முஸ்லிம் பெண் பரீட்சார்த்திகள், எந்த உடையணிய வேண்டும்..? முக்கிய தீர்மானம் எடுக்கப்படவுள்ளது
அரசாங்க பரீட்சைகளுக்குத் தோற்றும் முஸ்லிம் பெண் பரீட்சார்த்திகளுக்கான உடை எவ்வாறு அமையவேண்டும் என்பது தொடர்பில் ஆராய்ந்து அந்த உடையை கல்வி அமைச்சின் சுற்று நிருபத்தில் உள்ளடக்கிக் கொள்வதற்கு முஸ்லிம் கல்வி மாநாடு, சிவில் சமூக அமைப்புகள், அகில இலங்கை ஜம்இய்யத்துல் உலமா சபை, ஸ்ரீலங்கா முஸ்லிம் கவுன்ஸில் என்பன திட்டமிட்டுள்ளன. கடந்த காலங்களில் பரீட்சைகளுக்குத் தோற்றிய
முஸ்லிம் மாணவிகள் சிலர், அவர்களது ஆடை தொடர்பில் பரீட்சை மண்டப அதிகாரிகளால் அசௌகரியங்களுக்குள்ளாக்கப்பட்டனர். நிகாப் அணிந்து சென்ற மாணவிகள் மற்றும் சில இடங்களில் அபாயாவுக்கும் மறுப்புத் தெரிவிக்கப்பட்டது. இதற்கு ஒரு தீர்வு பெற்றுக்கொள்வதற்காகவே பரீட்சைகளுக்குத் தோற்றும் முஸ்லிம் மாணவிகளின் ஆடை எவ்வாறு அமைய வேண்டுமெனத் தீர்மானிக்கப்படவுள்ளது.
இது தொடர்பான கூட்டமொன்று எதிர்வரும் சனிக்கிழமை காலை 9 மணிக்கு வெள்ளவத்தை– இஸ்லாமிய கற்கை நிலைய மண்டபத்தில் நடைபெறவுள்ளது. ஸ்ரீலங்கா முஸ்லிம் கவுன்ஸிலின் தலைவர் என்.எம். அமீன் தலைமையில் நடைபெறும் இக்கூட்டத்தில் முஸ்லிம் கல்வி மாநாட்டின் தலைவர் பேராசிரியர் ஏ.ஜி.ஹுசைன் இஸ்மாயில், முன்னாள் பரீட்சை ஆணையாளர் ஏ.எஸ்.மொஹமட் ஆகியோர் கருத்துகளை வழங்கவுள்ளனர்.
அகில இலங்கை ஜம்இய்யத்துல் உலமா சபையின் பிரதிநிதிகளும் கருத்துகளை முன்வைக்கவுள்ளனர். இக்கூட்டத்தில் பரீட்சை எழுதும் முஸ்லிம் மாணவிகள் இஸ்லாமிய கலாசாரத்துக்கு உட்பட்ட எவ்வாறான ஆடை அணியவேண்டும் என்ற தீர்மானம் ஒன்று எட்டப்படவுள்ளது.
தீர்மானிக்கப்படும் ஆடை கல்வியமைச்சின் அங்கீகாரம் பெறப்பட்டு சுற்றுநிருபம் மூலம் பரீட்சைத் திணக்களத்துக்கு அனுப்பி வைக்கப்படுமெனவும், பரீட்சைத் திணைக்களம் மூலம் பரீட்சை மண்டபங்களின் அதிகாரிகளுக்கு அனுப்பப்படுமெனவும் ஸ்ரீலங்கா முஸ்லிம் கவுன்ஸிலின் தலைவர் என்.எம்.அமீன் தெரிவித்தார்.
முஸ்லிம் மாணவிகள் பரீட்சை எழுதுவதற்கு செல்லும்போது பரீட்சை மண்டப அதிகாரிகளால் அசௌகரியங்களுக்கு உள்ளாக்கப்படுவது இதன் மூலம் நிவர்த்திக்கப்படுமெனவும் அவர் கூறினார்.
-Vidivelli
நல்ல முயற்சி, பரீட்சை எழுதுவோரின் ஆளடையாளம் அறியும் வண்ணமான உடையை சிபாரசு செய்வது முயற்சி வெற்றி பெற உதவியாக அமையும். முடியாதவர்கள் இறைவனை அஞ்சியவர்களாக வீட்டோடு இருந்து கொள்ளலாம்.
ReplyDeleteகிழக்கு மாகாண பெண்மாணவிகள் அணியும் பர்தா ஆடையே பொருத்தமானது.மேலுள்ள புகைப்படத்திலுள்ளதைப் போன்று மாற்றம் செய்யத் தேவையில்லை.ஆரம்பமாக பர்தா அமைப்பிலான ஆடையை கல்வி அமைச்சராகவிருந்த பதியுதீன் மஹ்மூத் அவர்களின் மகள் அணிந்து பாடசாலை சென்றதாகவும் அதனை ஏனைய மாணவிகள் கிண்டல் செயத்தாகவும் அதை அவர் தந்தையிடம் முறையிட அவர் இனி முஸ்லிம் மாணவிகள் இதே உடை அணிந்துதான் பாடசாலை வருவார்கள் எனக்கூறி அதை அறிமுக்படுத்தியதாகவும் ஒரு செய்தி கேள்விப்பட்டதுண்டு.
ReplyDelete