பொலிஸார் அராஜகம், அரசாங்கம் வேடிக்கை, போராட்டத்திற்கு தயாராகும் முஸ்லிம்கள்

கொழும்பில் சுமார் 175 பள்ளிவாசல்களை அங்கத்துவமாக கொண்டுள்ள பள்ளிவாசல்கள் சம்மேளனம் வீதியில் இறங்கி போராடப் போவதாக எச்சரிக்கை விடுத்துள்ளது.

கொழும்பு முஸ்லிம் பள்ளிவாசல்கள் சம்மேளனத்திற்கும், முஸ்லிம் அரசியல்வாதிகளுக்கும் இடையில் புதன்கிழமை இரவு நடைபெற்ற உயர்மட்ட கலந்துரையாடலின் போதே இந்த எச்சரிக்கை விடுக்கப்பட்டுள்ளது.

முஸ்லிம்கள் நோன்பு இருந்தும், குனூத் ஓதியும் மகிந்த அரசாங்கத்தை விரட்டியடித்து, நல்லாட்சி அரசாங்கத்தை கொண்டுவருவதில் முக்கிய பங்காற்றியிருந்தனர்.

இருந்தபோதும் தெஹி­வளை பாத்யா  மாவத்தை  பள்­ளி­வாசல் விவகாரத்தில் பொலிஸார் சட்டததை நிலைநாட்டாமல் இனவாதிகளுக்கு சார்பாக செயற்பட்டு, குறித்த பள்ளிவாசலின் விஸ்த்தரிப்பு பணிக்கு தடையேற்படுத்தியுள்ளனர்.

பொலிஸாரின் இந்த அராஜகப் போக்கு குறித்து, நல்லாட்சி அரசாங்கத்திற்கு அறிவித்தும் இதுவரை பள்ளிவாசல் விஸ்த்தரிப்பு பணிக்கு பொலிஸார் அனுமதியளிக்கவில்லை.

இந்நிலையில்அமைச்சர்கள் ஹலீம், றிசாத், கபீர் காசிம், பைஸர் முஸ்தபா ஆகியோரையும் பாராளுமன்ற உறுப்பினர்களான முஜீபுர் ரஹ்மான் மற்றும் மரைக்கார் ஆகியோரை கொழும்பு பள்ளிவாசல்கள் சம்மேளனம் சந்தித்து கலந்துரையாடல்களில் ஈடுபட்டது.

இதன்போது தெஹி­வளை பாத்யா  மாவத்தை  பள்­ளி­வாசல் விஸ்த்தரிப்பு பணிக்கு உடனடியாக அனுமதியளிக்க வேண்டுமெனவும், நல்லாட்சி அரசாங்கம் வேடிக்கை பார்ப்பதை நிறுத்திவிட்டு, பள்ளிவாசலை விஸ்த்தரிக்க முஸ்லிம்களுக்கு உள்ள உரிமையை உறுதிப்படுத்த வேண்டுமெனவும் இல்லையேல் பொலிஸாரின் அராஜகம் மற்றும் நல்லாட்சி அரசாங்கத்திற்கு எதிராக 175 பள்ளிவாசல்கள் மஹல்லாவாசிகளையும் இணைத்துக்கொண்டு வீதியில் இறங்கி போராட்டத்தில் ஈடுபடுவதெனவும் தீர்மானிக்கப்பட்டுள்ளது.