபி. 14 ம் நூற்றாண்டுகளில்  டில்லியை அலாவுத்தீன் கில்ஜி ஆண்டு கொண்டிருந்த வேளையில் இன்றைய கேரளாவில் வசித்தவர்களே இவர்கள் பட்டாணியர் என்றால் ," உருது மொழி பேசும் முகமதியர்" என்பது Tamil Lexicon அகராதியின் அர்த்தமாகும், இவர்கள் இயல்பிலேயே போர் ஆற்றல்மிக்க பலசாலி முஸ்லிம்களாகும். இவர்களைப் பற்றி "மட்டக்களப்பு மான்மியத்தில் FXC நடராசா (பக்கம் 66) தெளிவாக குறிப்பிடுகின்றார். 

#போர்ப்பின்னணி

திமிலர்கள் தமது கோட்டையாக "திமிலத்தீவை"வைத்திருந்ததுடன் அத்துமீறி முக்குவப் பிரதேசங்களுக்கு படையெடுத்து  முக்குவரைத் தாக்கினர்,  அதில் இருந்து பாதுகாக்க இடம்பெற்ற போர் பட்டாணிகளின் தலைமையில் இடம்பெற்றது,  இந்தப் போரை இன்றைய மட்டக்களப்பு ஊர்கள் ஞாபகம் செய்கின்றன,அதன்படி , சத்துருவை கொன்ற இடமே இன்றைய சத்துருக்கொண்டான் ,எனவும் நாலா புறமும் திரிந்த படைகள் சந்தித்த இடமே சந்தி வெளி எனவும், வந்து  இளைப்பாறிய இடமே " "வந்தாறு மூலை "எனவும், திமிலர்கள் மீண்டும் உள்ளே வராதபடி பட்டாணிகள் காவலரண் அமைத்த இடமே "ஏறாவூர்" எனவும் பெயர் பெற்றதாக, பண்டிதர் வி்.சி. கந்தையாவின் மட்டக்களப்பு தமிழகம் நூல்(பக்கம் 391, 392, 393,) குறிப்பிடுகின்றது, 

இதே விடயத்தை கல்முனைக்குடி "ஜும்மாப்பள்ளி வரலாறு, வரலாற்று பேழை , ஆகிய நூல்களில்  ஏ்.ஆதம்பாவா, & ஹாஜி உஸ்மான் ஸாஹிப் ஆகியோரும் குறிப்பிடுகின்றனர்.

#நன்றிக்கடன்_நினைவுகள் 

பட்டாணிகள் தமது இனத்தை பாதுகாத்ததற்காக முக்குவர்களின் 18 குடிகளிலும் அவர்களுக்கு திருமணம் செய்து வைத்ததுடன் ,தமக்கே உரிய கோயில்களிலும் அவர்களுக்கான நன்றிப் பூசைகளையும் செய்து வந்தனர், 

அந்த வகையிலேயே தாழங்குடாவில் உள்ள பரம நயினார் மற்றும், பெரிய தம்பிரான் ஆலயச் சடங்குகளில் இன்றும்" பட்டாணி மடை" வைக்கும் பழக்கம் உள்ளதாக" மட்டக்களப்பு சிறு தெய்வ வழிபாடு  ஓர் அறிமுகம் என்ற நூலில்( பக்கம்-101,102) மகேஸ்வரலிங்கம்  குறிப்பிடுகின்றார், 

ஆனாலும் பாண்டிருப்பு திரௌபதி அம்மன் ஆலயத்தில்  மிகவும் விஷேடமாக. பட்டாணிகளுக்கென விஷேட பூஜை நடாத்தப்பட்டு வருகிறது/ வந்தது. 

#பட்டாணி_பூசை,

 திரௌபதி அம்மன் ஆலயத்தில் இதற்கான விசேட பந்தல் அமைக்கப்படும்,அங்கு உப தெய்வமாக கருதப்படும் பட்டாணி பூசையில் சிலைகள் எதுவும் வைக்கப்படுவதில்லை, மாறாக ஒளி விளக்கு மாத்திரமே வைக்கப்படும் என சண்முக நாதன் தனது பாண்டிருப்பு திரௌபதி அம்மன் ஆலயம் என்ற நூலில் (பக்கம்70) குறிப்பிடுகின்றார், 

அத்தோடு பந்தலுக்கு வெளியே தலைப்பாகை ,தாடி உள்ள முஸ்லிம் அடையாள  உருவங்கள் வைக்கப்படுவதாகவும் கூறப்படுகின்றது, 

#பட்டாணி_பாடல்

பட்டாணி தெய்வத்திற்கான பூஜையின் போது  பூசாரியினால் பாடப்படும் பாடலானது முற்றிலும் இஸ்லாமிய மயமானது அதன்படி்..

