காதை அறுத்துக் கொள்வேன் - அரசாங்கத்திற்கு கபீர் விடுத்துள்ள சவால்

2025 வரவுசெலவுத் திட்டத்தில் முன்மொழியப்பட்டபடி, இந்த ஆண்டுக்குள் சிறு மற்றும் நடுத்தர நிறுவனங்களுக்கான (SMEs) அரச மேம்பாட்டு வங்கியை அரசாங்கத்தால் நிறுவ முடிந்தால், தனது காதை அறுத்துக் கொள்வேன் என்று எதிர்க்கட்சி பாராளுமன்ற உறுப்பினர் கபீர் ஹாஷிம் பாராளுமன்றத்தில் சவால் விடுத்தார். 

இன்று பாராளுமன்றத்தில் உரையாற்றிய எம்.பி. ஹாஷிம், குறித்த அரச மேம்பாட்டு வங்கி குறித்து எந்த நுணுக்கமான விவரங்களையும் அரசாங்கம் குறிப்பிடவில்லை என்றும், அரசாங்கத்திடம் தேவையான நிதி இருக்கிறதா என்றும், இது தொடர்பாக எடுக்கப்பட்ட நடவடிக்கைகள் என்ன என்றும் மேலும் கேள்வி எழுப்பினார்.

"இந்த வருடத்திற்குள் அரசாங்க மேமபாட்டு வங்கி நிறுவப்பட்டால், நான் என் காதை அறுத்துக்கொள்வேன்" என்று அவர் கூறினார்.

பாராளுமன்ற உறுப்பினர் ஹாஷிமின் சவாலுக்கு பதிலளித்த அமைச்சர் சுனில் ஹந்துன்னெத்தி, வங்கி தொடர்பான தேவையான பணிகளை அரசாங்கம் ஏற்கனவே தொடங்கியுள்ளதால், எதிர்க்கட்சி பாராளுமன்ற உறுப்பினர் தனது நாக்கை வெட்ட வேண்டியிருக்கும் என்று கூறினார். 

முன்மொழியப்பட்ட தேசிய மேம்பாட்டு வங்கிக்கு ரூ. 50 பில்லியன் நிதிக்காக மூன்று அரச வங்கிகளுடன் ஏற்கனவே பேச்சுவார்த்தைகள் நடைபெற்று வருவதாக அமைச்சர் சுனில் ஹந்துன்னெத்தி தெரிவித்தார்.

மேலும், முதற்கட்ட நடவடிக்கையாக, ஒரு பிராந்திய வங்கி 15,000 விவசாயிகளை சாத்தியமான பயனாளிகளாக அடையாளம் கண்டுள்ளது என்றும், மேம்பாட்டு வங்கியை அமைப்பது தொடர்பான பணிகள் ஏற்கனவே நடைபெற்று வருவதை உறுதிப்படுத்துவதாகவும் அவர் கூறினார். 

சிறு மற்றும் நடுத்தர நிறுவனங்களின் (SMEs) நலனுக்காக ஒரு தேசிய மேம்பாட்டு வங்கி நிறுவப்படும் என்று ஜனாதிபதி அனுர குமார திசாநாயக்க அறிவித்ததை அடுத்து, பாராளுமன்ற உறுப்பினர் கபீர் ஹாஷிம் கவனம் எழுப்பினார்.

திங்களன்று 2025 ஆம் ஆண்டுக்கான வரவு செலவுத் திட்டங்களை முன்வைத்து உரையாற்றிய ஜனாதிபதி, தற்போதுள்ள அரச வங்கி முறையின் கீழ் தேசிய மேம்பாட்டு வங்கி அமைக்கப்படும் என்றும் கூறினார்.