158 கோடி ரூபா நிதி இழப்பு - முன்னாள் ஆணையாளர் வசமாக மாட்டினார்

அரசுக்கு 158 கோடி ரூபாவுக்கும் அதிக நிதி இழப்பை ஏற்படுத்தி ஊழல் புரிந்த குற்றச்சாட்டின் பேரில், காணி உரித்து நிர்ணய திணைக்களத்தின் முன்னாள் ஆணையாளர் (விசாரணை) ஒருவர் இன்று (29) லஞ்ச ஊழல் ஒழிப்பு ஆணைக்குழுவின் அதிகாரிகளால் கைது செய்யப்பட்டுள்ளார்.

சந்தேகநபர்  காணி உரித்து நிர்ணய திணைக்களத்தின் விசாரணை ஆணையாளராகப் பணியாற்றிய காலத்தில், தனது அதிகாரத்தைத் தவறாகப் பயன்படுத்தி, நிறுவனத்தின் உத்தியோகபூர்வ கடிதத் தலைப்பைப் பயன்படுத்தி, முறையற்ற விசாரணை இலக்கத்தின் கீழ் அறிக்கை ஒன்றை வெளியிட்டுள்ளதாகத் தெரிவிக்கப்படுகிறது.

குறித்த விசாரணை அறிக்கையின் மூலம், பொரளை எலியட் வீதியில் அமைந்துள்ள 1.0982 ஹெக்டேயர் பரப்பளவை  கொண்ட 158 கோடியே 60 லட்சம் ரூபாய் பெறுமதியான அரச காணியை, தனியாருக்கு சொந்தமான காணி என சித்தரித்துள்ளார்.

இதன் மூலம் அரசுக்கு பாரிய இழப்பை ஏற்படுத்தி, வேறு ஒரு தரப்புக்கு நியாயமற்ற நன்மையை வழங்கியதாக அவர் மீது குற்றஞ்சாட்டப்பட்டுள்ளது.

கைது செய்யப்பட்ட சந்தேகநபர் கொழும்பு பிரதான நீதவான் நீதிமன்றத்தில் ஆஜர்படுத்தப்படவுள்ளார்.