"லாஇலாக இல்லல்லாஹ், முஹம்மது றசூலுல்லாஹ்,- 

மக்கம் தொழுத பிள்ளை முஹம்மது 

வேதம் தொழுத பிள்ளை கொத்துவா

வேதமல்லோ,பட்டாணியர் றாகூத்தான்

நாகூராப் பள்ளியிலே மீராசாய்வு 

நல்லவரம் பேறு பெற்றார்,

ஐந்து நேரத் தொழுகை பட்டாணியார் அயரார் ஏழு நாளும்........"

........எனத் தொடர்கின்றது,

இந்த பாடல்களில் உள்ள விடயங்களின் ஊடாக சிலர் இந்த கோயில் தொடர்பு நாகூரில் வாழ்ந்த ஷாகுல் ஹமீத் வலியுள்ளா அவர்களை ஞாபகம் செய்வதாகவும் கூறுகின்றனர்,இது இந்தியாவிலும் பல இடங்களில் உண்டு,

#குடி_வழி_தொடர்புகள் 

புராதன கால  இந்து முக்குவர்களையும்,அவர்களின்  வாழ்வியல் இருப்பையும்  பாதுகாக்க பட்டாணி முஸ்லிம்கள் தமது நாடு, உயிர் என்பவற்றை தியாகம் செய்ததுடன் அந்த குலத்திலையே திருமணமும் செய்து  சமயமாக இஸ்லாத்தை ப் பின்பற்றினர், அதனால்தான்  இந்துக்களின்   குடிவழி முறை கிழக்கு முஸ்லிம்களிடம் இன்றும் உள்ளது,

இதனை பேராசிரியர் பத்மநாதனும் உறுதிப்படுத்துகின்றார், 

#இன்றைய_முடிவும், #வரலாற்றுத்_தவறும்,

இவ்வாறு பல வழிகளில் உதவிய முஸ்லிம் "வகுத்துவார்" உறவுகளுக்கு தாம் வழிபட்ட கோயில்களிலும், வாழ்வியலும் இடம் கொடுத்த முக்குவ இந்து முன்னோரைப் பாராட்டும் அதே வேளை, இன்றைய கோயில் நிர்வாகம் முஸ்லிம் வர்த்தகர்களை ஆலய நிகழ்வில் வியாபாரம் செய்வதற்கு தடுத்துள்ளமையானது, மிகப்பெரும் வரலாற்றுத் தவறாகவே கொள்ள வேண்டி உள்ளது, 

உண்மையில் இப்பிரதேசத்தில் உள்ள ஏனைய கோயில் நிகழ்வுகளை விட பாண்டிருப்பு திரௌபதி அம்மன் ஆலயத்தில் முஸ்லிம்கள் பெருமளவில்  ஆர்வமாகக் கலந்து கொள்வது மரபாகும், நிர்வாகத்தின் இந்த தவறான முடிவு இன உறவிலும் பாதிப்பை உண்டு பண்ணும் என்பதில் ஐயமில்லை, பல முஸ்லிம்கள் இது பற்றி  தமது கவலையை வெளிப்படுத்துகின்றனர்.

அந்தவகையில் , ஒரு  நிகழ்வில் இன ரீதியான தடைகளை உருவாக்குவதும், நடை முறைப்படுத்துவதும், வழிபாட்டு ரீதியாக ஓரளவு ஏற்கக் கூடியதாக இருப்பினும் , வரலாற்று ரீதியாக எம் முன்னோர்களுக்கு நாம் செய்யும் துரோகமாகவே இதனைக்  கருத வேண்டி உள்ளது, ...

 #இனியாவது_உரியவர்கள்_சிந்தித்துசெயற்படட்டும் 

முபிஸால் அபூபக்கர் 

முது நிலை விரிவுரையாளர் மெய்யியல் துறை, பேராதனைப் பல்கலைக்கழகம்