புத்தளத்திற்கு தேசியப் பட்டியல், வரவேற்கப்பட வேண்டியது - NM. அமீன்

ஐக்கிய தேசிய கட்சி மூலமாக அகில இலங்கை மக்கள் காங்கிரஸுக்கு கிடைத்த தேசியப்பட்டியலை, கடந்த பல வருடங்களாக பாராளுமன்ற பிரதிநிதித்துவம் இல்லாமலிருந்த புத்தளத்திற்கு வழங்கப்பட்டமை வரவேற்கத்தக்கதென முஸ்லிம் கவுன்சில் தலைவர் என்.எம்.அமீன் தெரிவித்தார்.

அவர் மேலும் குறிப்பிடுகையில்,

வடக்கிலிருந்து புலிகளினால் இனச்சுத்திகரிப்பு செய்யப்பட்டு புத்தளத்தில் வாழ்ந்துவரும் வடக்கு முஸ்லிம்கள் புத்தளத்திலுள்ள வளங்களை சுரண்டுவதாக குற்றம் சுமத்தப்பட்டிருந்தது. இவ்வாறான நிலையில்தான் அகில இலங்கை மக்கள் காங்கிரசுக்கு கிடைத்துள்ள தேசியப் பட்டியல் எம்.பி. பதவி புத்தளத்திற்கு வழங்கப்பட்டுள்ளது. றிசாத் பதியுதீன் மேற்கொண்ட இத்தீர்மானம் வரவேற்கப்பட வேண்டியது.

உடுத்த உடையுடன், திக்கற்று நின்ற வடக்கு முஸ்லிம்களை அதிகளவில் அரவணைத்து, உபசரித்த பெருமை புத்தளம் முஸ்லிம்களை சாரும்.

புத்தளம் மாவட்டத்திலிருந்து 2 முஸ்லிம் பாராளுமன்ற உறுப்பினர்கள் தெரிவாகும் அளவுக்கு அம்மாவட்டத்தில் முஸ்லிம் வாக்காளர்கள் உள்ளனர். இருந்தபோதும் துரதிஷ்டவசமாக கடந்த பல வருடங்களாக முஸ்லிம் பிரதிநிதித்துவம் கிடைக்காமலே இருந்துவந்துள்ளது. அந்த கவலை தற்போது தீர்க்கபட்டுள்ளது.

இவ்வாறான நிலையில் புத்தளம் முஸ்லிம்களும், புத்தளத்தில் வாழும் வடக்கு முஸ்லிம்களும் கடந்த கால பகையுணர்வுகளை மறந்து வாழ்வதற்கான அரியசந்தர்ப்மாக இதனை பயன்படுத்தி எதிர்காலத்திண் இருதரப்பு பிரதேச மக்களின் ஒத்துழைப்புடன் தமக்கான பாராளுமன்ற பிரதிநிதித்துவங்களை உறுதிசெய்ய முன்வர வேண்டும் எனவும் என்.எம்.அமீன் மேலும் கூறினார்.