பயங்கரவாதத்துடன் தொடர்பற்ற முஸ்லிம்களை கைதுசெய்து, குற்றச்சாட்டுக்களை இட்டுக்கட்டி, ஆதாரங்களைத் தேடும் கலாசாரத்திற்கு முற்றுப்புள்ளி வையுங்கள்
ஏப்ரல் 21 தொடர் தற்கொலைக் குண்டுத் தாக்குதல்களை தொடர்ந்து நாடளாவிய ரீதியில் முன்னெடுக்கப்பட்ட சிறப்பு விசாரணைகளுக்கமைய இதுவரை கைது செய்யப்பட்டோரில் 293 பயங்கரவாத சந்தேக நபர்கள் தடுத்து வைக்கப்பட்டுள்ளதாக பொலிஸ் ஊடகப் பேச்சாளர் தெரிவித்திருக்கிறார். பயங்கரவாத நடவடிக்கைகள், அந்நடவடிக்கைகளுக்கு உதவி ஒத்தாசை வழங்கியவர்கள் மற்றும் தடை செய்யப்பட்ட அமைப்புக்களின் உறுப்பினர்களாக இருந்து ஆயுதப் பயிற்சி பெற்றவர்கள் என்ற குற்றச்சாட்டுக்களின் கீழேயே இந்த 293 பேரும் கைது செய்யப்பட்டுள்ளதாக அவர் குறிப்பிட்டுள்ளார்.
எனினும் பயங்கரவாத தரப்புகளுடன் எந்தவிதத்திலும் தொடர்புபடாத பலரும் கைது செய்யப்பட்டு, தடுத்து வைக்கப்பட்டுள்ள நிலையில் அவர்களும் மேற்படி 293 பேரினுள் அடங்குகின்றனரா என்பது தெளிவுபடுத்தப்படவில்லை.
இந் நிலையில்தான் பயங்கரவாத செயற்பாடுகளுடன் தொடர்புபட்டிராதோரை இதன் பிற்பாடும் தடுத்த வைக்காது விசாரணைகளைத் துரிதப்படுத்தி உடன் விடுவிக்க வேண்டும் எனும் கோரிக்கைகள் தற்போது முன்வைக்கப்பட்டு வருகின்றன.
இது தொடர்பில் கடந்த செவ்வாய்க்கிழமை பாராளுமன்றத்தில் உரை நிகழ்த்திய ஐக்கிய தேசியக் கட்சியின் கொழும்பு மாவட்ட பாராளுமன்ற உறுப்பினர் முஜிபுர் ரஹ்மானும் வலியுறுத்தியிருந்தார்.
”பயங்கரவாத தாக்குதலுடன் சம்பந்தமில்லாத இன்னும் சிலர் சிறைகளில் இருக்கின்றனர். அவர்கள் தொடர்பான விசாரணைகளை துரிதப்படுத்தி அவர்களை சமூகத்துடன் இணைந்து வாழ சட்டமா அதிபர் திணைக்களம் நடவடிக்கை எடுக்கவேண்டும். ஏனெனில் சாட்சிகள் இல்லாமல், குற்றச்சாட்டுக்கள் இல்லாமல் ஒருவரை தடுப்புக்காவலில் வைத்திருப்பது அவரின் அடிப்படை உரிமையை மீறும் குற்றமாகும்” என முஜிபுர் ரஹ்மான் சுட்டிக்காட்டியிருந்தார்.
அதேபோன்றுதான் அண்மையில் கைது செய்யப்பட்டு தடுத்து வைக்கப்பட்டுள்ள ஜமாஅதே இஸ்லாமி அமைப்பின் முன்னாள் தலைவர் உஸ்தாத் ஹஜ்ஜுல் அக்பரை விடுவிக்க நடவடிக்கை எடுக்குமாறும் அவர் ஜனாதிபதியிடமும் பொலிஸ் ஆணைக்குழுவிடமும் குறித்த உரையில் கோரிக்கை விடுத்திருந்தார்.
