பசுவை கொல்பவர்கள் யாராக இருந்தாலும், அவர்கள் இந்தியாவின் மிகப்பெரிய எதிரி

பசு வதை செய்பவர்களுக்கு இந்தியாவில் வாழ உரிமை இல்லை என்று  உத்தரகாண்ட மாநில முதல்வர் ஹரிஷ் ராவத் தெரிவித்துள்ளார்.

பசு இறைச்சி, பசுவதை தொடர்பாக பேசுகையில் சர்ச்சைக்குரிய கருத்தை காங்கிரஸ் கட்சியை சேர்ந்த உத்தரகாண்ட் மாநில முதல்வர் ஹரிஷ் ராவத் தெரிவித்துள்ளார்.

ஹரித்துவாரில் நடைபெற்ற நிகழ்ச்சியில் கலந்துகொண்டு அவர் பேசியதாவது: பசுவை கொல்பவர்களுக்கு இந்தியாவில் வாழஉரிமை கிடையாது என்றார். பசுவை கொள்பவர்கள் யாராக இருந்தாலும், எந்த சமூகத்தை சேர்ந்தவர்களாக இருப்பினும், அவர்கள் இந்தியாவின் மிகப்பெரிய எதிரி, அவர்களுக்கு நாட்டில் வாழ உரிமை இல்லை என்றார். 

உத்தரகாண்ட் மாநிலத்தில் பசுவை கொல்பவர்களை சட்டம் பார்த்துக் கொள்ளும். மேலும் பசுக்களை பாதுகாக்க மாநில அரசு எதையும் செய்யும் என்றும் கூறினார்.

தன்னுடைய அரசில், பசுக்கள் கொல்லப்படுவதற்கு எதிராக சில பரிந்துரைகளை தான் தாக்கல் செய்ததாகவும், நாட்டில் முதல்முறையாக உத்தரகாண்ட் மாநிலம் மட்டுமே பசுக்களுக்கு கொட்டகை அமைத்து, தீவணமும் வழங்கிவருகிறது என்றும் கூறினார்.

உத்தரபிரதேச மாநிலம் தாத்ரி என்னும் இடம் அருகே மாட்டிறைச்சியை சமைத்து சாப்பிட்டதாக கூறி இக்லாக் என்பவர் கிராமவாசிகளால் அடித்துக் கொல்லப்பட்டார். இச்சம்பவம் நாடு முழுவதும் பெரும் அதிர்வலையை உருவாக்கியது. இதனையடுத்து நாட்டில் சகிப்புத்தன்மையின்மை பெருகிவருவதாக காங்கிரஸ் குற்றம் சாட்டியது. 

இவ்விவகாரம் தொடர்பான நிகழ்வுகளுக்கு காங்கிரஸ் கட்சி எதிர்ப்பு தெரிவித்து வருகிறது. இந்த நிலையில் காங்கிரஸ் கட்சியின் நிலைப்பாட்டிற்கு மாறாக உத்தரகாண்ட் மாநில முதல்வர் ஹரிஷ் ராவத் கருத்து அமைந்துள்ளது.