”ஜமாஅத்தே இஸ்லாமி நடுநிலையான சிந்தனையை முன்வைக்க முயற்சித்த, அதற்காக சிரமம் எடுத்துக் கொண்ட ஓர் அமைப்பு. அந்த அமைப்பின் முன்னாள் தலைவரை எதுவித சாட்சிகளோ, ஆதாரமோ இன்றி எந்தப் பொறுப்புமற்ற நிலையில் கொழும்பு குற்றத்தடுப்பு பிரிவினர் நள்ளிரவில் வீட்டுக்குச் சென்று கைது செய்து இன்னும் தடுப்புக் காவலில் வைத்துள்ளனர். அவரை கைது செய்து வைத்திருப்பதானது விசேடமாக, முஸ்லிம் சமூகத்தினுள் ஒரு விரும்பத்தகாத செயலாக பதிவாகியுள்ளது. முஸ்லிம் சமூகத்தினுள் மார்க்க ரீதியான மிக உயர்ந்த அந்தஸ்த்தில் இருக்கின்ற அவரை தடுத்து வைத்திருப்பது அநீதியானதாகும். இவ்வாறு நடுநிலையான சிந்தனை கொண்ட, இஸ்லாம் மதம் பற்றிய ஒரு தெளிவை கொண்ட புத்திஜீவியை குற்றச்சாட்டுகள் அல்லது சாட்சிகள் எதுவுமின்றி கைது செய்து தடுத்து வைத்திருப்பதானது சந்தேகத்தை ஏற்படுத்துகின்றது” என அவர் தனது உரையில் சுட்டிக்காட்டியிருந்தார்.
இது இவ்வாறிருக்க, சட்டவிரோத கைதுகள் மற்றும் தடுத்துவைத்தல் என்பவற்றைத் தவிர்த்துக் கொள்வதற்காக இலங்கை மனித உரிமைகள் ஆணைக்குழு வழங்கியிருக்கும் வழிகாட்டல்களை கவனத்தில் கொண்டு செயற்படுமாறு அனைத்து பொலிஸ் உத்தியோகஸ்தர்களையும் அறிவுறுத்தும்படி பதில் பொலிஸ் மா அதிபர் சி.டி.விக்ரமரத்ன அனைத்து பொலிஸ் நிலையங்களினதும் பொறுப்பதிகாரிகளை கடிதமூலம் கடந்த வாரம் வேண்டியிருந்தார். கடந்த காலங்களில் பல சட்டவிரோத கைதுகள் இடம்பெற்று தடுத்துவைக்கப்பட்ட சம்பவங்கள் பதிவானதையடுத்து, இலங்கை மனித உரிமைகள் ஆணைக்குழு பொலிஸாருக்கு வழங்கிய சிபாரிசுகளின் அடிப்படையிலேயே பதில் பொலிஸ் மா அதிபர் மேற்படி கடிதத்தை பொலிஸ் நிலையங்களுக்கு அனுப்பியிருந்தார்.
”நம்பத்தகுந்த தகவல்கள் கிடைத்ததன் பின்பு சந்தேகத்தின் பேரிலேயே கைதுகள் இடம்பெறவேண்டும். கைது செய்யப்பட்டதன் பின்பு அந்தக் கைதினை நியாயப்படுத்துவதற்காக குற்றங்களைத் தேடிக்கண்டுபிடிக்கக் கூடாது” என மனித உரிமை ஆணைக்குழு பொலிசாருக்கு வழங்கிய தனது வழிகாட்டல்களில் தெரிவித்திருந்தது. கைதுகள் இடம்பெறும் அனைத்து சந்தர்ப்பங்களிலும் உரிய விசாரணைகள் இடம்பெற்று, அந்த விசாரணைக்கான நிரந்தர சாட்சிகள் இருக்கவேண்டியது அவசியமாகும். அன்றி ஒரு தகவலின் அடிப்படையில் மாத்திரம் கைதுகள் இடம்பெறக்கூடாது எனவும் அவ் வழிகாட்டலில் குறிப்பிடப்பட்டிருந்தது.
இருந்தபோதிலும் பொலிசார் இவற்றைக் கருத்திற் கொண்டு செயற்படுகிறார்களா எனும் கேள்வியே உஸ்தாத் ஹஜ்ஜுல் அக்பரின் கைது விவகாரத்தில் எழுகிறது. இதுபோன்ற கைதுகள் இதன்பிற்பாடும் நடைபெற இடமளிக்க முடியாது. டாக்டர் ஷாபியைக் கைது செய்து மூக்குடைபட்டது போன்று இன்னுமின்னும் பயங்கரவாதத்துடன் எந்தவித சம்பந்தமுமற்ற முஸ்லிம் புத்திஜீவிகளையும் நடுநிலையாளர்களையும் கைது செய்து பின்னர் குற்றச்சாட்டுக்களை இட்டுக் கட்டி அதற்கு ஆதாரங்களைத் தேடுகின்ற கலாசாரத்திற்கு முற்றுப்புள்ளி வைக்கப்பட வேண்டும்.
இதற்காக சகலரும் முன்வந்து குரல் கொடுக்க வேண்டும், செயற்பட வேண்டும் என வலியுறுத்த விரும்புகிறோம்.
vidivelli
Post a Comment